Новый Завет — Соборное послание Святого Апостола Иакова

Глава 1.

Зачало 50.

1. Иаков, Богу и Господу Иисусу Христу раб, обeманадесяте колeнома, иже в разсeянии, радоватися.
2. Всяку радость имeйте, братие моя, егда во искушения впадаете различна,
3. вeдяще, яко искушение вашея вeры содeловает терпeние:
4. терпeние же дeло совершенно да имать, яко да будете совершенни и всецeли, ни в чемже лишени.
5. Аще же кто от вас лишен есть премудрости, да просит от дающаго Бога всeм нелицеприемнe и не поношающаго, и дастся ему.
6. Да просит же вeрою, ничтоже сумняся: сумняйся бо уподобися волнению морскому, вeтры возметаему и развeваему.
7. Да не мнит бо человeк он, яко приимет что от Бога.
8. Муж двоедушен неустроен во всeх путех своих.
9. Да хвалится же брат смиренный в высотe своей,
10. богатый же во смирении своем, зане якоже цвeт травный мимоидет:
11. возсия бо солнце со зноем, и изсуши траву, и цвeт ея отпаде, и благолeпие лица ея погибе: сице и богатый в хождении своем увядает.
12. Блажен муж, иже претерпит искушение: зане искусен быв, приимет вeнец жизни, егоже обeща Бог любящым его.
13. Никтоже искушаемь да глаголет, яко от Бога искушаемь есмь: Бог бо нeсть искуситель злым (искушаемь злыми), не искушает же той никогоже,
14. кийждо же искушается, от своея похоти влекомь и прельщаемь:
15. таже похоть заченши раждает грeх, грeх же содeян раждает смерть.
16. Не льститеся, братие моя возлюбленная:
17. всяко даяние благо и всяк дар совершен свыше есть, сходяй от Отца свeтов, у негоже нeсть премeнение, или преложения стeнь.
18. Восхотeв бо породи нас словом истины, во еже быти нам начаток нeкий созданием его.
19. (Зачало 51) Тeмже, братие моя возлюбленная, да будет всяк человeк скор услышати и косен глаголати, косен во гнeв,
20. гнeв бо мужа, правды Божия не содeловает.
21. Сего ради отложше всяку скверну и избыток злобы, в кротости приимите всажденное слово, могущее спасти душы вашя.
22. Бывайте же творцы слова, а не точию слышатели, прельщающе себе самeх.
23. Зане аще кто есть слышатель слова, а не творец, таковый уподобися мужу смотряющу лице бытия своего в зерцалe:
24. усмотри бо себе и отиде, и абие забы, каков бe.
25. Приникий же в закон совершен свободы, и пребыв, сей не слышатель забытлив быв, но творец дeла, сей блажен в дeлании своем будет.
26. Аще кто мнится вeрен быти в вас, и не обуздовает языка своего, но льстит сердце свое, сего суетна есть вeра.
27. Вeра бо честа и нескверна пред Богом и Отцем сия есть, еже посeщати сирых и вдовиц в скорбeх их, и нескверна себе блюсти от мира.

 

Глава 2.

Зачало 52.

1. Братие моя, не на лица зряще имeйте вeру Господа нашего Иисуса Христа славы.
2. Аще бо внидет в сонмище ваше муж, злат перстень нося, в ризe свeтлe, внидет же и нищь в худe одeжди,
3. и воззрите на носящаго ризу свeтлу, и речете ему: ты сяди здe добрe: и нищему речете: ты стани тамо, или сяди здe на подножии моем:
4. и не разсмотристе в себe, и бысте судии помышлений злых.
5. Слышите, братие моя возлюбленная, не Бог ли избра нищыя мира сего богаты в вeрe и наслeдники царствия, еже обeща любящым его?
6. вы же укористе нищаго. Не богатии ли насилуют вам, и тии влекут вы на судища?
7. не тии ли хулят доброе имя нареченное на вас?
8. Аще убо закон совершаете царский, по писанию: возлюбиши искренняго своего якоже себе самаго, добрe творите:
9. аще же на лица зрите, то грeх содeваете, обличаеми от закона якоже преступницы.
10. Иже бо весь закон соблюдет, согрeшит же во единeм, бысть всeм повинен.
11. Рекий бо: не прелюбы сотвориши, рекл есть и: не убиеши. Аще же не прелюбы сотвориши, убиеши же, был еси преступник закона.
12. Тако глаголите и тако творите, яко законом свободным имущии суд прияти.
13. Суд бо без милости не сотворшему милости: и хвалится милость на судe.
14. (Зачало 53) Кая польза, братие моя, аще вeру глаголет кто имeти, дeл же не имать? еда может вeра спасти его?
15. Аще же брат или сестра нага будета и лишена будета дневныя пищи,
16. речет же има кто от вас: идита с миром, грeйтася и насыщайтася? не даст же има требования тeлеснаго: кая польза?
17. Такожде и вeра, аще дeл не имать, мертва есть о себe.
18. Но речет кто: ты вeру имаши, аз же дeла имам: покажи ми вeру твою от дeл твоих, и аз тебe покажу от дeл моих вeру мою.
19. Ты вeруеши, яко Бог един есть: добрe твориши: и бeси вeруют, и трепещут.
20. Хощеши же ли разумeти, о, человeче суетне, яко вeра без дeл мертва есть?
21. Авраам отец наш не от дeл ли оправдася, вознес исаака сына своего на жертвенник?
22. Видиши ли, яко вeра поспeшествоваше дeлом его, и от дeл совершися вeра?
23. И совершися писание глаголющее: вeрова же авраам Богови, и вмeнися ему в правду, и друг Божий наречеся.
24. Зрите ли убо, яко от дeл оправдается человeк, а не от вeры единыя?
25. Такожде же и раав блудница не от дeл ли оправдася, приемши сходники и иным путем изведши их?
26. Якоже бо тeло без духа мертво есть, тако и вeра без дeл мертва есть.

 

Глава 3.

Зачало 54.

1. Не мнози учителие бывайте, братие моя, вeдяще, яко болшее осуждение приимем,
2. много бо согрeшаем вси. Аще кто в словe не согрeшает, сей совершен муж, силен обуздати и все тeло.
3. Се бо и конем узды во уста влагаем, да повинуются нам, и все тeло их обращаем:
4. се, и корабли велицы суще и от жестоких вeтров заточаеми, обращаются малым кормилцем, аможе стремление правящаго хощет:
5. такожде же и язык мал уд есть, и вельми хвалится. Се мал огнь, и коль велики вещи сожигает.
6. И язык огнь, лeпота неправды: сице и язык водворяется во удeх наших, скверня все тeло, и паля коло рождения нашего, и опаляяся от геенны:
7. всяко бо естество звeрей же и птиц, гад же и рыб, укрощается и укротится естеством человeческим,
8. языка же никтоже может от человeк укротити: не удержимо бо зло, исполнь яда смертоносна.
9. Тeм благословляем Бога и Отца, и тeм кленем человeки бывшыя по подобию Божию:
10. от тeхже уст исходит благословение и клятва. Не подобает, братие моя возлюбленная, сим тако бывати.
11. (Зачало 55) Еда ли источник от единаго устия источает сладкое и горькое?
12. Еда может, братие моя, смоковница маслины творити, или виноградная лоза смоквы? такожде ни един источник слану и сладку творит воду.
13. Кто премудр и худог в вас, да покажет от добраго жития дeла своя в кротости и премудрости.
14. Аще же зависть горьку имате и рвение в сердцах ваших, не хвалитеся, ни лжите на истину:
15. нeсть сия премудрость свыше низходящи, но земна, душевна, бeсовска:
16. идeже бо зависть и рвение, ту нестроение и всяка зла вещь.
17. А яже свыше премдрость, первeе убо честа есть, потом же мирна, кротка, благопокорлива, исполнь милости и плодов благих, несумeнна и нелицемeрна.
18. Плод же правды в мирe сeется творящым мир.

 

Глава 4.

1. Откуду брани и свары в вас? не отсюду ли, от сластей ваших, воюющих во удeх ваших?
2. Желаете, и не имате: убиваете и завидите, и не можете улучити: сваряетеся и борете, и не имате, зане не просите:
3. просите, и не приемлете, зане злe просите, да в сластех ваших иждивете.
4. Прелюбодeе и прелюбодeйцы, не вeсте ли, яко любы мира сего вражда Богу есть, иже бо восхощет друг быти миру, враг Божии бывает.
5. Или мните, яко всуе писание глаголет: к зависти желает дух, иже вселися в ны?
6. Болшую же дает благодать: тeмже глаголет: Господь гордым противится, смиренным же дает благодать.
7. (Зачало 56) Повинитеся убо Богу, противитеся же диаволу, и бeжит от вас.
8. Приближитеся Богу, и приближится вам: очистите руцe, грeшницы, исправите сердца ваша, двоедушнии:
9. постраждите и слезите и плачитеся: смeх ваш в плачь да обратится, и радость в сeтование:
10. смиритеся пред Господем, и вознесет вы.
11. Не оклеветайте друг друга, братие: оклеветаяй бо брата, или осуждаяй брата своего, оклеветает закон и осуждает закон: аще же закон осуждаеши, нeси творец закона, но судия.
12. Един есть законоположник и судия, могий спасти и погубити: ты же кто еси осуждаяй друга?
13. Слышите нынe, глаголющии: днесь или утрe пойдем во он град, и сотворим ту лeто едино, и куплю дeем и приобрeтение:
14. иже не вeсте, что утрe случится: кая бо жизнь ваша, пара бо есть, яже вмалe является, потом же исчезает.
15. Вмeсто еже бы глаголати вам: аще Господь восхощет, и живи будем, и сотворим сие или оно:
16. нынe же хвалитеся в гордынех ваших: всяка хвала такова зла есть.
17. Вeдущему убо добро творити, и не творящему, грeх ему есть.

 

Глава 5.

1. Приидите нынe, богатии, плачитеся и рыдайте о лютых скорбех ваших грядущих на вы.
2. Богатство ваше изгни, и ризы вашя молие поядоша.
3. Злато ваше и сребро изоржавe, и ржа их в послушество на вас будет, и снeсть плоти вашя аки огнь: егоже снискасте в послeдния дни.
4. Се, мзда дeлателей дeлавших нивы вашя, удержаная от вас, вопиет, и вопиения жавших во ушы Господа саваофа внидоша.
5. Возвеселистеся на земли, и насладистеся: упитасте сердца ваша аки в день заколения.
6. Осудисте, убисте првднаго: не противится вам.
7. (Зачало 57) Долготерпите убо, братие моя, до пришествия Господня. Се земледeлец ждет честнаго плода от земли, долготерпя о нем, дондеже приимет дождь ран и позден:
8. долготерпите убо и вы, утвердите сердца ваша, яко пришествие Господне приближися.
9. Не воздыхайте друг на друга, братие, да не осуждени будете: се, судия пред дверьми стоит.
10. Образ приимите, братие моя, злострадания и долготерпeния пророки, иже глаголаша именем Господним.
11. Се, блажим терпящыя. Терпeние иовле слышасте, и кончину Господню видeсте, яко многомилостив есть Господь и щедр.
12. Прежде же всeх, братие моя, не кленитеся ни небом, ни землею, ни иною коею клятвою: буди же вам еже ей, ей, и еже ни, ни: да не в лицемeрие впадете.
13. Злостраждет ли кто в вас? да молитву дeет: благодушствует ли кто? да поет.
14. Болит ли кто в вас, да призовет пресвитеры церковныя, и да молитву сотворят над ним, помазавше его елеем во имя Господне:
15. и молитва вeры спасет болящаго, и воздвигнет его Господь: и аще грeхи сотворил есть, отпустятся ему.
16. Исповeдайте убо друг другу согрeшения и молитеся друг за друга, яко да исцeлeете: много бо может молитва првднаго поспeшествуема.
17. Илиа человeк бe подобострастен нам, и молитвою помолися, да не будет дождь, и не одожди по земли лeта три и мeсяц шесть:
18. и паки помолися, и небо дождь даде, и земля прозябе плод свой.
19. Братие, аще кто в вас заблудит от пути истины, и обратит кто его,
20. да вeсть, яко обративый грeшника от заблуждения пути его спасет душу от смерти и покрыет множество грeхов.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы