Книга пятая Моисеeва — Второзаконие

Книга пятая Моисеева

Второзаконие

Глава 1.

1 Сия словеса, яже глагола моисей всему израилю об ону страну иордана, в пустыни на запады, близ чермнаго моря, между фараном и тофолом, и ловоном и авлоном и [златыми рудами]:
2 единонадесяти дний от хорива путь чрезъ гору сиир даже до кадисъ-варни.
3 И бысть в четыредесятое лето, в первыйнадесять месяц, в первый день месяца глагола моисей ко всем сыном израилевым, по всему елико заповеда ему господь к ним,
4 по убиении сиона царя аморрейска, жившаго во есевоне, и ога царя васанска, жившаго во астарофе и во едраине,
5 об ону страну иордана в земли моавли, нача моисей изъясняти закон сей, глаголя:
6 господь бог наш глагола нам в хориве, глаголя: да довлеет вам жити в горе сей:
7 обратитеся и воздвигнитеся вы, и внидите в гору аморрейску, и ко всем населником аравы, в гору и поле, и к югу и в приморскую землю ханааню, и во антиливан, даже до реки великия, реки евфрата:
8 видите, предах пред вами землю, вшедше наследите землю, еюже клятся господь отцем вашим, аврааму и исааку и иакову, дати ю имъ и семени их по них.
9 И рекох к вам во время оно глаголя: не возмогу един водити вас:
10 господь бог ваш умножил вы есть, и се, есте днесь яко звезды небесныя множеством:
11 господь бог отец ваших да приложит вам, яко да будете тысящами сугубо, и да благословитъ вас, якоже глагола вам:
12 како возмогу един носити труды ваша и тяжести ваша и пререкания ваша?
13 изберите себе мужы мудры и уметелны и смысленны в племенех ваших, и поставлю их над вами старейшины вам.
14 И отвещасте ми и рекосте: добро слово, еже глаголал еси сотворити.
15 И взях от вас мужы мудры и уметелны и смысленны, и поставих их владети надъ вами тысященачалники и стоначалники, и пятьдесятоначалники и десятоначалники, и писмовводители судиям вашим.
16 И заповедах судиям вашим во время оно, глаголя: разслушайте посреде братий ваших, и судите праведно посреде мужа и посреде брата его и посреде пришелца его:
17 да не познаете лица в суде, малому и великому судиши, и не устыдишися лица человеча, яко суд божий есть: и речь, яже аще жестока будет у вас, донесете ю ко мне, и услышу ю.
18 И заповедах вам во время оно вся словеса, яже сотворите.
19 И воздвигшеся от хорива, проидохом всю пустыню великую и страшную ону, юже видесте, путь горы аморрейски, якоже заповеда нам господь бог наш: и приидохом до кадисъ-варни.
20 И рекох вам: приидосте до горы аморрейски, юже господь бог наш дает вам:
21 видите, предаде господь бог ваш пред лицемъ вашим землю: вшедше наследите, якоже глагола господь бог отец ваших вам: не бойтеся, ни ужасайтеся.
22 И приидосте ко мне вси и рекосте: да послемъ мужы пред нами, и да соглядают нам землю, и да поведят нам ответ, путь, имже дойдемъ ея, и грады, в няже внидем.
23 И угодно бысть слово предо мною, и пояхъ от вас дванадесять мужей, мужа единаго от коегождо племене.
24 И обратившеся взыдоша на гору, и приидоша до дебри [грезновныя], и соглядаша ю:
25 и взяша в руце свои от плода земли и принесоша к нам, и глаголаху: блага земля, юже господь бог наш дает нам.
26 И не восхотесте взыти, но преслушасте глаголъ господа бога вашего:
27 и возроптасте в кущах своих и рекосте: ненависти ради изведе ны господь из земли египетския предати нас в руки аморрейския, потребити нас:
28 камо мы взыдемъ? Братия же ваша отвратиша сердца ваша, глаголюще: язык велик и многъ и крепчае нас, и грады велицы и ограждени даже до небесе, но и сыны исполинов видехомъ тамо.
29 И глаголах к вам: не ужасайтеся, ниже убойтеся от них:
30 господь бог ваш предходяй пред лицем вашим, той повоюет их с вами, по всему елико сотвори вам в земли египетстей пред очима вашима,
31 и в пустыни сей, юже видесте: яко воспита тебе господь бог твой, якоже некий человекъ питает сына своего, по всему пути в оньже ходисте, дондеже приидосте на место сие.
32 И в словеси сем не веровасте господеви богу вашему,
33 иже предходит пред вами в путь избрати вам место, путеводя вас огнем нощию, показуя вам путь, имже ити по нем, и облаком во дни.
34 И услыша господь (богъ) глас словес ваших, и разгневався клятся, глаголя:
35 аще узрит кто от мужей сих землю благую сию, еюже аз кляхся отцем их,
36 разве халев сын иефонниин, сей узритъ ю, и сему дам землю, на нюже взыде, и сыномъ его, понеже прилежит господеви.
37 И на мя разгневася господь вас ради, глаголя: ниже ты внидеши тамо:
38 иисус сын навин, иже стоит пред тобою, сей внидет тамо: сего укрепи, яко сей даст ю в наследие израилю:
39 и отрочата ваша, о нихже глаголасте, яко в пленении имут быти, и всяко отроча младо, еже не весть днесь добра или зла, сии внидутъ тамо, и сим дам ю, и сии наследят ю:
40 и вы обратившеся ополчистеся в пустыню, путем к чермному морю.
41 И отвещасте и рекосте мне: согрешихомъ пред господем богом нашим: мы шедше повоюем, по всему елико заповеда господь бог наш нам. И вземше кийждо орудия ратная своя и собравшеся взыдосте на гору.
42 И рече господь ко мне: рцы им: не восходите, ниже ратуйте, несмь бо с вами, и да не будете сотрени пред враги вашими.
43 И глаголах к вам, и не послушасте мене: и преступисте слово господне, и понудившеся взыдосте на гору.
44 И изыде аморрей живущий на горе той противу вам, и прогна вас, аки бы пчелы творили, и уязвляху вас от сиира даже до ермы.
45 (И возвратистеся,) и седше плакасте предъ господем, и не послуша господь гласа вашего, ниже внят вам:
46 и седесте в кадисе дни многи, елики дни тогда седесте.

 

Глава 2.

1 И возвратившеся воздвигохомся в пустыню, путемъ моря чермнаго, якоже глагола господь ко мне: и обходихомъ гору сиир дни многи.
2 И рече господь ко мне:
3 довлеет вам обхождати гору сию: возвратитеся убо к северу:
4 и людем заповеждь, глаголя: вы пройдите сквозе пределы братии вашея, сынов исавовых, живущих в сиире, и убоятся вас и ужаснутся зело:
5 не сотворите с ними рати: не дах бо вамъ от земли их ниже стопы ноги, яко во жребий дах сыном исавовым гору сиир:
6 сребром пищу купите себе у них и ядите, и воду в меру возмите от них на цене и пийте:
7 ибо господь бог твой благослови тебе во всякомъ деле руку твоею: разумей, како прошел еси пустыню великую и страшную сию: се, четыредесять лет господь бог твой с тобою, и не востребовалъ еси словесе.
8 И минухом братию свою сыны исавли, живущия в сиире, у пути аравскаго от елона и от гесионъ-гавера, и возвратившеся преидохомъ путь в пустыню моавлю.
9 И рече господь ко мне: не совраждуйтеся моавитомъ и не сотворите с ними рати: не дах бо вамъ от земли их во жребий, сыном бо лотовым дахъ ароир наследити.
10 оммины прежде седяху на ней, народ великъ и мног и крепок якоже енакими:
11 рафаины глаголются и сии, якоже и енакими: и моавити прозывают я оммины.
12 И в сиире седяше хоррей прежде, но сынове исавовы потребиша я и искорениша я от лица своего: и вселишася вместо их, имже образомъ сотвори израиль земли наследия своего, юже даде господь им.
13 ныне убо вы востаните и воздвигнитеся, и пройдите дебрь заретову.
14 И дни, в няже отидохом от кадисъ-варни дондеже преидохом дебрь заретову, тридесять и осмь лет, дондеже паде весь род мужей воинских от полка, якоже клятся им господь бог.
15 И рука божия бяше на них, погубити я от полка, дондеже падоша.
16 И бысть внегда падоша вси мужи воинстии умирающе от среды людий,
17 и рече господь ко мне, глаголя:
18 ты прейдеши днесь пределы моавлими ароир:
19 и пришедше близ сынов амманих, не совраждуйтеся им и не сотворите с ними рати: не дам бо тебе от земли сынов амманих во жребий, яко сыном лотовым дах ю во жребий.
20 Земля рафаинска возыменуются: рафаини бо на ней прежде живяху: амманитяне же прозываютъ их зоммин:
21 язык велик и мног и крепок, якоже и енакими: и погуби я господь от лица их, и прияша наследие и вселишася вместо ихъ даже до сего дне:
22 якоже сотвориша сыном исавовым живущимъ в сиире, имже образом потребиша хорреа от лица своего и наследиша их, и вселишася вместо их даже до сего дне:
23 и евее живущии во асирофе даже до газы, и каппадоки изшедшии из каппадокии потребиша я, и вселишася вместо их.
24 ныне убо востаните и воздвигнитеся, и прейдите вы дебрь арноню: се, предах в руце твои сиона царя есевоня аморрейска и землю его: начни наследовати, сотвори с ним рать днешний день:
25 начинай даяти трепет твой и страх твой пред лицем всех языков сущих под небесем, иже слышавше имя твое возмятутся, и болезнь приимут от лица твоего.
26 И послах послы от пустыни кедамоф к сиону царю есевоню словесы мирными, глаголя:
27 да пройду сквозе землю твою: по пути пройду, не совращуся ни на десно, ни на лево:
28 пищу на цене даси ми, и ям: и воду на цене даси ми, и пию: точию ногама моима да прейду:
29 якоже сотвориша ми сынове исавли живущии в сиире и моавити живущии во ароире, дондеже прейду иордан на землю, юже господь бог нашъ дает нам.
30 И не восхоте сион царь есевонь, да пройдемъ сквозе его, яко ожесточи господь бог нашъ дух его и укрепи сердце его, да предастся в руце твои якоже во днешний день.
31 И рече господь ко мне: се, начах предаяти пред лицем твоим сиона царя есевоня аморрейска и землю его, и начинай наследити землю его.
32 И изыде сион царь есевонь противу намъ сам и вси людие его на брань во иассу:
33 и предаде его господь бог наш пред лицемъ нашим в руце наши: и убихом его, и сыны его и вся люди его:
34 и одержахом вся грады его во оно время, и разорихом всяк град, ктому и жены их и дети их не оставихом живы:
35 токмо скот пленихом себе, и корысти градовъ взяхом.
36 Из ароира, иже есть при устии водотечи арнони, и град иже есть в дебри, и даже до горы галаадовы, не бысть град уцелевый от нас: вся предаде господь бог наш в руце наши:
37 токмо в земли сынов амманих не приступахомъ ко всем прилежащим к водотечи иавокове и ко градом иже в горах, якоже повеле намъ господь бог наш.

 

Глава 3.

1 И обратившеся взыдохом путем иже к васану: и изыде ог царь васанский противу нам, самъ и вси людие его с ним на брань во едраим.
2 И рече господь ко мне: не убойся его, яко в руце твои предах его, и вся люди его, и всю землю его: и сотвориши ему, якоже сотворил еси сиону царю аморрейску, иже живяше во есевоне.
3 И предаде его господь бог наш в руце наши, и ога царя васанска, и вся люди его: и избихом его, дондеже не остася от него семя:
4 и одержахом вся грады его во время оно, не бысть града, егоже не взяхом от них: шестьдесят градов, вся пределы аргова царя ога в васане,
5 вся грады тверды, стены высоки, врата и вереи, кроме градов ферезейских многих зело:
6 потребихом их, якоже сотворихом сиону царю есевоню, и потребихом вся грады, вкупе и жены их и чада:
7 и вся скоты, и корысти градныя пленихомъ себе,
8 и взяхом в то время землю от рук двухъ царей аморрейских, иже быша об он полъ иордана, от водотечи арнони, даже и до горы аермона.
9 Финикиане прозывают аермон саниором, аморрей же прозва его саниром.
10 Вси грады мисоровы, и весь галаад, и весь васан даже до елхи и едраима, грады царствия огова в васане:
11 яко точию ог царь васанский остася от рафаинов: се, одр его одр железен, се, той есть в краеградии Греч.: акра. сынов аммановых: девять лакот долгота его и четыри лакти широта его лактем мужеским.
12 И землю ту наследихом во оно время от ароира, иже есть у устия водотечи арнони, и пол горы галаадовы: и грады его дах рувиму и гаду:
13 и оставшее галаадово, и все васанское царство огово дах полуплемени манассиину, и весь пределъ аргова, весь васан оный, земля рафаиня вменится.
14 И иаир сын манассиин взя вся пределы аргова, даже до предел гаргасинских и махафинских: прозва я по имени своему васан авоф иаир, даже до сего дне:
15 и махиру дах галаад,
16 и рувиму и гадови дах от галаада даже до водотечи арнони, среди водотечи предел, и даже до иавока: водотеча предел сынов амманих:
17 и арава и иордан предел от махенерефа и даже до моря аравскаго, моря сланаго, подъ асидофом фазги от востока.
18 И повелех вам во время оно, глаголя: господь бог ваш даде вам землю сию во жребий: вооружени поидите пред лицем братии вашея сыновъ израилевых, всяк сильный:
19 точию жены ваша и дети ваша и скоти ваша, вем, яко скот мног есть вам, да пребудут во градех ваших, яже дах вам:
20 дондеже упокоит господь бог наш братию вашу, якоже и вас, и наследят и сии землю, юже господь бог ваш дает им об ону страну иордана: и возвратитеся кийждо в наследие свое еже дах вам.
21 И иисусу заповедах во время оно, глаголя: очи ваши видеша вся, елика сотвори господь бог наш обоим царем сим, тако сотворитъ господь бог наш всем царством, ихже сквозе ты пройдеши тамо:
22 не убойтеся от них, яко господь бог нашъ сам поборет по вас.
23 И молихся господеви во оно время, глаголя:
24 господи боже, ты начал еси показовати твоему рабу крепость твою и силу твою, и руку крепкую и мышцу высокую: кто бо есть бог на небеси или на земли, иже сотворит, якоже сотворилъ еси ты, и по крепости твоей?
25 прешед убо увижду землю благую сию, яже об ону страну иордана, гору сию благу и антиливан.
26 И презре мя господь вас ради, и не послуша мене, и рече господь ко мне: довлеет ти, не приложи к сему глаголати словесе сего:
27 взыди на верх горы изсеченыя и воззри очима твоима к морю и северу, и югу и на востоки, и виждь очима твоима, яко не прейдеши иордана сего:
28 и заповеждь иисусу, и укрепи его, и утеши его: яко сей прейдет предъ лицем людий сих, и сей разделит им въ наследие всю землю, юже еси видел.
29 И пребыхом во юдоли близ дому фогорова.

 

Глава 4.

1 И ныне, израилю, послушай оправданий и судов, елика аз учу вас днесь делати, да поживете и умножитеся, и вшедше наследите землю, юже господь бог отец ваших даетъ вам в наследие:
2 да не приложите к словеси, еже аз заповедаю вам, ниже да отимете от него: сохраните заповеди господа бога нашего, елика аз заповедаю вамъ днесь.
3 очи ваши видеша вся, елика сотвори господь бог наш веельфегору: яко всяк человекъ иже иде вслед веельфегора, потреби его господь бог наш от вас:
4 вы же, прилежащии господеви богу вашему, живете вси до днесь:
5 видите, показах вам оправдания и суды, якоже заповеда мне господь бог мой сотворити сице на земли, в нюже вы идете тамо, наследити ю:
6 и сохраните, и сотворите, яко сия премудрость ваша и смышление пред всеми языки, елицы аще услышат вся оправдания сия и рекут: се, людие премудрии и уметелны: языкъ великий сей.
7 Кий бо язык тако велий, емуже есть бог, приближаяйся ему, яко господь бог нашъ во всех, в нихже аще призовем его?
8 и кий язык велик, емуже суть оправдания и суды правы по всему закону сему, егоже аз даю пред вами днесь?
9 Вонми себе и снабди душу твою зело, и не забуди всех словес, яже видеста очи твои, и да не отступят от сердца твоего вся дни живота твоего: и да наставиши сыны твоя и сыны сынов твоих,
10 в день в оньже стоясте пред господем богомъ вашим в хориве в день собрания, егда рече господь ко мне: собери ко мне люди, и да слышатъ словеса моя, да научатся боятися мене вся дни, в няже сии живут на земли, и сыны своя да научат.
11 И приидосте, и стасте под горою: и гора горяше огнем даже до небесе, тма, мрак, и вихр.
12 И глагола господь к вам на горе из среды огня: глас словес его вы слышасте, и образа не видесте, токмо глас:
13 и возвести вам завет свой, егоже заповеда вам творити, десять словес, и написа я на двоих скрижалех каменных:
14 и мне заповеда господь во время оно, научити вас оправданием и судам, творити вам я на земли, в нюже вы входите тамо наследити ю.
15 И снабдите души своя зело, яко не видесте всякаго подобия в день, в оньже глагола господь к вам в горе хориве из среды огня:
16 не беззаконнуйте, и не сотворите себе самимъ подобия ваянна, всякаго образа подобия мужеска пола или женска:
17 и подобия всякаго скота, иже есть на земли, подобия всякия птицы пернатыя, под небесемъ парящия:
18 подобия всякаго гада, иже плежет по земли: подобия всякия рыбы, елики суть в водахъ под землею:
19 да не когда воззрев на небо и видев солнце и луну и звезды, и всю красоту небесную, прельстився поклонишися им и послужиши им, яже раздели господь бог твой всем языком, иже под небесем.
20 Вас же взя господь бог и изведе вас от пещи железны из египта, да будете ему людие в жребий, якоже в днешний день.
21 И господь бог разгневася на мя о словесехъ ваших, и клятся, да не прейду иордана сего и да не вниду в землю, юже господь бог твой даетъ тебе в наследие:
22 аз бо умру в сей земли, и не прейду иордана сего, вы же прейдете и наследите землю благую сию.
23 Вонмите вы, да не когда забудете завета господа бога вашего, егоже завеща к вам, и да не сотворите сами себе изваянна подобия всех, яже заповеда тебе господь бог твой,
24 яко господь бог твой огнь потребляяй есть, бог ревнитель.
25 Аще же родиши сыны и сыны сынов твоих, и умедлите на земли, и возбеззаконнуете, и сотворите изваянно подобие всякаго, и сотворите злое пред господем богом вашим, еже раздражити его,
26 засвидетелствую вам днесь небесем и землею, яко пагубою погибнете от земли, на нюже вы преходите чрез иордан тамо наследити ю: не пребудете много дний на ней, но потреблениемъ потребитеся:
27 и разсыплет вы господь во всех языцех, и останетеся мали числом во языцех, в няже введет вы господь тамо,
28 и послужите тамо богом иным, делом рукъ человеческих, древу и камению, иже не узрятъ и не услышат, ни ядят, ни обоняют:
29 и взыщете тамо господа бога вашего, и обрящете его, егда взыщете его от всего вашего сердца и от всея души вашея в скорби вашей.
30 И постигнут тя вся сия словеса в последняя дни, и обратишися к господеви богу твоему, и услышиши глас его,
31 яко бог щедр и милосерд господь бог твой, не оставит тебе, ниже потребит тебе, не забудетъ завета отец твоих, имже клятся им.
32 Вопросите дний первых, бывших прежде вас, от дне в оньже сотвори бог человека на земли, и от края небесе даже до края небесе, аще бысть по словеси великому сему, аще слышано бысть сицево:
33 аще (кий) язык слыша глас бога живаго глаголюща от среды огня, имже образом слышалъ еси ты, и жив был еси:
34 аще искуси бог вшед взяти себе языкъ от среды языка искушением, и знамении и чудесы, и бранию и рукою сильною, и мышцею высокою и видении великими, по всему елико сотвори господь бог наш во египте пред тобою зрящим,
35 яко да разумееши ты, яко господь бог твой сей бог есть, и несть разве его.
36 от небесе слышан сотвори тебе глас свой, еже научити тя, и на земли показа тебе огнь свой великий, и глаголы его слышал еси из среды огня:
37 занеже возлюби отцы твоя, избра семя их по них вас, и изведе тя сам силою своею великою из египта
38 потребити языки великия и крепчайшия тебе пред лицем твоим, ввести тя, дати тебе землю их в наследие, якоже имаши днесь.
39 И увеси днесь, и обратишися умом, яко господь бог твой сей бог на небеси горе и на земли долу, и несть разве его,
40 и да сохраниши заповеди его и оправдания его, елика аз заповедаю тебе днесь, да благо тебе будет и сыном твоим по тебе, яко да будете долголетни на земли, юже господь бог твой дает тебе вся дни.
41 Тогда отдели моисей три грады об ону страну иордана на восток солнца,
42 еже убегати тамо убийце, иже аще убиет ближняго не ведый, и сей не ненавидя его прежде вчера и третияго дне, и да вбегнет во един град от сих и живъ будет:
43 восор в пустыни в земли селней рувиму, и раммоф в галааде гадду, и гавлон в васане манассии.
44 Сей закон, егоже предложи моисей предъ сыны израильтескими:
45 сия свидения и оправдания и суды, елика глагола моисей сыном израилевым в пустыни, изшедшим им из земли египетския,
46 об он пол иордана, в дебри, близъ дому фогорова, в земли сиона царя аморрейска, иже живяше во есевоне, егоже изби моисей и сынове израилевы, изшедшим им из земли египетския.
47 И наследиша землю его и землю ога царя васанска, дву царей аморрейских, иже бяху об он пол иордана на восток солнца,
48 от ароира, иже есть во устии водотечи арнони и у горы сиона, яже есть аермон,
49 всю араву об ону страну иордана, на восток солнца под асидофом тесаным.

 

Глава 5.

1 И призва моисей всего израиля и рече к ним: слыши, израилю, оправдания и суды, елика азъ глаголю во уши ваши во днешний день, и научитеся их, и сохраните творити я.
2 господь бог ваш завеща вам завет в хориве:
3 не отцем вашим завеща господь заветъ сей, но токмо вам: вы же зде вси живи днесь.
4 Лицем к лицу глагола господь к вам на горе изъ среды огня,
5 и аз стоях между господем и вами во время оно возвестити вам глаголы господня, яко убоястеся от лица огня и не взыдосте на гору, глаголя:
6 аз есмь господь бог твой, изведый тя изъ земли египетския, от дому работы:
7 да не будут тебе бози инии пред лицемъ моим.
8 Да не сотвориши себе кумира, ни всякаго подобия, елика на небеси горе, и елика на земли низу, и елика в водах под землею,
9 да не поклонишися им, ниже послужиши им: яко аз есмь господь бог твой, бог ревнив, отдаяй грехи отцев на чада до третияго и четвертаго рода ненавидящим мене,
10 и творяй милость в тысящах любящим мене и хранящим повеления моя.
11 Да не приимеши имене господа бога твоего всуе: не очистит бо господь бог твой приемлющаго имя его всуе.
12 Снабди день субботный святити его, якоже заповеда тебе господь бог твой:
13 шесть дний делай, и да сотвориши вся дела твоя,
14 в день же седмый суббота господу богу твоему: да не сотвориши в онь всякаго дела, ты и сын твой и дщерь твоя, раб твой и раба твоя, вол твой и осел твой и всяк скот твой, и пришлец обитаяй у тебе, да почиет рабъ твой и раба твоя, и осел твой, якоже и ты:
15 и да помянеши, яко (и ты) раб был еси в земли египетстей и изведе тя господь богъ твой оттуду рукою крепкою и мышцею высокою: сего ради повеле тебе господь бог твой, еже хранити день субботный и святити его.
16 Чти отца твоего и матерь твою, якоже заповеда тебе господь бог твой, да благо ти будетъ и да долголетен будеши на земли, юже господь бог твой дает тебе.
17 Не убий.
18 Не прелюбодействуй.
19 Не укради.
20 Не послушествуй на ближняго твоего свидетелства ложна.
21 Не пожелай жены ближняго твоего, не пожелай дому ближняго твоего, ни села его, ни раба его, ни рабыни его, ни вола его, ни осляте его, ни всякаго скота его, ниже всех, елика ближняго твоего суть.
22 Сия словеса глагола господь ко всему сонму вашему на горе из среды огня: тма, мрак, буря, глас велик, и не приложи: и написа я на двоихъ скрижалех каменных, и даде мне.
23 И бысть яко услышасте глас из среды огня, и гора горяше огнем, и приидосте ко мне вси началницы племен ваших и старейшины ваши,
24 и ресте: се, показа нам господь бог нашъ славу свою, и глас его слышахом из среды огня: во днешний день видехом, яко возглаголетъ бог человеку, и жив будет:
25 и ныне да не измрем, яко потребит насъ огнь великий сей, аще приложим мы слышати глас господа бога нашего ктому, и умрем:
26 кая бо плоть, яже слыша глас бога жива, глаголюща из среды огня, якоже мы, и жива будетъ?
27 приступи ты, и послушай вся, елика къ тебе речет господь бог наш, и ты речеши къ нам вся, елика речет господь бог наш к тебе, и услышим, и сотворим.
28 И услыша господь глас словес ваших, глаголющимъ вам ко мне, и рече господь ко мне: слышах гласъ словес людий сих, елика глаголаша к тебе: право вся, елика глаголаша:
29 кто даст еже быти тако сердцу их въ них, яко боятися мене и хранити заповеди моя во вся дни, да благо будет им и сыномъ их во веки?
30 гряди, рцы им: возвратитеся вы в домы своя:
31 ты же зде стани со мною, и возглаголю к тебе вся заповеди и оправдания и суды, еликимъ научиши их: и да сотворят сице в земли, юже аз даю им в жребий:
32 и сохраните творити, якоже заповеда тебе господь бог твой: не совратитеся ни на десно, ни на лево,
33 по всему пути, егоже заповеда тебе господь бог твой ходити в нем, да тя упокоит, и благо тебе будет: и многи дни будете на земли, юже наследите.

 

Глава 6.

1 И сия заповеди и оправдания и суды, елика заповеда господь бог ваш научити вас творити тако на земли, в нюже вы входите тамо, наследити ю:
2 да боитеся господа бога вашего, хранити вся оправдания его и заповеди его, яже аз заповедаю тебе днесь, ты и сынове твои, и сыны сыновъ твоих, во вся дни живота твоего, да многи дни пребудете.
3 И послушай, израилю, и снабди творити, да благо ти будет, и да умножитеся зело, якоже глагола господь бог отец ваших, дати тебе землю кипящую млеком и медом. И сия оправдания и суды, елика заповеда господь (богъ) сыномъ израилевым в пустыни, изшедшим им из земли египетския.
4 Слыши, израилю: господь бог наш господь единъ есть.
5 И возлюбиши господа бога твоего от всего сердца твоего и от всея души твоея и от всея силы твоея.
6 И да будут словеса сия, яже аз заповедаю тебе днесь, в сердцы твоем и в души твоей,
7 и да накажеши ими сыны твоя, и да возглаголеши о них седяй в дому и идый путем, и лежа и востая:
8 и навяжеши я в знамение на руку твою, и да будут непоколеблема пред очима твоима:
9 и да напишете я на празех храмин вашихъ и врат ваших.
10 И будет егда введет тя господь бог твой в землю, еюже клятся отцем твоим, аврааму и исааку и иакову, дати тебе грады велики и добры, ихже не создал еси,
11 домы полны всяких благ, ихже не наполнилъ еси, потоки ископаны, ихже не ископал еси, винограды и маслины, ихже не насадил еси: и ядый и насытився,
12 вонми себе, да не разширится сердце твое, да не забудеши господа бога твоего, изведшаго тебе из земли египетския, от дому работы.
13 господа бога твоего да убоишися, и тому единому послужиши, и к нему прилепишися, и именемъ его кленешися.
14 Да не ходите вслед богов иных, боговъ языческих, иже окрест вас:
15 яко бог ревнив господь бог твой посреде тебе: да не разгневався яростию господь богъ твой на тя, потребит тя от лица земли.
16 Да не искусиши господа бога твоего, якоже искушасте во искушении.
17 Храня да сохраниши заповеди господа бога твоего, свидения его и оправдания его, елика заповеда тебе:
18 и да сотвориши угодное и благое предъ господем богом твоим, да благо будет тебе, и внидеши и наследиши землю благую, еюже клятся господь отцем вашим,
19 отгнати вся враги твоя от лица твоего, якоже глагола господь.
20 И будет егда вопросит тя сын твой утре, глаголя: что суть свидения и оправдания и суды, елика заповеда господь бог наш намъ?
21 и речеши сыну твоему: раби бехом фараону в земли египетстей, и изведе нас господь бог оттуду рукою крепкою и мышцею высокою:
22 и даде господь (богъ) знамения и чудеса велика и зла во египте на фараона и на дом его и на силу его пред нами,
23 и нас изведе господь бог наш оттуду, да введет нас дати нам землю сию, еюже клятся господь бог наш отцем нашим, дати ю нам:
24 и заповеда нам господь творити вся оправдания сия, боятися господа бога нашего, да благо будетъ нам во вся дни, да живем, якоже и днесь,
25 и милосердие будет нам, аще сохраним творити вся заповеди закона сего пред господем богомъ нашим, якоже заповеда нам.

 

Глава 7.

1 И будет егда введет тя господь бог твой въ землю, в нюже входиши тамо наследити ю, и изженет языки великия и многия от лица твоего, хеттеа и гергесеа, и аморреа и хананеа, и ферезеа и евеа и иевусеа, седмь языковъ великих и многих, и крепчае вас:
2 и предаст их господь бог твой в руце твои, и избиеши я, пагубою погубиши я, да не завещаеши к ним завета, ниже да помилуеши их,
3 ниже сватовства сотвориши с ними: дщери своея не даси сыну его, и дщере его да не поймеши сыну твоему:
4 отвратит бо сына твоего от мене, и послужитъ богом инем: и разгневается господь гневомъ на вы, и потребит тя вскоре.
5 Но сице да сотворите им: требища их разсыплете, и столпы их да сокрушите, и дубравы их да посечете, и ваяния богов их да сожжете огнем:
6 яко люди святи есте господеви богу вашему: и вас избра господь бог ваш, да будете ему люди избранни паче всех языков, елицы на лицы земли.
7 Не яко мнози есте паче всех язык, предприя вас господь и избра вас господь, вы бо есте меншии от всех языков:
8 но яко возлюби господь вас, и храня клятву, еюже клятся отцем вашим, изведе господь вас рукою крепкою и мышцею высокою, и избави тя от дому работы, от руки фараона царя египетска,
9 и да увеси, яко господь бог твой сей бог: бог верный, храняй завет свой и милость любящим его и хранящим заповеди его в тысящи родов:
10 и воздаяй ненавидящим его в лице потребити я, и не умедлит ненавидящим, в лице воздастъ им.
11 И да сохраниши заповеди и оправдания и суды сия, елика аз заповедаю тебе творити днесь.
12 И будет егда послушаете вся оправдания сия, и сохраните и сотворите я, сохранит и господь бог твой тебе завет и милость, якоже клятся отцем вашим,
13 и возлюбит тя, и благословит тя и умножитъ тя, и благословит плод чрева твоего и плодъ земли твоея, пшеницу твою и вино твое и елей твой, и стада волов твоих и паствы овецъ твоих на земли, юже клятся господь отцемъ твоим дати тебе:
14 и благословен будеши паче всех язык и не будет в вас безчадный, ниже неплоды, и в скотех твоих:
15 и отимет господь бог твой от тебе всяко разслабление и всяку язю египетскую злую, яже видел еси и елика веси: не возложитъ на тя, но возложит я на вся ненавидящия тебе:
16 и ясти будеши вся корысти языков, яже господь бог твой дает тебе: да не пощадит ихъ око твое, и да не послужиши богом их, яко претыкание тебе есть сие.
17 Аще же речеши во уме твоем: яко языкъ сей множае паче мене, како возмогу аз потребити я?
18 не убоишися их: памятию да помянеши, елика сотвори господь бог твой фараону и всемъ египтяном,
19 искушения великая, яже видеста очи твои, знамения она и чудеса великая, руку крепкую и мышцу высокую, якоже изведе тя господь бог твой: тако сотворит господь бог вашъ всем языком, ихже ты боишися от лица их:
20 и шершни послет господь бог твой на них, дондеже потребятся оставшиися и сокрывшиися от тебе:
21 не повредишися от лица их: яко господь богъ твой в тебе, бог великий и крепкий:
22 и погубит господь бог твой языки сия от лица твоего, помалу малу: не возможеши погубити их вскоре, да не будет земля пуста, и умножатся зверие дивии на тя:
23 и предаст их господь бог твой в руце твои, и погубиши их погублением великим, дондеже искорените их:
24 и предаст цари их в руце твои, и погубите имя их от места онаго: ниже единъ постоит пред лицем твоим, дондеже погубиши их.
25 Ваяния богов их да сожжете огнем, да не похощеши злата и сребра взяти себе от них, да не когда согрешиши того ради, яко мерзость есть господеви богу твоему:
26 и да не внесеши мерзости в свой дом, и проклят будеши якоже сия: ненавидением да возненавидиши, и омерзением да омерзиши, яко проклятие есть.

 

Глава 8.

1 Вся заповеди, яже аз заповедаю вам днесь, снабдите творити, да живете, и умножитеся, и внидете, и наследите землю благую, еюже клятся господь бог отцем вашим.
2 И да помянеши весь путь, имже проведе тебе господь бог твой, сие четыредесятое лето в пустыни, да искусит тя и озлобит тя, и уразумеются яже в сердцы твоем, аще сохраниши заповеди его или ни.
3 И озлоби тя, и гладом замори тя, и напита тя манною, еяже ты не уведел еси, ни отцы твои: да возвестит тебе, яко не о хлебе единем жив будет человек, но о всяком словеси исходящем из устъ божиих жив будет человек.
4 Ризы твоя не обетшаша на тебе: нозе твои не язвишася, се, четыредесять лет.
5 И уразумееши сердцем твоим, яко имже образом аще кий человек накажет сына своего, тако господь бог твой накажет тя.
6 И сохраниши заповеди господа бога твоего ходити в путех его и боятися его.
7 господь бо бог твой введет тя в землю благую и многу, идеже водотечи водныя и источники бездны исходящия по полям и горам,
8 в землю пшеницы и ячменя, (идеже) виногради, смокви и щипцы, в землю масличия елеа и меда:
9 в землю на нейже не с нищетою снеси хлебъ твой, и ничесого востребуеши на ней: в землю в нейже камение железно, и от гор ея ископаеши медь:
10 и ясти будеши, и насытишися, и благословиши господа бога твоего на земли блазей, юже даде тебе.
11 Вонми себе, не забуди господа бога твоего, еже не сохранити заповеди его и судбы и оправдания его, елика аз заповедаю тебе днесь:
12 да не когда ядый и насытився, и домы добры соградив и вселився в ня,
13 и волом твоим и овцам твоим умножившимся тебе, сребру и злату умножившимся тебе, и всем, елика тебе будут, умножившимся тебе,
14 вознесешися сердцем твоим, и забудеши господа бога твоего, изведшаго тя из земли египетския, из дому работы:
15 проведшаго тя сквозе пустыню великую и страшную ону, в нейже змии угрызающия, и скорпии, и жажда, в нейже не бяше воды: изведшаго тебе из камене несекома источник водный:
16 питавшаго тя манною в пустыни, еяже не ведел еси ты, ниже ведяху отцы твои, да озлобит тя и да искусит тя, и благо тебе сотворит на последок твой:
17 да не речеши в сердцы твоем: крепость моя и сила руки моея сотвори мне силу великую сию,
18 и помянеши господа бога твоего, яко той даде тебе крепость, еже сотворити силу, и да уставит завет свой, имже клятся отцемъ твоим, якоже днесь.
19 И будет аще забвением забудеши господа бога твоего, и пойдеши вслед богов иных, и послужиши им, и поклонишися им, засвидетелствую вам днесь небесем и землею, яко пагубою погибнете:
20 якоже и прочии языцы, яже господь богъ погубляет от лица вашего, тако погибнете, занеже не послушасте гласа господа бога вашего.

 

Глава 9.

1 Слыши, израилю, ты преходиши иордан днесь, внити еже наследити языки великия и крепчайши паче вас, грады велики и ограждены до небесе,
2 люди велики и многи и предолги, сыны енаковы, яже ты веси, и ты слышал еси: кто противу станет сыном енаковымъ?
3 И увеси днесь, яко господь бог твой сей предыдет пред лицем твоим: огнь попаляяй есть: сей потребит я, и сей отвратитъ я от лица твоего, и потребит я вскоре, якоже рече тебе господь.
4 Не рцы в сердцы твоем, егда потребитъ господь бог твой языки сия пред лицем твоим, глаголя: правд ради моих введе мя господь наследити землю благую сию:
5 не ради правды твоея, ниже преподобия ради сердца твоего ты входиши наследити землю их, но нечестия ради и беззакония языков сихъ господь от лица твоего потребит я, и да уставитъ завет, имже клятся господь отцем вашим, аврааму и исааку и иакову:
6 и да увеси днесь, яко не ради правды твоея господь бог твой дает тебе землю благую сию наследити: яко людие жестоковыйнии есте.
7 Помни, не забуди, колико разгневасте господа бога своего в пустыни: от негоже дне изыдосте из земли египетския, даже внидосте в место сие, не покаряющеся совершасте яже противу господа:
8 и в хориве разгневасте господа, и разгневася господь на вы, потребити вас,
9 восходящу мне на гору, взяти скрижали каменныя, скрижали завета, яже завеща господь к вам: и пребых в горе четыредесять дний и четыредесять нощей: хлеба не ядох и воды не пих.
10 И даде ми господь две скрижали каменны, написаны перстом божиим, и на них бяху написана вся словеса, яже глагола господь к вам в горе изъ среды огня в день собрания:
11 и бысть по четыредесяти днех и по четыредесяти нощех, даде ми господь две скрижали каменны, скрижали завета,
12 и рече господь ко мне: востани и сниди скоро отсюду, яко беззаконноваша людие твои, яже извел еси из земли египетски: соступиша скоро с пути, егоже заповедал еси им, и сотвориша себе слияние.
13 И рече господь ко мне: глаголах тебе единою и дважды, глаголя: видех люди сия, и се, людие жестоковыйнии суть:
14 остави мя, да потреблю я, и погублю имя их под небесем, и сотворю тя в язык великъ и крепок и мног паче сих.
15 И возвратився снидох с горы, и гора горяше огнем: и две скрижали свидений во обою руку моею:
16 и видев, яко согрешисте пред господемъ богом вашим, и сотвористе себе телца слияна, и соступисте с пути скоро, егоже заповеда господь вам творити,
17 и взем обе скрижали, повергох я изъ руку моею и сокруших их пред вами.
18 И молихся пред господем второе, якоже и первое, четыредесять дний и четыредесять нощей, хлеба не ядох и воды не пих, всех ради грехов ваших, имиже согрешисте, творяще злое пред господем богом вашим, еже разгневати его:
19 и боязнен бех гнева ради и ярости, яко разгневася господь на вы, да потребит вас: и послуша мене господь и в то время.
20 И на аарона разгневася господь зело, еже погубити его: и молихся и за аарона во время оно.
21 И грех ваш, егоже сотвористе, телца, взях его и сожгох его на огни, и избих его и сотрох его зело, даже бысть дробен, и бысть яко прах, и изсыпахъ прах в водотечу сходящую с горы.
22 И в [запалении], и во [искушении], и во [гробех похотения] разгневасте господа бога вашего.
23 И егда посла вас господь от кадисъ-варни, глаголя: взыдите и наследите землю, юже аз даю вам: и сопротивистеся глаголу господа бога вашего, и не веровасте ему, и не послушасте гласа его:
24 и не покаряющеся бысте господу от дне, в оньже познася вам.
25 И молихся пред господем четыредесять дний и четыредесять нощей, в няже молихся: рече бо господь погубити вас.
26 И молихся богу и рекох: господи, господи царю богов, не погуби людий твоих и наследия твоего, еже избавил еси крепостию твоею великою, яже извел еси из земли египетския крепостию твоею великою и рукою сильною и мышцею твоею высокою:
27 помяни авраама и исаака и иакова, рабы твоя, имже клялся еси собою: не призирай на жестокость людий сих, и на нечестие ихъ и на грехи их:
28 да не когда рекут живущии на земли, отнюдуже извел еси нас, глаголюще: не могий господь ввести их в землю, юже им обеща, и ненавидя их господь, изведе погубити их в пустыни:
29 и сии людие твои и жребий твой, ихже извелъ еси из земли египетския крепостию твоею великою и мышцею твоею высокою.

 

Глава 10.

1 Во оно время рече господь ко мне: истеши себе две скрижали каменны якоже первыя, и взыди ко мне на гору, и да сотвориши себе ковчегъ древян:
2 и напишу на скрижалех словеса, яже бяху на скрижалех первых, ихже сокрушил еси, и да вложиши я в ковчег.
3 И сотворих ковчег от древ негниюших, и истесах две скрижали каменны якоже и первыя, и взыдох на гору: и обе скрижали во обою руку моею:
4 и написа на скрижалех по писанию первому десять словес, яже глагола господь к вам на горе от среды огня, и даде я господь мне.
5 И обратився снидох с горы, и вложих скрижали в ковчег, егоже сотворих: и беста ту, якоже повеле ми господь.
6 И сынове израилевы воздвигошася от вирофа сынов иакимлих в мисадай: тамо умре аарон, и погребен бысть ту, и бысть жрец елеазаръ сын его вместо его.
7 оттуду же воздвигошася в гадгад, и от гадгада до етавафа, земли водотечи вод.
8 Во оно время отдели господь племя левиино носити ковчег завета господня, предстояти предъ господем, служити и молитися и благословляти о имени его до днешняго дне:
9 сего ради несть левитом части и жребия в братии их: господь сам жребий их, якоже рече им.
10 И аз стоях на горе четыредесять дний и четыредесять нощей, и послуша господь мене и во время сие, и не восхоте господь погубити вас.
11 И рече господь ко мне: гряди, воздвигнися предъ людьми сими, и да внидут и наследят землю, еюже кляхся отцем их, дати ю им.
12 И ныне, израилю, что просит господь бог твой у тебе, точию еже боятися господа бога твоего и ходити во всех путех его, и любити его и служити господу богу твоему от всего сердца твоего и от всея души твоея,
13 хранити заповеди господа бога твоего и оправдания его, елика аз заповедаю тебе днесь, да благо тебе будетъ?
14 Се, господа бога твоего небо и небо небесе, земля и вся елика суть на ней:
15 обаче отцы ваши произволи господь любити их, и избра семя их по них, вас, паче всех язык, в день сей.
16 И обрежите жестокосердие ваше, и выи вашея не ожесточите ктому:
17 ибо господь бог ваш сей бог богов и господь господей, бог великий и крепкий и страшный, иже не дивится лицу, ниже вземлет дара:
18 творяй суд пришелцу и сиру и вдовице, и любит пришелца дати ему хлеб и ризу.
19 И возлюбите пришелца: пришелцы бо бесте въ земли египетстей.
20 господа бога твоего да убоишися, и тому (*единому) послужиши, и к нему прилепишися, и именемъ его кленешися:
21 той хвала твоя и той бог твой, иже сотвори тебе великая и славная сия, яже видесте очи твои:
22 в седмидесятих и пяти душах снидоша отцы твои во египет: ныне же сотвори тя господь богъ твой яко звезды небесныя множеством.

 

Глава 11.

1 И да возлюбиши господа бога твоего, и сохраниши стражбы его и оправдания его и заповеди его и суды его во вся дни.
2 И увесте днесь, яко не чада ваша, елицы не сведеша, ниже видеша наказания господа бога твоего и величества его, и руки сильныя и мышцы высокия,
3 и знамений его и чудес его, елика сотвори посреде египта фараону царю египетску и всей земли его,
4 и елика сотвори силе египетстей: колесницы их и кони их како потопи вода моря чермнаго, пред лицем их, гонящим им вслед вас, и погуби их господь бог до днешняго дне:
5 и елика сотвори вам в пустыни, дондеже приидосте на место сие:
6 и елика сотвори дафану и авирону сыномъ елиава сына рувимля, яже отверзши земля уста своя пожре их, и домы их, и кущи их, и все их имение с ними, среди всего израиля:
7 яко очи ваши видеста вся дела господня великая, елика сотвори в вас днесь.
8 И сохраните вся заповеди его, елики аз заповедаю вам днесь, да живете и умножитеся, и внидете и наследите землю, на нюже вы преходите чрез иордан тамо наследити ю:
9 да многи дни будете на земли, еюже клятся господь отцем вашим дати им и семени их по них землю кипящую млеком и медом.
10 есть бо земля, на нюже вы идете тамо наследити ю, не яко земля египетска есть, отнюдуже изыдосте, егда сеют семя и напаяютъ ю ногами своими, аки вертоград зелейный:
11 земля же, в нюже ты входиши тамо наследити ю, земля нагорная и равная, от дождя небеснаго напаяется водою:
12 земля, на нюже господь бог твой присещаетъ всегда, очи господа бога твоего на ней от начала лета и до конца лета.
13 Аще же слухом послушаете всех заповедий его, яже аз заповедаю тебе днесь, любити господа бога твоего и служити ему от всего сердца твоего и от всея души твоея,
14 и даст дождь земли твоей во время ранный и поздный, и собереши жита твоя и вино твое и елей твой:
15 и даст пищу на селех скотом твоим.
16 И ядый и насытився, внемли себе, да не разширится сердце твое, и преступите, и послужите богом иным, и поклонитеся им:
17 и яростию разгневается господь на вы и затворитъ небо, и не будет дождя, и земля не даст плода своего, и погибнете вскоре от земли благия, юже господь даде вам.
18 И вложите словеса сия в сердца ваша и въ душу вашу, и наважите я в знамение на руку вашу, и будут непоколебима между очима вашима,
19 и научите сим чада своя глаголати сия, седящу тебе в дому и идущу тебе в пути, и возлежащу ти и востающу ти:
20 и напишите я на празех домов ваших и врат ваших,
21 да умножатся дние ваши и дни сынов вашихъ на земли, еюже клятся господь отцем вашимъ дати им, якоже дние неба на земли.
22 И будет аще слухом послушаете всех заповедий сих, яже аз заповедаю вам днесь творити, любити господа бога вашего и ходити во всех путехъ его и прилеплятися к нему,
23 тогда изженет господь вся языки сия от лица вашего, и одержите языки великия и крепкия паче вас.
24 Всякое место, на немже станет стопа ногъ ваших, вам будет: от пустыни и антиливана, и от реки великия евфрата, и даже до моря, еже на западе, будут пределы ваши:
25 никтоже противостанет пред лицем вашим: и трепет ваш и страх ваш возложит господь бог ваш на лице всея земли, на нюже аще взыдете, якоже глагола господь к вам.
26 Се, аз даю пред вами днесь благословение и клятву:
27 благословение, аще послушаете заповедий господа бога вашего, елики аз заповедаю вам днесь:
28 и клятву, аще не послушаете заповедий господа бога вашего, елики аз заповедаю вам днесь, и совратитеся с пути, егоже заповедах вам, идуще послужити богом иным, ихже не весте.
29 И будет егда введет тебе господь бог твой в землю, в нюже преходиши тамо наследити ю, да даси благословение на горе гаризин и клятву на горе гевал:
30 не се ли сия суть об ону страну иордана, за путем иже на западе солнца, в земли ханаана обитающаго на западе солнца близ галгала у [дуба высокаго]?
31 Вы бо преходите иордан, вшедше наследити землю, юже господь бог ваш дает вам в жребий вся дни, и приимете ю, и вселитеся в ню:
32 и да сохраните творити вся заповеди его и суды его, яже аз даю пред вами днесь.

 

Глава 12.

1 И сия заповеди и суды, яже снабдите творити на земли, юже господь бог отец ваших даетъ вам в жребий во вся дни, в няже вы жити будете на земли:
2 пагубою погубите вся места, в нихже служиша тамо языцы богом своим, яже вы приимете, на горах высоких и холмех и под древомъ сеновным:
3 и да раскопаете требища их и сокрушите столпы их, и дубравы их ссечете, и ваяние богов их сожжете огнем, и погубите имя их от места того.
4 Да не сотворите тако господу богу вашему,
5 токмо на месте, идеже изберет господь богъ ваш, во единем от племен ваших, нарещи имя его тамо и призвати, и взыщете, и внидете тамо:
6 и принесете тамо всесожжения ваша, и жертвы ваша, и начатки ваши, и обеты ваши, и вольная ваша, и исповедания ваша, первенцы волов вашихъ и овец ваших,
7 и ясти будете тамо пред господем богом вашимъ и возвеселитеся о всех, на няже возложите руки ваша вы и домове ваши, якоже тя благословилъ есть господь бог твой.
8 Да не сотворите тамо всех, елика вы творите зде днесь, кийждо угодное пред собою:
9 не приидосте бо до ныне в покой и в наследие, еже господь бог ваш дает вам.
10 И егда прейдете иордан и вселитеся на земли, юже господь бог ваш даст в наследие вам, и упокоит вас от всех враг ваших, иже окрест вас, и вселитеся со утверждением:
11 и будет место, еже изберет господь богъ ваш призвати имя его тамо, ту принесете вся, елика аз заповедаю вам днесь: всесожжения ваша и жертвы ваша, и десятины ваша и начатки рук ваших, и всяк избран дар ваш, елика обещаете господеви богу вашему:
12 и возвеселитеся пред господем богом вашимъ вы и сынове ваши и дщери ваши, и рабы ваши и рабыни ваши, и левити, иже у врат ваших: яко несть им части ни жребия с вами.
13 Внемли себе, да не принесеши всесожжений твоихъ на всяком месте, еже аще узриши,
14 токмо на месте, еже изберет господь богъ твой, в единем от племен твоих, тамо да принесеши всесожжения твоя и тамо сотвориши вся, елика аз заповедаю тебе днесь.
15 Но токмо всем желанием души твоея да пожреши, и снеси мяса по благословению господа бога твоего, еже даде тебе во всяком граде: нечистый при тебе и чистый вкупе да яст я, яко серну, или еленя.
16 Токмо крове да не снесте: на землю пролиете ю, аки воду.
17 Не возможеши ясти в градех твоих десятины пшеницы твоея и вина твоего и елеа твоего, первенцов волов твоих и овец твоих, и всех обетов, елики обещаете, и исповеданий ваших, и начатков рук ваших:
18 токмо пред господем богом твоим да снеси я на месте, еже изберет господь бог твой себе, ты и сын твой и дщерь твоя, и рабъ твой и раба твоя, и левит, и пришлец иже во градех твоих, и возвеселишися пред господемъ богом твоим во всех, на няже возложиши руку твою.
19 Внемли себе, да не оставиши левитина во все время, дондеже еси жив на земли.
20 Аще же разширит господь бог твой пределы твоя, якоже глагола тебе, и речеши: снем мяса, аще вожделеет душа твоя, яко ясти мяса, во всем желании души твоея да снеси мяса.
21 Аще же далече отстоит место от тебе, еже изберет господь бог твой призывати имя его тамо, и заколеши от волов твоих и от овец твоих, яже даст тебе бог твой, якоже заповедах тебе, и снеси во градехъ твоих по желанию души твоея.
22 якоже ястся серна и елень, тако да снеси е: нечистый при тебе, и чистый такожде да снест.
23 Вонми крепце, еже не ясти крове: кровь бо есть душа его: да на снестся душа съ мясы:
24 да не снесте ея, на землю пролиете ю аки воду:
25 да не снеси ю, да благо тебе будет и сыном твоим по тебе во веки, аще сотвориши се, еже добро и угодно есть предъ господем богом твоим.
26 Разве святая твоя, яже аще будут тебе, и обеты твоя взем да приидеши на место, еже изберет господь бог твой оное себе призвати имя его тамо:
27 и сотвориши всесожжения твоя: мяса да вознесеши на олтарь господа бога твоего, кровь же жертвъ твоих да пролиеши пред степени олтаря господа бога твоего, мяса же да снеси.
28 Снабди и послушай, и да сотвориши вся словеса, яже аз заповедаю тебе, да благо тебе будетъ и сыном твоим во веки, аще сотвориши добро и угодно пред господем богом твоим.
29 Аще же потребит господь бог твой языки, в няже входиши ты тамо, наследити землю их, от лица твоего, и приимеши ю в наследие, и вселишися в земли их:
30 внемли себе, да не взыщеши последовати им, по потреблении их от лица твоего, не взыщи богов их, глаголя: якоже творят языцы сии богом своим, сотворю и аз:
31 да не сотвориши господу богу твоему тако: мерзостна бо господеви, яже возненавиде, сотвориша богомъ своим, яко сыны своя и дщери своя жгутъ огнем богом своим.
32 Всяко слово, еже аз заповедаю тебе днесь, сие снабди творити: да не приложиши къ сему, ни отимеши от него.

 

Глава 13.

1 Аще же востанет в тебе пророк, или видяй соние, и даст тебе знамение или чудо,
2 и приидет знамение или чудо, еже рече к тебе, глаголя: идем да послужим богомъ иным, ихже не весте:
3 да не послушаете глагол пророка того, или видящаго сон той: яко искушает господь богъ твой вас, еже уведети, аще любите господа бога вашего всем сердцем вашим и всею душею вашею:
4 вслед господа бога вашего ходите, и того бойтеся, и заповеди его сохраните, и гласа его послушайте, и тому служите, и к нему прилепитеся:
5 и пророк той или видяй сон да умрет: глагола бо, еже прельстити тя от господа бога твоего изведшаго тя из земли египетския, избавльшаго тя из работы, еже совратити тя с пути, егоже заповеда тебе господь богъ твой ходити по нему: и погубите сами злое от вас самих.
6 Аще же помолит тя брат твой от отца твоего или от матере твоея, или сын твой, или дщерь твоя, или жена твоя яже на лоне твоем, или друг твой, равен души твоей, отай глаголя: идем и послужим богом иным, ихже не видел еси ты и отцы твои,
7 от богов языков, иже окрест вас, близъ сущих тебе, или дальних от тебе, от конца земли до конца земли,
8 да не соизволиши ему и не послушаеши его, и да не пощадит его око твое, и не возлюбиши его, ниже прикрыеши его:
9 возвещая да возвестиши о нем, и рука твоя да будет на нем в первых убити его, и руки всех людий послежде:
10 и побиют его камением, и умрет, яко взыскал есть отвратити тебе от господа бога твоего, изведшаго тя из земли египетския, от дому работы:
11 и весь израиль услышав убоится, и не приложит ктому сотворити по словеси сему злому еже в вас.
12 Аще же услышиши в единем от градовъ твоих, яже господь бог дает тебе, вселитися тамо, глаголющих:
13 изыдоша мужи беззаконнии от вас и отвратиша вся живущия во граде их, глаголюще: идем, да послужим богом иным, ихже не весте,
14 и да взыщеши и вопросиши и обыщеши зело, и се, истинно слово яве, сотворися мерзость сия в вас:
15 убивая да убиеши вся живущия во граде онем убийством меча, проклятием проклените его, и вся яже в нем,
16 и вся корысти его собереши на распутия его, и зажжеши град огнем, и вся корысти его всенародно пред господем богом твоим, и будет пуст во веки, не возградится по сем:
17 и да ничтоже прилепится от проклятия руце твоей, да отвратится бог от ярости гнева своего: и даст тебе милость и помилует тя, и умножит тя, якоже глагола тебе, якоже клятся господь отцем твоим,
18 аще послушаеши гласа господа бога твоего, еже хранити вся заповеди его, яже аз заповедаю тебе днесь, творити доброе и угодное предъ господем богом твоим.

 

Глава 14.

1 Сынове есте господа бога вашего: да не нарезуетеся и не возложите плеши между очима вашима надъ мертвым:
2 яко людие святи есте господеви богу вашему, и вас избра господь бог ваш быти вам людемъ избранным ему от всех языков иже на лицы земли.
3 Да не снесте всякия мерзости.
4 Сия скоты ядите: телца от говяд и агнца от овец и козла от коз:
5 еленя и серну, и буйвола и ланя, и зубря и онагра и сайгака.
6 Всяк скот на двое деля пазнокти, и копыто на двое копытя, и отрыгая жвание в скотех, да ясте.
7 И сих да не снесте от отрыгающих жвание и от делящих пазнокти на двое, но копыт не раздвояющих: велблюда и заяца и хирогрилля: яко отрыгают жвание сии, но копыт не раздвояют, нечиста сия вам суть.
8 И свинии, яко на двое делит пазнокти и копыта раздвояет, и сия жвания не отрыгает, нечиста сия вам есть: от мяс их да не ясте, и мертвечинам их да не прикоснетеся.
9 И сия да ясте от всех яже в воде: вся, имже суть перие и чешуя, ядите.
10 И всех, имже несть перия, ни чешуи, да не ясте: нечиста суть вам.
11 Всяку птицу чисту да ясте.
12 И сих да не ясте от них:
13 орла и грифа и орла морскаго,
14 и неясыти и иктина и подобных сим:
15 и врана и врабия, и выпелицы и сухолапля, и ястреба и подобных сим:
16 и врана нощнаго и лилика и подобных сим:
17 и еродиа и лебедя, и ивина и катаракта, и вдода
18 и нощнаго нетопыря, и сыча и теслоноса, и харадриона и подобных сим, и порфириона.
19 Вся гады птичия нечиста суть вам: да не ясте от них.
20 Всяку птицу чисту да ясте.
21 Всякия мертвечины да не ясте: приселнику, иже во градех твоих, да дасте, и да яст, или да продасте страннику: яко людие святи есте господеви богу вашему. Да не свариши ягняте во млеце матере его.
22 Десятины да даси от всего плода семене своего, плод нив твоих от года до года,
23 и да снеси я пред господем богом твоимъ на месте, идеже изберет господь бог твой призывати имя его тамо: да принесеши десятину пшеницы твоея и вина твоего и елеа твоего, и первенцы волов твоих и овец твоих, да научишися боятися господа бога твоего вся дни.
24 Аще же далече будет путь от тебе и не возможеши донести их, яко далече место от тебе, еже изберет господь бог твой призывати имя его тамо, яко да благословит тя господь бог твой:
25 и продаси сие на цене, и возмеши сребро в руку твою, и пойдеши на место, еже изберетъ господь бог твой,
26 и даси сребро за все, на неже пожелает душа твоя, на волы и овцы, или на вино, или на сикеру, или на все, егоже желает душа твоя, и да снеси тамо пред господем богом твоим, и возвеселишися ты и дом твой.
27 И левит иже во градех твоих, не оставиши его, яко несть ему части ни жребия съ тобою:
28 по трех летех да изнесеши всю десятину жит твоих в лето оно, да положиши ю во градех твоих:
29 и приидет левит, яко несть ему части ни жребия с тобою, и пришлец, и сирота и вдова, яже во градех твоих, да ядят и насытятся: да благословит тя господь бог твой во всех делехъ твоих, яже аще сотвориши.

 

Глава 15.

1 В седмое лето да сотвориши отпущение.
2 И сице заповедь отпущения: да оставиши весь долг твой, имже должен ближний тебе, и от брата своего не истяжеши, яко наречеся отпущение господу богу твоему.
3 от чуждаго да истяжеши, елика суть твоя у него: брату же твоему отпущение да сотвориши долга твоего.
4 яко не будет у тебе недостаточен: сего ради словесе благословением благословит тя господь бог твой в земли, юже тебе господь бог даетъ во жребий прияти ю.
5 Аще же слухом послушаете гласа господа бога вашего хранити и творити вся заповеди сия, яже аз заповедаю тебе днесь, яко господь бог твой благословил тя есть, якоже глагола тебе,
6 и взаим даси языком многим, ты же не займеши, и обладати будеши ты языки многими, тобою же не возобладают.
7 Аще же брат от братии твоея будет тебе недостаточен во единем от градов твоихъ в земли, юже господь бог твой дает тебе, да не отвратиши сердца твоего, ниже сожмеши руки твоея пред братом твоим требующим:
8 отверзая да отверзеши руку твою ему, и взаим да даси ему, елико просит, и елико ему не достанет.
9 Внемли себе: да не будет слово тайно в сердцы твоем беззакония, глаголя: близ есть седмое лето, лето отпущения, и возлукавнует око твое брату твоему требующему, и не даси ему, и возопиет на тя ко господу, и будет тебе грехъ велик:
10 даянием да даси ему, и взаим да даси ему, елико воспросит, якоже требует: и не опечалися в сердцы своем, дающу ти ему, яко сего ради слова благословит тя господь богъ твой во всех делех твоих, и во всем, на неже возложиши руку твою:
11 ибо не оскудеет недостаточный от земли твоея, сего ради аз заповедаю тебе творити слово сие, глаголя: отверзая отверзи руце твои брату твоему нищему и просящему на земли твоей.
12 Аще же продастся тебе брат твой евреанин, или евреаныня, да поработает тебе шесть лет, и в седмое да отпустиши его свободна от себе:
13 егда же пустиши его свободна от себе, да не отпустиши его тща:
14 напутное ему да уготовиши от овецъ твоих и от пшеницы твоея и от вина твоего: якоже благослови тя господь бог твой, да даси ему,
15 и помяни, яко раб и ты был еси въ земли египетстей, и свободи тя господь бог твой оттуду: сего ради аз заповедаю тебе творити слово сие.
16 Аще же речет к тебе: не отиду от тебе, яко возлюбих тя и дом твой, яко добро ему есть у тебе:
17 да возмеши шило, и провертиши ему ухо пред дверьми у степени, и будет ти рабъ во веки: и рабе твоей сотвориши такожде.
18 Да не будет жестоко пред тобою, отпущаемымъ им от тебе свободным, понеже годовую мзду наемничу работа тебе шесть лет: и благословитъ тя господь бог твой во всем, еже твориши.
19 Всяко первородное, еже родится от воловъ твоих и от овец твоих, мужеск пол да освятиши господеви богу твоему: да не делаеши первороднымъ телцем твоим и да не стрижеши первенца во овцахъ твоих.
20 Пред господем богом твоим да яси я от лета до лета, на месте, идеже изберетъ господь бог твой, ты и дом твой.
21 Аще же будет на нем порок, хромота, или слепота, и всякий порок зол, да не пожреши его господу богу твоему.
22 Во градех твоих да снеси я: нечистый и чистый у тебе такожде да яст, яко серну или еленя.
23 Токмо крове да не снесте: на землю проливай ю аки воду.

 

Глава 16.

1 Храни месяц новых (плодовъ), и да сотвориши пасху господеви богу твоему, яко в месяце новых изшелъ еси из египта нощию.
2 И да пожреши пасху господеви богу твоему, овцы и говяда на месте, еже изберет господь богъ твой призывати имя его тамо.
3 Да не снеси в ню кваснаго: седмь дний да яси в ню опресноки, хлеб озлобления, яко со тщанием изыдосте из египта, да поминаете день исхода вашего от земли египетския вся дни жития вашего:
4 да не явится тебе квасно во всех пределехъ твоих седмь дний, и да не преноществует от мяс, яже пожреши в вечер в первый день, до утрия.
5 Не возможеши жрети пасхи ни в единем от градов твоих, яже господь бог твой дает тебе:
6 но токмо на месте, еже изберет господь бог твой призывати имя его ту, тамо пожреши пасху в вечер при захождении солнца, во время в неже изшел еси из земли египетския:
7 и свариши, и испечеши, и снеси на месте, идеже изберет господь бог твой: и возвратишися заутра, и пойдеши в дом твой.
8 Шесть дний да яси опресноки, в седмый же день исходный праздник господеви богу твоему: да не сотвориши в нем всякаго дела, кроме яже суть души.
9 Седмь седмиц всецелых да сочтеши себе: в начало же твоего серпа на жатву начни исчисляти седмь седмиц,
10 и да сотвориши праздник седмиц господеви богу твоему, якоже рука твоя может, елика дастъ тебе, якоже благослови тя господь бог твой.
11 И возвеселишися пред господем богом твоимъ ты и сын твой и дщерь твоя, и раб твой и раба твоя, и левит иже во градех твоих, и пришлец, и сирота и вдова, яже в вас, на месте, идеже изберет господь бог твой призывати имя его тамо:
12 и помянеши, яко раб был еси (ты) в земли египетстей, и сохраниши и сотвориши заповеди сия.
13 Праздник кущей да сотвориши себе седмь дний, егда собереши от нивы твоея и от точила твоего:
14 и да возвеселишися в празднице твоем ты и сын твой и дщи твоя, раб твой и раба твоя, и левит и пришлец, и сирота и вдова, яже во градех твоих:
15 седмь дний да празднуеши господеви богу твоему на месте, еже изберет господь бог твой призывати имя его тамо: аще же благословит тя господь бог твой во всех плодех твоих и во всякомъ деле рук твоих, и будеши веселяся.
16 В три времена лета да явится всяк мужескъ пол пред господем богом твоим, на месте, еже изберет господь бог твой: в праздник опресноков, и в праздник седмиц, и в праздник кущей: да не явишися пред господем богом твоим тощь:
17 кийждо по силе рук своих, по благословению господа бога твоего, еже даде тебе.
18 Судии и книгочии поставиши себе во всехъ градех твоих, яже господь бог твой дает тебе по племенам, и да судят людем суд праведный:
19 да не уклонят суда, ниже познают лице, ниже да возмут даров: дары бо ослепляют очи мудрых и отмещут словеса праведных.
20 Праведне праведное гоните, да поживете, и вшедше наследите землю, юже господь бог твой дает вам.
21 Да не насадиши себе дубравы: всякаго древа близ олтаря господа бога твоего да не сотвориши себе,
22 да не поставиши себе капища, еже возненавиде господь бог твой.

 

Глава 17.

1 Да не пожреши господеви богу твоему телца или овчате, на немже есть порок, всяк глагол зол: яко мерзость господеви богу твоему есть.
2 Аще же обрящется у тебе во единемъ от градов твоих, яже господь бог твой даетъ тебе, муж или жена, иже сотворит лукавое пред господем богом твоим, преступити заветъ его:
3 и шедше послужат богом иным и поклонятся им, солнцу, или луне, или всякому яже от красоты небесныя, ихже не повелех тебе:
4 и возвестится тебе, и взыщеши зело, и се, истинно бысть слово, мерзость сотворися сия во израили:
5 да изведеши человека того, или жену ту, иже сотвориша дело злое сие, пред двери, и побиете их камением, и да умрут.
6 При двою свидетелех или при трех да умрет: умираяй да не умрет при единем свидетели:
7 и рука свидетелей да будет на нем в первых, умертвити его, и рука всех людий послежде: и измите злое от вас самех.
8 Аще же неудоборешимо слово у тебе въ суде между кровию и кровию, и между судомъ и судом, и между язвою и язвою, и между прением и прением, словеса судная в градехъ твоих, и востав взыдеши на место, еже изберетъ господь бог твой призвати имя его тамо:
9 и приидеши к жерцем левитом, и к судии, иже будет в тыя дни, и взыскавше возвестятъ тебе суд:
10 и сотвориши по словеси, еже возвестятъ тебе от места, еже изберет господь бог твой призывати имя его тамо, и да сохраниши зело творити вся, елика законоположатся тебе:
11 по закону и по суду, егоже рекут тебе, сотвориши, да не уклонишися от словесе, еже известят тебе, ни на десно, ни на лево.
12 И человек, иже сотворит в гордости, еже не послушати жерца предстоящаго служити во имя господа бога твоего, или судии, иже в тыя дни будет, да умрет человек той, и да измеши злое от израиля:
13 и вси людие услышавше убоятся, и не будут нечествовати ктому.
14 Аще же внидеши в землю, юже господь бог твой дает тебе в жребий, и приимеши ю, и вселишися на ней, и речеши: поставлю князя над собою, якоже и прочии языцы, иже окрест мене:
15 поставляя да поставиши над собою князя, егоже изберет господь бог твой, от братии твоея да поставиши над собою князя, не возможеши поставити над собою князя человека чуждаго, яко не брат твой есть.
16 обаче да не умножит себе коней, ниже да возвратит людий во египет, яко да не умножит себе коней: господь же рече вам: не приложите возвратитися путем сим ктому:
17 и да не умножит себе жен, да не превратится сердце его: и сребра и злата да не умножитъ себе зело.
18 И будет егда сядет на престоле власти своея, да напишет себе второзаконие сие в книзе от жерцев левитов,
19 и будет с ним, и да чтет ю во вся дни жития своего, да научится боятися господа бога своего и хранити вся заповеди сия и оправдания сия, творити я:
20 да не возвысится сердце его от братии его, да не преступит от заповедий ни на десно, ни на лево, яко да будет многа лета во власти своей, той и сыны его с ним, в сынехъ израилевых.

 

Глава 18.

1 Да не будет жерцем левитом всему племени левиину части ниже жребия со израилем: приношения господу жребий их, да ядят я:
2 жребий же да не будет ему в братии его: господь сам жребий его, якоже рече ему.
3 И сей суд жерцев, яже от людий, от приносящих жертвы, аще телца, аще овцу: и даси жерцу рамо, и челюсти, и утробу:
4 и начатки пшеницы твоея и вина твоего и елеа твоего, и начаток стрижения овецъ твоих да даси ему:
5 яко того избра господь бог твой от всехъ племен твоих предстояти пред господем богомъ твоим, служити и благословити во имя господне, той и сынове его во вся дни.
6 Аще же приидет левит от единаго градовъ ваших, от всех сынов израилевых, идеже той обитает, якоже желает душа его, на место, еже изберет господь,
7 да служит имени господа бога вашего, якоже и вся братия его левити предстоящии тамо пред господем:
8 часть отделеную да яст, кроме продажи яже по отечеству.
9 Аще же внидеши в землю, юже господь бог твой дает тебе, да не навыкнеши творити по мерзостемъ языков тех:
10 да не обрящется в тебе очищая сына своего и дщерь свою огнем, волхвуя волхвованиемъ и чаруяй и птицеволшебствуяй,
11 чародей обавая обаванием, утробоволхвуяй и знаменосмотритель, и вопрошаяй мертвых:
12 есть бо мерзость господеви богу твоему всякъ творяй сия: сих бо ради мерзостей потребитъ я господь бог твой от лица твоего.
13 Совершен да будеши пред господем богом твоим.
14 языцы бо сии, ихже ты наследиши, сии чарований и волхвований послушают: тебе же не тако даде господь бог твой.
15 пророка от братии твоея, якоже мене, возставитъ тебе господь бог твой, того послушайте:
16 по всему, елико просил еси от господа бога твоего в хориве в день собрания, глаголюще: да не приложим слышати гласа господа бога нашего, и огня великаго сего не увидим по сем, да не измрем.
17 И рече господь ко мне: право вся, елика глаголаху к тебе:
18 пророка возставлю им от среды братии их, якоже тебе: и вдам слово мое во уста его, и возглаголет им, якоже заповедаю ему:
19 и человек той, иже не послушает словесъ его, елика возглаголет пророк оный во имя мое, аз отмщу от него:
20 обаче пророк, иже вознечествует глаголати во имя мое слово, егоже не повелех ему глаголати, и иже аще возглаголет во имя боговъ инех, да умрет пророк той.
21 Аще же речеши в сердцы своем: како познаемъ слово, егоже не глагола господь?
22 елика аще возглаголет пророк во имя господне, и не сбудется, и не случится слово сие, егоже не рече господь: в нечестии глагола пророкъ той, не убойтеся его.

 

Глава 19.

1 егда же погубит господь бог твой языки, ихже господь бог твой дает тебе землю, и наследиши их и вселишися во градех их и в домехъ их,
2 три грады да отлучиши себе среди земли твоея, юже господь бог твой дает тебе в наследие.
3 уготови себе путь, и на трое раздели пределы земли твоея, юже разделяет тебе господь бог твой: и да будет убежище тамо всякому убийце.
4 Сие же да будет заповедание убийце, иже аще убежит тамо, и жив будет: иже аще убиет ближняго своего не ведя, и сей не ненавиде его прежде вчерашняго дне и третияго,
5 и иже аще пойдет с подругом своим въ лес собирати дрова, и поползнется рука его с секирою секущаго дрова, и спадши секира с топорища улучит подруга его, и умрет, сей да убежит во един от градов сих, и жив да будет:
6 да не погнав ужик крове вслед убившаго, яко разгорится сердце ему, и постигнетъ его, аще должайший будет путь, и убиетъ душу его, и умрет: и сему несть судъ смертный, понеже не бе ненавидя его прежде вчерашняго и третияго дне:
7 сего ради заповедаю аз тебе слово сие, глаголя: три грады да отлучиши себе.
8 Аще же разширит господь бог твой пределы твоя, якоже клятся отцем твоим, и даст тебе господь всю землю, юже рече дати отцем твоим,
9 аще послушаеши творити вся заповеди сия, яже аз заповедаю тебе днесь, любити господа бога твоего, ходити во всех путех его вся дни: и да приложиши себе еще три грады къ сим трием градом,
10 и да не пролиется кровь безвинна в земли твоей, юже господь бог твой дает тебе в жребий, и да не будет в тебе крови повинен.
11 Аще же будет у тебе человек ненавидяй ближняго своего, и навет сотворит нань, и востанет нань, и поразит душу его, и умрет, и вбегнет во един от градов сих,
12 да послют старейшины града того, и возмутъ его оттуду, и да предадят его в руце ужиков крове, и да умрет:
13 да не пощадит его око твое, и да очистиши кровь неповинную от израиля, и благо будет тебе.
14 Да не предвижеши пределов ближняго своего, яже поставиша отцы твои в наследии твоем, еже наследовал еси в земли, юже господь бог твой дает тебе во жребий.
15 Да не пребудет свидетель един во свидетелство на человека по всякой обиде и по всякому преступлению и по всякому греху, имже аще согрешит: при устех двою свидетелей и при устехъ триех свидетелей да станет всяк глагол.
16 Аще же востанет свидетель неправеден на человека, глаголя на него нечестие,
17 да станут оба человека, имже есть пря, пред господем и пред жерцы и пред судиями, иже будут в тыя дни,
18 и да испытают их судии прилежно, и се, свидетель неправеден свидетелствова неправду, воста на брата своего:
19 да сотворите ему, якоже и он умысли сотворити супротив брата своего, и измите злое от вас самех:
20 да и прочии услышавше убоятся, и не приложат ктому творити словесе злаго сего въ вас:
21 да не пощадит его око твое: душу за душу, око за око, зуб за зуб, руку за руку, ногу за ногу, якоже аще кто даст порокъ на ближняго своего, сице воздастся ему.

 

Глава 20.

1 Аще же изыдеши на брань на враги твоя, и узриши кони и всадники и люди множайшия тебе, да не убоишися их: яко господь бог твой съ тобою, изведый тя из земли египетския.
2 И будет егда приближишися к рати, и приступивъ жрец да возглаголет к людем и речет к ним:
3 послушай, израилю, вы исходите днесь на рать ко врагом вашим: да не ослабеет сердце ваше, ни убойтеся, ниже устрашитеся и не уклонитеся от лица их:
4 яко господь бог ваш идый пред вами споборствуетъ вам на враги ваша и спасет вас.
5 И да рекут книгочия к людем, глаголюще: кий человек создавый храмину нову, и не обнови ея? да идет, и да возвратится в дом свой, да не умрет на рати, и человек ин обновитъ ю:
6 и кии человек, иже насади виноград, и не веселися от него? да идет, и возвратится в дом свой, да не умрет на рати, и человекъ ин возвеселится от него:
7 и кий человек, иже обручи себе жену, и не понял ю? да идет, и возвратится в домъ свой, да не умрет на рати, и ин человекъ поймет ю.
8 И да приложат книгочия глаголати к людем, и да рекут: кий человек страшлив и слабъ сердцемъ? да идет, и возвратится в дом свой, да не устрашит сердца брата своего, аки сердце свое.
9 И будет егда умолкнут книгочия глаголюще к людем, и поставят воеводы воинства вожды людий.
10 Аще же приидеши ко граду воевати нань, и воззовеши я с миром:
11 аще убо мирное отвещают ти, и отверзутъ тебе (градъ), вси людие обретшиися во граде да будут тебе дань дающе и послушающии тебе:
12 аще же не покорятся тебе, и сотворят съ тобою рать, да обсядеши его,
13 дондеже предаст я господь бог твой в руце твои: да избиеши всяк мужеск пол в немъ убийством меча,
14 кроме жен и имения, и вся скоты, и вся елика суть во граде, и все стяжание да плениши себе, и да снеси весь плен враговъ твоих, яже господь бог твой дает тебе.
15 Тако да сотвориши всем градом, иже суть далече от тебе зело, иже не суть от градовъ языков сих, ихже господь бог дает тебе наследити землю их:
16 от них да не оставите жива всякаго дыхания:
17 но и проклятием проклените их, хеттеа и аморреа, и хананеа и ферезеа, и евеа и иевусеа и гергесеа, якоже заповеда тебе господь бог твой:
18 да не научат вас творити всякия мерзости своя, елики твориша богом своим, и согрешите пред господем богом вашим.
19 Аще же обсядеши град един дни многи воевати его в приятие себе, да не истребиши садовия его, возложив железо нань, но токмо да яси плод от них, самого же да не посечеши: еда древо, еже в дубраве, человек есть, еже внити от лица твоего в забрала?
20 но древо, еже веси, яко не ястся плодъ его, сие потребиши и посечеши, и сотвориши лествицы на град, иже творит на тя рать, дондеже предастся.

 

Глава 21.

1 Аще же обрящется убиеный на земли, юже господь бог дает тебе наследити, лежащь на поли, и не ведят убившаго и:
2 да изыдут старцы и судии твои и да измерятъ до градов, иже окрест убиенаго:
3 и будет град приближаяйся убиеному, и да возмут старейшины града того юницу от говяд, еюже не делано, и яже ярма не понесе:
4 и да изведут старейшины града того юницу в дебрь суху, яже не оранна, ниже насеяна, и да пресекут жилы юницы в дебри:
5 и да приступят жерцы левити: яко сих избра господь бог твой предстояти ему и благословляти во имя его: и во устех их да будетъ всякое прекословие и всякая язва:
6 и вси старейшины града того, приближающиися убиеному, да омыют руце над главою юницы, ейже пресечены суть жилы в дебри,
7 и отвещавше да рекут: руце наши не пролияша крове сея, и очи наши не видеша:
8 милостив буди людем твоим израилю, ихже извелъ еси, господи, из земли египетския, да не будет кровь неповинна на людех твоих израили: и очистится им кровь:
9 ты же отимеши кровь неповинну от среды себе, аще сотвориши доброе и угодное пред господемъ богом твоим.
10 Аще же изыдеши на брань противу врагомъ твоим, и предаст я господь бог твой в руце твои, и плениши плен от них,
11 и узриши в плене жену добру обличием, и возлюбиши ю, и поймеши ю себе в жену,
12 и введеши ю внутрь в дом твой, и да обриеши главу ея, и да обрежеши ногти ея,
13 и да совлечеши ризы пленныя ея с нея: и да сядет в дому твоем, и да плачется отца своего и матере своея месяц дний: и по семъ внидеши к ней, и совокупишися с нею, и будетъ тебе жена.
14 И будет аще не восхощеши ея, да отпустиши ю свободну, продажею же да не продаси ея на цене: да не отринеши ея, понеже смирилъ еси ю.
15 Аще же будут мужу две жены, едина от них люба, и другая не люба, и породятъ ему любая и нелюбая, и будет сын перворожденный от нелюбимыя:
16 и будет в оньже день разделит сыномъ своим имение свое, не возможет первенцемъ быти сын любимыя, презрев сына нелюбимыя первенца:
17 но сына нелюбимыя за первенца да признает, и даст ему сугубо от всего, еже обрящется ему, яко сей есть начало чад его, и сему достоит первенство.
18 Аще же кому будет сын непокорив и грубитель, не послушаяй гласа отца своего и гласа матере своея, и накажут его, и не послушает их,
19 да возмут его отец его и мати его, и да изведут его пред старейшины града своего и пред врата места своего,
20 и да рекут к мужем града своего: сынъ наш сей непокорив есть и грубитель и не слушает речи нашея, сластолюбствуя пиянствует:
21 и да побиют его мужие града того камением, и да умрет: и измите злое от себе самих, да и прочии слышавше убоятся.
22 Аще же будет на ком грех, суд смертный, и да умрет, и повесите его на древе,
23 да не пренощует тело его на древе, но во гробе погребите его в тойже день: яко проклят есть от бога всяк висяй на древе: и да не оскверните земли, юже господь бог твой дает тебе во жребий.

 

Глава 22.

1 Видев телца брата твоего или овцу его заблуждающия на пути, да не презриши я: но возвращениемъ возвратиши я к брату твоему, и да отдаси ему.
2 Аще же несть близ тебе брат твой, ниже увеси его, собери я внутрь дому твоего, и да будут у тебе, дондеже взыщет ихъ брат твой, и отдаси их ему.
3 Такожь сотвориши осляти его, и тако да сотвориши ризе его, и тако да сотвориши всему погубленому брата твоего: елика аще погибнут от него, и обрящеши я, да не возможеши пренебрещи я.
4 Аще увидиши осля брата твоего или телца его падшия на пути, да не презриши я: возставляя да возставиши я с собою.
5 Да не будет утварь мужеска на жене, ни да облачится муж в ризу женску: яко мерзость есть господеви богу твоему всяк творяй сия.
6 Аще же улучиши гнездо птичие пред лицемъ твоим на пути, или на древе некоем, или на земли, и в нем птенцы или яица, и мати седит на птенцех или яицех, да не возмеши матере со птенцы:
7 отпущением да отпустиши матерь, птенцы же возмеши себе, да благо тебе будет и долгоденственъ будеши.
8 Аще же созиждеши дом нов, и сотвориши ограждение дому твоему, и да не сотвориши убийства въ дому твоем, аще падет падый от него.
9 Да не насееши винограда твоего различна, да не освятится плод, и семя, еже насееши с плодом винограда твоего.
10 Да не ореши юнцем и ослятем вкупе.
11 Ниже да облечешися в ризу разноличну от льна и волны вкупе ткану.
12 Тресны да сотвориши себе на четырех краяхъ одежды своея, в нюже облечешися.
13 Аще же кто поймет жену и будет с нею, и возненавидит ю,
14 и наложит на ню обвинителная словеса, и нанесет на ню имя злое, и возглаголет: жену сию поях, и пришед к ней, не обретохъ ю девицею:
15 и взем отец девицы и матерь, да изнесутъ девическая отроковицы пред старейшины ко вратом,
16 и речет отец отроковицы ко старейшинам: дщерь мою сию дах мужу сему в жену, и ныне возненавидев ю сей,
17 возлагает ей обвинителная словеса, глаголя: не обретох дщере твоея девою: и се, девическая дщере моея: и да разгнут ризы пред старейшины града онаго,
18 и да возмут старейшины града онаго мужа того и накажут его,
19 и да обвинят его стом сиклей, и дадятъ отцу отроковицы, яко изнесе имя зло на девицу израильтеску, и (паки) да будет ему жена: не возможет отпустити ю во вся лета.
20 Аще же будет воистинну слово сие, и не обрящутся девическая отроковице,
21 и да изведут девицу пред врата дому отца ея, и побиют ю камением мужие градстии, и да умрет, яко сотвори безумие в сынехъ израилевых, оскверни дом отца своего: и измите злое от себе самих.
22 Аще же обрящется человек лежай с женою мужатою, убийте обоих, человека лежащаго с женою и жену: и измите злое от израиля.
23 Аще же будет дева обрученая мужу, и обретъ ю человек (другий) во граде, будет с нею,
24 изведите обоих пред врата града их, и побийте (обоихъ) камением, и да умрут: отроковицу, понеже не вопила во граде, и мужа, понеже обиде жену ближняго своего: и измите злое от себе самих.
25 Аще же на поли обрящет человек деву обрученую, и насиловав будет с нею, убийте человека единаго бывшаго с нею:
26 а отроковице ничтоже сотворите: несть бо деве греха смертнаго: якоже аще кто бы востал на ближняго своего, и убил бы душу его, тако сие дело:
27 понеже на селе обрете ю, возопи отроковица обрученая, и не бе помогаяй ей.
28 Аще же кто обрящет отроковицу деву, яже несть обручена, и насиловав будет съ нею, и обличится:
29 да даст человек бывый с нею отцу отроковицы пятьдесят дидрахм сребра, и тому да будетъ жена, понеже обиде ю: не возможет отпустити ю во все время.
30 Да не поймет человек жены отца своего, и да не открыет покровения отца своего.

 

Глава 23.

1 Да не входит каженик и скопец в сонм господень.
2 Ниже да внидет блудородный во храм господень до десятаго рода.
3 Да не внидет амманитин и моавитин в храмъ господень: и даже до десятаго рода да не входитъ в храм господень, и даже до века,
4 понеже не сретоша они вас с хлебы и водою на пути, исходящим вам из земли египетския, и яко наяша на тя валаама сына веорова от месопотамии, да тя прокленет:
5 и не восхоте господь бог твой послушати валаама, и обрати господь бог твой клятвы в благословение, зане возлюби тя господь бог твой:
6 да не совещаеши мирная им и полезная имъ во вся дни твоя во веки.
7 Да не возгнушаешися идумеанином, яко братъ твой есть: да не возгнушаешися египтянином, яко пришлец был еси в земли его:
8 сынове аще родятся им, в роде третиемъ да внидут в храм господень.
9 Аще же изыдеши ополчитися на враги твоя, и да сохранишися от всякаго слова зла.
10 Аще будет у тебе человек, иже не будет чист от излияния его нощию, и да изыдет вне полка, и да не внидет в полк:
11 и егда будет к вечеру, да омыет тело свое водою, и зашедшу солнцу да внидет в полк.
12 И место тебе да будет вне полка, и изыдеши тамо вон:
13 и рылец да будет тебе за поясом твоим, и будет егда сядеши вне, и да ископаеши им (яму), и навратив покрыеши стыдение твое в ней:
14 яко господь бог твой ходит в полце твоемъ избавляти тя и предати враги твоя в руце твои пред лицем твоим: и да будет полкъ твой свят, и да не явится у тебе стыдение вещи, и отвратится от тебе.
15 Да не предаси раба господину его, иже прииде к тебе от господина своего:
16 с тобою да обитает, с вами да живет во всяком месте, идеже угодно будет ему: да не оскорбиши его.
17 Да не будет блудница от дщерей израилевых, и да не будет блудник от сынов израилевым.
18 Да не принесеши мзды блудничи, ниже цены песии в дом господа бога твоего на всяк обет, яко мерзость суть господеви богу твоему и обоя.
19 Да не даси брату твоему в лихву сребра и в лихву пищей и в лихву всякия вещи, емуже аще взаим даси:
20 чуждему да даси в лихву, брату же твоему да не даси в лихву, да благословит тя господь богъ твой во всех делех твоих на земли, в нюже входиши тамо наследити ю.
21 Аще же обещаеши обет господеви богу твоему, да не умедлиши воздати его, яко взыская взыщет господь бог твой от тебе, и будет на тебе грех:
22 аще же не восхощеши обещати, несть ти греха.
23 Исходящая на уст твоих сохрани и сотвори, имже образом обещал еси господеви богу твоему дар, егоже глаголал еси устами твоими.
24 Аще же внидеши на ниву ближняго своего, и собереши в руце свои класы, а серпа да не возложиши на ниву ближняго.
25 Аще же внидеши в виноград ближняго своего, да яси гроздие, елико души твоей насытитися, в сосуд же да не вложиши.

 

Глава 24.

1 Аще же кто поймет жену и поживет с нею, и будет аще не обрящет благодати пред ним, яко обрете в ней срамное дело, да напишетъ ей книгу отпущения и вдаст в руце ея, и да отпустит ю из дому своего,
2 и отшедши будет (жена) мужу иному:
3 и аще возненавидит ю муж вторый, и напишетъ ей книгу отпущения и даст ей в руце ея, и отпустит ю из дому своего, или умрет муж ея вторый, иже бе ю поялъ себе в жену:
4 не возможет муж первый, отпустивый ю, возвративъ пояти ю себе в жену, по осквернении ея, яко гнусно есть пред господем богом твоим: и да не осквернавите земли, юже господь бог вашъ дает вам в наследие.
5 Аще же кто поймет жену внове, да не идетъ на брань, и да не наложится ему ни каяже вещь: неповинен будет в дому своем лето едино, да веселит жену свою, юже поял есть.
6 Да не возмеши в залог жерновных каменей, яко душу сей дает в залог.
7 Аще же ят будет человек крадый душу от братии своея сынов израилевых, и насилиемъ продает ю, да умрет тать той, и измите злое от вас самих.
8 Внемли себе в язве проказы, и храни зело творити по всему закону, егоже возвестятъ вам жерцы левити: якоже заповедах вам, да храните творити:
9 помяни, елика сотвори господь бог твой мариаме на пути, исходящим вам из египта.
10 Аще же долг есть на ближнем твоем, долг каковый либо, да не внидеши в дом его взяти залог его:
11 вне станеши, и человек той, на немже есть долг твой, изнесет залог вон.
12 Аще же человек убог есть, да не преноществует залог его у тебе:
13 отданием да отдаси ризу его до захождения солнца, и да почиет в ризе своей, и благословитъ тя, и будет тебе милость пред господем богомъ твоим.
14 Да не лишиши мзды убогаго и требующаго от братии твоея, или от пришлец иже во градех твоих:
15 в той же день да отдаси мзду ему, да не зайдет солнце ему, яко убог есть, и в том имать надежду, и да не возопиет на тя к господеви, и будет тебе грех.
16 Да не умрут отцы за сыны, и сынове да не умрут за отцы: кийждо за свой грехъ да умрет.
17 Не уклониши суда пришелцу и сиру и вдове, и да не вземлеши в залог ризы вдовичи,
18 и помянеши, яко раб (и ты) был еси в земли египетстей, и свободи тя господь богъ твой оттуду: сего ради аз тебе заповедаю творити сие слово.
19 Аще же пожнеши ниву твою на селе твоем, и забудеши сноп на ниве твоей, да не возвратишися взяти его: пришелцу и убогу, и сиру и вдове да будет, да благословит тя господь бог твой во всех делех руку твоею.
20 Аще же масличие собираеши, да не возвратишися останков собрати яже за тобою: пришелцу и сиру и вдове да будут: и воспомянеши, яко раб был еси в земли египетстей: сего ради аз тебе заповедаю творити слово сие.
21 Аще же обираеши виноград твой, да не собираеши останков яже за тобою: пришелцу и сиру и вдове да будут:
22 и помянеши, яко раб был еси в земли египетстей: сего ради аз тебе заповедаю творити сие слово.

 

Глава 25.

1 Аще же будет пря между человеки, и приидутъ на суд, и да судят, и оправдят праваго, и осудят нечестиваго:
2 и будет, аще достоин есть ран нечестивый, да поставиши его пред судиями, и да биютъ его пред ними по нечестию его:
3 и числом четыредесять ран да наложат ему, и да не приложат к сему: аще же приложат паче ран сих бити его множае, срам будет брату твоему пред тобою.
4 Да не обротиши вола молотяща.
5 Аще же живут братия вкупе, и умретъ един от них, семене же не будет ему, да не будет жена умершаго иному мужу несродну: брат мужа ея да внидет к ней и пойметъ ю себе в жену, и да поживет с нею:
6 и будет отроча, еже аще родится, да поставится во имя умершаго, и не погибнетъ имя его от израиля.
7 Аще же не восхощет человек пояти жены брата своего, да приидет жена ко вратом пред старейшины и речет: не хощет брат мужа моего возставити имя брата своего во израили, не восхоте братъ мужа моего:
8 и да призовут его старейшины града того и рекут ему, и став речет: не хощу пояти ю:
9 и приступивши жена брата его к нему предъ старейшины, и изует сапог его единъ от ноги его, и да плюнет на лице его, и отвещавши речет: сице да сотворят человеку, иже не созиждет дому брата своего во израили:
10 и прозовется имя его во израили [домъ изутаго из сапога].
11 Аще же биются человека два вкупе, человекъ с братом своим, и приступит жена единаго от них отяти мужа своего от руки биющаго и, и простерши руку свою, имет за ятра его,
12 да отсечеши руку ея: да не пощадит око твое ея.
13 Да не будет во влагалищи твоем мерило и мерило, великое и малое,
14 да не будет в дому твоем мера и мера, велика и мала:
15 мерило истинно и праведно да будет тебе, и мера истинна и праведна да будет тебе, да многи дни будеши на земли, юже господь богъ твой дает тебе в жребий,
16 яко мерзость господеви богу твоему всяк творяй сия, всяк творяй неправду.
17 Помяни, елика тебе сотвори амалик на пути, исходящу тебе из египта:
18 како сопротивоста тебе на пути и посече задний полк твой утружден за тобою: ты же алчен был еси и утружден: и не убояся бога:
19 и будет егда упокоит тя господь богъ твой от всех враг твоих, иже окрест тебе на земли, юже господь бог твой дает тебе въ жребий, еже наследити ю, да погубиши имя амаликово от земли, яже под небесем, и да не забудеши.

 

Глава 26.

1 И будет аще внидеши в землю, юже господь богъ твой дает тебе в жребий еже наследити ю, и вселишися на ней,
2 и да возмеши от начатка плодов земли твоея, юже господь бог твой дает тебе в жребий, и вложиши в кошницу, и пойдеши на место, еже изберет господь бог твой призывати имя его тамо:
3 и приидеши к жерцу, иже будет в тыя дни, и речеши к нему: возвещаю днесь господеви богу твоему, яко внидох в землю, еюже клятся господь отцем нашим дати нам:
4 и да возмет жрец от руку твоею кошницу и да положит ю пред олтарем господа бога твоего:
5 и отвещав речеши пред господем богом твоим: сирию остави отец мой и сниде во египетъ и обита тамо в числе малем, и бысть тамо в язык велик и во множество много и велико:
6 и озлобиша нас египтяне, и смириша ны, и возложиша на ны дела жестокая:
7 и возопихом ко господу богу отец наших, и услыша господь вопль наш и виде смирение наше и труд наш и скорбь нашу,
8 и изведе ны господь из египта сам крепостию своею великою и рукою сильною и мышцею высокою, и в видениих великих и в знамениих и въ чудесех,
9 и введе ны в место сие, и даде нам землю сию, землю кипящую медом и млеком:
10 и ныне се, принесох начатки от плодовъ земли, юже дал ми еси, господи, землю кипящую медом и млеком. И оставиши е пред господемъ богом твоим, и поклонишися тамо пред господемъ богом твоим,
11 и возвеселишися о всех благих, яже даде тебе господь бог твой, и дом твой, и левит, и пришлец иже у тебе.
12 егда же совершиши одесятити всю десятину плодов земли твоея в лето третие, вторую десятину да даси левиту и пришелцу и сироте и вдове, и ядят во градех твоих и насытятся:
13 и речеши пред господем богом твоим: очистихъ святая из дому моего, и дах я левиту и пришелцу и сироте и вдове, по всем заповедемъ твоим, яже заповедал еси мне: не преступихъ заповеди твоея и не забых,
14 и не ядох в болезни моей от них, не принесох от них в нечистое, ниже дах от них умершему: послушах гласа господа бога моего, сотворих, якоже заповедал еси мне:
15 призри с небесе от храма святаго твоего, и благослови люди твоя израиля и землю, юже далъ еси им якоже клялся еси отцемъ нашим, дати нам землю кипящую медом и млеком.
16 В сей день заповеда тебе господь бог твой сотворити вся оправдания сия и судбы: и сохраните и сотворите я от всего сердца вашего и от всея души вашея.
17 господа избрал еси днесь быти тебе въ бога, и ходити во всех путех его и хранити оправдания и заповеди и судбы его, и послушати гласа его.
18 И господь избра вас днесь, да будете ему люди избраннии, якоже рече тебе, хранити вся заповеди его,
19 и быти тебе вышше всех язык, иже сотвори тя именита и хвальна и славна, быти вам людем святым господу богу вашему, якоже глагола.

 

Глава 27.

1 И заповеда моисей и старейшины сынов израилевых, глаголя: сохраните вся заповеди сия, елики аз заповедаю вам днесь.
2 И будет в оньже день прейдете иорданъ на землю, юже господь бог твой дает тебе во жребий, и поставиши себе камение велико и обелиши я мелом,
3 и напишеши на каменех тех вся словеса закона сего, егда прейдете иордан, егда внидете в землю, юже господь бог твой дает тебе, землю кипящую медом и млеком, якоже рече господь бог отец твоих тебе.
4 И будет егда прейдете иордан, да поставите камение сие, яже аз повелеваю вам днесь, в горе гевал, и побелиши их мелом:
5 и да созиждеши тамо олтарь господеви богу твоему, олтарь от камения: да не возложиши на нихъ железа:
6 камением всецелым да созиждеши олтарь господеви богу твоему и вознесеши на нем всесожжения господеви богу твоему,
7 и пожреши жертву спасения: и яси, и насытишися тамо, и возвеселишися пред господем богом твоим,
8 и напишеши на камениих сих весь закон сей яве зело.
9 И глагола моисей и жерцы левити всему израилю, глаголюще: молчи и слыши, израилю, в день сей стался еси в люди господеви богу твоему:
10 и да послушаеши гласа господа бога твоего, и да сотвориши вся заповеди его и оправдания его, яже аз заповедаю тебе днесь.
11 И заповеда моисей людем в той день, глаголя:
12 сии да станут благословляти люди на горе гаризин, прешедше иордан: симеон, левий, иуда, иссахар, иосиф и вениамин:
13 и сии да станут на клятву на горе гевал: рувим, гад и асир, завулон, дан и неффалим.
14 И отвещавше рекут левити всему израилю гласомъ великим:
15 проклят человек, иже сотворит изваяние и слияние, мерзость господеви, дело рук художника, и положит е в сокровении. И отвещавше вси людие рекут: буди.
16 Проклят безчестяй отца своего или матерь свою. И рекут вси людие: буди.
17 Проклят прелагаяй пределы ближняго своего. И рекут вси людие: буди.
18 Проклят прельщаяй слепаго в пути. И рекутъ вси людие: буди.
19 Проклят, иже уклонит суд пришелцу и сироте и вдове. И рекут вси людие: буди.
20 Проклят лежай с женою отца своего, яко открыл есть покровение отца своего. И рекут вси людие: буди.
21 Проклят лежай со всяким скотом. И рекутъ вси людие: буди.
22 Проклят лежай с сестрою своею, дщерию отца своего или дщерию матере своея. И рекут вси людие: буди.
23 Проклят лежай с тещею своею. И рекут вси людие: буди. Проклят лежай с сестрою жены своея. И рекут вси людие: буди.
24 Проклят бияй ближняго с лестию. И рекутъ вси людие: буди.
25 Проклят, иже возмет дары поразити душу крове неповинныя. И рекут вси людие: буди.
26 Проклят всяк человек, иже не пребудетъ во всех словесех закона сего, еже творити я. И рекут вси людие: буди.

 

Глава 28.

1 И будет егда прейдете иордан в землю, юже господь бог ваш дает вам, аще слухомъ послушаете гласа господа бога вашего хранити и творити вся заповеди его, яже аз заповедаю тебе днесь, и даст тя господь бог твой вышше всехъ язык земли:
2 и приидут на тя вся благословения сия и обрящут тя. Аще слухом послушаеши гласа господа бога твоего,
3 благословен ты во граде и благословен ты на селе,
4 благословена исчадия чрева твоего и плоды земли твоея, и стада волов твоих и паствы овец твоих,
5 благословены житницы твои и останцы твои,
6 благословен ты внегда входити тебе и благословенъ ты внегда исходити тебе.
7 Да предаст тебе господь бог враги твоя, сопротивящияся тебе, сокрушены пред лицем твоим: путемъ единем изыдут на тя и седмию путьми побежатъ от лица твоего.
8 Да послет господь на тя благословение в хранилищахъ твоих и на вся, на няже возложиши руку твою на земли, юже господь бог твой дает тебе.
9 Да возставит тя господь бог твой себе людъ свят, якоже клятся отцем твоим. Аще послушаеши гласа господа бога твоего и ходити будеши в путех его,
10 и узрят тя вси языцы земнии, яко имя господа (бога твоего) призвася на тя, и убоятся тебе,
11 и умножит тя господь бог твой во благая во исчадиех утробы твоея и во исчадиехъ скотов твоих, и в плодех земли твоея, на земли твоей, юже клятся господь отцем твоимъ дати тебе.
12 Да отверзет тебе господь сокровище свое благое, небо, еже дати дождь земли твоей во время свое, да благословит вся дела рук твоих: и даси взаим языком многим, ты же не одолжишися: и обладаеши ты многими языки, тобою же не возобладают.
13 Да поставит тя господь бог твой во главу, а не в хвост: и будеши тогда выше, и не будеши ниже, аще послушаеши заповедий господа бога твоего, елика аз заповедаю тебе днесь хранити и творити:
14 да не преступиши от всех словес, яже аз заповедаю тебе днесь, на десно ниже на лево, ходити вслед богов иных служити им.
15 И будет аще не послушаеши гласа господа бога твоего хранити и творити вся заповеди его, елики аз заповедаю тебе днесь, и приидутъ на тя вся клятвы сия и постигнут тя:
16 проклят ты во граде и проклят ты на селе,
17 прокляты житницы твои и останки твои,
18 проклята исчадия утробы твоея и плоды земли твоея, стада волов твоих и паствы овецъ твоих,
19 проклят ты внегда входити тебе и проклятъ ты внегда исходити тебе.
20 Да послет тебе господь скудость и глад и истребление на вся, на няже возложиши руку твою, елика аще сотвориши, дондеже потребит тя и дондеже погубит тя вскоре, злых ради начинаний твоих, зане оставил еси мя.
21 Да прилепит господь к тебе смерть, дондеже потребит тя от земли, в нюже ты входиши тамо наследити ю.
22 Да поразит тя господь неимением и огневицею, и стужею и жжением, и убийством и ветромъ тлетворным и бледостию, и поженут тя, дондеже погубят тя.
23 И будет небо над главою твоею медяно и земля под тобою железна.
24 Да даст господь дождь земли твоей прах, и персть с небесе снидет на тя, дондеже сокрушитъ тя и дондеже погубит тя.
25 Да даст тя господь на изсечение пред враги твоими: путем единем изыдеши к ним и седмию пути побежиши от лица их, и будеши в разсеяние во всех царствах земных,
26 и будут мертвецы ваши снедь птицам небеснымъ и зверем земным, и не будет отгоняяй.
27 Да поразит тя господь вредом египетскимъ в седалищах и крастою дивиею и свербом, яко не мощи тебе исцелитися.
28 Поразит тя господь неистовством и слепотою и изступлением ума,
29 и будеши осязаяй в полудни, якоже осязаетъ слепый во тме, и не исправит путий твоих: и будеши тогда обидимь и расхищаемь во вся дни, и не будет помогаяй тебе.
30 Жену поймеши, и ин муж возымеет ю: дом созиждеши, и не поживеши в нем: виноградъ насадиши, и не обереши его:
31 телец твой заклан пред тобою, и не снеси от него: осля твое отято от тебе, и не отдастся тебе: овцы твоя отданы (будутъ) врагом твоим, и не будет тебе помогаяй:
32 сынове твои и дщери твоя отданы (будутъ) языку иному, и очи твои узрят истаевающе на сия, и не возможет рука твоя:
33 плоды земли твоея и вся труды твоя поястъ язык, егоже не веси, и будеши обидимь и сокрушаемь во вся дни,
34 и будеши изумлен, видений ради очесъ твоих, яже узриши.
35 Да поразит тя господь вредом злым на коленахъ и на голенех, яко не мощи исцелитися тебе от стоп ног твоих даже до верха (главы) твоея.
36 Да отведет тя господь и князи твоя, яже поставиши себе, в язык, егоже не веси ты и отцы твои, и послужиши тамо богомъ иным, древу и камению,
37 и будеши тамо в гадание и в притчу и повесть во всех языцех, в няже введет тя господь (богъ) тамо.
38 Семя много изнесеши на поле, и мало внесеши, яко поядят я прузи:
39 виноград насадиши и возделаеши, и вина не испиеши, ниже возвеселишися от него, яко пояст я червь:
40 маслины будут тебе во всех пределехъ твоих, и елеем не помажешися, яко истечетъ маслина твоя:
41 сыны и дщери родиши, и не будут тебе, отидут бо в плен:
42 вся древесная твоя и вся жита земли твоея потребит ржа:
43 пришлец, иже есть у тебе, взыдетъ над тя выше выше, ты же низыдеши низу низу:
44 сей взаим даст тебе, ты же ему взаимъ не даси: сей будет глава, ты же будеши хвост.
45 И приидут на тя вся клятвы сия, и поженутъ тя и постигнут тя, дондеже потребят тя и дондеже погубят тя: яко не послушал еси гласа господа бога твоего, еже хранити заповеди его и оправдания его, елика заповеда тебе.
46 И будут на тебе знамения и чудеса, и в семени твоем до века,
47 понеже не послужил еси господеви богу твоему с веселием и благим сердцем, множества ради всех (благихъ),
48 и послужиши врагом твоим, яже послетъ господь бог твой на тя с гладом и жаждею, и наготою и оскудением всех: и возложит яремъ железен на выю твою, дондеже сокрушит тя.
49 И наведет господь на тя язык издалеча от края земли аки устремление орле, язык, егоже не уразумееши глагола,
50 язык безстуден лицем, иже не удивится лицу старчу и юна не помилует:
51 и пояст плоды скотов твоих и плоды земли твоея, яко не оставит тебе пшеницы, ни вина, ни елеа, стад волов твоих и паств овецъ твоих, дондеже погубит тя:
52 и сокрушит тя во всех градех твоих, дондеже разорятся стены твоя высокия и крепкия, на нихже ты уповаеши, во всей земли твоей: и озлобит тя во всех градех твоих, яже даде тебе господь бог твой.
53 И снеси чада утробы твоея, плоть сыновъ и дщерей твоих, ихже даде тебе господь богъ твой, в тесноте твоей и в скорби твоей, еюже оскорбит тя враг твой.
54 Юный в вас и младый зело позавидит окомъ своим брату своему и жене яже на лоне его, и оставшимся чадом, яже аще останутся ему:
55 яко дати единому их от плотей чадъ своих, ихже ял еси, понеже ничто остася ему в тесноте и скорби твоей, еюже оскорбятъ тя врази твои во всех градех твоих.
56 И юная в вас (жена) и млада зело, еяже не обыче нога ея ходити по земли юности ради и младости, позавидит оком своим мужу своему иже на лоне ея, и сыну и дщери своей,
57 и блоне своей изшедшей из чресл ея, и чаду своему еже аще родит: снест бо я тайно, скудости ради всех в тесноте и скорби своей, еюже оскорбит тя враг твой во всех градех твоих.
58 Аще не послушаете творити вся словеса закона сего, написанная в книзе сей, еже боятися имене честнаго и чуднаго сего, господа бога твоего,
59 и удивит господь язвы твоя и язвы семене твоего, язвы великия и дивныя, и болезни злыя и известныя,
60 и обратит на тя всю болезнь египетскую злую, еяже ты боялся еси от лица их, и прилепятся к тебе:
61 и все разслабление, и всю язву ненаписанную и всю писаную в книзе закона сего наведетъ господь на тя, дондеже потребит тя:
62 и останетеся в числе малем, вместо того егда бысте яко звезды небесныя множеством, яко не послушасте гласа господа бога вашего.
63 И будет, якоже возвеселися господь о васъ благотворити вам и умножити вас, тако возвеселится господь о вас потребити вас: и возметеся от земли, в нюже вы входите тамо наследити ю,
64 и разсеет тя господь бог твой во вся языки, от края земли даже до края ея, и послужиши тамо богом иным, древу и камению, ихже не знал еси ты и отцы твои:
65 но и во языцех онех не упокоитъ тя, ниже будет стояния стопе ноги твоея: и даст тебе господь тамо сердце печальное и оскудевающая очеса и истаявающую душу:
66 и будет живот твой висящь пред очима твоима, и убоишися во дни и в нощи, и не будеши веры яти житию твоему:
67 заутра речеши: како будет вечеръ? и в вечеръ речеши: како будет утро? от страха сердца твоего, имже убоишися, и от видений очесъ твоих, имиже узриши:
68 и возвратит тя господь бог во египет въ кораблех, и на пути егоже рекох, не приложите ксему видети его: и продани будете тамо врагом вашим в рабы и в рабыни, и не будетъ купующаго.

 

Глава 29.

1 Сия словеса завета, яже завеща господь моисею уставити сыном израилевым в земли моавли, кроме завета, егоже завеща им в хориве.
2 И призва моисей вся сыны израилевы и рече к ним: вы видесте вся, елика сотвори господь в земли египетстей пред вами фараону и всем слугам его и всей земли его,
3 искушения великая, яже видеста очи твои, знамения и чудеса великая оная, руку крепкую и мышцу высокую:
4 и не даде господь бог вам сердца разумети и очес видети и ушес слышати, даже до дне сего:
5 и водил вас четыредесять лет по пустыни: не обетшаша ризы ваша, и сапози ваши не сотрошася на ногах ваших:
6 хлеба не ядосте, вина и сикера не писте, да познаете, яко сей господь бог ваш:
7 и приидосте до сего места: и изыде сионъ царь есевонский и ог царь васанский во сретение нам на брань,
8 и поразихом их на брани, и прияхом землю их: и дах ю во жребий рувиму и гаду и полуплемени манассиину.
9 И сохраните творити вся словеса завета сего творити я, да разумеете вся, елика сотворите.
10 Вы стасте вси днесь пред господем богом вашим, племеноначалницы ваши и старейшины ваши, и судии ваши и писмовводители ваши, всяк муж израильтеск,
11 и жены ваша и чада ваша, и пришлец иже посреде полка вашего, от древосечца вашего даже до водоносца вашего,
12 еже прейти в завет господа бога вашего и в клятвы его, елика завещает господь бог твой к тебе днесь:
13 да поставит тя себе в люди, и той будетъ тебе бог, якоже тебе рече и якоже клятся отцем твоим, аврааму и исааку и иакову.
14 И не вам единем аз завет сей и клятву сию завещаваю,
15 но и зде сущим с вами днесь, пред господемъ богом вашим, и не сущим с вами зде днесь.
16 яко вы весте, како жихом в земли египетстей и како проидохом посреде языков, ихже преидосте,
17 и видесте мерзости их и кумиры их, древо и камение, сребро и злато, яже суть у них.
18 еда кто есть в вас муж или жена, или отечество или племя, егоже сердце уклонися от господа бога вашего, ити еже служити богом языков оныхъ? еда кий есть в вас корень горе прорастающь в желчи и горести?
19 И будет аще услышит словеса клятвы сея и похвалится в сердцы своем, глаголя: преподобно мне да будет, яко в прельщении сердца моего пойду, да не погубит грешник безгрешнаго (съ собою):
20 не восхощет бог милостив быти ему, но тогда разгорится гнев господень и ревность его на человека того: и прилепятся ему вся клятвы завета сего, писанныя в книзе закона сего: и потребит господь имя его от поднебесныя,
21 и отлучит его господь на злая от всехъ сынов израилевых, по всем клятвам завета написаннаго в книзе закона сего.
22 И речет род ин, сынове ваши, иже востанутъ по вас, и чуждый иже приидет от земли далекия, и узрят язвы земли оныя и недуги ея, яже посла господь на ню,
23 жупел и соль сожженную: вся земля ея не насеется, ни прозябнет, ниже возникнет на ней всяк злак: якоже опровержеся содомъ и гоморр, адама и севоим, яже опроверже господь в ярости и гневе своем.
24 И рекут вси языцы: почто сотвори господь сице земли сей? кая ярость гнева великая сия?
25 И рекут: яко оставиша завет господа бога отец своих, егоже завеща отцемъ их, егда изведе их от земли египетския,
26 и шедше послужиша богом иным, и поклонишася им, ихже не ведяху, и не даде им ничтоже ни един:
27 и разгневася яростию господь на землю ту, еже навести на ню по всем клятвам завета, писанным в книгах закона сего:
28 и изъят их господь от земли их яростию и гневом, и прогневанием великим зело, и изверже их в землю ину якоже ныне.
29 Тайная господеви богу нашему, нам же явленная и чадом нашим во веки, творити вся словеса закона сего.

 

Глава 30.

1 И будет егда приидут на тя вся словеса сия, благословение и клятва, юже дах пред лицемъ твоим, и приимеши в сердце твое во всех языцех, в няже расточит тя господь бог твой тамо,
2 и обратишися ко господу богу твоему, и послушаеши гласа его по всем, елика аз заповедаю тебе днесь, ты и сын твой, от всего сердца твоего и от всея души твоея,
3 и исцелит господь грехи твоя и помилуетъ тя, и паки соберет тя от всех языков, в няже разсыпа тя господь бог тамо.
4 Аще будет разсеяние твое от края небесе даже до края небесе, оттуду соберет тя господь бог твой и оттуду возмет тя,
5 и введет тя господь бог твой оттуду в землю, юже наследиша отцы твои, и наследиши ю: и благо тебе сотворит, и умножит тя паче отец твоихъ
6 и очистит господь сердце твое и сердце семене твоего, любити господа бога твоего от всего сердца твоего и от всея души твоея, да живеши ты:
7 и даст господь бог твой клятвы сия на враги твоя и на ненавидящия тя, иже изгнаша тя:
8 и ты обратишися и послушаеши гласа господа бога твоего и сотвориши заповеди его, елики аз заповедаю тебе днесь.
9 И благословит тя господь бог твой во всяком деле руку твоею, в плодех утробы твоея и в плодех скотов твоих и в житех земли твоея, яко обратится господь бог твой возвеселитися о тебе во благих, якоже возвеселися от отцехъ твоих:
10 аще послушаеши гласа господа бога твоего хранити и творити вся заповеди его и оправдания его и суды его, написанныя в книзе закона сего: аще обратишися ко господу богу твоему от всего сердца твоего и от всея души твоея.
11 яко заповедь сия, юже аз заповедаю тебе днесь, не тяжка есть, ниже далече есть от тебе:
12 не на небеси есть, глаголя: кто взыдетъ от нас на небо и возмет ю нам, и услышавше ю сотворимъ?
13 ниже об ону страну моря есть, глаголяй: кто прейдет нам на ону страну моря и возметъ ю нам, и услышавше ю сотворимъ?
14 близ тебе есть глагол зело, во устехъ твоих и в сердцы твоем и в руку твоею, творити его.
15 Се, дах пред лицем твоим днесь жизнь и смерть, благо и зло.
16 Аще послушаеши заповедий господа бога твоего, яже аз заповедаю тебе днесь, любити господа бога твоего, ходити во всех путех его и хранити оправдания его и заповеди его и суды его, и поживеши, и умножишися, и благословит тя господь бог твой на всей земли, в нюже входиши наследити ю тамо.
17 И аще превратится сердце твое, и не послушаеши, и заблудив поклонишися богом иным и послужиши им,
18 возвещаю вам днесь, яко погибелию погибнете, и не многодневни будете на земли, юже господь богъ дает тебе, в нюже вы преходите иорданъ тамо наследити ю.
19 Засвидетелствую вам днесь небом и землею: живот и смерть дах пред лицем вашим, благословение и клятву: и избери живот, да живеши ты и семя твое,
20 любити господа бога твоего, послушати гласа его и прилепитися к нему: яко сие живот твой, и долгота дний твоих, жити на земли, еюже клятся господь бог отцем твоим, аврааму и исааку и иакову, дати им.

 

Глава 31.

1 И сконча моисей глаголя вся словеса сия ко всем сыном израилевымъ
2 и рече к ним: ста и двадесяти лет азъ есмь днесь: не возмогу ксему входити и исходити: господь же рече ко мне: не прейдеши иордана сего:
3 господь бог твой предыдый пред лицем твоим, той потребит языки сия от лица твоего, и наследиши их: и иисус предыдый пред лицемъ твоим, якоже глагола господь:
4 и сотворит им господь, якоже сотвори сиону и огу, двум царем аморрейским, иже быша об он пол иордана, и земли их, якоже потреби ихъ
5 и предаде их господь в руце ваши: и сотворите им, якоже заповедах вам:
6 мужайся и крепися, не бойся, ни ужасайся, ни устрашайся от лица их: яко господь богъ твой, сей предыдый с вами, и не отступитъ от тебе, ниже оставит тя.
7 И призва моисей иисуса и рече ему предъ всем израилем: мужайся и крепися: ты бо внидеши пред лицем людий сих в землю, юже клятся господь отцем вашим дати им, и ты в наследие разделиши ю им:
8 и господь, идый с тобою, не отступит от тебе, ниже оставит тя: не бойся, ни ужасайся.
9 И вписа моисей вся словеса закона сего въ книгу и даде жерцем сыном левииным, воздвижущимъ ковчег завета господня, и старцем сынов израилевых.
10 И заповеда им моисей в той день, глаголя: по седми летех во время лета оставления, в праздник кущей?
11 егда сходится весь израиль явитися предъ господем богом твоим на месте, еже изберетъ господь, читайте закон сей пред всем израилемъ во уши их:
12 соберите люди, мужы и жены и дети, и пришелца, иже во градех ваших, да услышатъ и научатся боятися господа бога вашего, и послушаютъ творити вся словеса закона сего:
13 и сынове их, иже не ведят, услышатъ и научатся боятися господа бога вашего во вся дни, елики поживут на земли, на нюже вы преходите иордан тамо наследити ю.
14 И рече господь к моисею: се, приближишася дние смерти твоея: призови иисуса, и станите пред дверьми скинии свидения, и заповем ему. И иде моисей и иисус ко скинии свидения, и стаста пред дверьми скинии свидения.
15 И сниде господь в столпе облачне, и ста у дверий скинии свидения: и ста столп облачный у дверий скинии свидения.
16 И рече господь к моисею: се, ты почиеши со отцы твоими, и воставше людие сии соблудятъ вслед богов чуждих земли, в нюже входятъ сии тамо, и оставят мя, и разорят заветъ мой, егоже завещах им:
17 и разгневаюся яростию на ня в той день, и оставлю я, и отвращу лице мое от них, и будут в снедь: и обрящут я зла многа и скорби, и рекут в день той: понеже несть господа бога в нас, постигнуша ны злая сия:
18 аз же отвращением отвращу лице мое от них в той день, злоб ради всех яже сотвориша, яко обратишася к богом чуждим:
19 и ныне напишите словеса песни сея, и научите ей сыны израилевы, и вложите ю во уста их, да будет мне песнь сия во свидетелство в сынех израилевых:
20 введу бо их в землю благую, еюже кляхся отцем их, дати им землю кипящую медомъ и млеком, и ядят, и насытившеся утолстеют, и обратятся к богом чуждим, и послужат им, и разгневают мя, и разорят завет мой, егоже завещах им:
21 и будет егда постигнут их многа зла и скорби, и противостанет песнь сия предъ лице их свидетелствующи, яко не забвена будетъ от уст их и от уст семене их: аз бо вем злобу их, елика творят днесь зде, прежде введения их в землю благую, еюже кляхся отцем их.
22 И написа моисей песнь сию в той день и научи ей сыны израилевы. И заповеда моисей иисусу сыну навину и рече ему:
23 мужайся и крепися: ты бо введеши сыны израилевы в землю, еюже клятся им господь, и той будетъ с тобою.
24 егда же сконча моисей пиша вся словеса закона сего в книгу даже до конца,
25 и заповеда левитом воздвижущим ковчегъ завета господня, глаголя:
26 вземше книгу закона сего, положите ю от страны ковчега завета господа бога вашего, и будетъ тамо вам во свидетелство:
27 яко аз вем рвение твое и выю твою жестокую: еще бо мне живу сущу с вами днесь, преогорчающе бысте господа, кольми паче по смерти моей?
28 соберите ко мне племеноначалники ваша и старцы ваша, и судии ваша и книговводители ваша, да возглаголю во уши их вся словеса сия и засвидетелствую им небом и землею:
29 вем бо, яко по скончании моем беззакониемъ собеззаконнуете и уклонитеся от пути, егоже (азъ) заповедах вам, и срящут вас злая в последния дни, яко сотворите злое предъ господем богом, прогневати его в делех рукъ ваших.
30 И глагола моисей во ушеса всего сонма израилева словеса песни сея даже до конца:

 

Глава 32.

1 Вонми, небо, и возглаголю, и да слышит земля глаголы уст моих,
2 да чается яко дождь вещание мое, и да снидутъ яко роса глаголи мои, яко туча на троскотъ и яко иней на сено:
3 яко имя господне призвах, дадите величие богу нашему.
4 бог, истинна дела его, и вси путие его суд: бог верен, и несть неправды в нем: праведн и преподобен господь.
5 Согрешиша, не того чада порочная: роде строптивый и развращенный,
6 сия ли господеви воздаете, сии людие буии и не мудри? не сам ли сей отец твой стяжа тя, и сотвори тя, и созда тя?
7 Помяните дни вечныя, разумейте лета рода родов: вопроси отца твоего, и возвеститъ тебе, старцы твоя, и рекут тебе.
8 егда разделяше вышний языки, яко разсея сыны адамовы, постави пределы языков по числу ангел божиих,
9 и бысть часть господня, людие его иаков, уже наследия его израиль:
10 удовли его в пустыни, в жажди зноя в безводне: обыде его и наказа его, и сохрани его яко зеницу ока:
11 яко орел покры гнездо свое, и на птенцы своя возжеле: простер криле свои и приятъ их, и подъят их на раму своею.
12 господь един вождаше их, и не бе с ними бог чуждь:
13 возведе я на силу земли, насыти их житъ селных: ссаша мед из камене и елей от тверда камене,
14 масло кравие и млеко овчее с туком агнчимъ и овним сынов юнчих и козлих, с тукомъ пшеничным, и кровь гроздову пияху вино.
15 И яде иаков и насытися, и отвержеся возлюбленный: уты, утолсте, разшире: и остави бога сотворшаго его, и отступи от бога спаса своего.
16 Прогневаша мя о чуждих, и в мерзостехъ своих преогорчиша мя.
17 Пожроша бесовом, а не богу, богом, ихже не ведеша: нови и секрати недавни приидоша, ихже не ведеша отцы их.
18 бога рождшаго тя оставил еси и забылъ еси бога питающаго тя.
19 И виде господь, и возревнова, и раздражися за гнев сынов их и дщерей,
20 и рече: отвращу лице мое от них и покажу, что будет им напоследок, яко род развращенъ есть, сынове, имже несть веры в них:
21 тии раздражиша мя не о бозе, прогневаша мя во идолех своих: и аз раздражу ихъ не о языце, о языце же неразумливе прогневаю их:
22 яко огнь возгорится от ярости моея, разжжется до ада преисподняго, снест землю и жита ея, попалит основания гор:
23 соберу на них злая, и стрелы моя скончаю в них:
24 тающе гладом и снедию птиц, и горб неисцелен: зубы зверий послю в ня, с яростию пресмыкающихся по земли:
25 отвне обезчадит их мечь, и от храмовъ их страх: юноша с девою, ссущее с совершеннымъ старцем.
26 Рех: разсею их, уставлю же от человекъ память их:
27 токмо за гнев врагов, да не долголетствуют, и да не налягут супостати, да не рекут: рука наша высока, и не господь сотвори сия вся:
28 яко язык погубивый совет есть, и несть в них художества, не смыслиша разумети:
29 сия вся да приимут во грядущее лето.
30 Како поженет един тысящи, и два двигнета тмы, аще не бог отдаде их, и господь предаде ихъ?
31 Не суть бо бози их, яко бог наш: врази же наши неразумливи.
32 от виноградов бо содомских виноград их, и розга их от гоморры: грозд их гроздъ желчи, грозд горести их:
33 ярость змиев вино их, и ярость аспидовъ неисцельна.
34 Не сия ли вся собрашася у мене и запечатлешася в сокровищах моихъ?
35 В день отмщения воздам, во время егда соблазнится нога их: яко близ день погибели их, и предстоят готовая вам:
36 яко судити имать господь людем своим, и о рабех своих умолен будет: виде бо их разслабленны и истаявша во время и изнемогша.
37 И рече господь: где суть бози их, на нихже уповаша,
38 ихже тук жертв их ядясте, и пиясте вино треб ихъ? да воскреснут и помогут вам, и будут вам покровители.
39 Видите, видите, яко аз есмь, и несть бог разве мене: аз убию и жити сотворю: поражу и аз исцелю, и несть иже изметъ от руку моею:
40 яко воздвигну на небо руку мою, и кленуся десницею моею, и реку: живу аз во веки:
41 яко поострю якоже молнию мечь мой, и приимет суд рука моя, и воздам месть врагомъ и ненавидящим мя воздам:
42 упою стрелы моя от крове, и мечь мой снест мяса от крове язвеных и пленения, от глав князей языческих.
43 Возвеселитеся, небеса, купно с ним, и да поклонятся ему вси ангели божии: возвеселитеся, языцы, с людьми его, и да укрепятся ему вси сынове божии: яко кровь сынов своихъ отмщает и отмстит, и воздаст месть врагомъ и ненавидящим его воздаст: и очистит господь землю людий своих.
44 И написа моисей песнь сию в той день, и научи ей сыны израилевы: и вниде моисей к людем и глагола вся словеса закона сего во уши людем, сам и иисус навин.
45 И сконча моисей глаголя словеса сия вся всему израилю,
46 и рече к ним: внемлите сердцем вашимъ вся словеса сия, яже аз засвидетелствую вам днесь, яже да заповесте сыном вашим, хранити и творити вся словеса закона сего,
47 яко не тщетно слово сие вам, зане сия жизнь ваша, и ради слова сего долги дни будете на земли, на нюже вы преходите иордан тамо наследити ю.
48 И рече господь к моисею в день сей, глаголя:
49 взыди на гору аварим, сия гора навав, яже есть в земли моавли прямо иерихону, и виждь землю ханааню, юже аз даю сыномъ израилевым во обдержание:
50 и скончайся тамо на горе, на нюже восходиши, и приложися к людем твоим, якоже умре аарон брат твой на горе ор и приложися к людем своим:
51 понеже не покористеся словеси моему в сынехъ израилевых у воды [пререкания] кадис в пустыни син, понеже не освятисте мене в сынех израилевых:
52 яко прямо узриши землю, и тамо не внидеши, юже даю сыном израилевым.

 

Глава 33.

1 И сие благословение, имже благослови моисей человек божий сыны израилевы прежде скончания своего,
2 и рече: господь от синаи прииде, и явися от сиира нам, и приспе от горы фарани, и прииде со тмами святых, одесную его ангели с ним,
3 и пощаде люди своя: и вси освященнии подъ руками твоими, и сии под тобою суть.
4 И прия от словес его закон, егоже заповеда нам моисей, наследие сонму иаковлю:
5 и будет в возлюбленнем князь, собравшимся князем людским купно с племены израилевыми.
6 Да живет рувим, и да не умрет, и симеонъ да будет мног числом.
7 И сие иуде: услыши, господи, глас иудинъ и в люди его вниди: руце его поборютъ по нем, и помощник на враги его да будеши.
8 И левию рече: дадите левию явленная его, и истину его мужу преподобну, егоже искусиша искушением, укориша его у воды [пререкания]:
9 глаголяй отцу своему и матери своей: не видех тебе: и братии своея не позна, и сыновъ своих не уведе: сохрани словеса твоя и завет твой соблюде:
10 явят оправдания твоя иакову и законъ твой израилю: возложат фимиам во гневе твоемъ всегда на олтарь твой:
11 благослови, господи, крепость его и дела руку его приими: порази чресла воставших на него врагов его, и ненавидящии его да не востанут.
12 И вениамину рече: возлюбленный господем уповаяй вселится (в немъ), и бог осеняет его во вся дни, и посреде рамен его почи.
13 И иосифови рече: от благословения господня земля его, от красот небесных и росы, и от безднъ источников низу,
14 и во время плодов солнечных обращений, и от схождений месячных,
15 и от верха гор начала, и от верха холмовъ вечных,
16 и по времени земли исполнения: и приятная явившемуся в купине, да приидут на главу иосифу, и на версе прославивыйся в братии.
17 Первородный юнца доброта его, рози единорога рози его: ими языки избодет вкупе даже до края земли: сия тмы ефремовы, и сия тысящи манассиины.
18 И завулону рече: возвеселися, завулоне, во исходе твоем, и иссахаре, в селениих твоих:
19 языки потребят: и призовете тамо, и пожрете тамо жертву правды: яко богатство морское воздоитъ тя, и купли от язык при мори живущих.
20 И гаду рече: благословен разширяяй гада: яко лев почи, сокрушивый мышцу и князя:
21 и виде начатки своя, яко тамо разделися земля, князей собранных вкупе с началники людскими: правду господь сотвори и суд свой со израилем.
22 И дану рече: дан, скимен львов, и изскочитъ от васана.
23 И неффалиму рече: неффалим насыщение приятных, и да насытится благословением от господа: море и юг наследит.
24 И асиру рече: благословен от паче чадъ асир, и будет приятен братии своей: омочитъ в елей ногу свою:
25 железо и медь сапог его будет, и аки дни твоя крепость твоя.
26 Несть якоже бог возлюбленнаго: восходяй на небо помощник твой, и великолепый в тверди:
27 и покрыет тя божие начало, и под крепостию мышцей вечных: и отженет от лица твоего врага, глаголя: да погибнеши:
28 и вселится израиль уповая един на земли иаковли в вине и пшенице: и небо ему облачно росою.
29 Блажен еси, израилю: кто подобен тебе, людие спасаемии от господа? защитит помощник твой, и мечь хвала твоя: и солжут тебе врази твои, и ты на выю их наступиши.

 

Глава 34.

1 И взыде моисей от аравофа моавля на гору навав, на верх фазга, яже есть прямо иерихону: и показа ему господь всю землю галаадску даже до дана,
2 и всю землю неффалимлю, и всю землю ефремову и манассиину, и всю землю иудину даже до моря последняго,
3 и пустыню и окрестная (села) иерихона, град фиников даже до сигора,
4 и рече господь к моисею: сия земля, еюже кляхся аврааму и исааку и иакову, глаголя: семени вашему дам ю: и показах ю очесем твоим, и тамо не внидеши.
5 И скончася тамо моисей раб господень в земли моавли словом господним.
6 И погребоша его в земли моавли близъ дому фогорова. И не уведа никтоже погребения его даже до дне сего.
7 Моисею же бе сто и двадесять лет, егда скончася: не отемнесте очи его, ни истлеста устне его.
8 И плакашася сынове израилевы моисеа во аравофе моавли у иордана близ иерихона тридесять дний. И скончашася дние плача сетования о моисеи.
9 И иисус сын навин наполнися духа разума: возложи бо моисей руце свои на него. И послушаша его сынове израилевы, и сотвориша якоже заповеда господь моисею.
10 И не воста ктому пророк во израили якоже моисей, егоже позна господь лицем к лицу,
11 во всех знамениих и чудесех, егоже посла господь сотворити я в земли египетстей фараону и рабом его и всей земли его,
12 дивная великая, и руку крепкую (и мышцу высокую), яже сотвори моисей пред всемъ израилем.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы