Второе послание Святого апостола Павла к Коринфянам

Глава 1.

Зачало 167.

1 Павел, посланник иисус христов волею божиею, и тимофей брат, церкви божией сущей в коринфе, со святыми всеми сущими во всей ахаии:
2 благодать вам и мир от бога отца нашего, и господа иисуса христа.
3 благословен бог и отец господа нашего иисуса христа, отец щедрот и бог всякия утехи,
4 утешаяй нас о всяцей скорби нашей, яко возмощи нам утешити сущия во всяцей скорби, утешением, имже утешаемся сами от бога.
5 Зане якоже избыточествуют страдания христова в нас, тако христом избыточествует и утешение наше.
6 Аще ли же скорбим, о вашем утешении и спасении, действующемся в терпении техже страданий, яже и мы страждем:
7 и упование наше известно о вас. Аще ли утешаемся, о вашем утешении и спасении, ведяще, зане якоже общницы есте страстемъ нашим, такожде и утешению.
8 (Зачало 168) Не бо хощем вас, братие, не ведети о скорби нашей бывшей нам во асии, яко по премногу (и) паче силы отяготихомся, яко не надеятися нам и жити.
9 Но сами в себе осуждение смерти имехом, да не надеющеся будем на ся, но на бога возставляющаго мертвыя,
10 иже от толикия смерти избавил ны есть и избавляет, наньже и уповахом, яко и еще избавит,
11 споспешествующим и вам по нас молитвою, да от многих лиц, еже в нас дарование, многими благодарится о вас [в некиих: о насъ].
12 (Зачало 169) Похваление бо наше сие есть, свидетелство совести нашея, яко в простоте и чистоте божией, (а) не в мудрости плоти, но благодатию божиею жихом в мире, множае же у вас.
13 Не иная бо пишем вам, но яже чтете и разумеваете: уповаю же, яко и до конца уразумеете,
14 якоже и разуместе нас от части, яко похваление вам есмы, якоже и вы нам, в день господа нашего иисуса христа.
15 И сим упованием хотех к вам приити прежде, да вторую благодать имате,
16 и вами проити в македонию, и паки от македонии приити к вам, и вами проводитися во иудею.
17 Сие же хотя, еда что убо легкотою деяхъ? Или яже совещаваю, по плоти совещаваю, да будет у мене еже ей, ей, и еже ни, ни.
18 Верен же бог, яко слово наше, еже к вам, не бысть ей и ни.
19 Ибо божий сын иисус христос, иже у вас нами проповеданный, мною и силуаном и тимофеем, не бысть ей и ни, но в нем самемъ ей бысть:
20 елика бо обетования божия, в том ей и в том аминь: богу к славе нами.
21 (Зачало 170) Извествуяй же нас с вами во христа и помазавый нас, бог,
22 иже и запечатле нас, и даде обручение духа в сердца наша.
23 Аз же свидетеля бога призываю на мою душу, яко щадя вас, ктому не приидох в коринф,
24 не яко обладаем верою вашею, но (яко) споспешницы есмы вашей радости: верою бо стоите.

 

Глава 2.

1 Судих же в себе сие, не паки скорбию к вамъ приити.
2 Аще бо аз скорбь творю вам, то кто есть веселяяй мя, точию приемляй скорбь от мене?
3 И писах вам сие истое, да не пришед скорбь на скорбь прииму, о нихже подобаше ми радоватися, надеяся на вся вы, яко (Зачало 171) моя радость всех вас есть.
4 от печали бо многия и туги сердца написахъ вам многими слезами, не яко да оскорбитеся, но любовь да познаете, юже имам изобилно к вам.
5 Аще ли кто оскорбил (мене), не мене оскорби, но от части, да не отягчу, всех вас.
6 Доволно (бо) таковому запрещение сие, еже от многих:
7 темже сопротивное паче вы да даруете и утешите, да не како многою скорбию пожерт будет таковый:
8 темже молю вы, утвердите к нему любовь.
9 На сие бо и писах, да разумею искусство ваше, аще во всем послушливи есте.
10 емуже аще что даруете, и аз: ибо аз аще что даровах, емуже даровах, васъ ради, о лицы иисус христове,
11 да не обидими будем от сатаны: не не разумеваемъ бо умышлений его.
12 Пришед же в троаду во благовестие христово, и двери отверзене ми бывшей о господе,
13 не имех покоя духу моему, не обретшу ми тита брата моего: но отрекся им [целовавъ ихъ], изыдох в македонию.
14 (Зачало 172) богу же благодарение, всегда победители нас творящему о христе иисусе и воню разума его являющу нами во всяцем месте.
15 яко христово благоухание есмы богови въ спасаемых и в погибающих.
16 овем убо воня смертная в смерть, овемъ же воня животная в живот. И к сим кто доволенъ?
17 Несмы бо, якоже мнози, нечисто проповедающии слово божие, но яко от чистоты, но яко от бога, пред богом, во христе глаголем.

 

Глава 3.

1 Зачинаем ли паки нас самех извещавати вамъ? Или требуем, якоже нецыи, извещавателныхъ посланий к вам, или от вас известителныхъ?
2 Послание (бо) наше вы есте, написаное въ сердцах наших, знаемое и прочитаемое от всехъ человек:
3 являеми, яко есте послание христово служеное нами, написано не чернилом, но духомъ бога жива, не на скрижалех каменных, но на скрижалехъ сердца плотяных.
4 (Зачало 173) Надеяние же таково имамы христомъ к богу,
5 не яко доволни есмы от себе помыслити что, яко от себе, но доволство наше от бога:
6 иже и удоволи нас служители быти нову завету, не писмени, но духу: писмя бо убивает, а дух животворит.
7 Аще ли служение смерти писмены, образовано в каменех, бысть в славу, яко не мощи взирати сыном израилевым на лице моисеово, славы ради лица его престающия:
8 како не множае паче служение духа будет въ славе?
9 Аще бо служение осуждения, слава, много паче избыточествует служение правды в славе.
10 Ибо не прославися прославленное в части сей, за превосходящую славу.
11 Аще бо престающее, славою: много паче пребывающее, в славе.
12 (Зачало 174) Имуще убо таково упование, многим дерзновением действуем,
13 и не якоже моисей полагаше покрывало на лицы своем, за еже не мощи взирати сыномъ израилевым на конец престающаго.
14 Но ослепишася помышления их: даже бо до сего дне тожде покрывало во чтении ветхаго завета пребывает не откровено, зане о христе престает.
15 Но даже до днесь, внегда чтется моисей, покрывало на сердце их лежит:
16 внегда же обратятся ко господу, взимается покрывало.
17 господь же дух есть: а идеже дух господень, ту свобода.
18 Мы же вси откровенным лицем славу господню взирающе, в тойже образ преобразуемся от славы в славу, якоже от господня духа.

 

Глава 4.

Зачало 175.

1 Сего ради имуще служение сие, якоже помиловани быхом, не стужаем си:
2 но отрекохомся тайных срама, не в лукавствии ходяще, ни льстяще словесе божия, но явлениемъ истины представляюще себе ко всяцей совести человечестей, пред богом.
3 Аще ли же есть покровено благовествование наше, в гибнущих есть покровено,
4 в нихже бог века сего ослепи разумы неверных, во еже не возсияти им свету благовествования славы христовы, иже есть образ бога невидимаго.
5 Не себе бо проповедаем, но христа иисуса господа: себе же самех рабов вам иисуса (господа) ради:
6 (Зачало 176) яко бог рекий из тмы свету возсияти, иже возсия в сердцах наших, к просвещению разума славы божия о лицы иисус христове.
7 Имамы же сокровище сие в скудельных сосудех, да премножество силы будет божия, а не от нас:
8 во всем скорбяще, но не стужающе си: нечаеми, но не отчаяваеми:
9 гоними, но не оставляеми: низлагаеми, но не погибающе:
10 всегда мертвость господа иисуса в теле носяще, да и живот иисусов в теле нашем явится.
11 присно бо мы живии в смерть предаемся иисуса ради, да и живот иисусов явится в мертвенней плоти нашей:
12 темже смерть убо в нас действует, а живот в вас.
13 (Зачало 177) Имуще же тойже дух веры, по писанному: веровах, темже возглаголах: и мы веруем, темже и глаголем,
14 ведяще, яко воздвигий господа иисуса, и насъ со иисусом воздвигнет, и предпоставит с вами.
15 Вся бо вас ради, да благодать умножившаяся, множайшими благодарении избыточествит в славу божию.
16 Темже не стужаем си: но аще и внешний наш человек тлеет, обаче внутренний обновляется по вся дни.
17 еже бо ныне легкое печали нашея, по преумножению в преспеяние тяготу вечныя славы соделоваетъ нам,
18 не смотряющим нам видимых, но невидимых: видимая бо временна, невидимая же вечна.

 

Глава 5.

Зачало 178.

1 Вемы бо, яко аще земная наша храмина тела разорится, создание от бога имамы, храмину нерукотворену, вечну на небесех.
2 Ибо о сем воздыхаем, в жилище наше небесное облещися желающе:
3 аще точию и облекшеся, не нази обрящемся.
4 Ибо сущии в теле сем воздыхаем отягчаеми, понеже не хощем совлещися, но пооблещися, да пожерто будет мертвенное животом.
5 Сотворивый же нас в сие истое бог, иже и даде нам обручение духа.
6 Дерзающе убо всегда и ведяще, яко живуще в теле отходим от господа:
7 верою бо ходим, а не видением:
8 дерзаем же и благоволим паче отити от тела и внити ко господу:
9 темже и тщимся, аще входяще, аще отходяще, благоугодни ему быти:
10 (Зачало 179) всем бо явитися нам подобаетъ пред судищем христовым, да приимет кийждо, яже с телом содела, или блага, или зла.
11 Ведуще убо страх господень, человеки увещаваем, богови же явлени есмы: уповаем же, яко и в совестех ваших явлени есмы.
12 Не паки бо себе хвалим пред вами, но вину даем вам похвалению о нас, да имате к хвалящимся в лицы, а не в сердцы.
13 Аще бо изумихомся, богови: аще ли целомудрствуем, вам.
14 Ибо любы божия обдержит нас суждших сие: яко аще един за всех умре, то убо вси умроша.
15 (Зачало 180) христос же за всех умре, да живущии не ктому себе живут, но умершему за них и воскресшему.
16 Темже и мы отныне ни единаго вемы по плоти: аще же и разумехом по плоти христа, но ныне ктому не разумеем.
17 Темже аще кто во христе, нова тварь: древняя мимоидоша, се быша вся нова:
18 всяческая же от бога, примирившаго нас себе иисус христом и давшаго нам служение примирения:
19 зане бог бе во христе мир примиряя себе, не вменяя им согрешений их и положив въ нас слово примирения.
20 По христе убо молим [посолствуемъ], яко богу молящу нами, молим по христе: примиритеся с богом.
21 Не ведевшаго бо греха по нас грех сотвори, да мы будем правда божия о нем.

 

Глава 6.

Зачало 181.

1 Споспешествующе же и молим, не вотще благодать божию прияти вам.
2 глаголет бо: во время приятно послушах тебе, и в день спасния помогох ти. Се ныне время благоприятно, се ныне день спасния.
3 Ни едино ни в чемже дающе претыкание, да служение безпорочно будет,
4 но во всем представляюще себе якоже божия слуги, в терпении мнозе, в скорбех, в бедах, в теснотах,
5 в ранах, в темницах, в нестроениих, въ трудех, во бдениих, в пощениих,
6 во очищении, в разуме, в долготерпении, в благости, в дусе святе, в любви нелицемерне,
7 в словеси истины, в силе божией, оружии правды десными и шуими,
8 славою и безчестием, гаждением и благохвалением: яко лестцы, и истинни:
9 яко незнаеми, и познаваеми: яко умирающе, и се живи есмы: яко наказуеми, а не умерщвляеми:
10 яко скорбяще, присно же радующеся: яко нищи, а многи богатяще: яко ничтоже имуще, а вся содержаще.
11 (Зачало 182) уста наша отверзошася к вам, коринфяне, сердце наше распространися.
12 Не тесно вмещаетеся в нас, утесняетеся же во утробах ваших.
13 Тожде же возмездие, якоже чадом глаголю, распространитеся и вы.
14 Не бывайте (удобь) преложни ко иному ярму, якоже невернии [не бывайте преложни ко иному ярму неверныхъ]. Кое бо причастие правде къ беззаконию? Или кое общение свету ко тме?
15 Кое же согласие христови с велиаромъ? Или кая часть верну с невернымъ?
16 Или кое сложение церкви божией со идолы? Вы бо есте церкви бога жива, якоже рече бог: яко вселюся в них и похожду, и буду им бог, и тии будут мне людие.
17 Темже изыдите от среды их и отлучитеся, глаголет господь, и нечистоте не прикасайтеся, и азъ прииму вы:
18 и буду вам во отца, и вы будете мне в сыны и дщери, глаголет господь вседержитель.

 

Глава 7.

1 Сицева убо имуще обетования, о, возлюбленнии, (Зачало 183) очистим себе от всякия скверны плоти и духа, творяще святыню в страсе божии.
2 Вместите ны: ни единаго обидехом, ни единаго истлихом, ни единаго лихоимствовахом.
3 Не на осуждение глаголю: прежде бо рех, яко в сердцах наших есте, во еже умрети с вами и сожити.
4 Много ми дерзновение к вам, многа ми похвала о вас: исполнихся утехи, преизбыточествую радостию о всяцей печали нашей.
5 Ибо пришедшим нам в македонию, ни единаго име покоя плоть наша, но во всем скорбяще: внеуду брани, внутрьуду боязни.
6 Но утешаяй смиренныя, утеши насъ бог пришествием титовым,
7 не токмо же пришествием его, но и утешением, имже утешися о вас, поведая нам ваше желание, ваше рыдание, вашу ревность по мне, яко ми паче возрадоватися.
8 яко аще и оскорбих вас посланием, не раскаюся, аще и раскаял бых ся: вижду бо, яко послание оно, аще и к часу, оскорби вас.
9 ныне радуюся, не яко скорбни бысте, но яко оскорбистеся в покаяние: оскорбесте бо по бозе, да ни в чемже отщетитеся от нас.
10 (Зачало 184) Печаль бо, яже по бозе, покаяние нераскаянно во спасние соделовает, а (сего) мира печаль смерть соделовает.
11 Се бо сие самое, еже по бозе оскорбитися вам, колико содела в вас тщание? но ответъ? но негодование, но страх, но вожделение, но ревность, но отмщение? Во всем представисте себе чисты быти в вещи.
12 Аще бо и писах вам, не обидевшаго ради, ниже обидимаго ради, но за еже явитися въ вас тщанию нашему, еже о вас пред богом.
13 Сего ради утешихомся о утешении вашем: лишше же паче возрадовахомся о радости титове, яко покоися дух его от всехъ вас:
14 яко аще что ему о вас похвалихся, не посрамихся: но яко вся воистинну глаголахомъ вам, тако и похваление наше, еже к титу, истинно бысть:
15 и утроба его излиха к вам есть, воспоминающаго всех вас послушание, яко со страхом и трепетом приясте его.
16 Радуюся убо, яко во всем дерзаю въ вас.

 

Глава 8.

Зачало 185.

1 Сказуем же вам, братие, благодать божию, данную в церквах македонских:
2 яко во мнозем искушении скорбей избытокъ радости их, и яже во глубине нищета ихъ избыточествова в богатство простоты их:
3 яко по силе их, свидетелствую, и паче силы доброхотни,
4 со многим молением моляще нас, благодать и общение служения, еже ко святым, прияти нам:
5 и не якоже надеяхомся, но себе вдаша первее господеви, и нам волею божиею:
6 во еже умолити нам тита, да якоже прежде начат, такожде и скончает в вас и благодать сию.
7 (Зачало 186) Но якоже во всем избыточествуете, верою и словом, и разумом, и всяцем тщанием, и любовию, яже от вас к нам, да и в сей благодати избыточествуете.
8 Не по повелению глаголю, но за иных тщание и вашея любве истинное искушая.
9 Весте бо благодать господа нашего иисуса христа, яко вас ради обнища богат сый, да вы нищетою его обогатитеся.
10 И совет даю о сем: се бо вам есть на пользу, иже не точию, еже творити, но и еже хотети, прежде начасте от прешедшаго лета.
11 ныне же и сие творити скончайте, да якоже бысть усердие хотети, тако будет и исполнити от (сего,) еже имате.
12 Аще бо усердие предлежит, по елику аще кто имать, благоприятен есть, а не по елику не имать.
13 Не бо да иным убо отрада, вам же скорбь: но по изравнению.
14 В нынешнее время ваше избыточествие во онехъ лишение, да и онех избыток будет в ваше лишение, яко да будет равенство,
15 якоже есть писано: иже многое, не преумножилъ есть: и иже малое, не умалил [не преизбыточествова, иже много: и иже мало, не мнее приятъ].
16 (Зачало 187) благодарение же богови, давшему тожде тщание о вас в сердце титово:
17 яко моление убо прият, тщаливейший же сый, своею волею изыде к вам.
18 Послахом же с ним (и) брата, егоже похвала во евангелии по всем церквам:
19 не точию же, но и освящен от церквей с нами ходити, со благодатию сею, служимою нами к самого господа славе и усердию вашему:
20 блюдущеся того, да не кто нас поречет во обилии сем служимем нами:
21 промышляюще добрая не токмо пред богом, но и пред человеки.
22 Послахом же с ними (и) брата нашего, егоже искусихом во многих многащи встанлива [многажды тщателна] суща, ныне же зело встанливейша [множае тщателнейша], надеянием многим на вас.
23 Аще ли же о тите, общник мне и къ вам споспешник: аще ли братия наша, посланницы церквей, слава христова.
24 Показание убо любве вашея и нашего хваления о вас, к ним покажите, и в лице церквей.

 

Глава 9.

1 о службе бо, яже ко святым, лишше ми есть писати вам,
2 вем бо усердие ваше, имже о вас хвалюся македоняном, яко ахаиа приготовися от мимошедшаго лета: и яже от вас ревность раздражи множайших.
3 Послах же братию, да не похваление наше, еже о вас, испразднится в части сей, но да, якоже глаголах, приготовани будете:
4 да не како, аще приидут со мною македоняне и обрящут вас неприготованных, постыдимся мы, да не глаголем вы, в части сей похваления.
5 Потребно убо умыслих умолити братию, да прежде приидут к вам и предуготовят прежде возвещенное благословение ваше, сие готово быти тако, якоже благословение, а не яко лихоимство.
6 (Зачало 188) Се же глаголю: сеяй скудостию, скудостию и пожнет: а сеяй о благословении, о благословении и пожнет.
7 Кийждо якоже изволение имать сердцем, не от скорби, ни от нужды: доброхотна бо дателя любит бог.
8 Силен же бог всяку благодать изобиловати в вас, да о всем всегда всяко доволство имуще, избыточествуете во всяко дело благо,
9 якоже есть писано: расточи, даде убогим: правда его пребывает во век века.
10 Даяй же семя сеющему и хлеб в снедь, да подаст и умножит семя ваше, и да возраститъ жита правды вашея,
11 да о всем богатящеся во всяку простоту, яже содевает нами благодарение богу.
12 (Зачало 189) яко работа сего служения не токмо есть исполняющая лишения святых, но и избыточествующая многими благодареньми богови:
13 искушением служения сего славяще бога о покорении исповедания вашего в благовествовании христове, и о простоте сообщения к нимъ и ко всем,
14 и о тех молитве о вас, возжелеющихъ вас за премногую благодать божию на вас.
15 благодарение же богови о неисповедимем его даре.

 

Глава 10.

1 Сам же аз павел молю вы кротостию и тихостию христовою, иже в лице убо смирен в вас, не сый же у вас дерзаю в вас.
2 Молю же, да не присущ дерзаю надеянием, имже помышляю смети на некия непщующия нас яко по плоти ходящих.
3 Во плоти бо ходяще, не по плоти воинствуем:
4 оружия бо воинства нашего не плотская, но сильна богом на разорение твердем: помышления низлагающе,
5 и всяко возношение взимающееся на разум божий, и пленяюще всяк разум в послушание христово,
6 и в готовости имуще отмстити всяко преслушание, егда исполнится ваше послушание.
7 яже ли пред лицем, зрите? (Зачало 190) Аще кто надеется себе христова быти, да помышляетъ паки от себе, зане, якоже он христов, такожде и мы христовы.
8 Аще бо и лишше что похвалюся о власти нашей, юже даде нам господь в создание, а не на разорение ваше, не постыжуся.
9 (Но) да не явлюся, яко страша вас посланьми.
10 яко послания убо, рече, тяжка и крепка, а пришествие тела немощно, и слово уничиженно:
11 сие да помышляет таковый, яко яцы же есмы словом посланий, отстояще, таковии и ту суще есмы делом.
12 Не смеем бо судити [присовокупляти], или прикладовати себе иным хвалящим себе самех: но сами в себе себе измеряюще, и прилагающе себе самим себе, не разумевают.
13 Мы же не в безмерная похвалимся, но по мере правила, егоже раздели нам бог меру, достизати даже и до вас.
14 Не яко бо не досяжуще до вас, паче простираемъ себе, даже бо и до вас достигохом благовестиемъ христовым:
15 не в безмерная хвалящеся в чуждих трудех, упование же имуще, растущей вере вашей, в вас величатися по правилу нашему изобилно,
16 во еже и в дальших вас (странахъ) благовестити, не чужим правилом в готовых похвалитися.
17 Хваляйся же, о господе да хвалится:
18 не хваляй бо себе сей искусен, но егоже бог восхваляет.

 

Глава 11.

Зачало 191.

1 О, да бысте мало потерпели безумию моему! Но и потерпите мя.
2 Ревную бо по вас божиею ревностию: обручихъ бо вас единому мужу деву чисту представити христови.
3 Боюся же, да не како, якоже змий еву прельсти лукавством своим, тако истлеют (и) разумы ваши от простоты, яже о христе.
4 Аще бо грядый инаго иисуса проповедает, егоже не проповедахом, или духа инаго приемлете, егоже не приясте, или благовествование ино, еже не приясте, добре бысте потерпели.
5 (Зачало 192) Непщую бо ничимже лишитися преднихъ апостол:
6 аще бо и невежда словом, но не разумом: но везде явльшеся о всем в вас [но во всемъ явленни есмы во всех к вамъ].
7 Или грех сотворих себе смиряя, да вы вознесетеся, яко туне божие благовествование благовестихъ вамъ?
8 от иных церквей уях, приим оброкъ к вашему служению: и пришед к вам, и в скудости быв, не стужих ни единому:
9 скудость бо мою исполниша братия, пришедше от македонии: и во всем без стужения вамъ себе соблюдох и соблюду.
10 есть истина христова во мне, яко похваление сие не заградится о мне в странах ахайских.
11 Почто? зане не люблю ли васъ? бог весть. А еже творю, и сотворю,
12 да отсеку вину хотящим вины, да, о немже хвалятся, обрящутся якоже и мы.
13 Таковии бо лживи апостоли, делателе льстивии, преобразующеся во апостолы христовы.
14 И не дивно: сам бо сатана преобразуется во ангела светла:
15 не велие убо, аще и служителие его преобразуются яко служители правды: имже кончина будет по делом их.
16 Паки глаголю: да никтоже мнит мя безумна быти: аще ли ни, поне яко безумна приимите мя, да и аз мало что похвалюся.
17 А еже глаголю, не глаголю по господе, но яко в безумии в сей части похвалы:
18 понеже мнози хвалятся по плоти, и аз похвалюся.
19 Любезно бо приемлете безумныя, мудри суще:
20 приемлете бо, аще кто вас порабощает, аще кто поядает, аще кто (не влепоту) проторитъ [отемлетъ], аще кто по лицу биет вы, аще кто величается.
21 По досаждению глаголю, зане аки мы изнемогохом. (Зачало 193) о немже аще дерзает кто, несмысленно глаголю, дерзаю и аз.
22 еврее ли суть? и аз. израилите ли суть? и аз. Семя авраамле ли суть? и аз.
23 Служителие ли христовы суть? не в мудрости глаголю, паче аз. В трудех множае, в ранахъ преболе, в темницах излиха, в смертех многащи.
24 от иудей пять краты четыредесять разве единыя приях:
25 трищи палицами биен бых, единою каменьми наметан бых, трикраты корабль опровержеся со мною: нощь и день во глубине сотворих:
26 в путных шествиих множицею: беды в реках, беды от разбойник, беды от сродник, беды от язык, беды во градех, беды в пустыни, беды в мори, беды во лжебратии:
27 в труде и подвизе, во бдениих множицею, во алчбе и жажди, в пощениих многащи, в зиме и наготе.
28 Кроме внешних, нападение еже по вся дни, (и) попечение всех церквей.
29 Кто изнемогает, и не изнемогаю? Кто соблазняется, и аз не разжизаюся?
30 Аще хвалитися (ми) подобает, о немощи моей похвалюся.
31 (Зачало 194) бог и отец господа нашего иисуса христа весть, сый благословен во веки, яко не лгу.
32 В дамасце языческий князь арефы царя стрежаше дамаск град, яти мя хотя: и оконцемъ в кошнице свешен бых по стене, и избегохъ из руку его.

 

Глава 12.

1 Похвалитися же не пользует ми: прииду бо в видения и откровения господня.
2 Вем человека о христе, прежде лет четыренадесяти: аще в теле, не вем, аще ли кроме тела, не вем, бог весть: восхищена бывша таковаго до третияго небесе.
3 И вем такова человека: аще в теле, или кроме тела, не вем: бог весть:
4 яко восхищен бысть в рай, и слыша неизреченны глаголы, ихже не леть есть человеку глаголати.
5 о таковем похвалюся: о себе же не похвалюся, токмо о немощех моих.
6 Аще бо восхощу похвалитися, не буду безумен, истину бо реку: щажду же, да не (како) кто вознепщуетъ о мне паче, еже видит мя, или слышитъ что от мене.
7 И за премногая откровения да не превозношуся, дадеся ми пакостник плоти, аггел сатанин, да ми пакости деет, да не превозношуся.
8 о сем трикраты господа молих, да отступитъ от мене,
9 и рече ми: довлеет ти благодать моя: сила бо моя в немощи совершается. Сладце убо похвалюся паче в немощех моих, да вселится в мя сила христова.
10 (Зачало 195) Темже благоволю в немощех, въ досаждениих, в бедах, во изгнаниих, в теснотахъ по христе: егда бо немощствую, тогда силенъ есмь.
11 Бых несмыслен хваляся: вы мя понудисте. Аз бо должен бех от вас хвалимь бывати: ничимже бо лишихся первейших апостол, аще и ничтоже есмь:
12 знамения бо апостолова содеяшася в вас во всяцем терпении, в знамениих и чудесехъ и силах.
13 Что бо есть, егоже лишистеся паче прочихъ церквей, разве точию яко аз сам не стужихъ вамъ? Дадите ми неправду сию.
14 Се третие готов есмь приити к вам, и не стужу вам: не ищу бо ваших, но вас. Не должна бо суть чада родителем снискати имения, но родителе чадом.
15 Аз же в сладость иждиву и иждивен буду по душах ваших, аще и излишше вас любя, менше любимь есмь.
16 Буди же, аз не отягчих вас, но коваренъ сый, лестию вас приях.
17 еда коим от посланных к вам лихоимствовахъ васъ?
18 умолих тита, и с ним послах брата: еда лихоимствова чим вас титъ? не темже ли духом ходихома? не темиже ли стопами?
19 Паки ли мните, яко ответ вам творимъ? Пред богом, о христе глаголем: вся же, возлюбленнии, о вашем созидании и утверждении.
20 (Зачало 196) Боюся же, еда како пришед, не яцех же хощу, обрящу вас, и аз обрящуся вам, якова же не хощете: да не како (будутъ) рвения, зависти, ярости, рети, клеветы, шептания, кичения, нестроения:
21 да не паки пришедша мя смирит бог мой у вас, и восплачуся многих прежде согрешшихъ и не покаявшихся о нечистоте и блужении и студоложствии, яже содеяша.

 

Глава 13.

1 Третицею се гряду к вам: при устех двою или триех свидетелей станет всяк глагол.
2 Прежде рех и предглаголю, яко у васъ быв второе, и отсутствуя ныне пишу прежде согрешившим и прочим всем, яко аще прииду паки, не пощажду:
3 (Зачало 197) понеже искушения ищете глаголющаго во мне христа, иже в вас не изнемогает, но может в вас:
4 ибо аще и распят бысть от немощи, но живъ есть от силы божия: ибо и мы немощствуемъ в нем, но живи будем с ним от силы божия в вас:
5 себе искушайте, аще есте в вере: себе искушайте. Или не знаете себе, яко иисусъ христос в вас есть? Разве точию чим неискусни есте.
6 уповаю же, яко разумети имате, яко мы несмы неискусни.
7 Молимся же к богу, не сотворити вам ни единаго зла, не яко да мы искусни явимся, но да вы доброе сотворите, мы же яко неискусни будем.
8 Ничтоже бо можем на истину, но по истине.
9 Радуемся бо, егда мы немощствуем, вы же сильни бываете: о сем же и молимся, о вашемъ совершении.
10 Сего ради не сый у вас сия пишу, да не пришед безщадно сотворю по власти, юже господь дал ми есть в создание, а не на разорение.
11 Прочее же, братие, радуйтеся, совершайтеся, утешайтеся, тожде мудрствуйте, мир имейте. И бог любве и мира будет с вами.
12 Целуйте друг друга лобзанием святым. Целуютъ вы святии вси.
13 благодать господа нашего иисуса христа, и любы бога и отца, и общение святаго духа со всеми вами. Аминь.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы