Акафист преподобной Ирине Хрисовалантской

Акафист преподобной Ирине Хрисовалантской

Тропарь, глас 5

Царства земнаго древле не стяжавшую неувядаемым венцем венча тя во Царствии Своем Христос, Емуже всем сердцем и душею твоею прилепилася еси, преподобная мати Ирино, Хрисовалантская славо, нам же прибежище и помощь.

Кондак, глас 8

Яко чудес источник воистину многотекущий, явилася еси, преподобная мати Ирино: в чине бо ангельстем Господеви послужила еси и ныне с Небесными Силами Господа восхваляеши; темже вопием ти: в союзе мира сохрани нас, взывающих тебе: радуйся, мати равноангельная.

Кондак 1

Избранной угоднице Христовой и предивной чудотворице Ирине похвальное пение приносим. Ты же, яко имущая велие дерзновение ко Господу, молися о нас, с любовию тебе зовущих: Радуйся, преподобная мати Ирино, молитвеннице о душах наших.

Икос 1

Ангелом уподобилася еси житием твоим, преподобная Ирино, от младых бо лет чистоту душевную и телесную сохранила еси, Жениху Небесному с любовию последовав. Ныне же на небеси со святыми девами Ему предстоиши, воспевая хвалебную песнь. Услыши убо, преславная, наша пения похвальная сия:

Радуйся, благочестивых родителей чадо благословенное.

Радуйся, в Церкви Христовой прославленная.

Радуйся, с Женихом Нетленным обручившаяся.

Радуйся, Промыслом Его от брака земнаго уклонившаяся.

Радуйся, Ангелом чистотою подражавшая.

Радуйся, кротость и смирение стяжавшая.

Радуйся, от юности Богом предъизбранная.

Радуйся, к иноческому житию призванная.

Радуйся, преподобная мати Ирино, молитвеннице о душах наших.

Кондак 2

Видя святый Иоанникий девственную чистоту души твоея, предрече ти, богоблаженная Ирино, во обители Хрисоваланту трудами и подвигами своими подвизатися, в нейже многия души ко Господу приведеши, вопиющи Богу: Аллилуиа.

Икос 2

Разум небесный стяжавши, все имение твое нищим раздала еси и, на путь иноческаго жития возшедши, за Христом усердно потекла еси. Темже и нас в добродетельнем житии укрепи, зовущих ти:

Радуйся, ангельский нрав имевшая.

Радуйся, всю себе в руце Божии предавшая.

Радуйся, яко красотою душевною и телесною многия удивила еси.

Радуйся, яко евангельским мудрым девам уподобилася еси.

Радуйся, земным благам небесныя предпочетшая.

Радуйся, теми же Царствие Небесное себе стяжавшая.

Радуйся, Жениха Небеснаго верная последовательнице.

Радуйся, угодников Божиих ревностная почитательнице.

Радуйся, преподобная мати Ирино, молитвеннице о душах наших.

Кондак 3

Сила Вышняго укрепляше тя, достоблаженная Ирино, егда подвиг тяжкий на рамена своя подъяла еси — с воздетыми рукама к небу дни и нощи в молитве пребывати, воспевая Богу: Аллилуиа.

Икос 3

Имущи, святая Ирино, свыше данную тебе премудрость, на демона небоязненно ополчилася еси, тщащагося тя от пути спасительнаго отвратити; обаче он ничтоже успе, и побежден быв тобою крестным знамением и молитвою, посрамлен отъиде. Мы же, силе духа твоего удивляяся, умиленно поем ти:

Радуйся, помощию Божиею врага победившая.

Радуйся, упование свое на Господа возложившая.

Радуйся, кротостию и смирением Жениху Небесному уподобившаяся.

Радуйся, драгим сосудом Духа Святаго соделавшаяся.

Радуйся, козней бесовских не убоявшаяся.

Радуйся, замыслы демонския разсеявшая.

Радуйся, постом и молитвою плоть твою духови покорившая.

Радуйся, иноческими подвиги Ангелы и человеки удивившая.

Радуйся, преподобная мати Ирино, молитвеннице о душах наших.

Кондак 4

Бурю ярости паки воздвиже на храм души твоея враг рода человеческаго, святая Ирино, обаче тщетно труждашеся, не возмогше того поколебати: основан бо бе на твердом веры Христовы камени, на немже ты неподвижно стоящи, воспевала еси укрепляющему тя Христу Богу песнь: Аллилуиа.

Икос 4

Слышав тебе Господь Вседержитель, слезное моление приносящую, еже от нечистых помыслов тя свободити, сиянием небесным озари тя, блаженная Ирино, благодатныя дары низпосылая – духи нечистыя отганяти и силу вражию сокрушати. Сего ради и мы, слышаще, яко посрамися диавол, от младыя девы побеждаем, вопием ти сице:

Радуйся, благодати Божия причастнице.

Радуйся, козней диавольских победительнице.

Радуйся, во дни и в нощи к стопам Христовым повергавшаяся.

Радуйся, плоти своея в подвизех и трудех не щадившая.

Радуйся, смирением духа дерзновение ко Господу и Его Пречистей Матери приобретшая.

Радуйся, небесныя Ангелы покровители имевшая.

Радуйся, яко Дух Святый в тебе изобильно пребываше.

Радуйся, яко Сам Христос стопы твоя ко спасению направляше.

Радуйся, преподобная мати Ирино, молитвеннице о душах наших.

Кондак 5

Божественною благодатию осененная и от святаго патриарха Мефодия исповедника во игумению обители Хрисоваланту поставленная, мудро сестрами ея управляла еси, преподобная мати, добродетельному и богоугодному житию их научая и умудряющему тя Богу, таковую мудрость тебе дарующему, воспевая: Аллилуиа.

Икос 5

Видев подвиги твоя в молитве и посте совершаемыя, низпосла ти Подвигоположник Господь дар предвидения, да с материнскою любовию сестры обители твоея увещавати и на истинный путь наставляти возможеши. Мы же сему дивящеся, прославляем Господа, взывающе ти:

Радуйся, в Бозе непрестанно пребывавшая.

Радуйся, всенощными бдении обитель твою от бед ограждавшая.

Радуйся, яко вся тайная и сокровенная своя Господеви открывала еси.

Радуйся, яко дерзновение молитвенное к Нему стяжала еси.

Радуйся, яко всем прошением твоим Господь внимаше.

Радуйся, яко благоутробие Свое к тебе приклоняше.

Радуйся, заблуждшия к житию добродетельному наставляющая.

Радуйся, в Царствие Небесное путь указующая.

Радуйся, преподобная мати Ирино, молитвеннице о душах наших.

Кондак 6

Проповедуют о святости и праведности жития твоего, преподобная мати, христианския добродетели твоя, ихже в души своей возрастила еси и на пользу ближним своим употребила еси, да, наследуя Царствие Божие, благодарственно воспевают Творцу: Аллилуиа.

Икос 6

Возсия паче солнца богоугодное житие твое, всехвальная Ирино, еже бысть огнем палящим демону, погубити тя хотящему, обаче не могущему никоегоже зла тебе сотворити: быв же яростию и ненавистию снедаем, возжже покров на главе твоей. Ты же, в молитве пребывая, кознем бесовским не внимала еси: Ангела бо лучезарнаго зрела еси, венец нетленный на главу твою сплетающаго. Таковому молитвенному стоянию твоему дивящеся, восхваляем тя сице:

Радуйся, всемогущую благодать Божию в молитве показавшая.

Радуйся, помощию Всевышняго нападения вражия отразившая.

Радуйся, яко безсилие злаго духа обличила еси.

Радуйся, яко коварство его молитвами твоими посрамила еси.

Радуйся, ногама своима демона поправшая.

Радуйся, слуг бесовских от себе отгнавшая.

Радуйся, пламень нечестия вражия угасившая.

Радуйся, козни бесовския терпением своим разрушившая.

Радуйся, преподобная мати Ирино, молитвеннице о душах наших.

Кондак 7

Хотя Владыка и Господь спасти тобою многия жены во иночестве подвизающияся, посла тебе из рая три яблока чрез возлюбленнаго Апостола Своего Иоанна, да видяще чудо сие, вси, подвизающиися во благочестии, возжаждут райскаго наслаждения паче земнаго, восхваляя Бога песнию: Аллилуиа.

Икос 7

Новаго чуда тайнозрительницею была еси, святая Ирино: в день Страстей Христовых в видении дивном во олтари церковнем Господа, во образе блистающаго мужа, узрела еси, с Нимже и множество благолепных мужей, сладкозвучно воспевавших славу Его. Сему чудному видению дивящеся, воспеваем и мы хвалу Создателю нашему, тебе же взываем сице:

Радуйся, Самаго Господа чудесным образом видети удостоившаяся.

Радуйся, Ангелы, славословящия Его, лицезрети сподобившаяся.

Радуйся, благоухание дивное с небесе обонявшая.

Радуйся, ангельским пением услаждавшаяся.

Радуйся, сладчайший глас Спасителя слышавшая.

Радуйся, видением лика Его пресветлаго насладившаяся.

Радуйся, пророческим словесем Господним внимавшая.

Радуйся, их тайный смысл уразумевшая.

Радуйся, мати Ирино, молитвеннице о душах наших.

Кондак 8

Странно и страшно бысть грозное видение и повеление твое царю, егда, ему спящу, предстала еси пред ним, преподобная. Он же, в видении сем волю Божию уразумев, сродника твоего, неповинно им в темницу заключеннаго, от уз свободи, тебе же о спасении души своея возблагодари, Богу воспевая: Аллилуиа.

Икос 8

Всею душею Иисуса Сладчайшаго возлюбила еси, святая Ирино, и всем житием твоим Ему угодила еси. Сего ради яви тя Господь людем православным посреде бурь житейских миром их ограждающую и на путь спасительный, к Царствию Небесному ведущий, наставляющую. Буди и нам руководительницею к жизни вечней, вопиющим ти таковая:

Радуйся, страннице, горняго отечества взыскавшая.

Радуйся, лицезрети тамо Господа вожделевшая.

Радуйся, бедствующим скорая помощнице.

Радуйся, призывающим тя усердная заступнице.

Радуйся, неверныя на путь спасения наставившая.

Радуйся, грешныя к покаянию подвигшая.

Радуйся, милость от Бога всем верным приносящая.

Радуйся, прощения грехов наших у Господа просящая.

Радуйся, преподобная мати Ирино, молитвеннице о душах наших.

Кондак 9

Всякое естество человеческое и ангельское удивися, мати Ирино, сиянию в тебе благодати Божия и добродетелей богатству, имиже преукрашена была еси яко цветами благоуханными. Темже и сподобилася еси на небеси воспевати со Ангельскими чинми песнь хвалебную: Аллилуиа.

Икос 9

Ветии многовещаннии не возмогут по достоянию восхвалити подвиги и чудеса твоя, яже сотворила еси на земли, преподобная Ирино: нощному бдению бывшу, кипариси главы своя тебе преклоняху, молениим твоим внимающе, егда ты от земли на воздусе возносима невидимою силою была еси. Таковому чудеси дивящеся, с любовию приносим ти хваления сия:

Радуйся, добродетельми многими просиявшая.

Радуйся, вся тленная в житии твоем отвергшая.

Радуйся, уставов иноческаго жития ревнительнице.

Радуйся, ревностная их исполнительнице.

Радуйся, молитвеннице усердная.

Радуйся, чудотворице предивная.

Радуйся, сущим в бедах скорая помощнице.

Радуйся, обидящих милостивая наказательнице.

Радуйся, преподобная мати Ирино, молитвеннице о душах наших.

Кондак 10

Спасти хотящи душу твою и ближних твоих, поревновала еси, святая Ирино, в житии сем о славе Божией и подъяла еси многотрудный подвиг иноческаго жития, темже на небеси в лице преподобных ныне пребываеши, идеже со всеми святыми молиши о нас Господа, вопиющих Ему: Аллилуиа.

Икос 10

Стеною молитв твоих сохраняеши мир христианский, преподобная мати, от всякия беды и напасти; темже и нам, с любовию к тебе припадающим, буди покров и ограждение от враг видимых и невидимых, взывающим ти сице:

Радуйся, неоскудеваемый источниче Божия благословения.

Радуйся, лучу пресветлая истиннаго просвещения.

Радуйся, небесными ароматы благоухающая.

Радуйся, венцем нетленным украшенная.

Радуйся, на подвиги духовныя нас воздвизающая.

Радуйся, от сетей вражиих нас избавляющая.

Радуйся, всем верным крепкое прибежище.

Радуйся, христианом твердое заступление.

Радуйся, преподобная мати Ирино, молитвеннице о душах наших.

Кондак 11

Пение умиленное приносим ти, пречудная Ирино, воспевающе многая и предивная чудеса твоя, ты же милостивно с небеси на ны воззри и моления наша ко Престолу Божию вознеси, с любовию поющих Ему: Аллилуиа.

Икос 11

Светозарною звездою, светом истиннаго богопознания озаряющею всех хотящих спастися и жизнь вечную наследовати, явилася еси, мати Ирино, аще же и плотию своею от нас преставилася еси, обаче духом твоим присно с нами пребываеши. Сего ради, к чудотворней иконе твоей припадающе, прославляем тя хвалении сими:

Радуйся, небесная блага всем сердцем возлюбившая.

Радуйся, красная мира сего ни во чтоже вменившая.

Радуйся, преподобных матерей сподвижнице.

Радуйся, праведных жен сопричастнице.

Радуйся, дар прозорливости от Бога стяжавшая.

Радуйся, во спасение многих душ дар сей употребившая.

Радуйся, на брак Агнчий в светлей одежде вшедшая.

Радуйся, пред Престолом Пресвятыя Троицы хвалебную песнь воспевающая.

Радуйся, преподобная мати Ирино, молитвеннице о душах наших.

Кондак 12

Благодати и благих дел исполнена, течение земное совершивши, блаженную кончину от Господа восприяла еси, преподобная, Ангелы светлыми во обители райския препровождаема бывши. Ныне же Владыце, веселящися, предстоиши и за нас непрестанно молитвы Ему возносиши, прославляя Его ангельскою песнию: Аллилуиа.

Икос 12

Поюще Бога, дивнаго во святых Своих, ублажаем тя, преподобная мати Ирино, почитаем подвиги и труды твоя, восхваляем блаженную кончину твою и молим тя: простри с небесе руку помощи и нам, вопиющим ти:

Радуйся, горлице, в Иерусалим горний возлетевшая.

Радуйся, кадильнице, фимиам молитвы о нас к Богу приносящая.

Радуйся, дев христианских украшение.

Радуйся, жен и матерей преславное укрепление.

Радуйся, блаженства райскаго вкусившая.

Радуйся, в лице преподобных прославленная.

Радуйся, дивная всем верным помощнице.

Радуйся, всемощная о всех нас молитвеннице.

Радуйся, преподобная мати Ирино, молитвеннице о душах наших.

Кондак 13

О предивная и преславная чудотворице, преподобная мати Ирино, приими ныне малое сие моление наше и вознеси ко Христу Богу нашему, да ниспослет в души наша благодать Свою, грехи наша простит и всех нас помилует, да и мы сподобимся купно с тобою в селениих райских славити Святую Троицу, поюще: Аллилуиа.

(Этот кондак читается трижды, затем икос 1 и кондак 1)

Молитва

О равноангельная и всеславная Ирино, предстательнице наша милостивая! Призри с высоты небесныя на нас, любовию почитающих святую память твою и призывающих тя в помощь, вонми гласу моления нашего и умоли возлюбившаго тя Христа Бога, да милостив будет нам, просящим Его благостыню, да подаст нам оставление многих прегрешений наших, да укрепит нас благодатию Своею трезвенно и бодренно шествовати путем святых заповедей Его, христианскую же кончину жития нашего безболезненну, непостыдну, мирну и Божественных Таин причастну да дарует и сподобит нас вселитися во святыя блаженныя небесныя обители, идеже ты со всеми святыми выну радостно славословиши Единосущную Троицу: Отца и Сына и Святаго Духа. Аминь.

Вам понравилась молитва - оцените?



Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы