Новый Завет — Второе Соборное послание Святого апостола Петра

Глава 1.

Зачало 64.

1 Симон петр, раб и посланник иисус христов, равночестную с нами получившими веру в правде бога нашего и спаса иисуса христа:
2 благодать вам и мир да умножится в познании бога, и христа иисуса господа нашего.
3 яко вся нам божественныя силы его, яже к животу и благочестию, подана разумом [познаниемъ] призвавшаго нас славою и добродетелию,
4 имиже честная нам и великая обетования даровашася, да сих ради будете божественнаго причастницы естества, отбегше, яже в мире, похотныя тли:
5 и в самое же сие, тщание все привнесше, подадите в вере вашей добродетель, в добродетели же разум,
6 в разуме же воздержание, в воздержании же терпение, в терпении же благочестие,
7 во благочестии же братолюбие, в братолюбии же любовь.
8 Сия бо сущая в вас и множащаяся, не праздныхъ ниже безплодных сотворят вы в господа нашего иисуса христа познание:
9 емуже бо несть сих, слеп есть, мжай, забвение прием очищения древних своих грехов.
10 (Зачало 65) Темже паче, братие, потщитеся известно ваше звание и избрание творити: сия бо творяще, не имате согрешити никогдаже,
11 сице бо обилно приподастся вам вход въ вечное царство господа нашего и спаса иисуса христа.
12 Сего ради не обленюся воспоминати присно вам о сих, аще и ведите, и утверждени есте в настоящей истине.
13 Праведно бо мню, донележе есмь в семъ телеси, возставляти вас воспоминанием,
14 ведый, яко скоро есть отложение телесе моего, якоже и господь наш иисус христос сказа мне.
15 Потщуся же и всегда имети вас по моемъ исходе память о сих творити.
16 Не ухищренным бо баснем последовавше сказахом вам силу и пришествие господа нашего иисуса христа, но самовидцы бывше величествия онаго.
17 Прием бо от бога отца честь и славу, гласу пришедшу к нему от велелепныя славы: сей есть сын мой возлюбленный, о немже азъ благоизволих.
18 И сей глас мы слышахом с небесе сшедшь, с ним суще на горе святей.
19 И имамы известнейшее пророческое слово: емуже внимающе якоже светилу сияющу в темнемъ месте, добре творите, дондеже день озарит, и денница возсияет в сердцах ваших,
20 (Зачало 66) сие прежде ведуще, яко всяко пророчество книжное по своему сказанию не бывает.
21 Ни бо волею бысть когда человеком пророчество, но от святаго духа просвещаеми глаголаша святии божии человецы.

 

Глава 2.

1 Быша же и лживии пророцы в людех, якоже и в вас будут лживии учителие, иже внесутъ ереси погибели, и искупльшаго их владыки отметающеся, приводяще себе скору погибель.
2 И мнози последствуют их нечистотам, ихже ради путь истинный похулится.
3 И в преумножении льстивых словес [в лихоимстве льстивыми словесы] вас уловят: ихже судъ искони не коснит, и погибель их не дремлет.
4 Аще бо бог аггелов согрешивших не пощаде, но пленицами мрака связав, предаде на суд мучимыхъ блюсти:
5 и перваго мира не пощаде, но осмаго ноа правды проповедника сохрани, потоп миру нечествовавшихъ наведе:
6 и грады содомския и гоморрския сжег, разорениемъ осуди, образ хотящим нечествовати положив:
7 и праведнаго лота, обидима от беззаконныхъ в нечистоте сожития, избави:
8 видением бо и слухом праведный, живый въ них, день от дне душу праведну беззаконными делы мучаше:
9 (Зачало 67) весть господь благочистивыя от напасти избавляти, неправедники же на день судный мучимы блюсти,
10 наипаче же вслед плотския похоти сквернения ходящия и о господстве нерадящия: продерзателе, себе угодницы, славы не трепещут хуляще:
11 идеже ангели крепостию и силою болши суще, не терпят на ся от господа укоризненъ суд.
12 Сии же, яко скоти животни естествомъ бывше в погибель и тлю, в нихже не разумеютъ хуляще, во истлении своем истлеют,
13 приемлюще мзду неправедну, сласть мняще вседневное насыщение, сквернители и порочницы, питающеся лестьми своими, ядуще с вами,
14 очи имуще исполнь блудодеяния и непрестаемаго греха, прельщающе души неутверждены, сердце научено лихоимству имуще, клятвы чада:
15 оставльше правый путь заблудиша, последовавше пути валаама восорова, иже мзду неправедну возлюби,
16 обличение же име своего беззакония: подъяремникъ безгласен, человеческим гласом провещавшь, возбрани пророка безумие.
17 Сии суть источницы безводни, облацы и мглы от ветр преносими, имже мрак темный во веки блюдется.
18 Прегордая бо суеты вещающе, прельщают въ скверны плотския похоти, отбегающих всячески от них живущих во льсти,
19 свободу им обещавающе, сами раби суще тления: имже бо кто побежден бывает, сему и работен есть.
20 Аще бо отбегше скверн мира в разум [познаниемъ] господа и спаса нашего иисуса христа, сими же паки сплетшеся побеждаеми бывают, быша им последняя горша первых.
21 Лучше бо бе им не познати пути правды, нежели познавшим возвратитися вспять от преданныя им святыя заповеди.
22 Случися бо им истинная притча: пес возвращься на свою блевотину, и: свиния, омывшися, в калъ тинный.

 

Глава 3.

Зачало 68.

1 Сие уже, возлюбленнии, второе вам пишу послание, в нихже возбуждаю воспоминанием ваш чистый смысл,
2 помянути прежде реченныя глаголы от святыхъ пророк, и апостол ваших заповедь господа и спаса:
3 сие прежде ведяще, яко приидут в последния дни ругателе, по своих похотех ходяще
4 и глаголюще: где есть обетование пришествия его, отнележе бо отцы успоша, вся тако пребывают от начала создания.
5 Таится бо им сие хотящим, яко небеса беша исперва, и земля от воды и водою [и посреде воды] составлена, божиим словом:
6 темже тогдашнии мир, водою потоплен быв, погибе.
7 А нынешняя небеса и земля темже словомъ сокровена суть, огню блюдома на день суда и погибели нечестивых человек.
8 едино же сие да не утаится вас, возлюбленнии, яко един день пред господем яко тысяща лет, и тысяща лет яко день един.
9 Не коснит господь обетования, якоже нецыи коснение мнят: но долготерпит на нас, не хотя да кто погибнет, но да вси в покаяние приидут.
10 Приидет же день господень яко тать в нощи, в оньже небеса убо с шумом мимо идутъ [пойдутъ], стихии же сжигаемы разорятся, земля же и яже на ней дела сгорят.
11 Сим убо всем разоряемым, кацемъ подобает быти вам во святых пребываниих и благочестиих,
12 чающим и скорее быти желающим пришествия божияго дне, егоже ради небеса жегома разорятся, и стихии опаляемы растаются?
13 Нова же небесе и новы земли по обетованию его чаем, в нихже правда живет.
14 Темже, возлюбленнии, сих чающе, потщитеся нескверни и непорочни тому обрестися в мире,
15 и господа нашего долготерпение спасние непщуйте, якоже и возлюбленный наш брат павел по данней ему премудрости написа вам,
16 якоже и во всех своих посланиих, глаголя в них о сих: в нихже суть неудобь разумна некая, яже ненаучени и неутверждени развращают, якоже и прочая писания, к своей погибели им.
17 Вы же убо, возлюбленнии, предведяще хранитеся, да не лестию беззаконных сведени бывше, отпадете своего утверждения,
18 но да растете во благодати и разуме господа нашего и спаса иисуса христа. Тому слава и ныне и въ день века. Аминь.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы