Первое послание Святого апостола Павла к Фессалоникийцам

Глава 1.

Зачало 262.

1 Павел и силуан и тимофей церкви солунстей о бозе отце и господе иисусе христе: благодать вам и мир от бога отца нашего и господа иисуса христа.
2 Благодарим бога всегда о всех вас, поминание о вас творяще в молитвах наших,
3 непрестанно поминающе ваше дело веры, и труд любве, и терпение упования господа нашего иисуса христа, пред богом и отцем нашим,
4 ведяще, братие возлюбленная, от бога избрание ваше:
5 яко благовествование наше не бысть к вамъ в слове точию, но и в силе, и в дусе святе, и во извещении мнозе, якоже и весте, какови быхом в вас ради вас.
6 (Зачало 263) И вы подобницы бысте нам и господу, приемше слово в скорби мнозе с радостию духа святаго,
7 яко быти вам образ всем верующимъ в македонии и ахаии.
8 от вас бо промчеся слово господне не токмо въ македонии и ахаии, но и во всяко место вера ваша, яже к богу, изыде, яко не требовати нам глаголати что.
9 Тии бо о нас возвещают, каков вход имехомъ к вам, и како обратистеся к богу от идол, работати богу живу и истинну
10 и ждати сына его с небес, егоже воскреси из мертвых, иисуса, избавляющаго нас от гнева грядущаго.

 

Глава 2.

Зачало 264.

1 Сами бо весте, братие, вход наш иже к вам, яко не вотще бысть:
2 но предпострадавше и досаждени бывше, якоже весте, в филиппех, дерзнухом о бозе нашемъ глаголати к вам благовествование божие со многимъ подвигом.
3 утешение бо наше не от прелести, ни от нечистоты, ни лестию:
4 но якоже искусихомся от бога верни быти прияти благовествование, тако глаголем, не аки человеком угождающе, но богу искушающему сердца наша.
5 Никогдаже бо в словеси ласкания быхом к вам, якоже весте, ниже в вине лихоимания: богъ свидетель!
6 Ни ищуще от человек славы, ни от вас, ни от инех:
7 могуще в тяготе быти, якоже христовы апостоли, но быхом тиси посреде вас, якоже доилица греет своя чада.
8 Тако желающе вас, благоволихом подати вамъ не точию благовествование божие, но и души своя, занеже возлюблени бысте нам.
9 (Зачало 265) Помните бо, братие, труд наш и подвиг: нощь бо и день делающе, да не отяготимъ ни единаго от вас, проповедахом вам благовествование божие.
10 Вы свидетеле и бог, яко преподобно и праведно и непорочно вам верующим быхом,
11 якоже весте, зане единаго когождо вас, якоже отец чада своя,
12 моляще и утешающе вас, и свидетелствующе вам ходити достойно богу, призвавшему вы во свое царство и славу.
13 Сего ради и мы благодарим бога непрестанно, яко приемше слово слышания божия от нас, приясте не аки слово человеческо, но, якоже есть воистинну, слово божие, еже и действуется в вас верующих.
14 (Зачало 266) Вы бо подобницы бысте, братие, церквам божиим сущим во иудеи о христе иисусе, зане таяжде и вы пострадасте от своих сплеменник, якоже и тии от иудей,
15 убивших и господа иисуса и его пророки, и нас изгнавших, и богу не угодивших, и всем человеком противящихся,
16 (и) возбраняющих нам глаголати языком, да спасутся, во еже исполнити им грехи своя всегда: постиже же на них гнев до конца.
17 Мы же, братие, осиротевше от вас ко времени часа лицем, а не сердцем, лишше тщахомся лице ваше видети многим желанием.
18 Темже хотехом приити к вам, аз убо павел, единою и дважды: и возбрани намъ сатана.
19 Кто бо нам упование или радость или венец похваления? Не и вы ли пред господем нашимъ иисус христом во пришествии его?
20 (Зачало 267) Вы бо есте слава наша и радость.

 

Глава 3.

1 Темже уже не терпяще, благоволихом остатися во афинех едини,
2 и послахом тимофеа, брата нашего и служителя божия и споспешника нашего во благовестии христове, утвердити вас и утешити о вере вашей,
3 яко ни единому смущатися в скорбех сих: сами бо весте, яко на сие истое лежим [учинени есмы].
4 Ибо егда у вас бехом, предрекохомъ вам, яко имамы скорбети, еже и бысть, и весте.
5 Сего ради и аз ктому не терпя, послахъ разумети веру вашу, да не како искусил вы искушаяй, и вотще будет труд наш.
6 ныне же пришедшу тимофею к нам от вас и благовестившу нам веру вашу и любовь, и яко имате память о нас благу, всегда желающе насъ видети, якоже и мы вас:
7 сего ради утешихомся, братие, о вас, во всякой скорби и нужде нашей, вашею верою:
8 яко мы ныне живи есмы, аще вы стоите о господе.
9 (Зачало 268) Кое бо благодарение богу можем воздати о вас, о всякой радости, еюже радуемся васъ ради пред богом нашим,
10 нощь и день преизлиха молящеся видети лице ваше и совершити лишение веры вашея?
11 Сам же бог и отец наш и господь наш иисусъ христос да исправит путь наш к вам.
12 Вас же господь да умножит и да избыточествитъ любовию друг ко другу и ко всем, якоже и мы к вам,
13 во еже утвердити сердца ваша непорочна в святыни пред богом и отцем нашим, въ пришествие господа нашего иисуса христа со всеми святыми его. Аминь.

 

Глава 4.

Зачало 269.

1 Темже убо, братие, просим вы и молимъ о христе иисусе, якоже приясте от нас, како подобает вам ходити и угождати богови, якоже и ходите, да избыточествуете паче:
2 весте бо, какова повеления дахом вам господемъ иисусом.
3 Сия бо есть воля божия, святость ваша, хранити себе самех от блуда,
4 (и) ведети комуждо от вас свой сосудъ стяжавати во святыни и чести,
5 (а) не в страсти похотней, якоже и языцы не ведящии бога,
6 (и) еже не преступати и лихоимствовати въ вещи брата своего: зане мститель есть господь о всех сих, якоже и прежде рекохом къ вам и засвидетелствовахом.
7 Не призва бо нас бог на нечистоту, но во святость.
8 Темже убо отметаяй не человека отметает, но бога, давшаго духа своего святаго в нас.
9 о братолюбии же, не требуете, да пишется къ вам, сами бо вы богом учени есте, еже любити друг друга:
10 ибо творите то ко всей братии, сущей во всей македонии. Молим же вы, братие, избыточествовати паче,
11 и любезно прилежати, еже безмолвствовати и деяти своя и делати своима рукама, якоже повелехом вам:
12 да ходите благообразно ко внешним и ни чесогоже требуете.
13 (Зачало 270) Не хощу же вас, братие, не ведети о умерших, да не скорбите, якоже и прочии не имущии упования.
14 Аще бо веруем, яко иисус умре и воскресе, тако и бог умершия во иисусе приведетъ с ним.
15 Сие бо вам глаголем словом господним, яко мы живущии, оставшии в пришествие господне, не имамы предварити умерших:
16 яко сам господь в повелении, во гласе архангелове и в трубе божии снидет с небесе, и мертвии о христе воскреснут первее:
17 потом же мы, живущии оставшии, купно съ ними восхищени будем на облацех в сретение господне на воздусе, и тако всегда с господем будем.
18 Темже утешайте друг друга в словесехъ сих.

 

Глава 5.

Зачало 271.

1 А о летех и о временех, братие, не требе есть вам писати,
2 сами бо вы известно весте, яко день господень, якоже тать в нощи, тако приидет.
3 егда бо рекут: мир и утверждение, тогда внезапу нападет на них всегубителство, якоже болезнь во чреве имущей, и не имутъ избежати.
4 Вы же, братие, несте во тме, да день васъ якоже тать постигнет:
5 вси бо вы сынове света есте: и сынове дне: несмы нощи, ниже тмы.
6 Темже убо да не спим, якоже и прочии, но да бодрствуим и трезвимся.
7 Спящии бо, в нощи спят, и упивающиися в нощи упиваются.
8 Мы же, сынове суще дне, да трезвимся, оболкшеся в броню веры и любве и шлем упования спасния,
9 (Зачало 272) яко не положи нас бог в гнев, но в получение спасния господем нашим иисус христом,
10 умершим за нас, да, аще бдим, аще ли спим, купно с ним живем.
11 Сего ради утешайте друг друга, и созидайте кийждо ближняго, якоже и творите.
12 (Зачало 273) Молим же вы, братие, знайте труждающихся у вас, и настоятелей ваших о господе, и наказующих вы,
13 и имейте их по преизлиха в любви за дело их: мирствуйте в себе.
14 Молим же вы, братие, вразумляйте безчинныя, утешайте малодушныя, заступайте немощныя, долготерпите ко всем.
15 Блюдите, да никтоже зла за зло кому воздаст: но всегда доброе гоните и друг ко другу и ко всем.
16 Всегда радуйтеся.
17 Непрестанно молитеся.
18 о всем благодарите: сия бо есть воля божия о христе иисусе в вас.
19 духа не угашайте.
20 пророчествия не уничижайте.
21 Вся же искушающе, добрая держите.
22 от всякия вещи злыя [от всякаго вида злаго] огребайтеся.
23 Сам же бог мира да освятит вас всесовершенныхъ во всем: и всесовершен ваш дух и душа и тело непорочно в пришествие господа нашего иисуса христа да сохранится.
24 Верен призвавый вас, иже и сотворит.
25 Братие, молитеся о нас.
26 Целуйте братию всю лобзанием святым.
27 Заклинаю вы господем, прочести послание сие пред всею святою братиею.
28 благодать господа нашего иисуса христа с вами. Аминь.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы