Послание к Римлянам Святого апостола Павла

Глава 1.

Зачало 79.

1 Павел, раб иисус христов, зван апостол, избранъ в благовестие божие,
2 еже прежде обеща пророки своими в писаниихъ святых,
3 о сыне своем, бывшем от семене давидова по плоти,
4 нареченнем сыне божии в силе, по духу святыни, из воскресния от мертвых, иисуса христа господа нашего,
5 имже прияхом благодать и апостольство в послушание веры во всех языцех, о имени его,
6 в нихже есте и вы, звани иисусу христу:
7 всем сущим в риме возлюбленным богу, званным святым: благодать вам и мир от бога отца нашего, и господа иисуса христа.
8 Первое убо благодарю бога моего иисусомъ христом о всех вас, яко вера ваша возвещается во всем мире:
9 свидетель бо ми есть бог, емуже служу духом моим во благовествовании сына его, яко безпрестани память о вас творю,
10 всегда в молитвах моих моляся, аще убо когда поспешен буду волею божиею приити к вам:
11 желаю бо видети вас, да некое подам вамъ дарование духовное, ко утверждению вашему:
12 сие же есть, соутешитися в вас верою общею, вашею же и моею.
13 Не хощу же не ведети вам, братие, яко множицею восхотех приити к вам, и возбраненъ бых доселе, да некий плод имею и в вас, якоже и в прочих языцех.
14 еллином же и варвавом, мудрым же и неразумнымъ должен есмь:
15 тако есть, еже по моему усердию и вам сущим в риме благовестити.
16 Не стыжуся бо благовествованием христовым: сила бо божия есть во спасние всякому верующему, иудеови же прежде и еллину.
17 Правда бо божия в нем является от веры в веру, якоже есть писано: праведный же от веры жив будет.
18 (Зачало 80) открывается бо гнев божий с небесе на всякое нечестие и неправду человеков, содержащихъ истину в неправде:
19 зане разумное божие [еже возможно разумети о бозе] яве есть в них, бог бо явилъ есть им:
20 невидимая бо его, от создания мира твореньми помышляема, видима суть, и присносущная сила его и божество, во еже быти им безответным.
21 Занеже разумевше бога, не яко бога прославиша или благодариша, но осуетишася помышлении своими, и омрачися неразумное их сердце:
22 глаголющеся быти мудри, объюродеша,
23 и измениша славу нетленнаго бога в подобие образа тленна человека и птиц и четвероногъ и гад:
24 темже и предаде их бог в похотех сердецъ их в нечистоту, во еже сквернитися телесемъ их в себе самех:
25 иже премениша истину божию во лжу, и почтоша и послужиша твари паче творца, иже есть благословен во веки, аминь.
26 Сего ради предаде их бог в страсти безчестия: и жены бо их измениша естественную подобу в презъестественную:
27 такожде и мужие, оставльше естественную подобу женска пола, разжегошася похотию своею друг на друга, мужи на мужех студ содевающе, и возмездие, еже подобаше прелести их, въ себе восприемлюще.
28 (Зачало 81) И якоже не искусиша имети бога в разуме, (сего ради) предаде их бог в неискусенъ ум, творити неподобная,
29 исполненых всякия неправды, блужения, лукавства, лихоимания, злобы: исполненых зависти, убийства, рвения, льсти, злонравия:
30 шепотники, клеветники, богомерзки, досадители, величавы, горды, обретатели злых, родителемъ непокоривы,
31 неразумны, непримирителны, нелюбовны, неклятвохранителны, немилостивны.
32 Нецыи же и оправдание божие разумевше, яко таковая творящии достойни смерти суть, не точию сами творят, но и соизволяют творящим.

 

Глава 2.

1 Сего ради безответен еси, о, человече всяк судяй: имже бо судом судиши друга, себе осуждаеши, таяжде бо твориши судяй.
2 Вемы же, яко суд божий есть поистинне на творящих таковая.
3 Помышляеши ли же сие, о, человече, судяй таковая творящим и творя сам таяжде, яко ты избежиши ли суда божия,
4 или о богатстве благости его и кротости и долготерпении нерадиши, не ведый, яко благость божия на покаяние тя ведетъ?
5 По жестокости же твоей и непокаянному сердцу, собираеши себе гнев в день гнева и откровения праведнаго суда божия,
6 иже воздаст коемуждо по делом его:
7 овым убо, по терпению дела благаго, славы и чести и нетления ищущим, живот вечный:
8 а иже по рвению противляются убо истине, повинуются же неправде, ярость и гнев.
9 Скорбь и теснота на всяку душу человека творящаго злое, иудеа же прежде и еллина.
10 Слава же и честь и мир всякому делающему благое, иудееви же прежде и еллину.
11 Несть бо на лица зрения у бога.
12 елицы бо беззаконно [без закона] согрешиша, беззаконно [без закона] и погибнут: и елицы в законе согрешиша, законом суд приимут:
13 не слышателие бо закона праведни пред богом, но творцы закона, сии оправдятся:
14 (Зачало 82) егда бо языцы, не имуще закона, естеством законная творят, сии, закона не имуще, сами себе суть закон:
15 иже являют дело законное написано въ сердцах своих, спослушествующеи им совести, и между собою помыслом осуждающим или отвещающим,
16 в день, егда судит бог тайная человеком, по благовестию моему, иисусом христом.
17 Се, ты иудей именуешися, и почиваеши на законе, и хвалишися о бозе,
18 и разумееши волю, и разсуждаеши лучшая, научаемь от закона,
19 уповая же себе вожда быти слепым, света сущим во тме,
20 наказателя безумным, учителя младенцем, имуща образ разума и истины в законе:
21 научая убо инаго, себе ли не учиши,
22 проповедая не красти, крадеши: глаголяй не прелюбы творити, прелюбы твориши: гнушаяся идол, святая крадеши:
23 иже в законе хвалишися, преступлением закона бога безчествуеши.
24 Имя бо божие вами хулится во языцех, якоже есть писано.
25 обрезание бо пользует, аще закон твориши: аще же закона преступник еси, обрезание твое необрезание бысть.
26 Аще убо необрезание оправдание закона сохранит, не необрезание ли его во обрезание вменится,
27 и осудит еже от естества необрезание, закон совершающее, тебе, иже писанием и обрезаниемъ еси преступник закона.
28 (Зачало 83) Не бо иже яве, иудей есть, ни еже яве во плоти, обрезание:
29 но иже в тайне иудей, и обрезание сердца духом, (а) не писанием: емуже похвала не от человек, но от бога.

 

Глава 3.

1 Что убо лишшее иудею [кое убо преимущество иудеа]? или кая польза обрезания?
2 Много, по всякому образу: первее [наипаче] бо, яко вверена быша им словеса божия.
3 Что бо, аще не вероваша нецыи? еда (убо) неверствие их веру божию упразднитъ?
4 Да не будет: да будет же бог истинен, всякъ же человек ложь, якоже есть писано: яко да оправдишися во словесех твоих, и победиши, внегда судити ти.
5 Аще ли неправда наша божию правду составляет, что речем, еда ли неправедн бог наносяй гнев, по человеку глаголю.
6 Да не будет: понеже како судити имать богъ миру?
7 Аще бо истина божия в моей лжи избыточествова в славу его, что еще и аз яко грешникъ осуждаюся?
8 И не якоже хулимся, и якоже глаголютъ нецыи нас глаголати, яко сотворим злая, да приидут благая: ихже суд праведн есть.
9 Что убо? преимеем ли? Никакоже: предукорихомъ бо [прежде бо обвинени есмы] иудеи же и еллины вся [вси] под грехом быти,
10 якоже есть писано, яко несть праведнъ никтоже:
11 несть разумеваяй и несть взыскаяй бога:
12 вси уклонишася, вкупе непотребни быша: несть творяй благостыню, несть даже до единаго.
13 Гроб отверст гортань их, языки своими льщаху: яд аспидов под устнами их:
14 ихже уста клятвы и горести полна суть.
15 Скоры ноги их пролияти кровь:
16 сокрушение и озлобление на путех их,
17 и пути мирнаго не познаша.
18 Несть страха божия пред очима их.
19 (Зачало 84) Вемы же, яко елика законъ глаголет, сущим в законе глаголет: да всяка уста заградятся, и повинен будет весь миръ богови:
20 зане от дел закона не оправдится всяка плоть пред ним: законом бо познание греха.
21 ныне же кроме закона правда божия явися, свидетелствуема от закона и пророк.
22 Правда же божия верою иисус христовою во всехъ и на всех верующих: несть бо разнствия,
23 вси бо согрешиша, и лишени суть славы божия,
24 оправдаеми туне благодатию его, избавлением, еже о христе иисусе,
25 егоже предположи бог очищение верою въ крови его, в явление правды своея, за отпущение прежде бывших грехов,
26 в долготерпении божии, и в показание правды его в нынешнее время, во еже быти ему праведну и оправдающу сущаго от веры иисусовы.
27 Где убо похвала, отгнася. Которым закономъ? делы ли? Ни, но законом веры.
28 (Зачало 85) Мыслим убо верою оправдатися человеку, без дел закона.
29 Или иудеев бог токмо, а не и языковъ? ей, и языков:
30 понеже един бог, иже оправдит обрезание от веры и необрезание верою.
31 Закон ли убо разоряем верою? Да не будет: но закон утверждаем.

 

Глава 4.

1 Что убо речем авраама отца нашего обрести по плоти?
2 Аще бо авраам от дел оправдася, имать похвалу, но не у бога.
3 Что бо писание глаголетъ? верова же авраамъ богови, и вменися ему в правду.
4 (Зачало 86) Делающему же мзда не вменяется по благодати, но по долгу:
5 а не делающему, верующему же во оправдающаго нечестива, вменяется вера его в правду.
6 якоже и давид глаголет блаженство человека, емуже вменяет бог правду, без дел закона:
7 блажени, ихже отпустишася беззакония и ихже прикрышася греси:
8 блажен муж, емуже не вменит господь греха.
9 блаженство убо сие на обрезание ли, или на необрезание? Глаголем бо, яко вменися аврааму вера в правду.
10 Како убо вменися ему? во обрезании ли сущу, или в необрезании? Не во обрезании, но в необрезании.
11 И знамение прият обрезания, печать правды веры, яже в необрезании: яко быти ему отцу всех верующих в необрезании, во еже вменитися и тем в правду,
12 и отцу обрезания, не сущим точию от обрезания, но и ходящим в стопах веры, яже (бе) в необрезании отца нашего авраама.
13 (Зачало 87) Не законом бо обетование аврааму, или семени его, еже быти ему наследнику мирови, но правдою веры.
14 Аще бо сущии от закона наследницы, испразднися вера, и разорися обетование:
15 закон бо гнев соделовает: идеже бо несть закона, (ту) ни преступления.
16 Сего ради от веры, да по благодати, во еже быти известну обетованию всему семени, не точию сущему от закона, но и сущему от веры авраамовы, иже есть отец всем нам,
17 якоже есть писано: яко отца многимъ языком положих тя, прямо богу, емуже верова, животворящему мертвыя и нарицающу не сущая яко сущая.
18 Иже паче упования во упование верова, во еже быти ему отцу многим языком, по реченному: тако будет семя твое.
19 И не изнемог верою, ни усмотри своея плоти уже умерщвленныя, столетен негде сый, и мертвости ложесн сарриных:
20 во обетовании же божии не усумнеся неверованием, но возможе верою, дав славу богови
21 и известен быв, яко, еже обеща, силен есть и сотворити.
22 Темже и вменися ему в правду.
23 Не писано же бысть за того единаго точию, яко вменися ему,
24 но и за ны, имже хощет вменитися, верующимъ в воскресившаго иисуса христа господа нашего изъ мертвых,
25 иже предан бысть за прегрешения наша и воста за оправдание наше.

 

Глава 5.

Зачало 88.

1 Оправдившеся убо верою, мир имамы к богу господем нашим иисус христом,
2 имже и приведение обретохом верою во благодать сию, в нейже стоим, и хвалимся упованиемъ славы божия.
3 Не точию же, но и хвалимся в скорбех, ведяще, яко скорбь терпение соделовает,
4 терпение же искусство, искусство же упование:
5 упование же не посрамит, яко любы божия излияся в сердца наша духом святым даннымъ нам.
6 еще бо христос сущим нам немощным, по времени за нечестивых умре.
7 едва бо за праведника кто умрет: за благаго бо негли кто и дерзнет умрети.
8 Составляет же свою любовь к нам бог, яко, еще грешником сущим нам, христос за ны умре.
9 Много убо паче, оправдани бывше ныне кровию его, спасемся им от гнева.
10 (Зачало 89) Аще бо врази бывше примирихомся богу смертию сына его, множае паче примирившеся спасемся в животе его:
11 не точию же, но и хвалимся о бозе господемъ нашим иисус христом, имже ныне примирение прияхом.
12 Сего ради якоже единем человекомъ грех в мир вниде и грехом смерть, и тако смерть во вся человеки вниде, в немже вси согрешиша.
13 До закона бо грех бе в мире: грех же не вменяшеся, не сущу закону.
14 Но царствова смерть от адама даже до моисеа и над несогрешившими по подобию преступления адамова, иже есть образ будущаго.
15 Но не якоже прегрешение, тако и дар. Аще бо прегрешением единаго мнози умроша, множае паче благодать божия и дар благодатию единаго человека иисуса христа во многих преизлишествова.
16 И не якоже единем согрешшим дарование: грех бо из единаго во осуждение: даръ же от многих прегрешении во оправдание.
17 (Зачало 90) Аще бо единаго прегрешениемъ смерть царствова единем, множае паче избытокъ благодати и дар правды приемлюще, в жизни воцарятся единем иисус христом.
18 Темже убо, якоже единаго прегрешениемъ во вся человеки вниде осуждение, такожде и единаго оправданием во вся человеки вниде оправдание жизни.
19 якоже бо ослушанием единаго человека грешни быша мнози, сице и послушанием единаго праведни будут мнози.
20 Закон же привниде, да умножится прегрешение. Идеже бо умножися грех, преизбыточествова благодать:
21 да якоже царствова грех во смерть, такожде и благодать воцарится правдою в жизнь вечную, иисус христом господем нашим.

 

Глава 6.

1 Что убо речемъ? пребудем ли во гресе, да благодать преумножится? Да не будет.
2 Иже бо умрохом греху, како паки оживемъ о нем [како еще жити будем в немъ]?
3 (Зачало 91) Или не разумеете, яко елицы во христа иисуса крестихомся, в смерть его крестихомся?
4 Спогребохомся убо ему крещением в смерть, да якоже воста христос от мертвых славою отчею, тако и мы во обновлении жизни ходити начнем [да ходимъ].
5 Аще бо сообразни [снасаждени] быхом подобию смерти его, то и воскресния будем,
6 сие ведяще, яко ветхии наш человек съ ним распятся, да упразднится тело греховное, яко ктому не работати нам греху:
7 умерый бо свободися от греха.
8 Аще же умрохом со христом, веруем, яко и живи будем с ним,
9 ведяще, яко христос воста от мертвых, ктому уже не умирает: смерть им ктому не обладает.
10 еже бо умре, греху умре единою: а еже живет, богови живет.
11 (Зачало 92) Такожде и вы помышляйте себе мертвыхъ убо быти греху, живых же богови, о христе иисусе господе нашем.
12 Да не царствует убо грех в мертвеннемъ вашем теле, во еже послушати его в похотехъ его:
13 ниже представляйте уды ваша оружия неправды греху: но представляйте себе богови яко от мертвых живых, и уды ваша оружия правды богови.
14 Грех бо вами да не обладает: несте бо под законом, но под благодатию.
15 Что убо? согрешим ли, зане несмы подъ законом, но под благодатию, да не будет.
16 Не весте ли, яко емуже представляете себе рабы в послушание, раби есте, егоже послушаете, или греха в смерть, или послушания в правду?
17 Благодарим убо бога, яко бесте раби греху, послушасте же от сердца, в оньже и предастеся образ учения.
18 (Зачало 93) Свобождшеся же от греха, поработистеся правде.
19 Человеческо глаголю, за немощь плоти вашея. якоже бо представисте уды ваша рабы нечистоте и беззаконию в беззаконие, тако ныне представите уды ваша рабы правде во святыню.
20 егда бо раби бесте греха, свободни бесте от правды.
21 Кий убо тогда иместе плодъ? о нихже ныне стыдитеся, кончина бо онех, смерть.
22 ныне же свобождшеся от греха, порабощшеся же богови, имате плод ваш во святыню, кончину же жизнь вечную.
23 оброцы бо греха, смерть: дарование же божие живот вечный о христе иисусе господе нашем.

 

Глава 7.

Зачало 94.

1 Или не разумеете, братие: ведущим бо законъ глаголю: яко закон обладает над человеком, во елико время живетъ?
2 Ибо мужатая жена живу мужу привязана есть законом: аще ли же умрет муж ея, разрешится от закона мужескаго.
3 Темже убо, живу сущу мужу, прелюбодейца бывает, аще будет мужеви иному: аще ли умретъ муж ея, свободна есть от закона, не быти ей прелюбодейце, бывшей мужу иному.
4 Темже, братие моя, и вы умросте закону телом христовым, во еже быти вам иному, воставшему из мертвых, да плод принесем богови.
5 егда бо бехом во плоти, страсти греховныя, яже законом, действоваху во удех наших, во еже плод творити смерти:
6 ныне же упразднихомся от закона, умерше, имже держими бехом, яко работати нам (богови) во обновлении духа, а не в ветхости писмене.
7 Что убо речемъ? закон ли грехъ? Да не будет: но греха не знах, точию законом: похоти же не ведах, аще не бы закон глаголал: не похощеши.
8 Вину же прием грех заповедию, содела во мне всяку похоть: без закона бо грех мертвъ есть.
9 Аз же живях кроме закона иногда: пришедшей же заповеди, грех убо оживе,
10 аз же умрох: и обретеся ми заповедь, яже в живот, сия в смерть,
11 грех бо вину прием заповедию, прельсти мя, и тою умертви мя.
12 Темже убо закон свят, и заповедь свята и праведна и блага.
13 благое ли убо бысть мне смерть? Да не будет: но грех, да явится грех, благимъ ми содевая смерть, да будет по премногу грешенъ грех заповедию.
14 (Зачало 95) Вемы бо, яко закон духовенъ есть: аз же плотян есмь, продан подъ грех.
15 еже бо содеваю, не разумею: не еже бо хощу, сие творю, но еже ненавижду, то соделоваю.
16 Аще ли, еже не хощу, сие творю, хвалю закон яко добр,
17 ныне же не ктому аз сие содеваю, но живый во мне грех.
18 Вем бо, яко не живет во мне, сиречь во плоти моей, доброе: еже бо хотети прилежитъ ми, а еже содеяти доброе, не обретаю.
19 Не еже бо хощу доброе, творю, но еже не хощу злое, сие содеваю.
20 Аще ли, еже не хощу аз, сие творю, уже не аз сие творю, но живый во мне грех.
21 обретаю убо закон, хотящу ми творити доброе, яко мне злое прилежит.
22 Соуслаждаюся бо закону божию по внутреннему человеку:
23 вижду же ин закон во удех моих, противу воюющь закону ума моего и пленяющь мя законом греховным, сущим во удехъ моих.
24 окаянен аз человек: кто мя избавитъ от тела смерти сея?
25 Благодарю бога моего иисус христом господемъ нашим. Темже убо сам аз умом моимъ работаю закону божию, плотию же закону греховному.

 

Глава 8.

1 Ни едино убо ныне осуждение сущим о христе иисусе, не по плоти ходящим, но по духу:
2 (Зачало 96) закон бо духа жизни о христе иисусе свободил мя есть от закона греховнаго и смерти.
3 Немощное бо закона, в немже немоществоваше плотию, бог сына своего посла в подобии плоти греха, и о гресе осуди грех во плоти,
4 да оправдание закона исполнится в нас, не по плоти ходящих, но по духу.
5 Сущии бо по плоти плотская мудрствуют: а иже по духу, духовная.
6 Мудрование бо плотское смерть есть, а мудрование духовное живот и мир,
7 зане мудрование плотское вражда на бога: закону бо божию не покаряется, ниже бо может.
8 Сущии же во плоти богу угодити не могут.
9 Вы же несте во плоти, но в дусе, понеже дух божий живет в вас. Аще же кто духа христова не имать, сей несть егов.
10 Аще же христос в вас, плоть убо мертва греха ради, дух же живет правды ради.
11 Аще ли же дух воскресившаго иисуса от мертвыхъ живет в вас, воздвигий христа из мертвыхъ оживотворит и мертвенная телеса ваша, живущимъ духом его в вас.
12 Темже убо, братие, должни есмы не плоти, еже по плоти жити.
13 Аще бо по плоти живете, имате умрети, аще ли духом деяния плотская умерщвляете, живи будете:
14 (Зачало 97) елицы бо духом божиим водятся, сии суть сынове божии:
15 не приясте бо духа работы паки в боязнь, но приясте духа сыноположения, о немже вопием: авва отче.
16 Самый дух спослушествует духови нашему, яко есмы чада божия.
17 Аще же чада, и наследницы: наследницы убо богу, снаследницы же христу, понеже с ним страждем, да и с ним прославимся.
18 Непщую бо, яко недостойны страсти нынешняго времене к хотящей славе явитися в нас.
19 Чаяние бо твари, откровения сынов божиихъ чает:
20 суете бо тварь повинуся не волею, но за повинувшаго ю, на уповании,
21 яко и сама тварь свободится от работы истления в свободу славы чад божиих.
22 (Зачало 98) Вемы бо, яко вся тварь с нами совоздыхает и сболезнует даже доныне:
23 не точию же, но и сами начаток духа имуще, и мы сами в себе воздыхаем, всыновления чающе, избавления телу нашему.
24 упованием бо спасохомся. упование же видимое, несть упование: еже бо видитъ кто, что и уповаетъ?
25 Аще ли, егоже не видим, надеемся, терпениемъ ждем.
26 Сице же и дух способствует нам в немощехъ наших: о чесом бо помолимся, якоже подобает, не вемы, но сам дух ходатайствует о нас воздыхании неизглаголанными.
27 Испытаяй же сердца весть, что есть мудрование духа, яко по богу приповедует [ходатайствуетъ] о святых.
28 (Зачало 99) Вемы же, яко любящим бога вся поспешествуют во благое, сущим по предуведению званным:
29 ихже бо предуведе, (техъ) и предустави сообразных быти образу сына своего, яко быти ему первородну во многих братиях:
30 а ихже предустави, тех и призва: а ихже призва, сих и оправда: а ихже оправда, сих и прослави.
31 Что убо речем к сим, аще бог по нас, кто на ны?
32 Иже убо своего сына не пощаде, но за нас всех предал есть его, како убо не и с ним вся нам дарствуетъ?
33 Кто поемлет на избранныя божия, бог оправдаяй.
34 Кто осуждаяй? христос иисус умерый, паче же и воскресый, иже и есть о десную бога, иже и ходатайствует о нас.
35 Кто ны разлучит от любве божия, скорбь ли, или теснота, или гонение, или глад, или нагота, или беда, или мечь? якоже есть писано:
36 яко тебе ради умерщвляеми есмы весь день: вменихомся якоже овцы заколения.
37 Но во всех сих препобеждаем за возлюбльшаго ны.
38 Известихся бо, яко ни смерть, ни живот, ни ангели, ни начала, ниже силы, ни настоящая, ни грядущая,
39 ни высота, ни глубина, ни ина тварь кая возможетъ нас разлучити от любве божия, яже о христе иисусе господе нашем.

 

Глава 9.

Зачало 100.

1 Истину глаголю о христе, не лгу, послушествующей ми совести моей духом святым,
2 яко скорбь ми есть велия и непрестающая болезнь сердцу моему:
3 молил бых ся бо сам аз отлучен быти от христа по братии моей, сродницех моих по плоти,
4 иже суть израилите, ихже всыновление и слава, и завети и законоположение, и служение и обетования:
5 ихже отцы, и от нихже христос по плоти, сый над всеми бог благословен во веки, аминь.
6 (Зачало 101) Не такоже, яко отпаде слово божие: не вси бо сущии от израиля, сии израиль,
7 ни зане суть семя авраамле, вси чада: но во исааце, рече, наречется ти семя.
8 Сиречь, не чада плотская, сия чада божия: но чада обетования причитаются в семя.
9 обетования бо слово сие: на сие время прииду, и будет сарре сын.
10 Не точию же, но и ревекка от единаго ложа исаака отца нашего имущи:
11 еще бо не рождшимся, ни сотворившим что благо или зло, да по избранию предложение божие пребудетъ
12 не от дел, но от призывающаго, речеся ей, яко болий поработает меншему,
13 якоже есть писано: иакова возлюбих, исава же возненавидех.
14 Что убо речемъ? еда неправда у бога? Да не будет.
15 Моисеови бо глаголет: помилую, егоже аще помилую, и ущедрю, егоже аще ущедрю.
16 Темже убо ни хотящаго, ни текущаго, но милующаго бога.
17 Глаголет бо писание фараонови: яко на истое сие воздвигох тя, яко да покажу тобою силу мою, и да возвестится имя мое по всей земли.
18 (Зачало 102) Темже убо егоже хощет, милует: а егоже хощет, ожесточает.
19 Речеши убо ми: чесо ради еще укоряет, воли бо его кто противитися можетъ?
20 Темже убо, о, человече, ты кто еси, против отвещаяй богови? еда речет здание создавшему е: почто мя сотворил еси тако?
21 Или не имать власти скудельник на брении, от тогожде смешения сотворити ов убо сосуд в честь, ов же не в честь?
22 Аще же хотя бог показати гнев свой и явити силу свою, пренесе во мнозе долготерпении сосуды гнева совершены в погибель:
23 и да скажет богатство славы своея на сосудехъ милости, яже предуготова в славу,
24 ихже и призва нас не точию от иудей, но и от язык:
25 якоже и во осии глаголет: нареку не люди моя люди моя, и невозлюбленую возлюблену:
26 и будет, на месте, идеже речеся им: не людие мои есте вы, тамо нарекутся сынове бога живаго.
27 Исаиа же вопиет о израили: аще будет число сынов израилевых яко песок морский, останокъ спасется:
28 слово бо скончавая и сокращая в правде, яко слово сокращено сотворит господь на земли,
29 и якоже прорече исаиа: аще не бы господь саваоф оставил нам семене, якоже содомъ убо были быхом, и якоже гоморру уподобилися быхом.
30 Что убо речем, яко языцы, не гонящии правду, постигоша правду, правду же, яже от веры:
31 израиль же, гоня закон правды, в закон правды не постиже.
32 Чесо ради? Зане не от веры, но от делъ закона: преткнушася бо о камень претыкания,
33 якоже есть писано: се, полагаю в сионе камень претыкания и камень соблазна: и всякъ веруяй в онь не постыдится.

 

Глава 10.

Зачало 103.

1 Братие, благоволение убо моего сердца и молитва, яже к богу по израили, есть во спасние.
2 Свидетелствую бо им, яко ревность божию имут, но не по разуму.
3 Не разумеюще бо божия правды и свою правду ищуще поставити, правде божией не повинушася:
4 кончина бо закона христос, в правду всякому верующему.
5 Моисей бо пишет правду юже от закона: яко сотворивый та человек жив будет в них.
6 А яже от веры правда сице глаголет: да не речеши в сердцы твоем: кто взыдет на небо, сиречь христа свести:
7 или кто снидет в бездну, сиречь христа от мертвых возвести.
8 Но что глаголет писание? Близ ти глаголъ есть, во устех твоих и в сердцы твоем, сиречь глагол веры, егоже проповедаем:
9 яко аще исповеси усты твоими господа иисуса, и веруеши в сердцы твоем, яко богъ того воздвиже из мертвых, спасешися:
10 сердцем бо веруется в правду, усты же исповедуется во спасние.
11 (Зачало 104) Глаголет бо писание: всяк веруяй в онь не постыдится.
12 Несть бо разнствия иудееви же и еллину: той бо бог всех, богатяй [богат сый] во всехъ призывающих его.
13 Всяк бо, иже аще призовет имя господне, спасется.
14 Како убо призовут, в негоже не вероваша? Како же уверуют, егоже не услышаша? како же услышат без проповедающаго?
15 Како же проповедят, аще не послани будутъ? якоже есть писано: коль красны ноги благовествующихъ мир, благовествующих благая.
16 Но не вси послушаша благовествования. Исаиа бо глаголет: господи, кто верова слуху нашему?
17 Темже убо вера от слуха, слух же глаголомъ божиим.
18 Но глаголю: еда не слышаша? Темже убо [но паче], во всю землю изыде вещание их, и в концы вселенныя глаголы их.
19 Но глаголю: еда не разуме израиль? Первый моисей глаголет: аз раздражу вы не о языце, но о языце неразумне [о не языце, о языце неразумне] прогневаю вас.
20 Исаиа же дерзает и глаголет: обретохся не ищущим мене, явлен бых не вопрошающимъ о мне.
21 Ко израилю же глаголет: весь день воздех руце мои к людем непокоривым и пререкающим.

 

Глава 11.

1 Глаголю убо: еда отрину бог люди своя? Да не будет. Ибо и аз израильтянин есмь, от семене авраамля, колена вениаминова.
2 Не отрину бог людей своих, ихже прежде разуме. (Зачало 105) Или не весте, о илии что глаголет писание, яко приповедует богови [вопиетъ к богу] на израиля, глаголя:
3 господи, пророки твоя избиша и олтари твоя раскопаша: и аз остах един, и ищутъ души моея, изъяти ю.
4 Но что глаголет ему божественный ответъ? оставихъ себе седмь тысящ мужей, иже не преклониша колена пред ваалом.
5 Тако убо и в нынешнее время останокъ по избранию благодати бысть.
6 Аще ли по благодати, то не от дел: зане благодать уже не бывает благодать. Аще ли от дел, ктому несть благодать: зане дело уже несть дело.
7 Что убо? егоже искаше израиль, сего не получи, а избрание получи: прочии же ослепишася,
8 якоже есть писано: даде им бог духъ умиления [духа нечувствия], очи не видети и уши не слышати, даже до днешняго дне.
9 И давид глаголет: да будет трапеза их въ сеть и в лов, и в соблазн и в воздаяние им:
10 да помрачатся очи их еже не видети, и хребет их выну сляцай.
11 Глаголю убо: еда согрешиша, да отпадутъ? Да не будет. Но тех падением спасние языком, во еже раздражити их.
12 Аще ли же прегрешение их богатство мира, и отпадение их богатство языков: кольми паче исполнение ихъ?
13 (Зачало 106) Вам бо глаголю языком: понеже убо есмь аз языком апостол, службу мою прославляю.
14 Аще како раздражу мою плоть, и спасу некия от нихъ?
15 Аще бо отложение их, примирение миру, что приятие, разве жизнь из мертвыхъ?
16 Аще ли начаток свят, то и примешение: и аще корень свят, то и ветви.
17 Аще ли некия от ветвей отломишася, ты же, дивия маслина сый, прицепился еси в них, и причастник корене и масти маслинныя сотворился еси,
18 не хвалися на ветви: аще ли же хвалишися, не ты корень носиши, но корень тебе.
19 Речеши убо: отломишася ветви, да азъ прицеплюся.
20 Добре: неверием отломишася, ты же верою стоиши: не высокомудрствуй, но бойся.
21 Аще бо бог естественных ветвей не пощаде, да не како и тебе не пощадит.
22 Виждь убо благость и непощадение божие: на отпадших убо непощадение, а на тебе благость божия, аще пребудеши в благости: аще ли же ни, то и ты отсечен будеши.
23 И они же, аще не пребудут в неверствии, прицепятся: силен бо есть бог паки прицепити их.
24 Аще бо ты от естественныя отсечен дивия маслины, и чрез естество прицепился еси к добрей маслине: кольми паче сии, иже по естеству, прицепятся своей маслине?
25 (Зачало 107) Не бо хощу вас не ведети тайны сея, братие, да не будете о себе мудри, яко ослепление от части израилеви бысть, дондеже исполнение языков внидет,
26 и тако весь израиль спасется, якоже есть писано: приидет от сиона избавляяй, и отвратитъ нечестие от иакова:
27 и сей им от мене завет, егда отиму грехи их.
28 По благовествованию убо, врази вас ради: по избранию же, возлюблени отец ради.
29 Нераскаянна бо дарования и звание божие.
30 якоже бо и вы иногда противистеся богови, ныне же помиловани бысте сих противлением [сихъ ради противления]:
31 такожде и сии ныне противишася вашей милости [вашего ради помилования], да и тии помиловани будут.
32 Затвори бо бог всех в противление, да всехъ помилует.
33 о, глубина богатства и премудрости и разума божия! яко неиспытани судове его, и неизследовани путие его.
34 Кто бо разуме ум господень, или кто советник ему бысть?
35 Или кто прежде даде ему, и воздастся ему?
36 яко из того и тем и в нем всяческая. Тому слава во веки. Аминь.

 

Глава 12.

Зачало 108.

1 Молю убо вас, братие, щедротами божиими, представите телеса ваша жертву живу, святу, благоугодну богови, словесное служение ваше,
2 и не сообразуйтеся веку сему, но преобразуйтеся обновлением ума вашего, во еже искушати вам, что есть воля божия благая и угодная и совершенная.
3 Глаголю бо благодатию давшеюся мне, всякому сущему в вас не мудрствовати паче, еже подобаетъ мудрствовати: но мудрствовати в целомудрии, коемуждо якоже бог разделил есть меру веры.
4 (Зачало 109) якоже бо во единем телеси многи уды имамы, уды же вси не тожде имут делание,
5 такожде мнози едино тело есмы о христе, а по единому друг другу уди.
6 (Зачало 110) Имуще же дарования по благодати данней нам различна: аще пророчество, по мере веры:
7 аще ли служение, в служении: аще учяй, во учении:
8 аще утешаяй, во утешении: подаваяй, в простоте: предстояй [началствуяй], со тщанием: милуяй, с добрым изволением.
9 Любы нелицемерна: ненавидяще злаго, прилепляйтеся благому:
10 братолюбием друг ко другу любезни: честию друг друга болша творяще:
11 тщанием не лениви, духом горяще, господеви работающе:
12 упованием радующеся, скорби терпяще, въ молитве пребывающе:
13 требованием святых приобщающеся, страннолюбия держащеся:
14 благословляйте гонящия вы: благословите, а не клените.
15 Радоватися с радующимися, и плакати с плачущими.
16 Тожде друг ко другу мудрствующе: не высокая мудрствующе, но смиренными ведущеся: не бывайте мудри о себе:
17 ни единому же зла за зло воздающе, промышляюще добрая пред всеми человеки.
18 Аще возможно, еже от вас, со всеми человеки мир имейте.
19 Не себе отмщающе, возлюблении, но дадите место гневу. Писано бо есть: мне отмщение, азъ воздам, глаголет господь.
20 Аще убо алчет враг твой, ухлеби его: аще ли жаждет, напой его: сие бо творя, углие огнено собираеши на главу его.
21 Не побежден бывай от зла, но побеждай благимъ злое.

 

Глава 13.

Зачало 111.

1 Всяка душа властем предержащим да повинуется: несть бо власть аще не от бога, сущия же власти от бога учинены суть.
2 Темже противляяйся власти, божию повелению противляется: противляющиися же себе грех приемлют.
3 Князи бо не суть боязнь добрым делом, но злым. Хощеши же ли не боятися власти? благое твори, и имети будеши похвалу от него:
4 божий бо слуга есть, тебе во благое. Аще ли злое твориши, бойся, не бо без ума [всуе] мечь носит: божий бо слуга есть, отмститель в гнев злое творящему.
5 Темже потреба повиноватися не токмо за гнев, но и за совесть.
6 Сего бо ради и дани даете: служители бо божии суть, во истое сие пребывающе.
7 Воздадите убо всем должная: емуже убо урок, урок: (а) емуже дань, дань: (а) емуже страх, страх: (и) емуже честь, честь.
8 Ни единому же ничимже должни бывайте, точию еже любити друг друга: любяй бо друга, законъ исполни.
9 еже бо: не прелюбы сотвориши, не убиеши, не украдеши, не лжесвидетелствуеши, не похощеши, и аще кая ина заповедь, в сем словеси совершается, во еже: возлюбиши искренняго твоего, якоже сам себе.
10 Любы искреннему зла не творит: исполнение убо закона любы есть.
11 И сие, ведяще время, яко час уже нам от сна востати. (Зачало 112) ныне бо ближайшее нам спасние, нежели егда веровахом.
12 Нощь (убо) прейде, а день приближися: отложим убо дела темная, и облечемся во оружие света.
13 яко во дни, благообразно да ходим, не козлогласовании и пиянствы, не любодеянии и студодеянии, не рвением и завистию:
14 но облецытеся господем нашим иисус христом, и плоти угодия не творите в похоти.

 

Глава 14.

1 Изнемогающаго же в вере приемлите, не в сомнение помышлении.
2 ов бо верует ясти вся, а изнемогаяй зелия (да) яст.
3 ядый не ядущаго да не укоряет: и не ядый ядущаго да не осуждает: бог бо его прият.
4 Ты кто еси судяй чуждему рабу? Своему господеви стоит, или падает. Станет же, силенъ бо есть бог поставити его.
5 ов убо разсуждает день чрез день, ов же судит на всяк день. Кииждо своею мыслию да извествуется.
6 (Зачало 113) Мудрствуяй день, господеви мудрствует: и не мудрствуяй день, господеви не мудрствует. ядый, господеви яст, благодарит бо бога: и не ядый, господеви не яст, и благодарит бога.
7 Никтоже бо нас себе живет, и никтоже себе умирает:
8 аще бо живем, господеви живем, аще же умираем, господеви умираем: аще убо живем, аще умираем, господни есмы.
9 (Зачало 114) На сие бо христос и умре и воскресе и оживе, да и мертвыми и живыми обладает.
10 Ты же почто осуждаеши брата твоего, или ты что уничижаеши брата твоего? Вси бо предстанемъ судищу христову.
11 Писано бо есть: живу аз, глаголет господь, яко мне поклонится всяко колено, и всякъ язык исповестся богови.
12 Темже убо кийждо нас о себе слово даст богу.
13 Не ктому убо друг друга осуждаем, но сие паче судите, еже не полагати претыкания брату или соблазна.
14 Вем и извещен есмь о христе иисусе, яко ничтоже скверно само собою: точию помышляющему что скверно быти, оному скверно есть.
15 Аще же брашна ради брат твой скорбит, уже не по любви ходиши: не брашном твоимъ того погубляй, за негоже христос умре.
16 Да не хулится убо ваше благое.
17 Несть бо царство божие брашно и питие, но правда и мир и радость о дусе святе.
18 Иже бо сими служит христови, благоугоденъ есть богови и искусен человеком.
19 (Зачало 115) Темже убо мир возлюбим и яже к созиданию друг ко другу.
20 Не брашна ради разоряй дело божие. Вся бо чиста, но зло человеку претыканием ядущему.
21 Добро не ясти мяс, ниже пити вина, ни о немже брат твой претыкается или соблазняется или изнемогает.
22 Ты веру имаши? о себе сам имей предъ богом. блажен не осуждаяй себе, о немже искушается.
23 А сомняяйся, аще яст, осуждается, зане не от веры: всяко же, еже не от веры, грехъ есть.
24 Могущему же вас утвердити по благовествованию моему и проповеданию иисус христову, по откровению тайны, леты вечными умолчанныя,
25 явльшияся же ныне, писании пророческими, по повелению вечнаго бога, в послушание веры во всех языцех познавшияся,
26 единому премудрому богу, иисусом христом, емуже слава во веки. Аминь.

 

Глава 15.

Зачало 116.

1 Должни есмы мы сильнии немощи немощных носити, и не себе угождати:
2 кииждо же вас ближнему да угождает во благое к созиданию.
3 Ибо и христос не себе угоди, но якоже есть писано: поношения поносящих тебе нападоша на мя.
4 елика бо преднаписана быша, в наше наказание преднаписашася, да терпением и утешениемъ писаний упование имамы.
5 бог же терпения и утешения да даст вамъ тожде мудрствовати друг ко другу о христе иисусе,
6 да единодушно едиными усты славите бога и отца господа нашего иисуса христа.
7 (Зачало 117) Темже приемлите друг друга, якоже и христос прият вас во славу божию.
8 Глаголю же христа иисуса служителя бывша обрезания по истине божией, во еже утвердити обетования отцев:
9 а языком по милости, прославити бога, якоже есть писано: сего ради исповемся тебе во языцех, господи, и имени твоему пою.
10 И паки глаголет: возвеселитеся, языцы, с людьми его.
11 И паки: хвалите господа, вси языцы, и похвалите его, вси людие.
12 И паки исаиа глаголет: будет корень иессеов, и востаяй владети над языки: на того языцы уповают.
13 бог же упования да исполнит вас всякия радости и мира в вере, избыточествовати вамъ во уповании, силою духа святаго.
14 Извещен же есмь, братие моя, и самъ аз о вас, яко и сами вы полни есте благости, исполнени всякаго разума, могуще и иныя научити:
15 дерзее же писах вам, братие моя, от части, яко воспоминая вам, за благодать данную ми от бога,
16 во еже быти ми служителю иисус христову во языцех, священнодействующу благовествование божие, да будет приношение еже от языкъ благоприятно и освященно духом святым.
17 (Зачало 118) Имам убо похвалу о христе иисусе в тех, яже к богу:
18 не смею бо глаголати что, ихже не содея христос мною, в послушание языков, словомъ и делом,
19 в силе знамений и чудес, силою духа божия, якоже ми от иерусалима и окрест даже до иллирика исполнити благовествование христово.
20 Сице же потщахся благовестити, не идеже именовася христос, да не на чужем основании созижду,
21 но якоже есть писано: имже не возвестися о нем, узрят, и иже не слышаша, уразумеют.
22 Темже и возбранен бых многажды приити к вам.
23 ныне же ктому места не имый в странахъ сих, желание же имый приити к вам от многихъ лет,
24 яко аще поиду во испанию, прииду к вам. уповаю бо мимо грядый видети вас и вами проводитися тамо, аще вас прежде от части насыщуся.
25 ныне же гряду во иерусалим, служяй святым,
26 благоволиша бо македониа и ахаиа общение некое сотворити к нищим святым живущим во иерусалиме.
27 Благоволиша бо, и должни им суть. Аще бо в духовных их причастницы быша языцы, должни суть и в плотских послужити им.
28 Сие убо скончав, и запечатлев имъ плод сей, поиду вами во испанию:
29 вем же, яко грядый к вам, во исполнении благословения благовестия христова прииду.
30 (Зачало 119) Молю же вы, братие, господем нашимъ иисус христом и любовию духа, споспешствуйте ми в молитвах о мне к богу,
31 да избавлюся от противляющихся во иудеи, и да служба моя, яже во иерусалиме, благоприятна будет святым:
32 да с радостию прииду к вам волею божиею и упокоюся с вами.
33 бог же мира со всеми вами. Аминь.

 

Глава 16.

Зачало 120.

1 Вручаю же вам фиву сестру нашу, сущу служителницу церкве яже в кегхреех:
2 да приимете ю о господе достойне святым, и споспешствуйте ей, о нейже аще от васъ потребует вещи: ибо сия заступница многимъ бысть, и самому мне.
3 Целуйте прискиллу и акилу, споспешника моя о христе иисусе,
4 иже по души моей своя выя положиста, ихже не аз един благодарю, но и вся церкви языческия: и домашнюю их церковь.
5 Целуйте епенета возлюбленнаго ми, иже есть начаток ахаии во христа.
6 Целуйте мариамь, яже много трудися о нас.
7 Целуйте андроника и иунию, сродники моя и спленники моя, иже суть нарочиты во апостолех, иже и прежде мене вероваста во христа.
8 Целуйте амплиа возлюбленнаго ми о господе.
9 Целуйте урвана споспешника нашего о христе, и стахиа возлюбленнаго ми.
10 Целуйте апеллиа искусна о христе. Целуйте сущия от аристовула.
11 Целуйте иродиона сродника моего. Целуйте иже от наркисса сущия о господе.
12 Целуйте трифену и трифосу труждающияся о господе. Целуйте персиду возлюбленную, яже много трудися о господе.
13 Целуйте руфа избраннаго о господе, и матерь его и мою.
14 Целуйте асигкрита, флегонта, ерма, патрова, ермиа, и сущую с ними братию.
15 Целуйте филолога и иулию, ниреа и сестру его, и олимпана, и сущия с ними вся святыя.
16 Целуйте друг друга лобзанием святым. Целуютъ вы вся церкви христовы.
17 (Зачало 121) Молю же вы, братие, блюдитеся от творящих распри и раздоры, кроме учения, емуже вы научистеся, и уклонитеся от них:
18 таковии бо господеви нашему иисусу христу не работают, но своему чреву: иже благими словесы и благословениемъ прельщают сердца незлобивых.
19 Ваше бо послушание ко всем достиже. Радуюся же еже о вас: хощу же вас мудрых убо быти во благое, простых же в злое.
20 бог же мира да сокрушит сатану под ноги ваша вскоре. благодать господа нашего иисуса христа с вами. Аминь.
21 Целует вас тимофей споспешник мой, и лукий и иасон и сосипатр, сродницы мои.
22 Целую вы (и) аз тертий, написавый послание сие, о господе.
23 Целует вы гаие странноприимец мой и церкве всея. Целует вы ераст строитель градский, и куарт брат.
24 благодать господа нашего иисуса христа со всеми вами. Аминь.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы