Послание Святого апостола Павла к Филиппийцам

Глава 1.

Зачало 235.

1 Павел и тимофей, раби иисус христовы, всемъ святым о христе иисусе сущим в филиппех, с епископы и диаконы:
2 благодать вам и мир от бога отца нашего и господа иисуса христа.
3 Благодарю бога моего о всей памяти вашей,
4 всегда во всяцей молитве моей за всех васъ с радостию молитву мою творя,
5 о общении вашем в благовествование от перваго дне даже и доныне,
6 надеявся на сие истое, яко начный дело благо в вас совершит е даже до дне иисусъ христова:
7 якоже есть праведно мне сие мудрствовати о всех вас, за еже имети ми в сердцы вас, во узах моих и во ответе и извещении благовестия, сообщников мне благодати всехъ вас сущих.
8 (Зачало 236) Свидетель бо ми есть бог, яко люблю всех вас по милости иисус христове [утробою иисус христовою]:
9 и о сем молюся, да любовь ваша еще паче и паче избыточествует в разуме и во всяцемъ чувствии,
10 во еже искушати вам лучшая, да будете чисти и непреткновенни в день христов,
11 исполнени плодов правды иисус христом, в славу и похвалу божию.
12 (Зачало 237) Разумети же хощу вам, братие, яко яже о мне паче во успех благовествования приидоша,
13 яко узы моя явленны о христе быша во всем судищи и в прочих всех,
14 и множайшии братия о господе, надеявшиися о узах моих, паче дерзают без страха слово божие глаголати.
15 Нецыи убо по зависти и ревности, друзии же и за благоволение христа проповедают:
16 ови убо от рвения христа возвещаютъ нечисте, мняще печаль нанести узам моим:
17 ови же от любве, ведяще, яко во ответе благовествования лежу [во ответ благовествования учинен есмь].
18 Что убо? обаче всяцем образом, аще виною [лицемериемъ], аще истиною христосъ проповедаемь есть, и о сем радуюся, но и возрадуюся:
19 вем бо, яко сие сбудется ми во спасние вашею молитвою и подаянием духа иисус христова,
20 по чаянию и упованию моему, (Зачало 238) яко ни о единем же постыжуся, но во всяцемъ дерзновении, якоже всегда, и ныне возвеличится христос в теле моем, аще животом, аще ли смертию.
21 Мне бо еже жити, христос, и еже умрети, приобретение (есть).
22 Аще же, еже жити (ми) телом, сие мне плод дела: и что изволю, не вем.
23 обдержимь же есмь от обою, желание имый разрешитися и со христом быти, много паче лучше:
24 а еже пребывати во плоти, нужнейше (есть) вас ради.
25 И сие известне вем, яко буду и спребуду вам всем в ваш успех и радость веры,
26 яко да похвала ваша избыточествует о христе иисусе во мне, моим пришествием паки к вам.
27 (Зачало 239) Точию достойне благовествованию христову жителствуйте, да аще пришед и видевъ вас, аще и не сый у вас, услышу яже о вас, яко (истиною) стоите во единемъ дусе, и единодушне сподвизающеся по вере благовествования (волею),
28 и не колеблющеся ни о единем же от сопротивных: еже тем убо есть явление погибели, вам же спасния. И сие от бога:
29 яко вам даровася, еже о христе, не токмо еже в него веровати, но и еже по нем страдати,
30 тойже подвиг имуще, яков же во мне видесте и ныне слышите о мне.

 

Глава 2.

1 Аще убо кое утешение о христе, (или) аще кая утеха любве, аще кое общение духа, аще кое милосердие и щедроты,
2 исполните мою радость, да тожде мудрствуете, ту же любовь имуще, единодушни, единомудренни:
3 ничтоже по рвению или тщеславию, но смиреномудриемъ друг друга честию болша себе творяще.
4 Не своих си кийждо, но и дружних кийждо смотряйте.
5 (Зачало 240) Сие бо да мудрствуется в вас, еже и во христе иисусе:
6 иже, во образе божии сый, не восхищениемъ непщева быти равен богу:
7 но себе умалил [истощилъ], зрак раба приим, в подобии человечестем быв, и образомъ обретеся якоже человек:
8 смирил себе, послушлив быв даже до смерти, смерти же крестныя.
9 Темже и бог его превознесе и дарова ему имя, еже паче всякаго имене,
10 да о имени иисусове всяко колено поклонится небесных и земных и преисподних,
11 и всяк язык исповесть, яко господь иисусъ христос в славу бога отца.
12 (Зачало 241) Темже, возлюбленнии мои, якоже всегда послушасте мене, не якоже в пришествии моем точию, но ныне много паче во отшествии моем, со страхом и трепетом свое спасние содевайте:
13 бог бо есть действуяй в вас и еже хотети и еже деяти о благоволении.
14 Вся творите без роптания и размышления,
15 да будете неповинни и цели, чада божия непорочна посреде рода строптива и развращена, в нихже являетеся якоже светила в мире,
16 слово животно придержаще, в похвалу мне в день христов, (Зачало 242) яко не вотще текох, ни вотще трудихся.
17 Но аще и жрен бываю о жертве и службе веры вашея, радуюся и сорадуюся всем вам:
18 такожде и вы радуйтеся и сорадуйтеся мне.
19 уповаю же о господе иисусе тимофеа вскоре послати к вам, да и аз благодушствую, уведевъ яже о вас.
20 Ни единаго бо имам равнодушна, иже приснее о вас попечется:
21 вси бо своих си ищут, (а) не яже христа иисуса.
22 Искусство же его знаете, зане якоже отцу чадо, со мною поработал в благовестии.
23 Сего же убо уповаю послати абие, повнегда увем яже о мне.
24 (Зачало 243) Надеюся же о господе, яко и самъ скоро прииду к вам.
25 Потребнее же возмнех епафродита брата и споспешника и своинника моего, вашего же посланника и служителя потребе моей, послати к вам,
26 понеже желанием желаше видети всех вас, и тужаше, зане слышасте, яко боле.
27 Ибо боле близ смерти: но бог помилова его, не его же токмо, но и мене, да не скорбь на скорбь прииму.
28 Скорее убо послах его, да видевше его паки, возрадуетеся, и аз безпечаленъ пребуду.
29 Приимите убо его о господе со всякою радостию, и таковыя честны имейте,
30 зане за дело христово даже до смерти приближися, понудив себе вседушно [презрев душу свою], да исполнит ваше лишение службы яже ко мне.

 

Глава 3.

Зачало 244.

1 Прочее же, братие моя, радуйтеся о господе. Таяжде (бо) писати вам, мне убо неленостно, вамъ же твердо.
2 Блюдитеся от псов, блюдитеся от злых делателей, блюдитеся от сечения:
3 мы бо есмы обрезание, иже духом богу служим и хвалимся о христе иисусе, а не въ плоти надеемся:
4 ибо и аз имею надеяние такожде во плоти. Аще кто ин мнит надеятися во плоти, азъ паче,
5 обрезан осмодневно, от рода израилева, колена вениаминова, евреин от еврей, по закону фарисей,
6 по ревности гоних церковь божию, по правде законней быв непорочен.
7 Но яже ми бяху приобретения, сия вменихъ христа ради тщету.
8 Но убо вменяю вся тщету быти за превосходящее разумение христа иисуса господа моего, (Зачало 245) егоже ради всех отщетихся, и вменяю вся уметы быти, да христа приобрящу
9 и обрящуся в нем, не имый моея правды, яже от закона, но яже верою (иисусъ) христовою, сущую от бога правду в вере:
10 яко [еже] разумети его, и силу воскресния его, и сообщение страстей его, сообразуяся смерти его,
11 аще како достигну в воскресение мертвых.
12 Не зане уже достигох, или уже совершихся: гоню же, аще и постигну, о немже и постиженъ бых от христа иисуса.
13 Братие, аз себе не у помышляю достигша: едино же, задняя убо забывая, в предняя же простираяся,
14 со усердием гоню [к намеренному теку], к почести вышняго звания божия о христе иисусе.
15 елицы убо совершенни, сие да мудрствуим: и еже аще ино что мыслите, и сие богъ вам открыет.
16 обаче в неже достигохом, тоже да мудрствуемъ и темже правилом жителствуем.
17 Подобни ми бывайте, братие, и смотряйте тако ходящия, якоже имате образ нас.
18 Мнози бо ходят, ихже многажды глаголахъ вам, ныне же и плачя глаголю, враги креста христова:
19 имже кончина погибель, имже бог чрево, и слава в студе их, иже земная мудрствуют.
20 (Зачало 246) Наше бо житие на небесех есть, отонудуже и спасителя ждем, господа (нашего) иисуса христа,
21 иже преобразит тело смирения нашего, яко быти сему сообразну телу славы его, по действу еже возмогати ему и покорити себе всяческая.

 

Глава 4.

1 Темже, братие моя возлюбленная и вожделенная, радосте и венче мой, тако стойте о господе, возлюбленнии.
2 еводию молю и синтихию молю тожде мудрствовати о господе:
3 ей, молю и тебе, супружниче присный, споспешествуй им, яже во благовествовании сподвизашася со мною и с климентом и с прочими споспешники моими, ихже имена в книгах животных.
4 (Зачало 247) Радуйтеся всегда о господе: и паки реку: радуйтеся.
5 Кротость ваша разумна да будет всем человеком. господь близ.
6 Ни о чемже пецытеся, но во всем молитвою и молением со благодарением прошения ваша да сказуются к богу:
7 и мир божий, превосходяй всяк ум, да соблюдет сердца ваша и разумения ваша о христе иисусе.
8 Прочее же, братие (моя), елика суть истинна, елика честна, елика праведна, елика пречиста, елика прелюбезна, елика доброхвальна, аще кая добродетель и аще кая похвала, сия помышляйте.
9 Имже и научистеся, и приясте, и слышасте, и видесте во мне, сия творите: и бог мира будет с вами.
10 (Зачало 248) Возрадовахся же о господе вельми, яко уже когда воспомянусте пещися о мне: понеже и печастеся, но непогодным [неудобнымъ] временем обдержастеся.
11 Не яко по скудости глаголю: аз бо навыкох, в нихже есмь, доволен быти:
12 вем и смиритися, вем и избыточествовати: во всем и во всех навыкох, и насыщатися и алкати, и избыточествовати и лишатися.
13 Вся могу о укрепляющем мя (иисусе) христе.
14 обаче добре сотвористе, сприобщившеся печали моей.
15 Весте же и вы, филипписиане, яко в начале благовествования, егда изыдох от македонии, ни едина ми церковь общевася в слово даяния и приятия, точию вы едини:
16 яко и в солунь и единою и дващи въ требование (мое) посласте ми.
17 Не яко ищу даяния, но ищу плода множащагося в слово ваше [в пользу вашу].
18 Приях же вся и избыточествую: исполнихся, приемь от епафродита посланная от вас, воню благоухания, жертву приятну, благоугодну богу.
19 бог же мой да исполнит всякое требование ваше по богатству своему в славе, о христе иисусе.
20 богу же и отцу нашему слава во веки веков. Аминь.
21 Целуйте всякаго свята о христе иисусе. Целуютъ вы сущая со мною братия.
22 Целуют вы святии вси, паче же иже от кесарева дому.
23 благодать господа нашего иисуса христа со всеми вами. Аминь.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы