Послание Святого апостола Павла к Титу

Глава 1.

Зачало 300.

1 Павел, раб божий, апостол же иисус христов, по вере избранных божиих и разуму истины, яже по благочистию,
2 о уповании жизни вечныя, юже обетова неложный бог прежде лет вечных,
3 яви же во времена своя слово свое проповеданием, еже мне поручено бысть по повелению спасителя нашего бога:
4 титу, присному чаду по общей вере: благодать, милость, мир от бога отца и господа иисуса христа спаса нашего.
5 Сего ради оставих тя в крите, да недокончанная исправиши и устроиши по всемъ градом пресвитеры, якоже тебе аз повелех:
6 аще кто есть непорочен, единыя жены муж, чада имый верна, не во укорении блуда, или непокорива.
7 Подобает бо епископу без порока быти, якоже божию строителю: не себе угождающу, (не дерзу, не напрасливу,) не гневливу, не пиянице, не бийце, не скверностяжателну,
8 но страннолюбиву, благолюбцу, целомудренну, праведну, преподобну, воздержателну,
9 держащемуся вернаго словесе по учению, да силен будет и утешати во здравем учении, и противящияся обличати.
10 Суть бо мнози непокориви, суесловцы и умомъ прельщени, наипаче же сущии от обрезания,
11 ихже подобает уста заграждати: иже вся домы развращают, учаще яже не подобает, сквернаго ради прибытка.
12 Рече же некто от них, свой им пророк: критяне присно лживи, злии зверие, утробы праздныя.
13 Свидетелство сие истинно есть: еяже ради вины обличай их нещадно, да здрави будутъ в вере,
14 не внимающе иудейским баснем, ни заповедемъ человек отвращающихся от истины.
15 (Зачало 301) Вся убо чиста чистым: оскверненымъ же и неверным ничтоже чисто, но осквернися их и ум и совесть.
16 бога исповедуют ведети, а делы отмещутся его, мерзцы суще и непокориви и на всякое дело благое неискусни.

 

Глава 2.

1 Ты же глаголи, яже подобает здравому учению:
2 старцем трезвенным быти, честным, целомудренным, здравствующим верою, любовию, терпением:
3 старицам такожде во украшении столепным, не клеветивым, не вину многу порабощенным, доброучителным,
4 да уцеломудрят юныя, мужелюбицам быти, чадолюбицам,
5 целомудренным, чистым, домы добре правящим, благим, покаряющимся своим мужем, да не слово божие хулится:
6 юноши такожде моли целомудрствовати.
7 о всем (же) сам себе подавая образ добрыхъ дел, во учении независтное [целость], честность, нетление,
8 слово здравое, незазорное, да противный посрамится, ничтоже имея глаголати о нас укорно.
9 Рабы, своим господем повиноватися, во всемъ благоугодным быти, не прекословным,
10 не крадущим, но веру всяку являющим благу, да учение спасителя нашего бога украшаютъ во всем.
11 (Зачало 302) явися бо благодать божия спасителная всем человеком,
12 наказующи нас, да отвергшеся нечестия и мирских похотей, целомудренно и праведно и благочестно поживем в нынешнем веце,
13 ждуще блаженнаго упования и явления славы великаго бога и спаса нашего иисуса христа,
14 иже дал есть себе за ны, да избавитъ ны от всякаго беззакония и очистит себе люди избранны, ревнители добрым делом.
15 Сия глаголи, и моли, и обличай со всякимъ повелением, да никтоже тя преобидит [презираетъ].

 

Глава 3.

1 Воспоминай тем началствующим и владеющимъ повиноватися и покарятися, и ко всякому делу благу готовым быти:
2 ни единаго хулити, не сварливым быти, но тихим, всяку являющим кротость ко всем человеком.
3 Бехом бо иногда и мы несмысленни, и непокориви, и прельщени, работающе похотем и сластем различным, в злобе и зависти живуще, мерзцы (суще и) ненавидяще друг друга.
4 егда же благодать и человеколюбие явися спаса нашего бога,
5 не от дел праведных, ихже сотворихом мы, но по своей его милости, спасе нас банею пакибытия и обновления духа святаго,
6 егоже излия на нас обилно иисус христом, спасителем нашим,
7 да оправдившеся благодатию его, наследницы будем по упованию жизни вечныя.
8 (Чадо тите,) верно слово, и о сихъ хощу тя извещати [утвердити], да пекутся добрым делом прилежати веровавшии богу: сия суть полезна человеком и добра.
9 Буих же стязаний и родословий и рвений и сваров законных отступай: суть бо неполезны и суетны.
10 еретика человека по первом и вторемъ наказании отрицайся,
11 ведый, яко развратися таковый, и согрешает, и есть самоосужден.
12 егда послю артему к тебе или тихика, потщися приити ко мне в никополь: тамо бо судихъ озимети.
13 Зину законника и аполлоса скоро предпосли, и да ничтоже им скудно будет.
14 Да учатся же и наши добрым делом прилежати в нужная требования, да не будут безплодни.
15 Целуют тя со мною сущии вси. Целуй любящия ны в вере. благодать со всеми вами. Аминь.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы