Новый Завет — Первое Соборное послание Святого апостола Петра

Глава 1.

Зачало 58.

1 Петр, апостол иисус христов, избранным пришелцемъ разсеяния понта, галатии, каппадокии, асии и вифинии,
2 по прозрению бога отца, во святыни духа, въ послушание и кропление крове иисус христовы: благодать вам и мир да умножится.
3 благословен бог и отец господа нашего иисуса христа, иже по мнозей своей милости порождей нас во упование живо воскресением иисус христовымъ от мертвых,
4 в наследие нетленно и нескверно и неувядаемо, соблюдено на небесех вас ради,
5 иже силою божиею соблюдаеми есте чрезъ веру, во спасние готовое явитися во время последнее.
6 о немже радуйтеся, мало ныне, аще лепо есть, прискорбни бывше в различных напастех:
7 да искушение вашея веры многочестнейше злата гибнуща, огнем же искушена, обрящется въ похвалу и честь и славу, во откровении иисусъ христове,
8 егоже не видевше любите, (и) на негоже ныне не зряще, верующе же, радуетеся радостию неизглаголанною и прославленною,
9 приемлюще кончину вере вашей, спасние душам:
10 о немже спасении взыскаша и испыташа пророцы, иже о вашей благодати прорекоша,
11 испытающе, в каково или в кое время являше в них дух христов, прежде свидетелствуя о христовых страстех, и о славах, яже по сих:
12 имже открыся, яко не им самем, но нам служаху сия, яже ныне возвестишася вамъ благовествовавшими вам духом святым посланнымъ с небесе, в няже желают ангели приникнути.
13 Темже, (возлюбленнии,) препоясавше чресла помышления вашего, трезвящеся, совершенне уповайте на приносимую вам благодать откровениемъ иисус христовым.
14 яко чада послушания, не преобразующеся первыми неведения вашего похотении,
15 но по звавшему вы святому, и сами святи во всемъ житии будите.
16 Зане писано есть: святи будите, яко азъ свят есмь.
17 И аще отца называете нелицемерно судяща комуждо по делу, со страхом жития вашего время жителствуйте,
18 ведяще, яко не истленным сребром или златом избавистеся от суетнаго вашего жития отцы преданнаго,
19 но честною кровию яко агнца непорочна и пречиста христа,
20 предуведена убо прежде сложения мира, явльшася же в последняя лета вас ради,
21 иже его ради веруете в бога воздвигшаго его из мертвых и славу ему давша, яко да вера ваша и упование будет на бога.
22 Души ваша очистивше в послушании истины духом, в братолюбие нелицемерно, от чиста сердца друг друга любите прилежно,
23 порождени не от семене истленна, но неистленна, словом живаго бога и пребывающа во веки.
24 Зане всяка плоть яко трава, и всяка слава человеча яко цвет травный: изсше трава, и цвет ея отпаде:
25 глагол же господень пребывает во веки. Се же есть глагол благовествованный в вас.

 

Глава 2.

1 Отложше убо всяку злобу и всяку лесть и лицемерие и зависть и вся клеветы,
2 яко новорождени младенцы, словесное и нелестное млеко возлюбите, яко да о нем возрастете во спасение:
3 понеже вкусисте, яко благ господь.
4 К немуже приходяще, камени живу, от человекъ убо уничижену, от бога же избрану, честну,
5 и сами яко камение живо зиждитеся во храмъ духовен, святителство свято, возносити жертвы духовны, благоприятны богови иисус христом.
6 Зане писано есть в писании: се полагаю в сионе камень краеуголен, избран, честен: и веруяй вонь не постыдится.
7 Вам убо честь верующим, а противящимся камень, егоже небрегоша зиждущии, сей бысть во главу угла, и камень претыкания и камень соблазна:
8 о немже и претыкаются слову противляющиися, на неже и положени быша.
9 Вы же род избран, царское священие, языкъ свят, людие обновления, яко да добродетели возвестите из тмы вас призвавшаго в чудный свой свет:
10 иже иногда не людие, ныне же людие божии: иже не помиловани, ныне же помиловани бысте.
11 Возлюбленнии, молю яко пришелцевъ и странников, огребатися от плотских похотей, яже воюют на душу,
12 житие ваше имуще добро во языцех, да о немже клевещут вас аки злодеев, от добрых дел видевше, прославят бога в день посещения.
13 Повинитеся убо всякому человечу созданию [началству] господа ради: аще царю, яко преобладающу:
14 аще ли же князем, яко от него посланным, во отмщение убо злодеем, в похвалу же благотворцем.
15 яко тако есть воля божия, благотворящимъ обуздовати безумных человек невежство:
16 яко свободни, а не яко прикровение имуще злобы свободу, но яко раби божии.
17 Всех почитайте, братство возлюбите, бога бойтеся, царя чтите.
18 Раби, повинуйтеся во всяцем страсе владыкам, не токмо благим и кротким, но и строптивым.
19 Се бо есть угодно пред богом, аще совести ради божия терпит кто скорби, стражда без правды.
20 Кая бо похвала, аще согрешающе мучими терпите? Но аще добро творяще и страждуще терпите, сие угодно пред богом,
21 на сие бо и звани бысте: (Зачало 59) зане и христос пострада по нас, нам оставль образ, да последуем стопам его:
22 иже греха не сотвори, ни обретеся лесть во устех его:
23 иже укаряемь противу не укаряше, стражда не прещаше, предаяше же судящему праведно:
24 иже грехи наша сам вознесе на теле своемъ на древо, да от грех избывше, правдою поживем: егоже язвою исцелесте.
25 Бесте бо яко овцы заблуждшия (не имущя пастыря): но возвратистеся ныне к пастырю и посетителю душ ваших.

 

Глава 3.

1 Такожде же и жены, повинующяся своим мужем, да и аще нецыи не повинуются слову, женскимъ житием без слова пленени будут,
2 видевше еже со страхом чисто житие ваше.
3 Имже да будет не внешняя, плетения власъ и обложения злата, или одеяния риз, лепота,
4 но потаеный сердца человек, в неистлении кроткаго и молчаливаго духа, еже есть предъ богом многоценно.
5 Тако бо иногда и святыя жены, уповающия на бога, украшаху себе, повинующяся своимъ мужем:
6 якоже сарра послушаше авраама, господина того зовущи: еяже бысте чада, благотворящя и не боящяся ни единаго страха.
7 Мужие такожде, вкупе живуще со своими женами по разуму, яко немощнейшу сосуду женскому воздающе честь, яко и снаследницы благодатныя жизни, во еже не прекращатися молитвам вашим.
8 Конец же, вси единомудрени будите, милостиви, братолюбцы, (милосердни,) благоутробни, мудролюбцы, смиреномудри:
9 не воздающе зла за зло, или досаждения за досаждение: супротивное же, благословяще, ведяще, яко на се звани бысте, да благословение наследите.
10 (Зачало 60) Хотяй бо живот любити и видети дни благи, да удержит язык свой от зла, и устне свои еже не глаголати льсти.
11 Да уклонится от зла, и да сотворит благо, да взыщет мира и да держится его:
12 зане очи господни на праведныя, и уши его в молитву их, лице же господне на творящия злая, еже потребити их от земли.
13 И кто озлобит вас, аще благому подобницы будете?
14 Но аще и страждете правды ради, блажени есте: страха же их не убойтеся, ниже смущайтеся.
15 господа же бога освятите в сердцах ваших: готови же присно ко ответу всякому вопрошающему вы словесе о вашем уповании, с кротостию и страхом:
16 совесть имуще благу, да о немже клевещутъ вас аки злодеев, постыдятся злословящии ваше благое о христе житие.
17 Лучше бо есть благое творящим, аще хощетъ воля божия, пострадати, нежели зло творящим:
18 зане и христос единою о гресех нашихъ пострада, праведник за неправедники, да приведетъ ны богови, умерщвлен убо быв плотию, ожив же духом:
19 о немже и сущим в темнице духовом сошедъ проповеда,
20 противльшимся иногда, егда ожидаше божие долготерпение, во дни ноевы, делаему ковчегу, в немже мало, сиречь осмь душ, спасошася от воды.
21 егоже воображение ныне и нас спасаетъ крещение, не плотския отложение скверны, но совести благи вопрошение у бога, воскресением иисус христовым,
22 иже есть о десную бога, возшед на небо, покоршимся ему ангелом и властем и силам.

 

Глава 4.

Зачало 61.

1 Христу убо пострадавшу за ны плотию, и вы в ту же мысль вооружитеся: зане пострадавый плотию, преста от греха,
2 во еже не ктому человеческим похотем, но воли божией прочее во плоти жити время.
3 Довлеет бо вам мимошедшее время жития, волю языческую творившим, хождшим в нечистотах, в похотех, (в мужеложстве, в скотоложстве, в помыслех,) в пиянстве, в козлогласованиих, в лихоимании и богомерзких идолослужениих:
4 о немже дивятся, не сходящимся вам в тоже блуда разлияние, хуляще:
5 иже воздадят слово готову сущему судити живым и мертвым.
6 На се бо и мертвым благовестися, да судъ убо приимут по человеку плотию, поживутъ же по бозе духом.
7 Всем же кончина приближися. уцеломудритеся убо и трезвитеся в молитвах.
8 Прежде же всех друг ко другу любовь прилежну имейте, зане любовь покрывает множество грехов.
9 Страннолюбцы друг ко другу, без роптании.
10 Кийждо якоже прият дарование, между себе сим служаще, яко добрии строителие различныя благодати божия.
11 Аще кто глаголет, яко словеса божия: аще кто служит, яко от крепости, юже подаетъ бог: да о всем славится бог иисус христом, емуже есть слава и держава во веки веков. Аминь.
12 (Зачало 62) Возлюбленнии, не дивитеся еже в вас раждежению ко искушению вам бываему, яко чужду вам случающуся:
13 но понеже приобщаетеся христовым страстем, радуйтеся, яко да и в явление славы его возрадуетеся веселящеся.
14 Аще укоряеми бываете о имени христове, блажени есте яко славы и божий дух на васъ почивает: онеми убо хулится, а вами прославляется.
15 Да не кто убо от вас постраждет яко убийца, или яко тать, или яко злодей, или яко чуждопосетитель:
16 аще ли же яко христианин, да не стыдится, да прославляет же бога в части сей.
17 яко время начати суд от дому божия: аще же прежде от вас, кая кончина противящимся божию евангелию?
18 И аще праведник едва спасется, нечестивый и грешный где явится?
19 Темже и страждущии по воли божией, яко верну зиждителю да предадят души своя во благотворении.

 

Глава 5.

1 Старцы иже в вас молю, яко старец сый и свидетель христовым страстем, иже и хотящей славе явитися общник:
2 пасите еже в вас стадо божие, посещающе не нуждею, но волею и по бозе, ниже неправедными прибытки, но усердно,
3 ни яко обладающе причту, но образи бывайте стаду:
4 и явльшуся пастыреначалнику, приимете неувядаемый славы венец.
5 Такоже юнии повинитеся старцем: вси же друг другу повинующеся, смиреномудрие стяжите, зане бог гордым противится, смиренным же даетъ благодать.
6 (Зачало 63) Смиритеся убо под крепкую руку божию, да вы вознесет во время:
7 всю печаль вашу возвергше нань, яко той печется о вас.
8 Трезвитеся, бодрствуйте, зане супостат вашъ диавол, яко лев рыкая, ходит, иский кого поглотити:
9 емуже противитеся тверди верою, ведуще, яко теже страсти случаются вашему братству, еже в мире.
10 бог же всякия благодати, призвавый вас в вечную свою славу о христе иисусе, мало пострадавшия, той да совершит вы, да утвердит, да укрепит, да оснует.
11 Тому слава и держава во веки веков. Аминь.
12 Силуаном вам верным братом, яко непщую, вмале написах, моля и засвидетелствуя сей быти истинней благодати божией, в нейже стоите.
13 Целует вы яже в вавилоне соизбранная, и марко сын мой.
14 Целуйте друг друга лобзанием любве. Миръ вам всем о христе иисусе. Аминь.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы