Послание Святого апостола Павла к Ефесянам

Глава 1.

Зачало 216.

1 Павел, посланник иисус христов волею божиею, святым сущим во ефесе и верным о христе иисусе:
2 благодать вам и мир от бога отца нашего и господа иисуса христа.
3 благословен бог и отец господа нашего иисуса христа, благословивый нас всяцем благословениемъ духовным в небесных о христе,
4 якоже избра нас в нем прежде сложения мира, быти нам святым и непорочным пред нимъ в любви,
5 прежде нарек нас во усыновление иисусъ христом в него, по благоволению хотения своего,
6 в похвалу славы благодати своея, еюже облагодати нас о возлюбленнем:
7 (Зачало 217) о немже имамы избавление кровию его, и оставление прегрешении, по богатству благодати его,
8 юже преумножил есть в нас во всяцей премудрости и разуме,
9 сказав нам тайну воли своея по благоволению своему, еже прежде положи в нем,
10 в смотрение исполнения времен, возглавити всяческая о христе, яже на небесех и яже на земли в нем:
11 в немже и наследницы сотворихомся, прежде наречени бывше по прозрению божию вся действующаго по совету воли своея,
12 яко быти нам в похваление славы его, прежде уповавшим во христа:
13 в немже и вы, слышавше слово истины, благовествование спасния нашего, в немже и веровавше знаменастеся духом обетования святым,
14 иже есть обручение наследия нашего, во избавление снабдения, в похвалу славы его.
15 Сего ради и аз слышав вашу веру о христе иисусе и любовь, яже ко всем святым,
16 (Зачало 218) не престаю благодаря о вас, поминание о вас творя в молитвах моих,
17 да бог господа нашего иисуса христа, отец славы, даст вам духа премудрости и откровения, въ познание его,
18 просвещенна очеса сердца вашего, яко уведети вам, кое есть упование звания его, и кое богатство славы достояния его во святых,
19 и кое преспеющее величество силы его в нас верующих по действу державы крепости его,
20 юже содея о христе, воскресив его от мертвых и посадив одесную себе на небесных,
21 превыше всякаго началства и власти и силы и господства, и всякаго имене именуемаго не точию в веце сем, но и во грядущем:
22 (Зачало 219) и вся покори под нозе его, и того даде главу выше всех церкви,
23 яже есть тело его, исполнение исполняющаго всяческая во всех.

 

Глава 2.

1 И вас сущих прегрешеньми мертвых и грехи вашими,
2 в нихже иногда ходисте по веку мира сего, по князю власти воздушныя, духа, иже ныне действуетъ в сынех противления,
3 в нихже и мы вси жихом иногда в похотехъ плоти нашея, творяще волю плоти и помышлений, и бехом естеством чада гнева, якоже и прочии:
4 (Зачало 220) бог же, богат сый в милости, за премногую любовь свою, еюже возлюби нас,
5 и сущих нас мертвых прегрешеньми, сооживи христом: благодатию есте спасени:
6 и с ним воскреси, и спосади на небесных во христе иисусе,
7 да явит в вецех грядущих презелное богатство благодати своея благостынею на нас о христе иисусе.
8 благодатию бо есте спасени чрез веру: и сие не от вас, божий дар:
9 не от дел, да никтоже похвалится.
10 Того бо есмы творение, создани во христе иисусе на дела благая, яже прежде уготова бог, да в них ходим.
11 Темже поминайте, яко вы, иже иногда языцы во плоти, глаголемии необрезание от рекомаго обрезания во плоти, рукотвореннаго,
12 яко бесте во время оно без христа, отчуждени жития израилева и чужди от заветъ обетования, упования не имуще и безбожни в мире:
13 ныне же о христе иисусе вы, бывшии иногда далече, близ бысте кровию христовою.
14 (Зачало 221) Той бо есть мир наш, сотворивый обоя едино, и средостение ограды разоривый,
15 вражду плотию своею, закон заповедий ученьми упразднив, да оба созиждет собою во единаго новаго человека, творя мир,
16 и примирит обоих во единем теле богови крестом, убив вражду на нем:
17 и пришед благовести мир вам, дальнимъ и ближним,
18 зане тем имамы приведение обои во единемъ дусе ко отцу.
19 (Зачало 222) Темже убо ктому несте странни и пришелцы, но сожителе святым и приснии богу,
20 наздани бывше на основании апостол и пророк, сущу краеуголну самому иисусу христу,
21 о немже всяко создание составляемо растетъ в церковь святую о господе:
22 о немже и вы созидаетеся в жилище божие духом.

 

Глава 3.

1 Сего ради аз павел юзник иисус христовъ о вас языцех.
2 Аще убо [понеже] слышасте смотрение благодати божия данныя мне в вас,
3 яко по откровению сказася мне тайна, якоже преднаписах вмале:
4 о немже [поелику] можете чтуще разумети разумъ мой в тайне христове,
5 яже во инех родех не сказася сыномъ человеческим, якоже ныне открыся святымъ его апостолом и пророком духом святым:
6 (яко) быти языком снаследником и стелесникомъ и спричастником обетования его о христе иисусе, благовествованием,
7 емуже бых служитель по дару благодати божия, данныя мне по действу силы его.
8 (Зачало 223) Мне меншему всех святых дана бысть благодать сия, во языцех благовестити неизследованное богатство христово
9 и просветити всех, что есть смотрение тайны сокровенныя от веков в бозе, создавшемъ всяческая иисус христом,
10 да скажется ныне началом и властем на небесныхъ церковию многоразличная премудрость божия,
11 по предложению век, еже сотвори о христе иисусе господе нашем,
12 о немже имамы дерзновение и приведение въ надеянии верою его.
13 Темже молю (вы) не стужати си в скорбехъ моих о вас, яже есть слава ваша.
14 Сего ради преклоняю колена моя ко отцу господа нашего иисуса христа,
15 из негоже всяко отечество на небесехъ и на земли именуется:
16 да даст вам по богатству славы своея, силою утвердитися духом его во внутреннем человеце,
17 вселитися христу верою в сердца ваша: въ любви вкоренени и основани,
18 да возможете разумети со всеми святыми, что широта и долгота и глубина и высота,
19 разумети же преспеющую разум любовь христову, да исполнитеся во всяко исполнение божие.
20 Могущему же паче вся творити по преизбыточествию, ихже просим или разумеем, по силе действуемей в нас,
21 тому слава в церкви о христе иисусе во вся роды века веков. Аминь.

 

Глава 4.

Зачало 224.

1 Молю убо вас аз юзник о господе, достойно ходити звания, в неже звани бысте,
2 со всяким смиреномудрием и кротостию, с долготерпением, терпяще друг другу любовию,
3 тщащеся блюсти единение духа в союзе мира.
4 едино тело, един дух, якоже и звани бысте во единем уповании звания вашего:
5 един господь, едина вера, едино крещение,
6 един бог и отец всех, иже над всеми и чрез всех и во всех нас.
7 единому же комуждо нас дадеся благодать по мере дарования христова.
8 Темже глаголет: возшед на высоту, пленилъ еси плен, и даде даяния человеком.
9 А еже, взыде, что есть, точию яко и сниде прежде в долнейшия страны земли?
10 Сшедый, той есть и возшедый превыше всехъ небес, да исполнит всяческая.
11 И той дал есть овы убо апостолы, овы же пророки, овы же благовестники, овы же пастыри и учители,
12 к совершению святых, в дело служения, въ созидание тела христова,
13 дондеже достигнем вси в соединение веры и познания сына божия, в мужа совершенна, в меру возраста исполнения христова:
14 (Зачало 225) да не бываем ктому младенцы, влающеся и скитающеся всяким ветром учения, во лжи человечестей, в коварстве козней льщения:
15 истинствующе же в любви, да возрастим въ него всяческая, иже есть
Глава христос,
16 из негоже все тело, составляемо и счиневаемо приличне всяцем осязанием подаяния, по действу в мере единыя коеяждо части, возращение тела творит в создание самаго себе любовию.
17 (Зачало 226) Сие убо глаголю и послушествую о господе, ктому не ходити вам, якоже и прочии языцы ходят в суете ума их,
18 помрачени смыслом, суще отчуждени от жизни божия, за невежество сущее в них, за окаменение сердец их:
19 иже в нечаяние вложшеся, предаша себе студодеянию, в делание всякия нечистоты в лихоимании.
20 Вы же не тако познасте христа:
21 аще убо [понеже] слышасте его и о нем научистеся, якоже есть истина о иисусе:
22 отложити вам, по первому житию, ветхаго человека, тлеющаго в похотех прелестных,
23 обновлятися же духом ума вашего,
24 и облещися в новаго человека, созданнаго по богу в правде и в преподобии истины.
25 (Зачало 227) Темже отложше лжу, глаголите истину кийждо ко искреннему своему, зане есмы друг другу удове.
26 Гневайтеся и не согрешайте: солнце да не зайдет в гневе вашем:
27 ниже дадите места диаволу.
28 Крадый ктому да не крадет, но паче да труждается, делая своима рукама благое, да имать подаяти требующему.
29 Всяко слово гнило да не исходит из устъ ваших, но точию еже есть благо к созданию веры, да даст благодать слышащим.
30 И не оскорбляйте духа святаго божия, имже знаменастеся в день избавления.
31 Всяка горесть, и гнев, и ярость, и кличь, и хула да возмется от вас, со всякою злобою:
32 бывайте же друг ко другу блази, милосерди, прощающе друг другу, якоже и бог во христе простил есть вам.

 

Глава 5.

Зачало 228.

1 Бывайте убо подражатели богу, якоже чада возлюбленная,
2 и ходите в любви, якоже и христос возлюбилъ есть нас, и предаде себе за ны приношение и жертву богу в воню благоухания.
3 Блуд же и всяка нечистота и лихоимство ниже да именуется в вас, якоже подобает святым:
4 и сквернословие, и буесловие, или кощуны, яже неподобная, но паче благодарение:
5 сие бо да весте, яко всяк блудник, или нечист, или лихоимец, иже есть идолослужитель, не имать достояния в царствии христа и бога.
6 Никтоже вас да льстит суетными словесы, сихъ бо ради грядет гнев божий на сыны непокоривыя.
7 Не бывайте убо сопричастницы сим.
8 Бесте бо иногда тма, ныне же свет о господе: (Зачало 229) якоже чада света ходите:
9 плод бо духовный есть во всяцей благостыни и правде и истине:
10 искушающе, что есть благоугодно богови:
11 и не приобщайтеся к делом неплодным тмы, паче же и обличайте.
12 Бываемая бо отай от них, срамно есть и глаголати.
13 Вся же обличаемая от света являются, все бо являемое свет есть:
14 сего ради глаголет: востани, спяй, и воскресни от мертвых, и осветит тя христос.
15 Блюдите убо, како опасно ходите, не якоже немудри, но якоже премудри,
16 искупующе время, яко дние лукави суть.
17 Сего ради не бывайте несмысленни, но разумевайте, что есть воля божия.
18 И не упивайтеся вином, в немже есть блуд: но паче исполняйтеся духом,
19 глаголюще себе во псалмех и пениихъ и песнех духовных, воспевающе и поюще въ сердцах ваших господеви,
20 (Зачало 230) благодаряще всегда о всех о имени господа нашего иисуса христа богу и отцу,
21 повинующеся друг другу в страсе божии.
22 Жены, своим мужем повинуйтеся, якоже господу,
23 зане муж глава есть жены, якоже и христос глава церкве, и той есть спаситель тела:
24 но якоже церковь повинуется христу, такожде и жены своим мужем во всем.
25 (Зачало 231) Мужие, любите своя жены, якоже и христос возлюби церковь, и себе предаде за ню,
26 да освятит ю, очистив банею водною в глаголе:
27 да представит ю себе славну церковь, не имущу скверны, или порока, или нечто от таковых, но да будет свята и непорочна.
28 Тако должни суть мужие любити своя жены, яко своя телеса: любяй (бо) свою жену, себе самаго любит.
29 Никтоже бо когда свою плоть возненавиде, но питает и греет ю, якоже и господь церковь:
30 зане уди есмы тела его, от плоти его и от костей его.
31 Сего ради оставит человек отца своего и матерь, и прилепится к жене своей, и будета два в плоть едину.
32 Тайна сия велика есть: аз же глаголю во христа и во церковь.
33 (Зачало 232) обаче и вы, по единому кийждо свою жену сице да любит, якоже (и) себе: а жена да боится (своего) мужа.

 

Глава 6.

1 Чада, послушайте своих родителей о господе: сие бо есть праведно.
2 Чти отца твоего и матерь: яже есть заповедь первая во обетовании:
3 да благо ти будет, и будеши долголетенъ на земли.
4 И отцы, не раздражайте чад своих, но воспитовайте их в наказании и учении господни.
5 Раби, послушайте господий (своихъ) по плоти со страхом и трепетом, в простоте сердца вашего, якоже (и) христа,
6 не пред очима точию работающе яко человекоугодницы, но якоже раби христовы, творяще волю божию от души,
7 со благоразумием служаще якоже господу, а не (яко) человеком,
8 ведяще, яко кийждо, еже аще сотворитъ благое, сие приимет от господа, аще раб, аще свободь.
9 И господие, таяжде творите к ним, послабляюще (имъ) прещения, ведуще, яко и вам самемъ и тем господь есть на небесех, и обиновения лица несть у него.
10 (Зачало 233) Прочее же, братие моя, возмогайте во господе и в державе крепости его:
11 облецытеся во вся оружия божия, яко возмощи вам стати противу кознем диаволским,
12 яко несть наша брань к [противу] крови и плоти, но к началом, и ко властем (и) къ миродержителем тмы века сего, к духовомъ злобы поднебесным.
13 Сего ради приимите вся оружия божия, да возможете противитися в день лют и вся содеявше стати.
14 Станите убо препоясани чресла ваша истиною, и оболкшеся в броня правды,
15 и обувше нозе во уготование благовествования мира:
16 над всеми же восприимше щит веры, в немже возможете вся стрелы лукаваго разжженныя угасити:
17 и шлем спасния восприимите, и мечь духовный, иже есть глагол божий:
18 (Зачало 234) всякою молитвою и молением молящеся на всяко время духом, и в сие истое бдяще во всяком терпении и молитве о всех святыхъ
19 и о мне, да дастся ми слово во отверзение уст моих, с дерзновением сказати тайну благовествования,
20 о немже посолствую во узах, да в немъ дерзаю, якоже подобает ми глаголати.
21 Да увесте же и вы, яже о мне, что делаю, вся скажет вам тихик, возлюбленный брат и верен служитель о господе,
22 егоже послах к вам на сие истое, да увесте, яже о нас, и да утешитъ сердца ваша.
23 Мир братии и любовь с верою от бога отца и господа иисуса христа.
24 благодать со всеми любящими господа нашего иисуса христа в неистлении. Аминь.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы