Евангелие от Луки

Евангелие от Луки

От Луки святое благовествование

Глава 1.

Зачало 1.

1 Понеже убо мнози начаша чинити повесть о извествованных в нас вещех,
2 якоже предаша нам, иже исперва самовидцы и слуги бывшии словесе:
3 изволися и мне последовавшу выше вся испытно, поряду писати тебе, державный феофиле,
4 да разумееши, о нихже научился еси словесехъ утверждение.
5 (Зачало 2) Бысть во дни ирода царя иудейска, иерей некий, именем захариа, от дневныя чреды авиани: и жена его от дщерей аароновех, и имя ей елисавет.
6 Беста же праведна оба пред богом, ходяща во всех заповедех и оправданиих господнихъ безпорочна.
7 И не бе има чада, понеже елисавет бе неплоды, и оба заматоревша во днех своихъ беста.
8 Бысть же служащу ему в чину чреды своея пред богом,
9 по обычаю священничества ключися ему покадити, вшедшу в церковь господню:
10 и все множество людей бе молитву дея вне, в год [во время] фимиама:
11 явися же ему ангел господень, стоя одесную олтаря кадилнаго:
12 и смутися захариа видев, и страх нападе нань.
13 Рече же к нему ангел: не бойся, захарие: зане услышана бысть молитва твоя, и жена твоя елисаветь родит сына тебе, и наречеши имя ему иоанн.
14 И будет тебе радость и веселие, и мнози о рождестве его возрадуются.
15 Будет бо велий пред господем: и вина и сикера не имать пити, и духа святаго исполнится еще из чрева матере своея:
16 и многих от сынов израилевых обратит ко господу богу их.
17 И той предыдет пред ним духом и силою илииною, обратити сердца отцем на чада, и противныя в мудрости праведных, уготовати господеви люди совершены.
18 И рече захариа ко ангелу: по чесому разумею сие? аз бо есмь стар, и жена моя заматоревши во днех своих.
19 И отвещав ангел рече ему: аз есмь гавриил предстояй пред богом, и послан есмь глаголати к тебе и благовестити тебе сия:
20 и се будеши молчя и не могий проглаголати, до негоже дне будут сия: зане не веровал еси словесем моим, яже сбудутся во время свое.
21 И беша людие ждуще захарию: и чудяхуся коснящу ему в церкви.
22 Изшед же не можаше глаголати к ним: и разумеша, яко видение виде в церкви: и той бе помавая им, и пребываше нем.
23 И бысть яко исполнишася дние службы его, иде в дом свой.
24 (Зачало 3) По сих же днех зачат елисаветъ жена его, и таяшеся месяц пять, глаголющи:
25 яко тако мне сотвори господь во дни, в няже призре отяти поношение мое в человецех.
26 В месяц же шестый послан бысть ангелъ гавриил от бога во град галилейский, емуже имя назарет,
27 к деве обрученней мужеви, емуже имя иосиф, от дому давидова: и имя деве мариамь.
28 И вшед к ней ангел рече: радуйся, благодатная: господь с тобою: благословена ты в женах.
29 она же видевши смутися о словеси его и помышляше, каково будет целование сие.
30 И рече ангел ей: не бойся, мариамь: обрела бо еси благодать у бога.
31 И се зачнеши во чреве, и родиши сына, и наречеши имя ему иисус.
32 Сей будет велий, и сын вышняго наречется: и даст ему господь бог престол давида отца его:
33 и воцарится в дому иаковли во веки, и царствию его не будет конца.
34 Рече же мариамь ко ангелу: како будет сие, идеже мужа не знаю?
35 И отвещав ангел рече ей: дух святый найдет на тя, и сила вышняго осенит тя: темже и раждаемое свято наречется сын божий:
36 и се, елисавет южика твоя, и та зачатъ сына в старости своей: и сей месяц шестый есть ей нарицаемей неплоды:
37 яко не изнеможет у бога всяк глагол.
38 Рече же мариамь: се раба господня: буди мне по глаголу твоему. И отиде от нея ангел.
39 (Зачало 4) Воставши же мариамь во дни тыя, иде в горняя со тщанием, во град иудов:
40 и вниде в дом захариин, и целова елисавет.
41 И бысть яко услыша елисавет целование мариино, взыграся младенец во чреве ея: и исполнися духа свята елисавет,
42 и возопи гласом велиим, и рече: благословена ты в женах, и благословен плод чрева твоего:
43 и откуду мне сие, да приидет мати господа моего ко мне?
44 се бо, яко бысть глас целования твоего во ушию моею, взыграся младенец радощами во чреве моем.
45 И блаженна веровавшая, яко будет совершение глаголанным ей от господа.
46 И рече мариамь: величит душа моя господа,
47 и возрадовася дух мой о бозе спасе моем:
48 яко призре на смирение рабы своея: се бо, отныне ублажат мя вси роди:
49 яко сотвори мне величие сильный, и свято имя его:
50 и милость его в роды родов боящимся его:
51 сотвори державу мышцею своею: расточи гордыя мыслию сердца их:
52 низложи сильныя со престол, и вознесе смиренныя:
53 алчущия исполни благ, и богатящияся отпусти тщи.
54 Восприят израиля отрока своего, помянути милости,
55 якоже глагола ко отцем нашим, аврааму и семени его до века.
56 Пребысть же мариамь с нею яко три месяцы и возвратися в дом свой.
57 елисавети же исполнися время родити ей, и роди сына.
58 И слышаша окрест живущии и ужики ея, яко возвеличил есть господь милость свою съ нею: и радовахуся с нею.
59 И бысть во осмый день, приидоша обрезати отроча, и нарицаху е именем отца его, захарию.
60 И отвещавши мати его рече: ни, но да наречется иоанн.
61 И реша к ней, яко никтоже есть въ родстве твоем, иже нарицается именем тем.
62 И помаваху отцу его, еже како бы хотел нарещи е.
63 И испрошь дщицу, написа, глаголя: иоаннъ будет имя ему. И чудяхуся вси.
64 отверзошася же уста его абие и языкъ его, и глаголаше, благословя бога.
65 И бысть на всех страх живущих окрестъ их: и во всей стране иудейстей поведаеми бяху вси глаголи сии.
66 И положиша вси слышавшии в сердце своем, глаголюще: что убо отроча сие будетъ? И рука господня бе с ним.
67 И захариа отец его исполнися духа свята, и пророчествова, глаголя:
68 благословен господь бог израилев, яко посети и сотвори избавление людем своим:
69 и воздвиже рог спасния нам, в дому давида отрока своего:
70 якоже глагола усты святых сущих от века пророк его,
71 спасние от враг наших и из руки всехъ ненавидящих нас:
72 сотворити милость со отцы нашими и помянути завет святый свой,
73 клятву, еюже клятся ко аврааму отцу нашему, дати нам,
74 без страха, из руки враг наших избавльшимся,
75 служити ему преподобием и правдою предъ ним вся дни живота нашего.
76 И ты, отроча, пророк вышняго наречешися: предыдеши бо пред лицем господним, уготовати пути его,
77 дати разум спасния людем его, во оставление грех их,
78 милосердия ради милости бога нашего, в нихже посетил есть нас восток свыше,
79 просветити во тме и сени смертней седящия, направити ноги наша на путь мирен.
80 отроча же растяше и крепляшеся духом: и бе в пустынех до дне явления своего ко израилю.

 

Глава 2.

Зачало 5.

1 Бысть же во дни тыя, изыде повеление от кесаря августа написати всю вселенную.
2 Сие написание первое бысть владящу сириею киринию.
3 И идяху вси написатися, кождо во свой град.
4 Взыде же и иосиф от галилеи, из града назарета, во иудею, во град давидов, иже нарицается вифлеем, зане быти ему от дому и отечества давидова,
5 написатися с мариею обрученою ему женою, сущею непраздною.
6 Бысть же, егда быста тамо, исполнишася дние родити ей:
7 и роди сына своего первенца, и повит его, и положи его в яслех: зане не бе имъ места во обители.
8 И пастырие беху в тойже стране, бдяще и стрегуще стражу нощную о стаде своем.
9 И се ангел господень ста в них, и слава господня осия их: и убояшася страхом велиим.
10 И рече им ангел: не бойтеся: се бо благовествую вам радость велию, яже будет всем людем:
11 яко родися вам днесь спас, иже есть христос господь, во граде давидове:
12 и се вам знамение: обрящете младенца повита, лежаща в яслех.
13 И внезапу бысть со ангелом множество вой небесных, хвалящих бога и глаголющих:
14 слава в вышних богу, и на земли мир, во человецех благоволение.
15 И бысть, яко отидоша от них на небо ангели, и человецы пастырие реша друг ко другу: прейдем до вифлеема и видим глаголъ сей бывший, егоже господь сказа нам.
16 И приидоша поспешшеся, и обретоша мариамь же и иосифа, и младенца лежаща во яслех.
17 Видевше же сказаша о глаголе глаголаннемъ им о отрочати сем.
18 И вси слышавшии дивишася о глаголанных от пастырей к ним.
19 мариамь же соблюдаше вся глаголы сия, слагающи в сердцы своем.
20 (Зачало 6) И возвратишася пастырие, славяще и хваляще бога о всех, яже слышаша и видеша, якоже глаголано бысть к ним.
21 И егда исполнишася осмь дний, да обрежутъ его, и нарекоша имя ему иисус, нареченное ангелом прежде даже не зачатся во чреве.
22 И егда исполнишася дние очищения ею, по закону моисеову, (Зачало 7) вознесоста его во иерусалим, поставити его пред господем,
23 якоже есть писано в законе господни: яко всяк младенец мужеска полу, разверзая ложесна, свято господеви наречется:
24 и еже дати жертву, по реченному в законе господни, два горличища или два птенца голубина.
25 (Зачало 8) И се, бе человек во иерусалиме, емуже имя симеон: и человек сей праведенъ и благочистив, чая утехи израилевы: и духъ бе свят в нем.
26 И бе ему обещано духом святым, не видети смерти, прежде даже не видит христа господня.
27 И прииде духом в церковь. И егда введоста родителя отроча иисуса, сотворити има по обычаю законному о нем,
28 и той прием его на руку своею, и благослови бога, и рече:
29 ныне отпущаеши раба твоего, владыко, по глаголу твоему, с миром:
30 яко видесте очи мои спасние твое,
31 еже еси уготовал пред лицем всехъ людей:
32 свет во откровение языком, и славу людей твоих израиля.
33 И бе иосиф и мати его чудящася о глаголемыхъ о нем.
34 И благослови я симеон, и рече к марии матери его: се лежит сей на падение и на востание многим во израили, и в знамение пререкаемо:
35 и тебе же самой душу пройдет оружие: яко да открыются от многих сердец помышления.
36 И бе анна пророчица, дщи фануилева, от колена асирова: сия заматоревши во днех мнозех, живши с мужем седмь лет от девства своего:
37 и та вдова яко лет осмьдесят и четыре, яже не отхождаше от церкве, постом и молитвами служащи день и нощь.
38 И та в той час приставши исповедашеся господеви, и глаголаше о нем всем чающим избавления во иерусалиме.
39 И яко скончашася вся по закону господню, возвратишася в галилею, во град свой назарет.
40 отроча же растяше и крепляшеся духом, исполняяся премудрости: и благодать божия бе на нем.
41 И хождаста родителя его на всяко лето во иерусалим в праздник пасхи.
42 И егда бысть двоюнадесяти лету, восходящимъ им во иерусалим по обычаю праздника,
43 и скончавшим дни, и возвращающимся им, оста отрок иисус во иерусалиме: и не разуме иосиф и мати его:
44 мневша же его в дружине суща, преидоста дне путь, и искаста его во сродницех и в знаемых:
45 и не обретша его, возвратистася во иерусалим, взыскающа его.
46 И бысть по триех днех, обретоста его в церкви, седящаго посреде учителей, и послушающаго их, и вопрошающаго их:
47 ужасахуся же вси послушающии его о разуме и о ответех его.
48 И видевша его, дивистася: и к нему мати его рече: чадо, что сотвори нама тако? се отец твой и аз боляща искахома тебе.
49 И рече к нима: что яко искаста мене? не веста ли, яко в тех, яже отца моего, достоит быти ми?
50 И та не разуместа глагола, егоже глагола има.
51 И сниде с нима, и прииде в назарет: и бе повинуяся има. И мати его соблюдаше вся глаголы сия в сердцы своем.
52 И иисус преспеваше премудростию и возрастомъ и благодатию у бога и человек.

 

Глава 3.

Зачало 9.

1 В пятое же надесяте лето владычества тивериа кесаря, обладающу понтийскому пилату иудеею, и четвертовластвующу галилеею ироду, филиппу же брату его четвертовластвующу итуреею и трахонитскою страною, и лисанию авилиниею четвертовластвующу,
2 при архиереи анне и каиафе, бысть глаголъ божий ко иоанну захариину сыну в пустыни.
3 И прииде во всю страну иорданскую, проповедая крещение покаяния во оставление грехов:
4 якоже есть писано в книзе словес исаии пророка, глаголюща: глас вопиющаго в пустыни: уготовайте путь господень: правы творите стези его:
5 всяка дебрь исполнится, и всяка гора и холмъ смирится: и будут стропотная в правая, и острии в пути гладки:
6 и узрит всяка плоть спасние божие.
7 Глаголаше же исходящим народом креститися от него: порождения ехиднова, кто сказа вам бежати от грядущаго гнева?
8 Сотворите убо плоды достоины покаяния: и не начинайте глаголати в себе: отца имамы авраама: глаголю бо вам, яко может бог от камения сего воздвигнути чада аврааму.
9 уже бо и секира при корени древа лежит: всяко убо древо, не творящее плода добра, посекается и во огнь вметается.
10 И вопрошаху его народи, глаголюще: что убо сотворимъ?
11 отвещав же глагола им: имеяй две ризе, да подаст не имущему: и имеяй брашна, такожде да творит.
12 Приидоша же и мытари креститися от него, и реша к нему: учителю, что сотворимъ?
13 он же рече к ним: ничтоже более от повеленнаго вам творите.
14 Вопрошаху же его и воини, глаголюще: и мы что сотворимъ? И рече к ним: ни когоже обидите, ни оклеветавайте: и доволни будите оброки вашими.
15 Чающим же людем, и помышляющим всем въ сердцах своих о иоанне, еда той есть христос,
16 отвещаваше иоанн всем, глаголя: азъ убо водою крещаю вы: грядет же креплий мене, емуже несмь достоин отрешити ремень сапогу его: той вы крестит духом святымъ и огнем:
17 емуже лопата в руку его, и отребитъ гумно свое, и соберет пшеницу в житницу свою, плевы же сожжет огнем негасающим.
18 Многа же убо и ина, утешая благовествоваше людем.
19 (Зачало 10) Ирод же четвертовластник, обличаемъ от него о иродиаде жене брата своего, и о всех, яже сотвори злая ирод,
20 приложи и сие над всеми, и затвори иоанна в темнице.
21 Бысть же егда крестишася вси людие, и иисусу крещшуся и молящуся, отверзеся небо,
22 и сниде дух святый телесным образом, яко голубь, нань: и глас с небесе бысть, глаголя: ты еси сын мой возлюбленный, о тебе благоволих.
23 (Зачало 11) И той бе иисус яко лет тридесять начиная, сый, яко мнимь, сын иосифов, илиев,
24 матфатов, левиин, мелхиин, ианнаев, иосифов,
25 маттафиев, амосов, наумов, еслимов, наггеов,
26 маафов, маттафиев, семеиев, иосифов, иудин,
27 иоаннанов, рисаев, зоровавелев, салафиилев, нириев,
28 мелхиев, аддиев, косамов, елмодамов, иров,
29 иосиев, елиезеров, иоримов, матфатов, левиин,
30 симеонов, иудин, иосифов, ионанов, елиакимов,
31 мелеаев, маинанов, маттафаев, нафанов, давидов,
32 иессеов, овидов, воозов, салмонов, наассонов,
33 аминадавов, арамов, есромов, фаресов, иудин,
34 иаковль, исааков, авраамов, фарин, нахоров,
35 серухов, рагавов, фалеков, еверов, саланов,
36 каинанов, арфаксадов, симов, ноев, ламехов,
37 мафусалев, енохов, иаредов, малелеилов, каинанов,
38 еносов, сифов, адамов, божий.

 

Глава 4.

Зачало 12.

1 Иисус же исполнь духа свята возвратися от иордана: и ведяшеся духом в пустыню,
2 дний четыридесять искушаемь от диавола: и не яст ничесоже во дни тыя: и скончавшимся им, последи взалка.
3 И рече ему диавол: аще сын еси божий, рцы каменеви сему, да будет хлеб.
4 И отвеща иисус к нему, глаголя: писано есть, яко не о хлебе едином жив будетъ человек, но о всяком глаголе божии.
5 И возвед его диавол на гору высоку, показа ему вся царствия вселенныя в часе [черте] временне.
6 И рече ему диавол: тебе дам власть сию всю и славу их: яко мне предана есть, и, емуже аще хощу, дам ю:
7 ты убо аще поклонишися предо мною, будутъ тебе вся.
8 И отвещав рече ему иисус: иди за мною, сатано писано есть: поклонишися господу богу твоему, и тому единому послужиши.
9 И веде его во иерусалим, и постави его на криле церковнем, и рече ему: аще сынъ еси божий, верзися отсюду долу:
10 писано бо есть, яко ангелом своимъ заповесть о тебе сохранити тя:
11 и на руках возмут тя, да не когда преткнеши о камень ногу твою.
12 И отвещав рече ему иисус, яко речено есть: не искусиши господа бога твоего.
13 И скончав все искушение диавол, отиде от него до времене.
14 И возвратися иисус в силе духовней в галилею: и весть изыде по всей стране о нем.
15 И той учаше на сонмищих их, славимъ всеми.
16 (Зачало 13) И прииде в назарет, идеже бе воспитан: и вниде, по обычаю своему, в день субботный в сонмище, и воста чести.
17 И даша ему книгу исаии пророка: и разгнувъ книгу, обрете место, идеже бе написано:
18 дух господень на мне: егоже ради помаза мя благовестити нищим, посла мя исцелити сокрушенныя сердцем, проповедати плененным отпущение и слепым прозрение, отпустити сокрушенныя во отраду,
19 проповедати лето господне приятно.
20 И согнув книгу, отдав слузе, седе: и всем в сонмищи очи беху зряще нань.
21 И начат глаголати к ним, яко днесь сбыстся писание сие во ушию вашею.
22 И вси свидетелствоваху ему, (Зачало 14) и дивляхуся о словесех благодати, исходящихъ из уст его, и глаголаху: не сей ли есть сын иосифовъ?
23 И рече к ним: всяко речете ми притчу сию: врачу, исцелися сам: елика слышахом бывшая в капернауме, сотвори и зде во отечествии своем.
24 Рече же: аминь глаголю вам, яко ни который пророк приятен есть во отечествии своем:
25 поистинне же глаголю вам: многи вдовицы беша во дни илиины во израили, егда заключися небо три лета и месяц шесть, яко бысть глад великъ по всей земли:
26 и ни ко единой их послан бысть илиа, токмо в сарепту сидонскую к жене вдовице.
27 И мнози прокажени беху при елиссеи пророце во израили: и ни един же от них очистися, токмо нееман сирианин.
28 И исполнишася вси ярости в сонмищи, слышавшии сия:
29 и воставше изгнаша его вон из града, и ведоша его до верху горы, на нейже градъ их создан бяше, да быша его низринули:
30 он же прошед посреде их, идяше.
31 (Зачало 15) И сниде в капернаум град галилейский: и бе учя их в субботы.
32 И ужасахуся о учении его: яко со властию бе слово его.
33 И в сонмищи бе человек имый духа беса нечиста, и возопи гласом велиим,
34 глаголя: остави, что нам и тебе, иисусе назарянине, пришел еси погубити нас: вемъ тя, кто еси, святый божий.
35 И запрети ему иисус, глаголя: премолчи и изыди из него. И поверг его бесъ посреде, изыде из него, никакоже вредивъ его.
36 И бысть ужас на всех, и стязахуся, друг ко другу глаголюще: что слово сие, яко властию и силою велит нечистым духовом, и исходятъ?
37 (Зачало 16) И исхождаше глас о нем во всяко место страны.
38 Востав же из сонмища, вниде в дом симонов: теща же симонова бе одержима огнем велиим: и молиша его о ней.
39 И став над нею, запрети огню, и остави ю: абие же воставши служаше им.
40 Заходящу же солнцу, вси, елицы имеяху болящия недуги различными, привождаху их къ нему: он же на единаго коегождо их руце возложь, исцеляше их.
41 Исхождаху же и беси от многих, вопиюще и глаголюще, яко ты еси христос сын божий. И запрещая не даяше им глаголати, яко ведяху христа самаго суща.
42 Бывшу же дни, изшед иде в пусто место: и народи искаху его, и приидоша к нему, и удержаваху его, да бы не отшел от них.
43 он же рече к ним, яко и другим градовомъ благовестити ми подобает царствие божие: яко на се послан есмь.
44 И бе проповедая на сонмищих галилейских.

 

Глава 5.

Зачало 17.

1 Бысть же належащу ему народу, да быша слышали слово божие, и той бе стоя при езере геннисаретсте:
2 и виде два корабля стояща при езере: рыбарие же отшедше от нею, измываху мрежи.
3 Влез же в един от кораблю, иже бе симонов, моли его от земли отступити мало: и сед учаше из корабля народы.
4 якоже преста глаголя, рече к симону: поступи во глубину, и вверзите мрежи ваша в ловитву.
5 И отвещав симон рече ему: наставниче, об нощь всю труждшеся, ничесоже яхом: по глаголу же твоему ввергу мрежу.
6 И се сотворше, яша множество рыб много: протерзашеся же мрежа их.
7 И помануша причастником, иже беху во друземъ корабли, да пришедше помогут им: и приидоша, и исполниша оба корабля, яко погружатися има.
8 Видев же симон петр, припаде к коленома иисусовома, глаголя: изыди от мене, яко мужъ грешен есмь, господи.
9 ужас бо одержаше его и вся сущия с ним, о ловитве рыб, яже яша.
10 Такожде же иакова и иоанна сына зеведеова, яже беста обещника симонови. И рече къ симону иисус: не бойся: отселе будеши человеки ловя.
11 И извлекше (оба) корабля на землю, оставльше вся, вслед его идоша.
12 (Зачало 18) И бысть егда бе иисус во единомъ от градов, и се, муж исполнь прокажения: и видев иисуса, пад ниц, моляся ему, глаголя: господи, аще хощеши, можеши мя очистити.
13 И простер руку, коснуся его, рек: хощу, очистися: и абие проказа отиде от него.
14 И той заповеда ему ни комуже поведати: но шед покажися иереови, и принеси о очищении твоем, якоже повеле моисей, во свидетелство им.
15 Прохождаше же паче слово о нем: и схождахуся народи мнози слышати и целитися от него от недуг своих.
16 Той же бе отходя в пустыню и моляся.
17 (Зачало 19) И бысть во един от дний, и той бе учя: и беху седяще фарисее и законоучителие, иже беху пришли от всякия веси галилейския и иудейския и иерусалимския: и сила господня бе исцеляющи их:
18 и се мужие носяще на одре человека, иже бе разслаблен, и искаху внести его и положити пред ним:
19 и не обретше куде внести его народа ради, взлезше на храм, сквозе скуделы [кровъ скудельный] низвесиша его со одром на среду пред иисуса.
20 И видев веру их, рече ему: человече, оставляюттися греси твои.
21 И начаша помышляти книжницы и фарисее, глаголюще: кто есть сей, иже глаголет хулы, кто может оставляти грехи, токмо единъ богъ?
22 Разумев же иисус помышления их, отвещавъ рече к ним: что помышляете в сердцах вашихъ?
23 что есть удобее, рещи: оставляюттися греси твои? или рещи: востани и ходи?
24 но да увесте, яко власть имать сынъ человеческий на земли отпущати грехи, (рече разслабленному:) тебе глаголю: востани и возми одр твой, и иди в дом твой.
25 И абие востав пред ними, взем, на немже лежаше, иде в дом свой, славя бога.
26 И ужас прият всех, и славляху бога: и исполнишася страха, глаголюще, яко видехомъ преславная днесь.
27 (Зачало 20) И посем изыде, и узре мытаря именем левию, седяща на мытнице, и рече ему: иди по мне.
28 И оставль вся, востав вослед его иде.
29 И сотвори учреждение велие левий ему в дому своем: и бе народ мытарей мног, и инех, иже бяху с ним возлежаще.
30 И роптаху книжницы на него и фарисее, ко учеником его глаголюще: почто с мытари и грешники ясте и пиете?
31 И отвещав иисус рече к ним: не требуютъ здравии врача, но болящии:
32 не приидох призвати праведных, но грешныя в покаяние.
33 (Зачало 21) они же реша к нему: почто ученицы иоанновы постятся часто и молитвы творят, такожде и фарисейстии, а твои ядят и пиютъ?
34 он же рече к ним: еда можете сыны брачныя, дондеже жених с ними есть, сотворити поститися?
35 Приидут же дние, егда отят будет от них жених, и тогда постятся в тыя дни.
36 глаголаше же и притчу к ним, яко никтоже приставления ризы новы приставляет на ризу ветху: аще ли же ни, и новую раздерет, и ветсей не согласует еже от новаго.
37 И никтоже вливает вина нова в мехи ветхи: аще ли же ни, расторгнет новое вино мехи, и само излиется, и меси погибнут:
38 но вино новое в мехи новы вливати [подобаетъ]: и обоя соблюдутся.
39 И никтоже пив ветхое, абие хощет новаго: глаголет бо: ветхое лучше есть.

 

Глава 6.

Зачало 22.

1 Бысть же в субботу второпервую ити ему сквозе сеяния: и восторгаху ученицы его класы, и ядяху, стирающе руками.
2 Нецыи же от фарисей реша им: что творите, егоже не достоит творити в субботы?
3 И отвещав иисус рече к ним: ни ли сего чли есте, еже сотвори давид, егда взалкася сам и иже с ним бяху?
4 како вниде в дом божий, и хлебы предложения взем, и яде, и даде и сущим с ним, ихже не достояше ясти, токмо единым иереемъ?
5 И глаголаше им, яко господь есть сынъ человеческий и субботе.
6 Бысть же и в другую субботу внити ему в сонмище и учити: и бе тамо человек, и рука ему десная бе суха.
7 Назираху же книжницы и фарисеи, аще в субботу исцелит, да обрящут речь нань.
8 он же ведяше помышления их, и рече человеку имущему суху руку: востани и стани посреде. он же востав ста.
9 Рече же иисус к ним: вопрошу вы: что достоитъ в субботы, добро творити, или зло творити? душу спасти, или погубити? они же умолчаша.
10 И воззрев на всех их, рече ему: простри руку твою. он же сотвори тако: и утвердися рука его здрава яко другая.
11 они же исполнишася безумия, и глаголаху друг ко другу, что быша сотворили иисусови.
12 (Зачало 23) Бысть же во дни тыя, изыде в гору помолитися: и бе об нощь в молитве божии.
13 И егда бысть день, призва ученики своя: и избра от них дванадесяте, ихже и апостолы нарече:
14 симона, егоже именова петра, и андреа брата его, иакова и иоанна, филиппа и варфоломеа,
15 матфеа и фому, иакова алфеева и симона нарицаемаго зилота,
16 иуду иаковля, и иуду искариотскаго, иже и бысть предатель.
17 (Зачало 24) Изшед с ними, ста на месте равне: и народ ученик его, и множество много людей от всея иудеи и иерусалима и помория тирска и сидонска,
18 иже приидоша послушати его и исцелитися от недуг своих, и страждущии от дух нечистых: и исцеляхуся.
19 И весь народ искаше прикасатися ему: яко сила от него исхождаше и исцеляше вся.
20 И той возвед очи свои на ученики своя, глаголаше: блажени нищии духом: яко ваше есть царствие божие.
21 Блажени, алчущии ныне: яко насытитеся. Блажени, плачущии ныне: яко возсмеетеся.
22 Блажени будете, егда возненавидят васъ человецы, и егда разлучат вы, и поносят, и пронесут имя ваше яко зло, сына человеческаго ради.
23 Возрадуйтеся в той день и взыграйте: се бо мзда ваша многа на небеси. По сим бо творяху пророком отцы их.
24 (Зачало 25) обаче горе вам богатым: яко отстоите утешения вашего [яко восприемлете утешение ваше].
25 Горе вам, насыщеннии ныне: яко взалчете. Горе вам смеющимся ныне: яко возрыдаете и восплачете.
26 Горе, егда добре рекут вам вси человецы: по сим бо творяху лжепророком отцы их.
27 Но вам глаголю слышащим: любите враги ваша, добро творите ненавидящим вас,
28 благословите кленущия вы, и молитеся за творящихъ вам обиду.
29 Биющему тя в ланиту, подаждь и другую: и от взимающаго ти ризу, и срачицу не возбрани.
30 Всякому же просящему у тебе, дай: и от взимающаго твоя, не истязуй.
31 (Зачало 26) И якоже хощете да творят вамъ человецы, и вы творите им такожде.
32 И аще любите любящия вы, кая вам благодать есть? ибо и грешницы любящия их любят.
33 И аще благотворите благотворящим вам, кая вам благодать есть? ибо и грешницы тожде творят.
34 И аще взаим даете, от нихже чаете восприяти, кая вам благодать есть, ибо и грешницы грешником взаим давают, да восприимут равная.
35 обаче любите враги ваша, и благотворите, и взаим дайте, ничесоже чающе: и будет мзда ваша многа, и будете сынове вышняго: яко той благ есть на безблагодатныя [неблагодарныя] и злыя.
36 Будите убо милосерди, якоже и отецъ ваш милосерд есть.
37 (Зачало 27) И не судите, и не судят вам: (и) не осуждайте, да не осуждени будете: отпущайте, и отпустят вам:
38 дайте, и дастся вам: меру добру, наткану и потрясну и преливающуся дадят на лоно ваше: тою бо мерою, еюже мерите, возмерится вам.
39 Рече же притчу им: еда может слепецъ слепца водити? не оба ли в яму впадетася?
40 Несть ученик над учителя своего: совершен же всяк будет, якоже (и) учитель его.
41 Что же видиши сучец, иже есть во очеси брата твоего, бервна же, еже есть во очеси твоем, не чуеши?
42 Или како можеши рещи брату твоему: брате, остави, да изму сучец, иже есть во очеси твоем, сам сущаго во очеси твоем бервна не видя? Лицемере, изми первее бервно изъ очесе твоего, и тогда прозриши изъяти сучецъ из очесе брата твоего.
43 Несть бо древо добро, творя плода зла: ниже древо зло, творя плода добра.
44 Всяко бо древо от плода своего познается: не от терния бо чешут смоквы, ни от купины емлютъ гроздия.
45 благий человек от благаго сокровища сердца своего износит благое: и злый человек от злаго сокровища сердца своего износит злое: от избытка бо сердца глаголют уста его.
46 (Зачало 28) Что же мя зовете: господи, господи, и не творите, яже глаголю?
47 Всяк грядый ко мне и слышай словеса моя и творя я, скажу вам, кому есть подобен:
48 подобен есть человеку зиждущу храмину, иже ископа и углуби, и положи основание на камени: наводнению же бывшу, припаде река ко храмине той, и не може поколебати ея: основана бо бе на камени.
49 Слышавый же и не сотворивый подобен есть человеку создавшему храмину на земли без основания: к нейже припаде река, и абие падеся, и бысть разрушение храмины тоя велие.

 

Глава 7.

1 Егда же сконча вся глаголы своя в слухи людем, (Зачало 29) вниде в капернаум.
2 Сотнику же некоему раб боля зле, хотяше [имеяше] умрети, иже бе ему честен.
3 Слышав же о иисусе, посла к нему старцы иудейския, моля его, яко да пришед спасетъ раба его.
4 они же пришедше ко иисусови, моляху его тощно, глаголюще, яко достоин есть, емуже даси сие:
5 любит бо язык наш, и сонмище той созда нам.
6 иисус же идяше с ними. И уже ему не далече сущу от храмины, посла к нему сотникъ други, глаголя ему: господи, не движися: несмь бо достоин, да под кров мой внидеши:
7 темже ни себе достойна сотворих приити къ тебе: но рцы слово, и исцелеет отрокъ мой:
8 ибо и аз человек есмь под владыкою учинен, имея под собою воины: и глаголю сему: иди, и идет: и другому: прииди, и приидет: и рабу моему: сотвори сие, и сотворит.
9 Слышав же сия иисус, чудися ему, и обращься идущему по нем народу рече: глаголю вам, ни во израили толики веры обретох.
10 И возвращшеся послании обретоша болящаго раба исцелевша.
11 (Зачало 30) И бысть посем, идяше во град, нарицаемый наин: и с ним идяху ученицы его мнози и народ мног.
12 якоже приближися ко вратом града, и се изношаху умерша, сына единородна матери своей, и та бе вдова: и народ от града многъ с нею.
13 И видев ю господь, милосердова о ней, и рече ей: не плачи.
14 И приступль коснуся во одр: носящии же сташа: и рече: юноше, тебе глаголю, востани.
15 И седе мертвый, и начат глаголати: и даде его матери его.
16 Прият же страх всех, и славляху бога, глаголюще: яко пророк велий воста в нас, и яко посети бог людей своих.
17 (Зачало 31) И изыде слово сие по всей иудеи о нем, и по всей стране.
18 И возвестиша иоанну ученицы его о всех сих.
19 И призвав два некая от ученик своихъ иоанн, посла ко иисусу, глаголя: ты ли еси грядый, или иного чаемъ?
20 Пришедша же к нему мужа реста: иоаннъ креститель посла нас к тебе, глаголя: ты ли еси грядый, или иного чаемъ?
21 В той же час исцели многи от недуг и ран и дух злых, и многим слепым дарова прозрение.
22 И отвещав иисус рече има: шедша возвестита иоанну, яже видеста и слышаста: яко слепии прозирают, хромии ходят, прокаженнии очищаются, глусии слышат, мертвии востают, нищии благовествуют:
23 и блажен есть, иже аще не соблазнится о мне.
24 отшедшема же ученикома иоанновома, начатъ глаголати к народом о иоанне: чесо изыдосте в пустыню видети, трость ли ветром колеблему?
25 Но чесо изыдосте видети? человека ли въ мягки ризы одеяна? Се, иже во одежди славней и пищи сущии, во царствии [во дворех царскихъ] суть.
26 Но чесо изыдосте видети? пророка ли? ей, глаголю вам, и лишше пророка.
27 Сей (бо) есть, о немже писано есть: се аз послю ангела моего пред лицем твоим, иже устроит путь твой пред тобою.
28 Глаголю бо вам: болий в рожденных женами пророка иоанна крестителя никтоже есть: мний же во царствии божии, болии его есть.
29 И вси людие слышавше и мытарие, оправдиша бога, крещшеся крещением иоанновым:
30 фарисее же и законницы совет божий отвергоша о себе, не крещшеся от него.
31 (Зачало 32) Рече же господь: кому убо уподоблю человеки рода сего, и кому суть подобни?
32 Подобни суть отрочищем седящим на торжищихъ и приглашающим друг друга, и глаголющим: пискахомъ вам, и не плясасте: рыдахом вам, и не плакасте.
33 Прииде бо иоанн креститель ни хлеба ядый, ни вина пия, и глаголете: беся имать.
34 Прииде сын человеческий ядый и пия, и глаголете: сей человек ядца и винопийца, друг мытарем и грешником.
35 И оправдися премудрость от чад своих всех.
36 (Зачало 33) Моляше же его некий от фарисей, да бы ял с ним: и вшед в дом фарисеов, возлеже.
37 И се жена во граде, яже бе грешница, и уведевши, яко возлежит во храмине фарисеове, принесши алавастр мира,
38 и ставши при ногу его созади, плачущися, начат умывати нозе его слезами, и власы главы своея отираше, и облобызаше нозе его, и мазаше миром.
39 Видев же фарисей воззвавый его, рече в себе, глаголя сей аще бы был пророк, ведел бы кто и какова жена прикасается ему: яко грешница есть.
40 И отвещав иисус рече к нему: симоне, имам ти нечто рещи. он же рече: учителю, рцы.
41 иисус же рече: два должника беста заимодавцу некоему: един бе должен пятиюсот динарии, другий же пятиюдесят:
42 не имущема же има воздати, обема отда [остави]. Который убо ею, рцы, паче возлюбитъ его?
43 отвещав же симон рече: мню, яко емуже вящше отда [остави]. он же рече ему: право судил еси.
44 И обращься к жене, симонови рече: видиши ли сию жену? Внидох в дом твой, воды на нозе мои не дал еси: сия же слезами облия ми нозе и власы главы своея отре.
45 Лобзания ми не дал еси: сия же, отнелиже внидох, не преста облобызающи ми нозе.
46 Маслом главы моея не помазал еси: сия же миром помаза ми нозе.
47 егоже ради, глаголю ти: отпущаются греси ея мнози, яко возлюби много: а емуже мало оставляется, менше любит.
48 Рече же ей: отпущаются тебе греси.
49 И начаша возлежащии с ним глаголати в себе: кто сей есть, иже и грехи отпущаетъ?
50 Рече же к жене: вера твоя спасе тя: иди в мире.

 

Глава 8.

Зачало 34.

1 И бысть посем, и той прохождаше сквозе грады и веси, проповедуя и благовествуя царствие божие: и обанадесяте с ним,
2 и жены некия, яже бяху исцелены от духов злых и недуг: мариа нарицаемая магдалина, из неяже бесов седмь изыде,
3 и иоанна жена хузаня, приставника иродова, и сусанна, и ины многи, яже служаху ему от имений своих.
4 Разумевающу же народу многу, и от всехъ градов грядущим к нему, рече притчу:
5 (Зачало 35) изыде сеяй сеяти семене своего: и егда сеяше, ово паде при пути, и попрано бысть, и птицы небесныя позобаша е:
6 а другое паде на камени, и прозяб усше, зане не имеяше влаги:
7 и другое паде посреде терния, и возрасте терние, и подави е:
8 другое же паде на земли блазе, и прозябъ сотвори плод сторицею. Сия глаголя, возгласи: имеяй уши слышати, да слышит.
9 Вопрошаху же его ученицы его, глаголюще: что есть притча сия?
10 он же рече: вам есть дано ведати тайны царствия божия, прочим же в притчах, да видяще не видят и слышаще не разумеют.
11 есть же сия притча: семя есть слово божие:
12 а иже при пути, суть слышащии, потом же приходит диавол и вземлет слово от сердца их, да не веровавше спасутся:
13 а иже на камени, иже егда услышат, с радостию приемлют слово: и сии корене не имут, иже во время веруют, и во время напасти отпадают:
14 а еже в тернии падшее, сии суть слышавшии, и от печали и богатства и сластьми житейскими ходяще подавляются, и не совершают плода:
15 а иже на добрей земли, сии суть, иже добрым сердцем и благим слышавше слово, держатъ и плод творят в терпении. Сия глаголя, возгласи: имеяй уши слышати да слышит.
16 (Зачало 36) Никтоже (убо) светилника вжег, покрывает его сосудом, или под одръ подлагает: но на свещник возлагает, да входящии видят свет.
17 Несть бо тайно, еже не явлено будет: ниже утаено, еже не познается и в явление приидет.
18 Блюдитеся убо, како слышите: иже бо имать, дастся ему: и иже аще не имать, и еже мнится имея, возмется от него.
19 Приидоша же к нему мати и братия его, и не можаху беседовати к нему народа ради.
20 И возвестиша ему, глаголюще: мати твоя и братия твоя вне стоят, видети тя хотяще.
21 он же отвещав рече к ним: мати моя и братия моя сии суть, слышащии слово божие, и творящии е.
22 (Зачало 37) И бысть во един от дний, той влезе в корабль и ученицы его: и рече к ним: прейдем на он пол езера. И поидоша.
23 Идущим же им, успе. И сниде буря ветреная в езеро, и скончавахуся, и в беде беху.
24 И приступльше воздвигоша его, глаголюще: наставниче, наставниче, погибаем. он же воставъ запрети ветру и волнению водному: и улегоста, и бысть тишина.
25 Рече же им: где есть вера ваша? убоявшеся же чудишася, глаголюще друг ко другу: кто убо сей есть, яко и ветром повелевает и воде, и послушают его?
26 (Зачало 38) И преидоша во страну гадаринску, яже есть об он пол галилеи.
27 Изшедшу же ему на землю, срете его муж некий от града, иже имяше бесы от лет многих, и в ризу не облачашеся, и во храме не живяше, но во гробех.
28 узрев же иисуса и возопив, припаде къ нему, и гласом велиим рече: что мне и тебе, иисусе сыне бога вышняго? молюся ти, не мучи мене.
29 Повеле бо духови нечистому изыти от человека: от многих бо лет восхищаше его: и вязаху его узы (железны) и путы, стрегуще его: и растерзая узы, гонимь бываше бесом сквозе пустыни.
30 Вопроси же его иисус, глаголя: что ти есть имя? он же рече: легеон: яко беси мнози внидоша вонь.
31 И моляху его, да не повелит им в бездну ити.
32 Бе же ту стадо свиней много пасомо в горе: и моляху его, да повелит им в ты внити. И повеле им.
33 Изшедше же беси от человека, внидоша во свиния: и устремися стадо по брегу в езеро, и истопе.
34 Видевше же пасущии бывшее, бежаша, и возвестиша во граде и в селех.
35 Изыдоша же видети бывшее: и приидоша ко иисусови и обретоша человека седяща, изъ негоже беси изыдоша, оболчена и смысляща, при ногу иисусову: и убояшася.
36 Возвестиша же им видевшии, како спасеся бесновавыйся.
37 И моли его весь народ страны гадаринския отити от них, яко страхом велиим одержими беху. он же влез в корабль, возвратися.
38 Моляшеся же ему муж, из негоже изыдоша беси, да бы с ним был. отпусти же его иисус, глаголя:
39 возвратися в дом твой и поведай, елика ти сотвори бог. И иде, по всему граду проповедая, елика сотвори ему иисус.
40 (Зачало 39) Бысть же егда возвратися иисус, прият его народ: беху бо вси чающе его.
41 И се прииде муж, емуже имя иаир, и той князь сонмищу бе. И пад при ногу иисусову, моляше его внити в дом свой:
42 яко дщи единородна бе ему, яко лет двоюнадесяте, и та умираше. егда же идяше, народи угнетаху его.
43 И жена сущи в точении крове от двоюнадесяте лету, яже врачем издавши все имение, (и) не возможе ни от единаго исцелети:
44 (и) приступльши созади, коснуся края ризъ его: и абие ста ток крове ея.
45 И рече иисус: кто есть коснувыйся мне? отметающимся же всем, рече петр и иже съ ним: наставниче, народи одержат тя и гнетут, и глаголеши: кто есть коснувыйся мне?
46 иисус же рече: прикоснуся мне некто: азъ бо чух силу изшедшую из мене.
47 Видевши же жена, яко не утаися, трепещущи прииде, и падши пред ним, еяже ради вины прикоснуся ему, поведа ему пред всеми людьми, и яко исцеле абие.
48 он же рече ей: дерзай дщи, вера твоя спасе тя: иди в мире.
49 еще ему глаголющу, прииде некий от архисинагога, глаголя ему, яко умре дщи твоя: не движи учителя.
50 иисус же слышав отвеща ему, глаголя: не бойся, токмо веруй, и спасена будет.
51 Пришед же в дом, не остави ни единаго внити, токмо петра и иоанна и иакова, и отца отроковицы, и матере.
52 Плакахуся же вси и рыдаху ея. он же рече: не плачитеся: не умре (бо), но спит.
53 И ругахуся ему, ведяще, яко умре.
54 он же изгнав вон всех, и емъ за руку ея, возгласи, глаголя: отроковице, востани.
55 И возвратися дух ея, и воскресе абие: и повеле дати ей ясти.
56 И дивистася родителя ея. он же повеле има никомуже поведати бывшаго.

 

Глава 9.

Зачало 40.

1 Созвав же обанадесяте, даде им силу и власть на вся бесы, и недуги целити:
2 и посла их проповедати царствие божие и исцелити болящия.
3 И рече к ним: ничесоже возмите на путь: ни жезла, ни пиры, ни хлеба, ни сребра, ни по двема ризама имети:
4 и в оньже дом внидете, ту пребывайте и оттуду исходите:
5 и елицы аще не приемлют вас, исходяще от града того, и прах от ног ваших оттрясите, во свидетелство на ня.
6 Исходяще же прохождаху сквозе веси, благовествующе и исцеляюще всюду.
7 (Зачало 41) Слыша же ирод четвертовластникъ бывающая от него вся и недоумевашеся: зане глаголемо бе от неких, яко иоанн воста от мертвых:
8 от инех же, яко илиа явися: от другихъ же, яко пророк един от древних воскресе.
9 И рече ирод: иоанна аз усекнух: кто же есть сей, о немже аз слышу таковая? И искаше видети его.
10 И возвращшеся апостоли поведаша ему, елика сотвориша: и поим их, отиде един [особь] на место пусто града, нарицаемаго вифсаида.
11 Народи же разумевше, по нем идоша: и приемъ их, глаголаше им о царствии божии и требующия исцеления целяше.
12 День же начат прекланятися. (Зачало 42) Приступльше же обанадесяте рекоша ему: отпусти народ, да шедше во окрестныя веси и села витаютъ и обрящут брашно: яко зде в пусте месте есмы.
13 Рече же к ним: дадите им вы ясти. они же реша: несть у нас вящше, токмо пять хлеб и рыбе две, аще убо не шедше мы купим во вся люди сия брашна.
14 Беху бо мужей яко пять тысящ. Рече же ко учеником своим: посадите их на купы по пятидесят.
15 И сотвориша тако и посадиша их вся.
16 Приим же пять хлеб и обе рыбе, воззревъ на небо, благослови их, и преломи, и даяше ученикомъ предложити народу.
17 И ядоша и насытишася вси: и взяша избывшия им укрухи коша дванадесяте.
18 (Зачало 43) И бысть егда моляшеся един, с ним беху ученицы: и вопроси их, глаголя: кого мя глаголют народи быти?
19 они же отвещавше реша: иоанна крестителя: инии же илию: друзии же, яко пророк некий от древних воскресе.
20 Рече же им: вы же кого мя глаголете быти? отвещав же петр рече: христа божия.
21 он же запрещь им, повеле никомуже глаголати сего,
22 рек, яко подобает сыну человеческому много пострадати, и искушену [отвержену] быти от старец и архиерей и книжник, и убиену быти, и в третий день востати.
23 (Зачало 44) глаголаше же ко всем: аще кто хощетъ по мне ити, да отвержется себе, и возметъ крест свой, и последует ми.
24 Иже бо аще хощет душу свою спасти, погубитъ ю: а иже погубит душу свою мене ради, сей спасет ю.
25 Что бо пользы имать человек, приобретъ мир весь, себе же погубив или оттщетивъ?
26 Иже бо аще постыдится мене и моих словес, сего сын человеческий постыдится, егда приидетъ во славе своей и отчей и святых ангел.
27 Глаголю же вам воистинну: суть нецыи от зде стоящих, иже не имут вкусити смерти, дондеже видят царствие божие.
28 (Зачало 45) Бысть же по словесех сих яко дний осмь, и поем петра и иоанна и иакова, взыде на гору помолитися.
29 И бысть егда моляшеся, видение лица его ино, и одеяние его бело блистаяся.
30 И се мужа два с ним глаголюща, яже беста моисей и илиа,
31 явльшася во славе, глаголаста же исходъ его, егоже хотяше скончати во иерусалиме.
32 Петр же и сущии с ним бяху отягчени сном: убуждшеся же видеша славу его, и оба мужа стояща с ним.
33 И бысть егда разлучистася от него, рече петр ко иисусу: наставниче, добро есть намъ зде быти: и сотворим сени три, едину тебе, и едину моисеови, и едину илии: не ведый, еже глаголаше.
34 Се же ему глаголющу, бысть облак, и осени их: убояшася же, вшедше во облак.
35 И глас бысть из облака, глаголя: сей есть сын мой возлюбленный, того послушайте.
36 И егда бысть глас, обретеся иисус един. И тии умолчаша, и никомуже возвестиша въ тыя дни ничесоже от тех, яже видеша.
37 (Зачало 46) Бысть же в прочий день, сшедшимъ им с горы, срете его народ мног.
38 И се муж из народа возопи, глаголя: учителю, молютися, призри на сына моего, яко единороденъ ми есть:
39 и се дух емлет его, и внезапу вопиет, и пружается [терзает его] с пенами, и едва отходит от него, сокрушая его:
40 и молихся учеником твоим, да ижденутъ его: и не возмогоша.
41 отвещав же иисус рече: о, роде неверный и развращенный, доколе буду в вас и терплю вы? приведи (ми) сына твоего семо.
42 еще же грядущу ему, поверже его бесъ и стрясе. Запрети же иисус духови нечистому, и исцели отрока, и вдаде его отцу его.
43 Дивляхуся же вси о величии божии. (Зачало 47) Всем же чудящимся о всех, яже творяше иисус, рече ко учеником своим:
44 вложите вы во уши ваши словеса сия: сынъ бо человеческий имать предатися в руце человечесте.
45 они же не разумеша глагола сего, бе бо прикровен от них, да не ощутят его: и бояхуся вопросити его о глаголе сем.
46 Вниде же помышление в них, кто их вящший бы был.
47 иисус же ведый помышление сердец их, приемъ отроча, постави е у себе
48 и рече им: иже аще приимет сие отроча во имя мое, мене приемлет: и иже аще мене приемлет, приемлет пославшаго мя: иже бо менший есть в вас, сей есть велик.
49 (Зачало 48) отвещав же иоанн рече: наставниче, видехом некоего о имени твоем изгоняща бесы: и возбранихом ему, яко воследъ не ходит с нами.
50 И рече к нему иисус: не браните: иже бо несть на вы, по вас есть.
51 Бысть же егда скончавахуся дние восхождению его, и той утверди лице свое ити во иерусалим:
52 и посла вестники пред лицем своим: и изшедше внидоша в весь самарянску, яко да уготовят ему:
53 и не прияша его, яко лице его бе грядущее во иерусалим.
54 Видевша же ученика его иаков и иоанн, реста: господи, хощеши ли, речема, да огнь снидетъ с небесе и потребит их, якоже и илиа сотвори?
55 обращься же запрети има, и рече: не веста, коего духа еста вы:
56 сын бо человеческий не прииде душ человеческихъ погубити, но спасти: и идоша во ину весь.
57 (Зачало 49) Бысть же идущим им по пути, рече некий к нему: иду по тебе, аможе аще идеши, господи.
58 И рече ему иисус: лиси язвины имут, и птицы небесныя гнезда: сын же человеческий не имать где главу подклонити.
59 Рече же ко другому: ходи вслед мене. он же рече: господи, повели ми, (да) шед прежде погребу отца моего.
60 Рече же ему иисус: остави мертвыя погребсти своя мертвецы: ты же шед возвещай царствие божие.
61 Рече же и другий: иду по тебе, господи: прежде же повели ми отвещатися, иже суть [попроститися с сущими] в дому моем.
62 Рече же к нему иисус: никтоже возложь руку свою на рало и зря вспять, управлен есть в царствии божии.

 

Глава 10.

Зачало 50.

1 По сих же яви господь и инех седмьдесят, и посла их по двема пред лицем своим во всяк град и место, аможе хотяше сам ити:
2 глаголаше же к ним: жатва убо многа, делателей же мало: молитеся убо господину жатве, да изведетъ делатели на жатву свою.
3 Идите: се аз посылаю вы яко агнцы посреде волков.
4 Не носите влагалища, ни пиры, ни сапог и ни когоже на пути целуйте.
5 Воньже аще дом внидете, первее глаголите: мир дому сему:
6 и аще убо будет ту сын мира, почиетъ на нем мир ваш: аще ли же ни, к вам возвратится.
7 В том же дому пребывайте, ядуще и пиюще, яже суть у них: достоин бо есть делатель мзды своея: не преходите из дому в дом.
8 И воньже аще град входите, и приемлютъ вы, ядите предлагаемая вам:
9 и исцелите недужныя, иже суть в нем, и глаголите им: приближися на вы царствие божие.
10 И воньже аще град входите, и не приемлютъ вас, изшедше на распутия его, рцыте:
11 и прах прилепший нам от града вашего, оттрясаем вам. обаче сие ведите, яко приближися на вы царствие божие.
12 Глаголю вам, яко содомляном в день той отраднее будет, неже граду тому.
13 Горе тебе, хоразине, горе тебе, вифсаидо: яко аще в тире и сидоне быша силы были бывшия в ваю, древле убо во вретищи и пепеле седяще покаялися быша:
14 обаче тиру и сидону отраднее будетъ на суде, неже вама.
15 И ты, капернауме, иже до небес вознесыйся, до ада низведешися.
16 (Зачало 51) Слушаяй вас, мене слушает: и отметаяйся вас, мене отметается: отметаяйся же мене, отметается пославшаго мя.
17 Возвратишася же седмьдесят с радостию, глаголюще: господи, и беси повинуются нам о имени твоем.
18 Рече же им: видех сатану яко молнию с небесе спадша.
19 Се, даю вам власть наступати на змию и на скорпию и на всю силу вражию: и ничесоже вас вредит.
20 обаче о сем не радуйтеся, яко дуси вам повинуются: радуйтеся же, яко имена ваша написана суть на небесех.
21 В той час возрадовася духом иисус и рече: исповедаютися, отче, господи небесе и земли, яко утаил еси сия от премудрых и разумных, и открыл еси та младенцем: ей, отче, яко тако бысть благоволение пред тобою.
22 И обращься ко учеником, рече: вся мне предана быша от отца моего: и никтоже весть, кто есть сын, токмо отец: и кто есть отец, токмо сын, и емуже аще хощет сынъ открыти.
23 (Зачало 52) И обращься ко учеником, единъ [особь] рече: блажени очи видящии, яже видите:
24 глаголю бо вам, яко мнози пророцы и царие восхотеша видети, яже вы видите, и не видеша: и слышати, яже слышите, и не слышаша.
25 (Зачало 53) И се, законник некий воста, искушая его и глаголя: учителю, что сотворив, живот вечный наследую?
26 он же рече к нему: в законе что писано есть? како чтеши?
27 он же отвещав рече: возлюбиши господа бога твоего от всего сердца твоего, и от всея души твоея, и всею крепостию твоею, и всемъ помышлением твоим: и ближняго своего яко сам себе.
28 Рече же ему: право отвещал еси: сие сотвори, и жив будеши.
29 он же хотя оправдитися сам, рече ко иисусу: и кто есть ближний мой?
30 отвещав же иисус рече: человек некий схождаше от иерусалима во иерихон, и в разбойники впаде, иже совлекше его, и язвы возложше отидоша, оставльше едва жива суща.
31 По случаю же священник некий схождаше путемъ тем, и видев его, мимоиде.
32 Такожде же и левит, быв на том месте, пришед и видев, мимоиде.
33 Самарянин же некто грядый, прииде над него, и видев его, милосердова:
34 и приступль обвяза струпы его, возливая масло и вино: всадив же его на свой скот, приведе его в гостинницу, и прилежа ему:
35 и наутрия изшед, изъем два сребреника, даде гостиннику, и рече ему: прилежи ему: и, еже аще прииждивеши, аз егда возвращуся, воздам ти.
36 Кто убо от тех триех ближний мниттися быти впадшему в разбойники?
37 он же рече: сотворивый милость с ним. Рече же ему иисус: иди, и ты твори такожде.
38 (Зачало 54) Бысть же ходящим им, и самъ вниде в весь некую: жена же некая именемъ марфа прият его в дом свой.
39 И сестра ей бе нарицаемая мариа, яже и седши при ногу иисусову, слышаше слово его.
40 Марфа же молвяше о мнозе службе, ставши же рече: господи, не брежеши ли, яко сестра моя едину мя остави служити? рцы убо ей, да ми поможет.
41 отвещав же иисус рече ей: марфо, марфо, печешися, и молвиши о мнозе,
42 едино же есть на потребу: мариа же благую часть избра, яже не отимется от нея.

 

Глава 11.

Зачало 55.

1 И бысть внегда быти ему на месте некоемъ молящуся, (и) яко преста, рече некий от ученикъ его к нему: господи, научи ны молитися, якоже и иоанн научи ученики своя.
2 Рече же им: егда молитеся, глаголите: отче наш, иже на небесех, да святится имя твое: да приидет царствие твое: да будет воля твоя, яко на небеси, и на земли:
3 хлеб наш насущный подавай нам на всякъ день:
4 и остави нам грехи наша, ибо и сами оставляем всякому должнику нашему: и не введи нас во искушение, но избави нас от лукаваго.
5 И рече к ним: кто от вас имать друга, и идет к нему в полунощи, и речет ему: друже, даждь ми взаим три хлебы:
6 понеже друг прииде с пути ко мне, и не имам чесо предложити ему.
7 И той извнутрь отвещав речет: не твори ми труды: уже двери затворены суть, и дети моя со мною на ложи суть: (и) не могу воставъ дати тебе.
8 глаголю же вам: аще и не даст ему востав, зане друг ему есть: но за безъочьство его, востав даст ему, елика требует.
9 (Зачало 56) И аз вам глаголю: просите, и дастся вам: ищите, и обрящете: толцыте, и отверзется вам:
10 всяк бо просяй приемлет, и ищяй обретает, и толкущему отверзется.
11 Котораго же вас отца воспросит сын хлеба, еда камень подаст ему? или рыбы, еда в рыбы место змию подаст ему?
12 или аще попросит яица, еда подастъ ему скорпию?
13 Аще убо вы зли суще, умеете даяния блага даяти чадом вашим, кольми паче отец, иже с небесе, даст духа святаго просящим у него?
14 (Зачало 57) И бе изгоня беса, и той бе нем: бысть же бесу изшедшу, проглагола немый: и дивишася народи.
15 Нецыи же от них реша: о веельзевуле князи бесовстем изгонит бесы.
16 Друзии же искушающе, знамения от него искаху с небесе.
17 он же ведый помышления их, рече им: всяко царство само в себе разделяяся, запустеет: и дом на дом, падает.
18 Аще же и сатана сам в себе разделися, како станет царство его, якоже глаголете, о веельзевуле изгонящя мя бесы.
19 Аще же аз о веельзевуле изгоню бесы, сынове ваши о ком изгонятъ? сего ради тии будут вам судии.
20 Аще ли же о персте божии изгоню бесы, убо постиже на вас царствие божие.
21 егда крепкий вооружився хранит свой двор, во смирении [в мире] суть имения его:
22 егда же креплей его нашед победитъ его, все оружие его возмет, на неже уповаше, и корысть его раздает.
23 (Зачало 58) Иже несть со мною, на мя есть: и иже не собирает со мною, расточает.
24 егда (же) нечистый дух изыдет от человека, преходит сквозе безводная места, ищя покоя: и не обретая, глаголет: возвращуся в домъ мой, отнюдуже изыдох.
25 И пришед обрящет и пометен и украшен:
26 тогда идет и поймет седмь других духовъ горших себе, и вшедше живут ту: и бываютъ последняя человеку тому горша первых.
27 Бысть же егда глаголаше сия, воздвигши некая жена глас от народа, рече ему: блажено чрево носившее тя, и сосца, яже еси ссал.
28 он же рече: темже убо блажени слышащии слово божие и хранящии е.
29 (Зачало 59) Народом же собирающимся начат глаголати: род сей лукав есть: знамения ищет, и знамение не дастся ему, токмо знамение ионы пророка:
30 якоже бо бысть иона знамение ниневитом, тако будет и сын человеческий роду сему.
31 Царица южская востанет на суд с мужи рода сего, и осудит их: яко прииде от конецъ земли слышати премудрость соломонову: и се множае соломона зде.
32 Мужие ниневитстии востанут на суд с родомъ сим, и осудят и: яко покаяшася проповедию иониною: и се множае ионы зде.
33 Никтоже (убо) светилника вжег, в скрове полагает, ни под спудом, но на свещнице, да входящии свет видят.
34 (Зачало 60) Светилник телу есть око: егда убо око твое просто будет, все тело твое светло будет: егда же лукаво будет, и тело твое темно:
35 блюди убо, еда свет, иже в тебе, тма есть.
36 Аще бо тело твое все светло, не имый некия части темны, будет светло все, якоже егда светилник блистанием просвещает тя.
37 егда же глаголаше, моляше его фарисей некий, да обедует у него: вшед же возлеже.
38 Фарисей же видев дивися, яко не прежде крестися [не первее умыся] прежде обеда.
39 Рече же господь к нему: ныне вы, фарисее, внешняя сткляницы и блюда очищаете, внутреннее же ваше полно грабления есть и лукавства.
40 Безумнии, не иже ли сотвори внешнее, и внутреннее сотворил есть?
41 обаче от сущих дадите милостыню: и се вся чиста вам будут.
42 (Зачало 61) Но горе вам фарисеом, яко одесятствуете от мятвы и пигана и всякаго зелия, и мимоходите суд и любовь божию: сия подобаше сотворити, и онех не оставляти.
43 Горе вам фарисеом, яко любите председания на сонмищех и целования на торжищих.
44 Горе вам, книжницы и фарисее лицемери, яко есте яко гроби неведоми, и человецы ходящии верху не ведят.
45 отвещав же некий от законник рече ему: учителю, сия глаголя, и нам досаждаеши.
46 он же рече: и вам законником горе, яко накладаете на человеки бремена не удобь носима, и сами единем перстом вашим не прикасаетеся бременем.
47 (Зачало 62) Горе вам, яко зиждете гробы пророк, отцы же ваши избиша их.
48 убо свидетелствуете и соблаговолите деломъ отец ваших: яко тии убо избиша их, вы же зиждете их гробы.
49 Сего ради и премудрость божия рече: послю в них [к нимъ] пророки и апостолы, и от нихъ убиют и изженут:
50 да взыщется кровь всех пророк, проливаемая от сложения мира, от рода сего,
51 от крове авеля даже до крове захарии, погибшаго между олтарем и храмом: ей, глаголю вам, взыщется от рода сего.
52 Горе вам законником, яко взясте ключь разумения: сами не внидосте, и входящим возбранисте.
53 глаголющу же ему сия к ним, начаша книжницы и фарисее бедне [зело] гневатися нань и престати [вопрошати] его о мнозе,
54 лающе его [наветующе нань], ищуще уловити нечто от уст его, да нань возглаголют.

 

Глава 12.

1 О нихже [между темъ] собравшимся тмам народа, яко попирати друг друга, начат глаголати учеником своим первее: внемлите себе от кваса фарисейска, еже есть лицемерие.
2 (Зачало 63) Ничтоже бо покровено есть, еже не открыется, и тайно, еже не уразумеется:
3 зане, елика во тме ресте, во свете услышатся: и еже ко уху глаголасте во храмех, проповестся на кровех.
4 глаголю же вам другом своим: не убойтеся от убивающих тело и потом не могущихъ лишше что сотворити:
5 сказую же вам, кого убойтеся: убойтеся имущаго власть по убиении воврещи в дебрь огненную: ей, глаголю вам, того убойтеся.
6 Не пять ли птиц ценится пенязема двема, и ни едина от них несть забвена пред богом.
7 Но и власи главы вашея вси изочтени суть. Не убойтеся убо: мнозех птиц унши есте вы.
8 (Зачало 64) глаголю же вам: всяк, иже аще исповесть мя пред человеки, и сын человеческий исповесть его пред ангелы божиими:
9 а отвергийся мене пред человеки, отверженъ будет пред ангелы божиими.
10 И всяк иже речет слово на сына человеческаго, оставится ему: а на святаго духа хулившему не оставится.
11 егда же приведут вы на соборища и власти и владычества, не пецытеся, како или что отвещаете, или что речете:
12 святый бо дух научит вы в той час, яже подобает рещи.
13 (Зачало 65) Рече же ему некий от народа: учителю, рцы брату моему разделити со мною достояние.
14 он же рече ему: человече, кто мя постави судию или делителя над вами?
15 Рече же к ним: блюдите и хранитеся от лихоимства: яко не от избытка [внегда избыточествовати] кому живот его есть от имения его.
16 (Зачало 66) Рече же притчу к ним, глаголя: человеку некоему богату угобзися нива:
17 и мысляше в себе, глаголя: что сотворю, яко не имам где собрати плодов моихъ?
18 И рече: се сотворю: разорю житницы моя, и болшия созижду, и соберу ту вся жита моя и благая моя:
19 и реку души моей: душе, имаши многа блага, лежаща на лета многа: почивай, яждь, пий, веселися.
20 Рече же ему бог: безумне, в сию нощь душу твою истяжут от тебе: а яже уготовалъ еси, кому будутъ?
21 Тако собираяй себе, а не в бога богатея.
22 Рече же ко учеником своим: сего ради глаголю вам: не пецытеся душею вашею, что ясте: ни телом, во что облечетеся:
23 душа болши есть пищи, и тело одежды.
24 Смотрите вран, яко не сеют, ни жнут: имже несть сокровища, ни житницы, и бог питаетъ их: кольми паче вы есте лучши птицъ?
25 Кто же от вас пекийся может приложити возрасту своему лакоть единъ?
26 Аще убо ни мала чесо можете, что о прочих печетеся?
27 Смотрите крины, како растут: не труждаются, ни прядут: глаголю же вам, яко ни соломонъ во всей славе своей облечеся, яко единъ от сих.
28 Аще же траву, на селе днесь сущу и утре в пещь вмещему, бог тако одевает: кольми паче вас, маловери?
29 И вы не ищите, что ясте, или что пиете: и не возноситеся:
30 всех бо сих языцы мира сего ищут: ваш же отец весть, яко требуете сих.
31 обаче ищите царствия божия, и сия вся приложатся вам.
32 (Зачало 67) Не бойся, малое стадо: яко благоизволи отец ваш дати вам царство.
33 Продадите имения ваша и дадите милостыню. Сотворите себе влагалища неветшающа, сокровище неоскудеемо на небесех, идеже тать не приближается, ни моль растлевает.
34 Идеже бо сокровище ваше, ту и сердце ваше будет.
35 Да будут чресла ваша препоясана, и светилницы горящии:
36 и вы подобни человеком чающим господа своего, когда возвратится от брака, да пришедшу и толкнувшу, абие отверзут ему.
37 блажени раби тии, ихже пришед господь обрящетъ бдящих: аминь глаголю вам, яко препояшется и посадит их, и минув [приступивъ] послужитъ им.
38 И аще приидет во вторую стражу, и в третию стражу приидет, и обрящет (ихъ) тако, блажени суть раби тии.
39 Се же ведите, яко аще бы ведал господинъ храмины, в кий час тать приидет, бдел убо бы, и не бы дал подкопати дому своего.
40 И вы убо будите готови: яко, воньже час не мните, сын человеческий приидет.
41 Рече же ему петр: господи, к нам ли притчу сию глаголеши, или ко всемъ?
42 Рече же господь: (Зачало 68) кто убо есть верный строитель и мудрый, егоже поставитъ господь над челядию своею, даяти во время житомерие?
43 блажен раб той, егоже пришед господь его обрящет творяща тако:
44 воистинну глаголю вам, яко над всем имениемъ своим поставит его.
45 Аще же речет раб той в сердцы своем: коснит господин мой приити: и начнет бити рабы и рабыни, ясти же и пити и упиватися:
46 приидет господин раба того в день, воньже не чает, и в час, воньже не весть: и растешетъ его, и часть его с неверными положит.
47 Той же раб ведевый волю господина своего, и не уготовав, ни сотворив по воли его, биен будет много:
48 неведевый же, сотворив же достойная ранам, биен будет мало. (Зачало 69) Всякому же, емуже дано будет много, много взыщется от него: и емуже предаша множайше, множайше просят [истяжутъ] от него.
49 огня приидох воврещи на землю, и что хощу, аще уже возгореся?
50 крещением же имам креститися, и како удержуся, дондеже скончаются?
51 Мните ли, яко мир приидох дати на землю? ни, глаголю вам, но разделение.
52 Будут бо отселе пять во едином дому разделени, трие на два, и два на три:
53 разделится отец на сына, и сын на отца: мати на дщерь, и дщи на матерь: свекры на невесту свою, и невеста на свекровь свою.
54 глаголаше же и народом: егда узрите облакъ восходящь от запада, абие глаголете: туча грядет: и бывает тако.
55 И егда юг веющь, глаголете: зной будет: и бывает.
56 Лицемери, лице небу и земли весте искушати: времене же сего како не искушаете?
57 Что же и о себе не судите праведное?
58 егда бо грядеши с соперником твоим ко князю, на пути даждь делание [потщися] избыти от него: да не како привлечет тебе к судии, и судия тя предаст слузе, и слуга всадитъ тя в темницу:
59 глаголю тебе: не изыдеши оттуду, дондеже и последнюю медницу воздаси.

 

Глава 13.

Зачало 70.

1 Приидоша же нецыи в то время, поведающе ему о галилеех, ихже кровь пилат смеси с жертвами их.
2 И отвещав иисус рече им: мните ли, яко галилеане сии грешнейши паче всех галилеанъ бяху, яко тако пострадаша?
3 Ни, глаголю вам: но аще не покаетеся, вси такожде погибнете.
4 Или они осмьнадесяте, на нихже паде столп силоамский и поби их, мните ли, яко тии должнейши бяху паче всех живущих во иерусалиме?
5 Ни, глаголю вам: но аще не покаетеся, вси такожде погибнете.
6 глаголаше же сию притчу: смоковницу имяше некий в винограде своем всаждену: и прииде ищя плода на ней, и не обрете:
7 рече же к винареви: се третие лето, отнелиже прихожду ищя плода на смоковнице сей, и не обретаю: посецы ю (убо), вскую и землю упражняетъ?
8 он же отвещав рече ему: господи, остави ю и се лето, дондеже окопаю окрестъ ея и осыплю гноем:
9 и аще убо сотворит плод: аще ли же ни, во грядущее посечеши ю.
10 (Зачало 71) Бяше же учя на едином от сонмищ в субботу:
11 и се жена бе имущи дух недужен летъ осмьнадесять, и бе сляка и не могущи восклонитися отнюд.
12 Видев же ю иисус, пригласи и рече ей: жено, отпущена еси от недуга твоего.
13 И возложи на ню руце: и абие простреся, и славляше бога.
14 отвещав же старейшина собору, негодуя, зане в субботу исцели (ю) иисус, глаголаше народу: шесть дний есть, в няже достоитъ делати: в тыя убо приходяще целитеся, а не в день субботный.
15 отвеща (же) убо ему господь и рече: лицемере, кождо вас в субботу не отрешаетъ ли своего вола или осла от яслий, и ведъ напаяет,
16 сию же дщерь авраамлю сущу, юже связа сатана се осмоенадесяте лето, не достояше ли разрешитися ей от юзы сея в день субботный?
17 И сия ему глаголющу, стыдяхуся вси противляющиися ему: и вси людие радовахуся о всех славныхъ бывающих от него.
18 (Зачало 72) глаголаше же: кому подобно есть царствие божие? и кому уподоблю е?
19 Подобно есть зерну горушну, еже приемъ человек вверже в вертоград свой: и возрасте, и бысть древо велие, и птицы небесныя вселишася в ветвие его.
20 Паки рече: кому уподоблю царствие божие?
21 подобно есть квасу, егоже приемши жена, скры в сатех триех муки, дондеже вскисе все.
22 И прохождаше сквозе грады и веси, учя и шествие творя во иерусалим.
23 Рече же некий ему: господи, аще мало есть спасающихся? он же рече к ним:
24 подвизайтеся внити сквозе тесная врата: яко мнози, глаголю вам, взыщут внити, и не возмогут.
25 отнележе востанет дому владыка, и затворитъ двери, и начнете вне стояти и ударяти в двери, глаголюще: господи, господи, отверзи нам. И отвещав речет вам: не вем вас, откуду есте.
26 Тогда начнете глаголати: ядохом пред тобою и пихом, и на распутиих наших учил еси.
27 И речет: глаголю вам, не вем вас, откуду есте: отступите от мене, вси делателие неправды.
28 Ту будет плачь и скрежет зубом, егда узрите авраама и исаака и иакова и вся пророки во царствии божии, вас же изгонимыхъ вон.
29 И приидут от восток и запад и севера и юга, и возлягут в царствии божии.
30 И се суть последнии, иже будут перви, и суть первии, иже будут последни.
31 (Зачало 73) В той день приступиша нецый от фарисей, глаголюще ему: изыди и иди отсюду, яко ирод хощет тя убити.
32 И рече им: шедше рцыте лису тому: се изгоню бесы и исцеления творю днесь и утре, и в третий скончаюся.
33 обаче подобает ми днесь и утре и в ближний ити: яко невозможно есть пророку погибнути кроме иерусалима.
34 иерусалиме, иерусалиме, избивый пророки и камением побивая посланныя к тебе, колькраты восхотех собрати чада твоя, якоже кокошъ гнездо свое под криле, и не восхотесте?
35 Се оставляется вам дом ваш пуст. Глаголю же вам, яко не имате мене видети, дондеже приидет, егда речете: благословен грядый во имя господне.

 

Глава 14.

Зачало 74.

1 И бысть егда внити ему в дом некоего князя фарисейска в субботу хлеб ясти, и тии бяху назирающе его.
2 И се человек некий, имый водный труд, бе пред ним.
3 И отвещав иисус рече к законником и фарисеом, глаголя: аще достоит в субботу целити?
4 они же умолчаша. И прием исцели его, и отпусти.
5 И отвещав к ним рече: котораго от васъ осел или вол в студенец впадет, и не абие ли исторгнет его в день субботный?
6 И не возмогоша отвещати ему к сим.
7 глаголаше же к званным притчу, обдержя [внимая], како председания избираху, глаголя к ним:
8 егда зван будеши ким на брак, не сяди на преднем месте: еда кто честнее тебе будет званных,
9 и пришед иже тебе звавый и онаго, речетъ ти: даждь сему место: и тогда начнеши со студомъ последнее место держати.
10 Но егда зван будеши, шед сяди на последнемъ месте, да егда приидет звавый тя, речетъ ти: друже, посяди выше: тогда будет ти слава пред званными с тобою.
11 яко всяк возносяйся смирится, и смиряяйся вознесется.
12 (Зачало 75) глаголаше же и ко звавшему его: егда сотвориши обед или вечерю, не зови друговъ твоих, ни братии твоея, ни сродник твоих, ни сосед богатых: еда когда и тии тя такожде воззовут, и будет ти воздаяние.
13 Но егда твориши пир, зови нищия, маломощныя, хромыя, слепыя:
14 и блажен будеши, яко не имут ти что воздати: воздаст же ти ся в воскрешение праведных.
15 Слышав же некий от возлежащих с ним сия, рече ему: блажен, иже снесть обед въ царствии божии.
16 (Зачало 76) он же рече ему: человекъ некий сотвори вечерю велию, и зва многи:
17 и посла раба своего в год вечери рещи званным: грядите, яко уже готова суть вся.
18 И начаша вкупе отрицатися вси. Первый рече ему: село купих, и имам нужду изыти и видети е. Молютися, имей мя отречена.
19 И другий рече: супруг волов купих пять, и гряду искусити их: молю тя, имей мя отречена.
20 И другий рече: жену поях, и сего ради не могу приити.
21 И пришед раб той поведа господину своему сия. Тогда разгневався дому владыка, рече рабу своему: изыди скоро на распутия и стогны града, и нищия и бедныя и слепыя и хромыя введи семо.
22 И рече раб. Господи, бысть якоже повелелъ еси, и еще место есть.
23 И рече господин к рабу: изыди на пути и халуги, и убеди внити, да наполнится домъ мой:
24 глаголю бо вам, яко ни един мужей техъ званных вкусит моея вечери: мнози бо суть звани, мало же избранных.
25 (Зачало 77) Идяху же с ним народи мнози: и обращься рече к ним:
26 аще кто грядет ко мне, и не возненавидитъ отца своего и матерь, и жену, и чад, и братию, и сестр, еще же и душу свою, не может мой быти ученик:
27 и иже не носит креста своего и вследъ мене грядет, не может мой быти ученик.
28 Кто бо от вас, хотяй столп создати, не прежде ли сед расчтет имение, аще имать, еже есть на совершение,
29 да не, когда положит основание и не возможетъ совершити, вси видящии начнут ругатися ему,
30 глаголюще, яко сей человек начат здати и не може совершити.
31 Или кий царь идый ко иному царю снитися с ним на брань, не сед ли прежде совещавает, аще силен есть срести с десятию тысящъ грядущаго со двемадесятма тысящама нань?
32 Аще ли же ни, еще далече ему сущу, моление послав молится о смирении.
33 Тако убо всяк от вас, иже не отречется всего своего имения, не может быти мой ученик.
34 Добро есть соль: аще же соль обуяет, чим осолится?
35 Ни в землю, ни в гной потребна есть: вонъ изсыплют ю. Имеяй уши слышати, да слышит.

 

Глава 15.

Зачало 78.

1 Бяху же приближающеся к нему вси мытарие и грешницы, послушати его.
2 И роптаху фарисее и книжницы, глаголюще, яко сей грешники приемлет и с ними яст.
3 Рече же к ним притчу сию, глаголя:
4 кий человек от вас имый сто овец, и погубль едину от них, не оставит ли девятидесяти и девяти в пустыни, и идет вслед погибшия, дондеже обрящет ю?
5 И обрет возлагает на раме свои радуяся:
6 и пришед в дом, созывает други и соседы, глаголя им: радуйтеся со мною, яко обретохъ овцу мою погибшую.
7 глаголю вам, яко тако радость будет на небеси о едином грешнице кающемся, нежели о девятидесятихъ и девяти праведник, иже не требуют покаяния.
8 Или кая жена имущи десять драхм, аще погубит драхму едину, не вжигает ли светилника, и пометет храмину, и ищет прилежно, дондеже обрящетъ?
9 И обретши созывает другини и соседы, глаголющи: радуйтеся со мною, яко обретох драхму погибшую.
10 Тако, глаголю вам, радость бывает предъ ангелы божиими о едином грешнице кающемся.
11 (Зачало 79) Рече же: человек некий име два сына:
12 и рече юнейший ею [от нихъ] отцу: отче, даждь ми достойную часть имения. И раздели има имение.
13 И не по мнозех днех собрав все мний сын, отиде на страну далече, и ту расточи имение свое, живый блудно.
14 Изжившу же ему все, бысть глад крепокъ на стране той, и той начат лишатися.
15 И шед прилепися единому от житель тоя страны: и посла его на села своя пасти свиния.
16 И желаше насытити чрево свое от рожец, яже ядяху свиния: и никтоже даяше ему.
17 В себе же пришед, рече: колико наемникомъ отца моего избывают хлебы, аз же гладомъ гиблю?
18 Востав иду ко отцу моему, и реку ему: отче, согреших на небо и пред тобою,
19 и уже несмь достоин нарещися сын твой? сотвори мя яко единаго от наемник твоих.
20 И востав иде ко отцу своему. еще же ему далече сущу, узре его отецъ его, и мил ему бысть, и тек нападе на выю его, и облобыза его.
21 Рече же ему сын: отче, согреших на небо и пред тобою, и уже несмь достоинъ нарещися сын твой.
22 Рече же отец к рабом своим: изнесите одежду первую и облецыте его, и дадите перстень на руку его и сапоги на нозе:
23 и приведше телец упитанный заколите, и ядше веселимся:
24 яко сын мой сей мертв бе, и оживе: и изгибл бе, и обретеся. И начаша веселитися.
25 Бе же сын его старей на селе: и яко грядый приближися к дому, слыша пение и лики:
26 и призвав единаго от отрок, вопрошаше: что (убо) сия суть?
27 он же рече ему, яко брат твой прииде: и закла отец твой телца упитанна, яко здрава его прият.
28 Разгневася же, и не хотяше внити. отецъ же его изшед моляше его.
29 он же отвещав рече отцу: се толико лет работаю тебе, и николиже заповеди твоя преступих, и мне николиже дал еси козляте, да со други своими возвеселился бых:
30 егда же сын твой сей, изъядый твое имение с любодейцами, прииде, заклал еси ему телца питомаго.
31 он же рече ему: чадо, ты всегда со мною еси и вся моя твоя суть:
32 возвеселитижеся и возрадовати подобаше, яко брат твой сей мертв бе, и оживе: и изгиблъ бе, и обретеся.

 

Глава 16.

Зачало 80.

1 Глаголаше же ко учеником своим: человек некий бе богат, иже имяше приставника: и той оклеветанъ бысть к нему, яко расточает имения его.
2 И пригласив его рече ему: что се слышу о тебе? воздаждь ответ о приставлении домовнем: не возможеши бо ктому дому строити.
3 Рече же в себе приставник дому: что сотворю, яко господь мой отемлет строение дому от мене? копати не могу, просити стыжуся:
4 разумех, что сотворю, да егда отставленъ буду от строения дому, приимут мя в домы своя.
5 И призвав единаго когождо от должникъ господина своего, глаголаше первому: колицемъ должен еси господину моему?
6 он же рече: сто мер [вать (<::греч>ватов_с<::слав>, т. е. меръ)] масла. И рече ему: приими писание твое, и сед скоро напиши пятьдесят.
7 Потом же рече другому: ты же колицем долженъ еси? он же рече: сто мер пшеницы. И глагола ему: приими писание твое, и напиши осмьдесят.
8 И похвали господь дому строителя неправеднаго, яко мудре сотвори: яко сынове века сего мудрейши паче сынов света в роде своемъ суть.
9 И аз вам глаголю: сотворите себе други от мамоны неправды, да, егда оскудеете, приимутъ вы в вечныя кровы.
10 (Зачало 81) Верный в мале, и во мнозе веренъ есть: и неправедный в мале, и во мнозе неправеден есть.
11 Аще убо в неправеднем имении верни не бысте, во истиннем кто вам веру иметъ?
12 И аще в чужем верни не бысте, ваше кто вам дастъ?
13 Никий же раб может двема господинома работати: ибо или единаго возненавидит, а другаго возлюбит: или единаго держится, о друземъ же нерадети начнет: не можете богу работати и мамоне.
14 Слышаху же сия вся и фарисее, сребролюбцы суще, ругахуся ему.
15 И рече им: (Зачало 82) вы есте оправдающе себе пред человеки, бог же весть сердца ваша: яко, еже есть в человецех высоко, мерзость есть пред богом.
16 Закон и пророцы до иоанна: оттоле царствие божие благовествуется, и всяк в не нудится [с нуждею входитъ].
17 удобее же есть небу и земли прейти, неже от закона единой черте погибнути.
18 Всяк пущаяй жену свою и приводя ину, прелюбы деет: и женяйся пущеною от мужа, прелюбы творит.
19 (Зачало 83) Человек же некий бе богат, и облачашеся в порфиру и виссон, веселяся на вся дни светло.
20 Нищь же бе некто, именем лазарь, иже лежаше пред враты его гноенъ
21 и желаше насытитися от крупиц падающихъ от трапезы богатаго: но и пси приходяще облизаху гной его.
22 Бысть же умрети нищему, и несену быти ангелы на лоно авраамле: умре же и богатый, и погребоша его.
23 И во аде возвед очи свои, сый в муках, узре авраама издалеча, и лазаря на лоне его:
24 и той возглашь рече: отче аврааме, помилуй мя, и посли лазаря, да омочит конец перста своего в воде и устудит язык мой: яко стражду во пламени сем.
25 Рече же авраам: чадо, помяни, яко восприялъ еси благая твоя в животе твоем, и лазарь такожде злая: ныне же зде утешается, ты же страждеши:
26 и над всеми сими между нами и вами пропасть велика утвердися, яко да хотящии прейти отсюду к вам не возмогут, ни иже оттуду, к нам преходят.
27 Рече же: молю тя убо, отче, да послеши его в дом отца моего:
28 имам бо пять братий: яко да засвидетелствуетъ им, да не и тии приидут на место сие мучения.
29 Глагола ему авраам: имут моисеа и пророки: да послушают их.
30 он же рече: ни, отче аврааме: но аще кто от мертвых идет к ним, покаются.
31 Рече же ему: аще моисеа и пророковъ не послушают, и аще кто от мертвых воскреснет, не имут веры.

 

Глава 17.

1 Рече же ко учеником своим: не возможно есть не приити соблазном, горе же, егоже ради приходят:
2 унее ему было бы, аще жернов оселский облежал бы о выи его, и ввержен в море, неже да соблазнит от малых сих единаго.
3 (Зачало 84) Внемлите себе. Аще согрешит къ тебе брат твой, запрети ему: и аще покается, остави ему:
4 и аще седмищи на день согрешит к тебе, и седмищи на день обратится, глаголя: каюся: остави ему.
5 И рекоша апостоли господеви: приложи нам веру.
6 Рече же господь: аще бысте имели веру яко зерно горушно, глаголали бысте убо ягодичине сей: восторгнися и всадися в море: и послушала бы вас.
7 Который же от вас раба имея орюща или пасуща, иже пришедшу ему с села речет: абие минув [пришедъ] возлязи?
8 Но не речет ли ему: уготовай, что вечеряю, и препоясався служи ми, дондеже ям и пию: и потом яси и пиеши ты?
9 еда имать хвалу [благодаритъ] рабу тому, яко сотвори повеленная? не мню.
10 Тако и вы, егда сотворите вся повеленная вам, глаголите, яко раби неключими есмы: яко, еже должни бехом сотворити, сотворихом.
11 И бысть идущу ему во иерусалим, и той прохождаше между самариею и галилеею.
12 (Зачало 85) Входящу же ему в некую весь, сретоша его десять прокаженных мужей, иже сташа издалеча:
13 и тии вознесоша глас, глаголюще: иисусе наставниче, помилуй ны.
14 И видев рече им: шедше покажитеся священником. И бысть идущим им, очистишася.
15 един же от них, видев, яко исцеле, возвратися, со гласом велиим славя бога,
16 и паде ниц при ногу его, хвалу ему воздая: и той бе самарянин.
17 отвещав же иисус рече: не десять ли очистишася? да девять где?
18 како не обретошася возвращшеся дати славу богу, токмо иноплеменник сей?
19 И рече ему: востав иди: вера твоя спасе тя.
20 (Зачало 86) Вопрошен же быв от фарисей, когда приидет царствие божие, отвещав имъ рече: не приидет царствие божие с соблюдениемъ [со усмотрениемъ]:
21 ниже рекут: се зде, или: онде. Се бо царствие божие внутрь вас есть.
22 Рече же ко учеником (своимъ): приидутъ дние, егда вожделеете единаго дне сына человеческаго видети, и не узрите.
23 И рекут вам: се зде, или: се, онде: не изыдите, ни пожените.
24 яко бо молния блистающися от поднебесныя на поднебесней светится: тако будет сын человеческий в день свой.
25 Прежде же подобает ему много пострадати и искушену [отвержену] быти от рода сего.
26 (Зачало 87) И якоже бысть во дни ноевы, тако будет и во дни сына человеческа:
27 ядяху, пияху, женяхуся, посягаху, до негоже дне вниде ное в ковчег: и прииде потоп, и погуби вся.
28 Такожде и якоже бысть во дни лотовы: ядяху, пияху, куповаху, продаяху, саждаху, здаху:
29 воньже день изыде лот от содомлян, одожди камык горящь и огнь с небесе, и погуби вся.
30 По томуже будет и в день, воньже сын человеческий явится.
31 В той день, иже будет на крове, и сосуди его в дому, да не слазит взяти их: и иже на селе, такожде да не возвратится вспять:
32 поминайте жену лотову.
33 Иже аще взыщет душу свою спасти, погубитъ ю: и иже аще погубит ю, живит ю.
34 глаголю вам: в ту нощь будета два на одре едином: един поемлется, а другий оставляется.
35 Будете две вкупе мелюще: едина поемлется, а другая оставляется.
36 Два будета на селе: един поемлется, а другий оставляется.
37 И отвещавше глаголаша ему: где, господи? он же рече им: идеже тело, тамо соберутся и орли.

 

Глава 18.

1 Глаголаше же и притчу к ним, како подобает всегда молитися и не стужати (си),
2 глаголя: (Зачало 88) судия бе некий в некоемъ граде, бога не бояся и человек не срамляяся.
3 Вдова же некая бе во граде том: и прихождаше к нему, глаголющи: отмсти мене от соперника моего.
4 И не хотяше на долзе времени. Последи же рече в себе: аще и бога не боюся, и человекъ не срамляюся:
5 но зане творит ми труды вдовица сия, отмщу ея: да не до конца приходящи застоит [трудитъ] мене.
6 Рече же господь: слышите, что судия неправды глаголетъ?
7 бог же не имать ли сотворити отмщение избранныхъ своих, вопиющих к нему день и нощь, и долготерпя о нихъ?
8 глаголю вам, яко сотворит отмщение их вскоре. обаче сын человеческий пришед убо обрящетъ ли (си) веру на земли?
9 Рече же и ко другим уповающим собою, яко суть праведницы, и уничижающим прочих, притчу сию:
10 (Зачало 89) человека два внидоста в церковь помолитися: един фарисей, а другий мытарь.
11 Фарисей же став, сице в себе моляшеся: боже, хвалу тебе воздаю, яко несмь якоже прочии человецы, хищницы, неправедницы, прелюбодее, или якоже сей мытарь:
12 пощуся двакраты в субботу, десятину даю всего елико притяжу.
13 Мытарь же издалеча стоя, не хотяше ни очию возвести на небо: но бияше перси своя, глаголя: боже, милостив буди мне грешнику.
14 Глаголю вам, яко сниде сей оправданъ в дом свой паче онаго: яко всяк возносяйся смирится, смиряяй же себе вознесется.
15 (Зачало 90) Приношаху же к нему и младенцы, да их коснется: видевше же ученицы запретиша им.
16 иисус же призвав их, глагола: оставите детей приходити ко мне и не браните им: таковыхъ бо есть царствие божие.
17 Аминь бо глаголю вам: иже аще не прииметъ царствия божия яко отроча, не имать внити в не.
18 (Зачало 91) И вопроси его некий князь, глаголя: учителю благий, что сотворив, животъ вечный наследствую?
19 Рече же ему иисус: что мя глаголеши блага, никтоже благ, токмо един бог.
20 Заповеди веси: не прелюбы твори: не убий: не укради: не лжесвидетелствуй: чти отца твоего и матерь твою.
21 он же рече: вся сия сохраних от юности моея.
22 Слышав же сия, иисус рече ему: еще единаго не докончал еси: вся, елика имаши, продаждь, и раздай нищим: и имети имаши сокровище на небеси: и гряди вослед мене.
23 он же слышав сие, прискорбен бысть: бе бо богат зело.
24 Видев же его иисус прискорбна бывша, рече: како не удобь имущии богатство в царствие божие внидут:
25 удобее бо есть велбуду сквозе иглине уши проити, неже богату в царствие божие внити.
26 Реша же слышавшии: то кто может спасенъ быти?
27 он же рече: невозможная у человекъ возможна суть у бога.
28 Рече же петр: се мы оставихом вся и по тебе идохом.
29 он же рече им: аминь глаголю вам, яко никтоже есть, иже оставит дом, или родители, или братию, или сестры, или жену, или чада, царствия ради божия,
30 иже не приимет множицею во время сие, и в век грядущий живот вечный.
31 (Зачало 92) Поемь же обанадесяте ученики своя, рече к нимъ? се восходим во иерусалим, и скончаются вся писанная пророки о сыне человечесте:
32 предадят бо его языком, и поругаются ему, и укорят его, и оплюют его,
33 и бивше убиют его: и в третий день воскреснет.
34 И тии ничесоже от сих разумеша: и бе глагол сей сокровен от них, и не разумеваху глаголемых.
35 (Зачало 93) Бысть же егда приближишася во иерихон, слепец некий седяше при пути прося:
36 слышав же народ мимоходящь, вопрошаше: что убо есть се?
37 Поведаша же ему, яко иисус назарянинъ мимоходит.
38 И возопи, глаголя: иисусе сыне давидов, помилуй мя.
39 И предыдущии прещаху ему, да умолчит: он же паче множае вопияше: сыне давидов, помилуй мя.
40 Став же иисус повеле привести его къ себе: приближшуся же ему к нему, вопроси его,
41 глаголя: что хощеши, да ти сотворю? онъ же рече: господи, да прозрю.
42 иисус же рече ему: прозри: вера твоя спасе тя.
43 И абие прозре, и вслед его идяше, славя бога. И вси людие видевше воздаша хвалу богови.

 

Глава 19.

Зачало 94.

1 И вшед прохождаше иерихон.
2 И се муж нарицаемый закхей, и сей бе старей мытарем, и той бе богат:
3 и искаше видети иисуса, кто есть, и не можаше от народа, яко возрастом мал бе:
4 и предитек, возлезе на ягодичину, да видит, яко хотяше мимо ея проити.
5 И яко прииде на место, воззрев иисусъ виде его, и рече к нему: закхее, потщався слези: днесь бо в дому твоем подобает ми быти.
6 И потщався слезе, и прият его радуяся.
7 И видевше вси роптаху, глаголюще, яко ко грешну мужу вниде витати.
8 Став же закхей рече ко господу: се пол имения моего, господи, дам нищим: и аще кого чимъ обидех, возвращу четверицею.
9 Рече же к нему иисус: яко днесь спасние дому сему бысть, зане и сей сын авраамль есть:
10 прииде бо сын человечь взыскати и спасти погибшаго.
11 Слышащим же им сия, приложь рече притчу, зане близ ему быти иерусалима, и мняху, яко абие царство божие хощет явитися.
12 Рече убо: (Зачало 95) человек некий добра рода иде на страну далече, прияти себе царство и возвратитися.
13 Призвав же десять раб своих, даде имъ десять мнас, и рече к ним: куплю дейте, дондеже прииду.
14 И граждане его ненавидяху его, и послаша послы вслед его, глаголюще: не хощем сему, да царствует над нами.
15 И бысть егда возвратися приим царство, рече пригласити рабы тыя, имже даде сребро, да увесть, какову куплю суть сотворили.
16 Прииде же первый, глаголя: господи, мнасъ твоя придела десять мнас.
17 И рече ему: благо, рабе добрый: яко о мале верен был еси, буди область имея над десятию градов.
18 И прииде вторый, глаголя: господи, мнасъ твоя сотвори пять мнас.
19 Рече же и тому: и ты буди над пятию градов.
20 И другий прииде, глаголя: господи, се мнасъ твоя, юже имех положену во убрусе:
21 бояхся бо тебе, яко человек яр еси, вземлеши, егоже не положил еси, и жнеши, егоже не сеял еси.
22 Глагола же ему: от уст твоих сужду ти, лукавый рабе: ведел еси, яко азъ человек яр есмь, вземлю, егоже не положих, и жну, егоже не сеях:
23 и почто не вдал еси моего сребра купцем, и аз пришед с лихвою истязал бых е?
24 И предстоящим рече: возмите от него мнас, и дадите имущему десять мнас.
25 И реша ему: господи, имать десять мнас.
26 Глаголю бо вам, яко всякому имущему дастся: а от неимущаго, и еже имать, отимется от него:
27 обаче враги моя оны, иже не восхотеша мене, да царь бых был над ними, приведите семо и изсецыте предо мною.
28 И сия рек, идяше преди, восходя во иерусалим.
29 (Зачало 96) И бысть яко приближися в вифсфагию и вифанию, к горе нарицаемей елеон, посла два ученик своих,
30 глаголя: идита в прямную весь: (и) в нюже входяща обрящета жребя привязано, на неже никтоже николиже от человек вседе: отрешша е приведита.
31 И аще кто вы вопрошает: почто отрешаета, сице рцыта ему, яко господь его требует.
32 Шедша же посланная обретоста, якоже рече има.
33 отрешающема же има жребя, рекоша господие его к нима: что отрешаета жребя?
34 она же рекоста, яко господь его требует.
35 И приведоста е ко иисусови: и возвергше ризы своя на жребя, всадиша иисуса.
36 Идущу же ему, постилаху ризы своя по пути.
37 (Зачало 97) Приближающужеся ему уже (абие) к низхождению горе елеонстей, начаша все множество ученик радующеся хвалити бога гласомъ велиим о всех силах, яже видеша,
38 глаголюще: благословен грядый царь во имя господне: мир на небеси, и слава в вышних.
39 И нецыи фарисее от народа реша к нему: учителю, запрети учеником твоим.
40 И отвещав рече им: глаголю вам, яко, аще сии умолчат, камение возопиет.
41 И яко приближися, видев град, плакася о нем,
42 глаголя: яко аще бы разумел и ты, въ день сей твой, еже к смирению [к миру] твоему: ныне же скрыся от очию твоею:
43 яко приидут дние на тя, и обложат врази твои острог о тебе, и обыдут тя, и обымутъ тя отвсюду,
44 и разбиют тя и чада твоя в тебе, и не оставят камень на камени в тебе: понеже не разумел еси времене посещения твоего.
45 (Зачало 98) И вшед в церковь, начат изгонити продающия в ней и купующия,
46 глаголя им: писано есть: дом мой домъ молитвы есть: вы же сотвористе его пещеру разбойником.
47 И бе учя по вся дни в церкви. Архиерее же и книжницы искаху его погубити, и старейшины людем.
48 И не обретаху, что бы сотворили ему: людие бо вси держахуся его, послушающе его.

 

Глава 20.

Зачало 99.

1 И бысть во един от дний онех, учащу ему люди в церкви и благовествующу, приидоша священницы и книжницы со старцы
2 и реша к нему, глаголюще: рцы нам, коею областию сия твориши, или кто есть давый тебе власть сию?
3 отвещав же рече к ним: вопрошу вы и азъ единаго словесе, и рцыте ми:
4 крещение иоанново с небесе ли бе, или от человекъ?
5 они же помышляху в себе, глаголюще, яко аще речем: с небесе, речет: почто убо не веровасте ему?
6 аще ли же речем: от человек, вси людие камением побиют ны: известно бо бе о иоанне, яко пророк бе.
7 И отвещаша: не вемы откуду.
8 иисус же рече им: ни аз глаголю вам, коею областию сия творю.
9 (Зачало 100) Начат же к людем глаголати притчу сию: человек некий насади виноград, и вдаде его делателем, и отиде на лета многа.
10 И во время посла к делателем раба, да от плода винограда дадут ему: делатели же бивше его, послаша тща.
11 И приложи послати другаго раба: они же и того бивше и досадивше ему, послаша тща.
12 И приложи послати третияго: они же и того уязвльше изгнаша.
13 Рече же господин винограда: что сотворю? послю сына моего возлюбленнаго, еда како, его видевше, усрамятся.
14 Видевше же его делателе, мышляху въ себе, глаголюще: сей есть наследник: приидите, убием его, да наше будет достояние.
15 И изведше его вон из винограда, убиша. Что убо сотворит им господин винограда?
16 Приидет и погубит делатели сия, и вдастъ виноград инем. Слышавше же рекоша: да не будет.
17 он же воззрев на них, рече: что убо писаное сие: камень, егоже небрегоша зиждущии, сей бысть во главу угла?
18 Всяк падый на камени том, сокрушится: а на немже падет, стрыет его.
19 (Зачало 101) И взыскаша архиерее и книжницы возложити нань руце в той час, и убояшася народа: разумеша бо, яко к ним притчу сию рече.
20 И наблюдше послаша лаятели [наветниковъ], притворяющих себе праведники быти: да имутъ его в словеси, во еже предати его началству и области игемонове.
21 И вопросиша его, глаголюще: учителю, вемы, яко право глаголеши и учиши, и не на лица зриши, но воистинну пути божию учиши:
22 достоит ли нам кесареви дань даяти, или ни?
23 Разумев же их лукавство, рече к ним: что мя искушаете?
24 покажите ми цату [динарий]: чий имать образъ и надписание? отвещавше же рекоша: кесарев.
25 он же рече им: воздадите убо, яже кесарева, кесареви, и яже божия, богови.
26 И не могоша зазрети глагола его предъ людьми: и дивишася о ответе его, и умолчаша.
27 (Зачало 102) Приступиша же нецыи от саддукей, глаголющии воскреснию не быти, вопрошаху его,
28 глаголюще: учителю, моисей написа нам: аще кому брат умрет имый жену, и той безчаден умрет, да брат его пойметъ жену и возставит семя брату своему.
29 Седмь убо братий бе: и первый поятъ жену, умре безчаден:
30 и поят вторый жену, и той умре безчаден:
31 и третий поят ю: такожде же и вси седмь: и не оставиша чад, и умроша:
32 послежде же всех умре и жена:
33 в воскресение убо, котораго их будетъ жена? седмь бо имеша ю жену.
34 И отвещав рече им иисус: сынове века сего женятся и посягают:
35 а сподобльшиися век он улучити и воскресение, еже от мертвых, ни женятся, ни посягают:
36 ни умрети бо ктому могут: равни бо суть ангелом, и сынове суть божии, воскресния сынове суще.
37 А яко востают мертвии, и моисей сказа при купине, якоже глаголет господа бога авраамля и бога исаакова и бога иаковля.
38 бог же несть мертвых, но живых: вси бо тому живи суть.
39 отвещавше же нецый от книжник рекоша: учителю, добре рекл еси.
40 Ктомуже не смеяху его вопросити ничесоже. Рече же к ним:
41 како глаголют христа сына давидова быти?
42 Сам бо давид глаголет в книзе псаломстей: рече господь господеви моему: седи одесную мене,
43 дондеже положу враги твоя подножие ногама твоима.
44 давид убо господа его нарицает, и како сын ему есть?
45 (Зачало 103) Слышащим же всем людем, рече учеником своим:
46 внемлите себе от книжник, хотящих ходити во одеждах, и любящих целования на торжищихъ и председания на сонмищих, и преждевозлежания на вечерях:
47 иже снедают домы вдовиц, и виною далече молятся [и лицемерно на долзе молятся]: сии приимут лишше осуждение.

 

Глава 21.

1 Воззрев же виде вметающия в храм набдящий имения [в сокровищное хранилище] дары своя богатыя.
2 Виде же и некую вдовицу убогу вметающу ту две лепте,
3 и рече: воистинну глаголю вам, яко вдовица сия убогая множае всех вверже:
4 вси бо сии от избытка своего ввергоша въ дары богови: сия же от лишения своего все житие, еже име, вверже.
5 (Зачало 104) И неким глаголющим о церкви, яко камением добрым и сосуды украшена, рече:
6 сия яже видите, приидут дние, в няже не останет камень на камени, иже не разорится.
7 Вопросиша же его, глаголюще: учителю, когда убо сия будутъ? и что есть знамение, егда хотят сия быти?
8 (Зачало 105) он же рече: блюдите, да не прельщени будете: мнози бо приидут во имя мое, глаголюще, яко аз есмь: и время приближися. Не изыдите убо вослед их.
9 егда же услышите брани и нестроения, не убойтеся: подобает бо сим быти прежде: но не у абие кончина.
10 Тогда глаголаше им: востанет бо языкъ на язык, и царство на царство:
11 труси же велицы по местом, и глади и пагубы будут, страхования же и знамения велия съ небесе будут.
12 (Зачало 106) Прежде же сих всех возложатъ на вы руки своя, и ижденут, предающе на сонмища и темницы, ведомы к царем и владыкам, имене моего ради:
13 прилучится же вам во свидетелство.
14 Положите убо на сердцах ваших, не прежде поучатися отвещавати:
15 аз бо дам вам уста и премудрость, ейже не возмогут противитися или отвещати вси противляющиися вам.
16 Предани же будете и родители и братиею и родом и други, и умертвят от вас:
17 и будете ненавидими от всех имене моего ради.
18 И влас главы вашея не погибнет.
19 В терпении вашем стяжите души ваша.
20 егда же узрите обстоимь иерусалимъ вои, тогда разумейте, яко приближися запустение ему.
21 Тогда сущии во иудеи да бегают в горы: и иже посреде его, да исходят: и иже во странах, да не входят вонь:
22 яко дние отмщению сии суть, яко исполнитися всему писанному.
23 Горе же имущим во утробе и доящимъ в тыя дни: будет бо беда велия на земли, и гнев на людех сих,
24 и падут во острии меча, и пленени будутъ во вся языки: и иерусалим будет попираемь языки, дондеже скончаются времена язык.
25 И будут знамения в солнце и луне и звездах: и на земли туга языком от нечаяния, шума морскаго и возмущения,
26 издыхающим человеком от страха и чаяния грядущих на вселенную: силы бо небесныя подвигнутся.
27 И тогда узрят сына человеческа грядуща на облацех с силою и славою многою.
28 (Зачало 107) Начинающим же сим бывати, восклонитеся и воздвигните главы ваша: зане приближается избавление ваше.
29 И рече притчу им: видите смоковницу и вся древа:
30 егда прошибаются уже, видяще сами весте, яко близ жатва есть.
31 Тако и вы, егда узрите сия бывающа, ведите, яко близ есть царствие божие.
32 Аминь глаголю вам, яко не имать прейти род сей, дондеже вся сия будут.
33 Небо и земля мимоидет, а словеса моя не имут прейти.
34 Внемлите же себе, да не когда отягчают сердца ваша объядением и пиянством и печальми житейскими, и найдет на вы внезапу день той:
35 яко сеть бо приидет на вся живущия на лицы всея земли.
36 Бдите убо на всяко время молящеся, да сподобитеся убежати всех сих хотящихъ быти, и стати пред сыном человеческим.
37 (Зачало 108) Бе же во дни во церкви учя: нощию же исходя водворяшеся в горе нарицаемей елеон.
38 И вси людие из утра прихождаху к нему во церковь послушати его.

 

Глава 22.

1 Приближашеся же праздник опреснок, глаголемый пасха:
2 и искаху архиерее и книжницы, како бы убили его: бояхуся бо людей.
3 Вниде же сатана во иуду нарицаемаго искариот, суща от числа обоюнадесяте.
4 И шед глагола архиереом и воеводам, како его предаст им.
5 И возрадовашася, и совещаша ему сребреники дати:
6 и исповеда [обещася], и искаше удобна времене, да предаст его им без народа.
7 Прииде же день опресноков, воньже подобаше жрети пасху:
8 и посла петра и иоанна, рек: шедша уготовайта нам пасху, да ямы.
9 она же рекоста ему: где хощеши уготоваемъ?
10 он же рече има: се восходящема вама во град, срящет вы человек в скудельнице воду нося: по нем идета в дом, воньже входит,
11 и рцета дому владыце: глаголет тебе учитель: где есть обитель, идеже пасху со ученики моими снемъ?
12 И той вама покажет горницу велию постлану: ту уготовайта.
13 Шедша же обретоста, якоже рече има: и уготоваста пасху.
14 И егда бысть час, возлеже, и обанадесяте апостола с ним.
15 И рече к ним: желанием возжелех сию пасху ясти с вами, прежде даже не прииму мук:
16 глаголю бо вам, яко отселе не имамъ ясти от нея, дондеже скончаются во царствии божии.
17 И приим чашу, хвалу воздав, рече: приимите сию, и разделите себе:
18 глаголю бо вам, яко не имам пити от плода лознаго, дондеже царствие божие приидет.
19 И приим хлеб, хвалу воздав преломи, и даде им, глаголя: сие есть тело мое, еже за вы даемо: сие творите в мое воспоминание.
20 Такожде же и чашу по вечери, глаголя: сия чаша новый завет моею кровию, яже за вы проливается:
21 обаче се, рука предающаго мя со мною (есть) на трапезе,
22 и сын убо человеческий идет по реченному [по предуставленному совету]: обаче горе человеку тому, имже предается.
23 И тии начаша искати в себе, который убо от них хощет сие сотворити.
24 Бысть же и пря в них, кий мнится ихъ быти болий.
25 он же рече им: царие язык господствуютъ ими, и обладающии ими благодателе нарицаются.
26 Вы же не тако: но болий в вас, да будетъ яко мний: и старей, яко служай.
27 Кто бо болий, возлежай ли, или служай? не возлежай ли? Аз же посреде вас есмь яко служай.
28 Вы же есте пребывше со мною в напастехъ моих:
29 и аз завещаваю вам, якоже завеща мне отец мой, царство,
30 да ясте и пиете на трапезе моей во царствии моем: и сядете на престолех, судяще обеманадесяте коленома израилевома.
31 Рече же господь: симоне, симоне, се сатана проситъ вас, да бы сеял, яко пшеницу:
32 аз же молихся о тебе, да не оскудеетъ вера твоя: и ты некогда обращься утверди братию твою.
33 он же рече ему: господи, с тобою готовъ есмь и в темницу и на смерть ити.
34 он же рече: глаголю ти, петре, не возгласитъ петель днесь, дондеже трикраты отвержешися мене не ведети.
35 И рече им: егда послах вы без влагалища и без меха и без сапог, еда чесого лишени бысте? они же реша: ничесоже.
36 Рече же им: но ныне иже имать влагалище, да возмет, такожде и мех: а иже не имать, да продаст ризу свою, и купит нож.
37 Глаголю бо вам, яко еще писаное се, подобает, да скончается о мне, еже: и со беззаконными вменися. Ибо еже о мне, кончину имать.
38 они же реша: господи, се ножа зде два. он же рече им: доволно есть.
39 (Зачало 109) И изшед иде по обычаю в гору елеонскую: по нем же идоша ученицы его.
40 Быв же на месте, рече им: молитеся, да не внидете в напасть.
41 И сам отступи от них яко вержениемъ камене, и поклонь колена моляшеся,
42 глаголя: отче, аще волиши мимонести чашу сию от мене: обаче не моя воля, но твоя да будет.
43 явися же ему ангел с небесе, укрепляя его.
44 И быв в подвизе, прилежнее моляшеся: бысть же пот его яко капли крове каплющия на землю.
45 И востав от молитвы (и) пришед ко учеником, обрете их спящих от печали
46 и рече им: что спите? воставше молитеся, да не внидете в напасть.
47 еще же ему глаголющу, се народ, и нарицаемый иуда, един от обоюнадесяте, идяше пред ними, и приступи ко иисусови целовати его. Сие бо бе знамение дал им: егоже аще лобжу, той есть.
48 иисус же рече ему: иудо, лобзанием ли сына человеческаго предаеши?
49 Видевше же, иже беху с ним, бываемое, реша ему: господи, аще ударим ножемъ?
50 И удари един некий от них архиереова раба, и уреза ему ухо десное.
51 отвещав же иисус рече: оставите до сего. И коснувся уха его, исцели его.
52 Рече же иисус ко пришедшим нань архиереомъ и воеводам церковным и старцем: яко на разбойника ли изыдосте со оружием и дрекольми яти мя?
53 по вся дни сущу ми с вами в церкви, не простросте руки на мя: но се есть ваша година и область темная.
54 емше же его ведоша, и введоша его во двор архиереов. Петр же вослед идяше издалеча.
55 Возгнещшим же огнь посреде двора и вкупе седящим им, седяше петр посреде их.
56 узревши же его рабыня некая седяща при свете [огни], и воззревши нань, рече: и сей с ним бе.
57 он же отвержеся его, глаголя: жено, не знаю его.
58 И помале другий видев его, рече: и ты от них еси. Петр же рече: человече, несмь.
59 И мимошедшу яко часу единому, ин некий крепляшеся глаголя: воистинну и сей с нимъ бе: ибо галилеанин есть.
60 Рече же петр: человече, не вем, еже глаголеши. И абие, еще глаголющу ему, возгласи петель.
61 И обращься господь воззре на петра: и помяну петр слово господне, якоже рече ему, яко прежде даже петель не возгласит, отвержешися мене трикраты.
62 И изшед вон, плакася горько.
63 И мужие держащии иисуса ругахуся ему, биюще:
64 и закрывше его, бияху его по лицу, и вопрошаху его, глаголюще: прорцы, кто есть ударей тя?
65 И ина многа хуляще глаголаху нань.
66 И яко бысть день, собрашася старцы людстии и архиерее и книжницы, и ведоша его на сонм свой,
67 глаголюще: аще ты еси христосъ? рцы нам. Рече же им: аще вам реку, не имете веры:
68 аще же и вопрошу (вы), не отвещаете ми, ни отпустите:
69 отселе будет сын человеческий седяй одесную силы божия.
70 Реша же вси: ты ли убо еси сын божий? он же к ним рече: вы глаголете, яко азъ есмь.
71 они же реша: что еще требуем свидетелства? сами бо слышахом от уст его.

 

Глава 23.

Зачало 110.

1 И воставше все множество их, ведоша его к пилату.
2 Начаша же нань вадити, глаголюще: сего обретохомъ развращающа язык наш и возбраняюща кесареви дань даяти, глаголюща себе христа царя быти.
3 Пилат же вопроси его, глаголя: ты ли еси царь иудеомъ? он же отвещав рече ему: ты глаголеши.
4 Пилат же рече ко архиереом и народу: никоеяже обретаю вины в человеце сем.
5 они же крепляхуся глаголюще, яко развращаетъ люди, учя по всеи иудеи, начен от галилеи до зде.
6 Пилат же слышав галилею, вопроси, аще человекъ галилеанин есть?
7 И разумев, яко от области иродовы есть, посла его ко ироду, сущу и тому во иерусалиме в тыя дни.
8 Ирод же видев иисуса рад бысть зело: бе бо желая от многа времене видети его, зане слышаше многа о нем: и надеяшеся знамение некое видети от него бываемо.
9 Вопрошаше же его словесы многими: онъ же ничесоже отвещаваше ему.
10 Стояху же архиерее и книжницы, прилежно вадяще нань.
11 укорив же его ирод с вои своими и поругався, оболк его в ризу светлу, возврати его к пилату.
12 Быста же друга ирод же и пилат в той день с собою: прежде бо беста вражду имуща между собою.
13 Пилат же созвав архиереи и князи и люди,
14 рече к ним: приведосте ми человека сего, яко развращающа люди: и се аз пред вами истязав, ни единыя же обретаю в человеце сем вины, яже нань вадите:
15 но ни ирод: послах бо его к нему, и се ничтоже достойно смерти сотворено есть о нем:
16 наказав убо его отпущу.
17 Нужду же имяше на вся праздники отпущати им единаго.
18 Возопиша же вси народи, глаголюще: возми сего, отпусти же нам варавву.
19 Иже бе за некую крамолу бывшую во граде и убийство ввержен в темницу.
20 Паки же пилат возгласи, хотя отпустити иисуса.
21 они же возглашаху, глаголюще: распни, распни его.
22 он же третицею рече к ним: что бо зло сотвори сей? ничесоже достойна смерти обретохъ в нем: наказав убо его отпущу.
23 они же прилежаху гласы великими, просяще его на распятие: и устояху [превозмогаху] гласи их и архиерейстии.
24 Пилат же посуди быти прошению их:
25 отпусти же бывшаго за крамолу и убийство всаждена в темницу, егоже прошаху: иисуса же предаде воли их.
26 И яко поведоша его, емше симона некоего киринеа, грядуща с села, возложиша нань крест, нести по иисусе.
27 Идяше же вослед его народ мног людей, и жены, яже и плакахуся и рыдаху его.
28 обращься же к ним иисус рече: дщери иерусалимски, не плачитеся о мне, обаче себе плачите и чад ваших:
29 яко се дние грядут, в няже рекут: блажены неплоды, и утробы, яже не родиша, и сосцы, иже не доиша.
30 Тогда начнут глаголати горам: падите на ны: и холмом: покрыйте ны.
31 Зане, аще в сурове древе сия творят, в сусе что будетъ?
32 (Зачало 111) Ведяху же и ина два злодея съ ним убити.
33 И егда приидоша на место, нарицаемое лобное, ту распяша его и злодея, оваго убо одесную, а другаго ошуюю.
34 иисус же глаголаше: отче, отпусти им: не ведят бо что творят. Разделяюще же ризы его, метаху жребия.
35 И стояху людие зряще. Ругахуся же и князи с ними, глаголюще: иныя спасе, да спасет и себе, аще той есть христос божий избранный.
36 Ругахуся же ему и воини, приступающе и оцет придеюще ему,
37 и глаголаху: аще ты еси царь иудейск, спасися сам.
38 Бе же и написание написано над ним писмены еллинскими и римскими и еврейскими: сей есть царь иудейск.
39 един же от обешеною злодею хуляше его, глаголя: аще ты еси христос, спаси себе и наю.
40 отвещав же другий прещаше ему, глаголя: ни ли ты боишися бога, яко в томже осужденъ еси?
41 и мы убо в правду: достойная бо по деломъ наю восприемлева: сей же ни единаго зла сотвори.
42 И глаголаше иисусови: помяни мя, господи, егда приидеши во царствии си.
43 И рече ему иисус: аминь глаголю тебе, днесь со мною будеши в раи.
44 Бе же час яко шестый, и тма бысть по всей земли до часа девятаго:
45 и померче солнце, и завеса церковная раздрася посреде.
46 И возглашь гласом велиим иисус, рече: отче, в руце твои предаю дух мой. И сия рек издше.
47 Видев же сотник бывшее, прослави бога, глаголя: воистинну человек сей праведн бе.
48 И вси пришедшии народи на позор сей, видяще бывающая, биюще перси своя возвращахуся.
49 Стояху же вси знаемии его издалеча, и жены споследствовавшия ему от галилеи, зрящя сия.
50 И се, муж именем иосиф, советник сый, муж благ и праведн,
51 сей не бе пристал совету и делу их, от аримафеа града иудейска, иже чаяше и самъ царствия божия:
52 сей приступль к пилату, проси телесе иисусова:
53 и снем е обвит плащаницею, и положи е во гробе изсечене, в немже не бе никтоже никогдаже положен.
54 И день бе пяток, и суббота светаше.
55 Вслед же шедшия жены, яже бяху пришли с ним от галилеи, видеша гроб, и яко положено бысть тело его:
56 возвращшася же уготоваша ароматы и миро: и в субботу убо умолчаша по заповеди.

 

Глава 24.

Зачало 112.

1 Во едину же от суббот зело рано приидоша на гроб, носящя яже уготоваша ароматы: и другия с ними:
2 обретоша же камень отвален от гроба,
3 и вшедша не обретоша телесе господа иисуса.
4 И бысть не домышляющимся им о сем, и се мужа два стаста пред ними в ризах блещащихся.
5 Пристрашным же бывшим им и поклоншим лица на землю, рекоста к ним: что ищете живаго с мертвыми?
6 несть зде, но воста: помяните, якоже глагола вам, еще сый в галилеи,
7 глаголя, яко подобает сыну человеческому предану быти в руце человек грешник, и пропяту быти, и в третий день воскреснути.
8 И помянуша глаголы его:
9 и возвращшася от гроба, возвестиша вся сия единомунадесяте и всем прочим.
10 Бяше же магдалина мариа и иоанна и мариа иаковля, и прочия с ними, яже глаголаху ко апостолом сия.
11 И явишася пред ними яко лжа глаголы их, и не вероваху им.
12 (Зачало 113) Петр же востав тече ко гробу, и приник виде ризы едины лежащя: и отиде, в себе дивяся бывшему.
13 И се два от них беста идуща в тойже день в весь, отстоящу стадий шестьдесят от иерусалима, ейже имя еммаус:
14 и та беседоваста к себе о всех сихъ приключшихся.
15 И бысть беседующема има и совопрошающемася, и сам иисус приближився идяше с нима:
16 очи же ею держастеся, да его не познаета.
17 Рече же к нима: что суть словеса сия, о нихже стязаетася к себе идуща, и еста дряхла?
18 отвещав же един, емуже имя клеопа, рече к нему: ты ли един пришлец еси во иерусалим, и не уведел еси бывшихъ в нем во дни сия?
19 И рече има: киихъ? она же реста ему: яже о иисусе назарянине, иже бысть мужъ пророк, силен делом и словом пред богомъ и всеми людьми:
20 како предаша его архиереи и князи наши на осуждение смерти, и распяша его:
21 мы же надеяхомся, яко сей есть хотя избавити израиля: но и над всеми сими, третий сей день есть днесь, отнелиже сия быша.
22 Но и жены некия от нас ужасиша ны, бывшия рано у гроба:
23 и не обретша телесе его, приидоша, глаголющя, яко и явление ангел видеша, иже глаголютъ его жива.
24 И идоша нецыи от нас ко гробу, и обретоша тако, якоже и жены реша: самаго же не видеша.
25 И той рече к нима: о несмысленная и косная сердцем, еже веровати о всех, яже глаголаша пророцы:
26 не сия ли подобаше пострадати христу и внити в славу свою?
27 И начен от моисеа и от всех пророк, сказаше има от всех писаний яже о нем.
28 И приближишася в весь, в нюже идяста: и той творяшеся далечайше ити.
29 И нуждаста его, глаголюща: облязи с нама, яко к вечеру есть, и приклонился есть день. И вниде с нима облещи.
30 И бысть яко возлеже с нима, и приимъ хлеб благослови, и преломив даяше има:
31 онема же отверзостеся очи, и познаста его: и той невидимь бысть има.
32 И рекоста к себе: не сердце ли наю горя бе в наю, егда глаголаше нама на пути и егда сказоваше нама писания?
33 И воставша в той час, возвратистася во иерусалим, и обретоста совокупленных единонадесяте и иже бяху с ними,
34 глаголющих, яко воистинну воста господь и явися симону.
35 И та поведаста, яже быша на пути, и яко познася има в преломлении хлеба.
36 (Зачало 114) Сия же им глаголющим, (и) самъ иисус ста посреде их, и глагола им: мир вам.
37 убоявшеся же и пристрашни бывше, мняху дух видети:
38 и рече им: что смущени есте? и почто помышления входят в сердца ваша?
39 видите руце мои и нозе мои, яко самъ аз есмь: осяжите мя и видите: яко духъ плоти и кости не имать, якоже мене видите имуща.
40 И сие рек, показа им руце и нозе.
41 еще же неверующим им от радости и чудящимся, рече им: имате ли что снедно зде?
42 они же даша ему рыбы печены часть и от пчел сот.
43 И взем пред ними яде,
44 рече же им: сия суть словеса, яже глаголахъ к вам еще сый с вами, яко подобает скончатися всем написанным в законе моисеове и пророцехъ и псалмех о мне.
45 Тогда отверзе им ум разумети писания
46 и рече им, яко тако писано есть, и тако подобаше пострадати христу и воскреснути от мертвых в третий день,
47 и проповедатися во имя его покаянию и отпущению грехов во всех языцех, наченше от иерусалима:
48 вы же есте свидетелие сим:
49 и се, аз послю обетование отца моего на вы: вы же седите во граде иерусалимсте, дондеже облечетеся силою свыше.
50 Извед же их вон до вифании и воздвигъ руце свои, (и) благослови их.
51 И бысть егда благословляше их, отступи от них и возношашеся на небо.
52 И тии поклонишася ему и возвратишася во иерусалим с радостию великою:
53 и бяху выну в церкви, хваляще и благословяще бога. Аминь.

Вам понравилась молитва - оцените?

Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры
Джерело Яндекс.Метрика Твоя Библия: Библия, ответы на вопросы, христианская библиотека. Каталог Христианских сайтов Каталог Православных сайтов Маранафа: Библия, словарь, каталог сайтов, форум, чат и многое другое. Рейтинг@Mail.ru