Псалом 135 — 151

Псалом 135.

Аллилуиа, 135.
1 Исповедайтеся господеви, яко благ: яко в век милость его.
2 Исповедайтеся богу богов: яко в век милость его.
3 Исповедайтеся господеви господей: яко в век милость его.
4 Сотворшему чудеса велия единому: яко в векъ милость его.
5 Сотворшему небеса разумом: яко в век милость его.
6 утвердившему землю на водах: яко в век милость его.
7 Сотворшему светила велия единому: яко в векъ милость его:
8 солнце во область дне: яко в век милость его:
9 луну и звезды во область нощи: яко в век милость его.
10 Поразившему египта с первенцы его: яко въ век милость его:
11 и изведшему израиля от среды их: яко в векъ милость его:
12 рукою крепкою и мышцею высокою: яко в век милость его.
13 Раздельшему чермное море в разделения: яко въ век милость его:
14 и проведшему израиля посреде его: яко в векъ милость его:
15 и истрясшему фараона и силу его в море чермное: яко в век милость его.
16 Проведшему люди своя в пустыни: яко в век милость его.
17 Поразившему цари велия: яко в век милость его.
18 И убившему цари крепкия: яко в век милость его:
19 сиона царя аморрейска: яко в век милость его:
20 и ога царя васанска: яко в век милость его.
21 И давшему землю их достояние: яко в век милость его:
22 достояние израилю рабу своему: яко в век милость его.
23 яко во смирении нашем помяну ны господь: яко в векъ милость его.
24 И избавил ны есть от врагов наших: яко въ век милость его:
25 даяй пищу всякой плоти: яко в век милость его.
26 Исповедайтеся богу небесному: яко в век милость его.

 

Псалом 136.

давиду иеремием, 136.
1 На реках вавилонских, тамо седохом и плакахом, внегда помянути нам сиона:
2 на вербиих посреде его обесихом органы наша.
3 яко тамо вопросиша ны пленшии нас о словесехъ песней, и ведшии нас о пении: воспойте нам от песней сионских.
4 Како воспоем песнь господню на земли чуждей?
5 Аще забуду тебе, иерусалиме, забвена буди десница моя.
6 Прильпни язык мой гортани моему, аще не помяну тебе, аще не предложу иерусалима, яко в начале веселия моего.
7 Помяни, господи, сыны едомския в день иерусалимль глаголющия: истощайте, истощайте до оснований его.
8 Дщи вавилоня окаянная, блажен, иже воздаст тебе воздаяние твое, еже воздала еси нам:
9 блажен, иже имет и разбиет младенцы твоя о камень.

 

Псалом 137.

псалом давиду, аггеа и захарии, 137.
1 Исповемся тебе, господи, всем сердцем моим, и предъ ангелы воспою тебе, яко услышал еси вся глаголы уст моих:
2 поклонюся ко храму святому твоему и исповемся имени твоему о милости твоей и истине твоей, яко возвеличилъ еси над всем имя твое святое.
3 В оньже аще день призову тя, скоро услыши мя: умножиши мя в души моей силою твоею.
4 Да исповедятся тебе, господи, вси царие земстии, яко услышаша вся глаголы уст твоих:
5 и да воспоют в путех господних, яко велия слава господня:
6 яко высок господь, и смиренныя призирает, и высокая издалеча весть.
7 Аще пойду посреде скорби, живиши мя: на гнев врагъ моих простерл еси руку твою, и спасе мя десница твоя.
8 господь воздаст за мя: господи, милость твоя во век: делъ руку твоею не презри.

 

Псалом 138.

В конец давиду, псалом захариин, в разсеянии, 138.
1 господи, искусил мя еси и познал мя еси: ты позналъ еси седание мое и востание мое.
2 Ты разумел еси помышления моя издалеча:
3 стезю мою и уже мое ты еси изследовал и вся пути моя провидел еси.
4 яко несть льсти в языце моем: се, господи, ты познал еси
5 вся последняя и древняя: ты создал еси мя и положил еси на мне руку твою.
6 удивися разум твой от мене, утвердися, не возмогу к нему.
7 Камо пойду от духа твоего? и от лица твоего камо бежу?
8 Аще взыду на небо, ты тамо еси: аще сниду во ад, тамо еси.
9 Аще возму криле мои рано и вселюся в последнихъ моря,
10 и тамо бо рука твоя наставит мя, и удержитъ мя десница твоя.
11 И рех: еда тма поперет мя? и нощь просвещение в сладости моей.
12 яко тма не помрачится от тебе, и нощь яко день просветится: яко тма ея, тако и свет ея.
13 яко ты создал стяжалъ еси утробы моя, восприял мя еси из чрева матере моея.
14 Исповемся тебе, яко страшно удивился еси: чудна дела твоя, и душа моя знает зело.
15 Не утаися кость моя от тебе, юже сотворилъ еси в тайне, и состав мой в преисподних земли.
16 Несоделанное мое видесте очи твои, и в книзе твоей вси напишутся: во днех созиждутся, и никтоже въ них.
17 Мне же зело честни быша друзи твои, боже, зело утвердишася владычествия их:
18 изочту их, и паче песка умножатся: востах, и еще есмь с тобою.
19 Аще избиеши грешники, боже: мужие кровей, уклонитеся от мене.
20 яко ревниви есте в помышлениих, приимут в суету грады твоя.
21 Не ненавидящия ли тя, господи, возненавидех, и о вразехъ твоих истаяхъ?
22 Совершенною ненавистию возненавидех я: во враги быша ми.
23 Искуси мя, боже, и увеждь сердце мое: истяжи мя и разумей стези моя:
24 и виждь, аще путь беззакония во мне, и настави мя на путь вечен.

 

Псалом 139.

В конец, псалом давиду, 139.
1 Изми мя, господи, от человека лукава, от мужа неправедна избави мя:
2 иже помыслиша неправду в сердцы, весь день ополчаху брани:
3 изостриша язык свой яко змиин: яд аспидовъ под устнами их.
4 Сохрани мя, господи, из руки грешничи, от человекъ неправедных изми мя, иже помыслиша запяти стопы моя.
5 Скрыша гордии сеть мне и ужы, препяша сеть ногама моима:
6 при стези соблазны положиша ми.
7 Рех господеви: бог мой еси ты, внуши, господи, гласъ моления моего.
8 господи, господи, сило спасния моего, осенил еси надъ главою моею в день брани.
9 Не предаждь мене, господи, от желания моего грешнику: помыслиша на мя, не остави мене, да не когда вознесутся.
10 Глава окружения их, труд устен их покрыетъ я.
11 Падут на них углия огненная, низложиши я во страстех, и не постоят.
12 Муж язычен не исправится на земли: мужа неправедна злая уловят во истление.
13 Познах, яко сотворит господь суд нищим и месть убогим.
14 обаче праведнии исповедятся имени твоему, и вселятся правии с лицем твоим.

 

Псалом 140.

псалом давиду, 140.
1 господи, воззвах к тебе, услыши мя: вонми гласу моления моего, внегда воззвати ми к тебе.
2 Да исправится молитва моя яко кадило пред тобою: воздеяние руку моею, жертва вечерняя.
3 Положи, господи, хранение устом моим и дверь ограждения о устнах моих.
4 Не уклони сердце мое в словеса лукавствия, непщевати вины о гресех с человеки делающими беззаконие: и не сочтуся со избранными их.
5 Накажет мя праведник милостию и обличит мя, елей же грешнаго да не намастит главы моея: яко еще и молитва моя во благоволениих их.
6 Пожерты быша при камени судии их: услышатся глаголи мои, яко возмогоша усладишася.
7 яко толща земли проседеся на земли, расточишася кости их при аде.
8 яко к тебе, господи, господи, очи мои: на тя уповах, не отими душу мою:
9 сохрани мя от сети, юже составиша ми, и от соблазнъ делающих беззаконие.
10 Падут во мрежу свою грешницы: един есм аз, дондеже прейду.

 

Псалом 141.

1 Разума давиду, внегда быти ему в вертепе молящемуся, 141.
2 Гласом моим ко господу воззвах, гласом моим ко господу помолихся.
3 Пролию пред ним моление мое, печаль мою пред нимъ возвещу.
4 Внегда изчезати от мене духу моему, и ты позналъ еси стези моя: на пути сем, по немуже хождах, скрыша сеть мне.
5 Сматрях одесную и возглядах, и не бе знаяй мене: погибе бегство от мене, и несть взыскаяй душу мою.
6 Воззвах к тебе, господи, рех: ты еси упование мое, часть моя еси на земли живых.
7 Вонми молению моему, яко смирихся зело: избави мя от гонящих мя, яко укрепишася паче мене.
8 Изведи из темницы душу мою, исповедатися имени твоему: мене ждут праведницы, дондеже воздаси мне.

 

Псалом 142.

псалом давиду, егда гоняше его авессалом сынъ его, 142.
1 господи, услыши молитву мою, внуши моление мое во истине твоей, услыши мя в правде твоей:
2 и не вниди в суд с рабом твоим, яко не оправдится пред тобою всяк живый.
3 яко погна враг душу мою: смирил есть в землю живот мой: посадил мя есть в темных, яко мертвыя века.
4 И уны во мне дух мой, во мне смятеся сердце мое.
5 Помянух дни древния, поучихся во всех делехъ твоих, в творениих руку твоею поучахся.
6 Воздех к тебе руце мои: душа моя яко земля безводная тебе.
7 Скоро услыши мя, господи, изчезе дух мой: не отврати лица твоего от мене, и уподоблюся низходящим въ ров.
8 Слышану сотвори мне заутра милость твою, яко на тя уповах: скажи мне, господи, путь, в оньже пойду, яко к тебе взях душу мою.
9 Изми мя от враг моих, господи, к тебе прибегох.
10 Научи мя творити волю твою, яко ты еси бог мой: дух твой благий наставит мя на землю праву.
11 Имене твоего ради, господи, живиши мя правдою твоею: изведеши от печали душу мою:
12 и милостию твоею потребиши враги моя и погубиши вся стужающия души моей: яко аз раб твой есмь.

 

Псалом 143.

псалом давиду, к голиафу, 143.
1 благословен господь бог мой, научаяй руце мои на ополчение, персты моя на брань.
2 милость моя и прибежище мое, заступник мой и избавитель мой, защититель мой, и на него уповах: повинуяй люди моя под мя.
3 господи, что есть человек, яко познался еси ему? или сын человечь, яко вменяеши его?
4 Человек суете уподобися: дние его яко сень преходят.
5 господи, преклони небеса, и сниди: коснися горам, и воздымятся:
6 блесни молнию, и разженеши я: посли стрелы твоя, и смятеши я.
7 Посли руку твою с высоты, изми мя и избави мя от вод многих, из руки сынов чуждих,
8 ихже уста глаголаша суету, и десница их десница неправды.
9 боже, песнь нову воспою тебе, во псалтири десятоструннемъ пою тебе:
10 дающему спасние царем, избавляющему давида раба своего от меча люта.
11 Избави мя и изми мя из руки сынов чуждих, ихже уста глаголаша суету, и десница их десница неправды:
12 ихже сынове их яко новосаждения водруженая в юности своей, дщери их удобрены, преукрашены яко подобие храма:
13 хранилища их исполнена, отрыгающая от сего въ сие: овцы их многоплодны, множащияся во исходищихъ своих: волове их толсти:
14 несть падения оплоту, ниже прохода, ниже вопля въ стогнах их.
15 ублажиша люди, имже сия суть: блажени людие, имже господь бог их.

 

Псалом 144.

Хвала давиду, 144.
1 Вознесу тя, боже мой, царю мой, и благословлю имя твое в век и в век века.
2 На всяк день благословлю тя, и восхвалю имя твое в век и в век века.
3 Велий господь и хвален зело, и величию его несть конца.
4 Род и род восхвалят дела твоя и силу твою возвестят:
5 великолепие славы святыни твоея возглаголют и чудеса твоя поведят:
6 и силу страшных твоих рекут и величие твое поведят:
7 память множества благости твоея отрыгнут и правдою твоею возрадуются.
8 Щедр и милостив господь, долготерпелив и многомилостив.
9 благ господь всяческим, и щедроты его на всехъ делех его.
10 Да исповедятся тебе, господи, вся дела твоя, и преподобнии твои да благословят тя:
11 славу царствия твоего рекут и силу твою возглаголют,
12 сказати сыновом человеческим силу твою и славу великолепия царствия твоего.
13 царство твое царство всех веков, и владычество твое во всяком роде и роде. Верен господь во всех словесехъ своих и преподобен во всех делех своих.
14 утверждает господь вся низпадающия и возставляетъ вся низверженныя.
15 очи всех на тя уповают, и ты даеши имъ пищу во благовремении:
16 отверзаеши ты руку твою и исполняеши всякое животно благоволения.
17 праведн господь во всех путех своих и преподобен во всех делех своих.
18 Близ господь всем призывающим его, всем призывающимъ его во истине:
19 волю боящихся его сотворит, и молитву их услышит, и спасет я.
20 Хранит господь вся любящия его, и вся грешники потребит.
21 Хвалу господню возглаголют уста моя: и да благословитъ всяка плоть имя святое его в век и в век века.

 

Псалом 145.

Аллилуиа, аггеа и захарии, 145.
1 Хвали, душе моя, господа:
2 восхвалю господа в животе моем, пою богу моему, дондеже есмь.
3 Не надейтеся на князи, на сыны человеческия, в нихже несть спасния.
4 Изыдет дух его, и возвратится в землю свою: в той день погибнут вся помышления его.
5 блажен, емуже бог иаковль помощник его, упование его на господа бога своего,
6 сотворшаго небо и землю, море, и вся, яже в них: хранящаго истину в век,
7 творящаго суд обидимым, дающаго пищу алчущим. господь решит окованныя:
8 господь умудряет слепцы: господь возводит низверженныя: господь любит праведники.
9 господь хранит пришелцы, сира и вдову приимет, и путь грешных погубит.
10 Воцарится господь во век, бог твой, сионе, в родъ и род.

 

Псалом 146.

Аллилуиа, 146.
1 Хвалите господа, яко благ псалом: богови нашему да усладится хваление.
2 Зиждай иерусалима господь: разсеяния израилева соберет:
3 изцеляяй сокрушенныя сердцем и обязуяй сокрушения их:
4 изчитаяй множество звезд, и всем им имена нарицаяй.
5 Велий господь наш, и велия крепость его, и разума его несть числа.
6 Приемляй кроткия господь, смиряяй же грешники до земли.
7 Начните господеви во исповедании, пойте богови нашему в гуслех:
8 одевающему небо облаки, уготовляющему земли дождь: прозябающему на горах траву и злак на службу человеком:
9 дающему скотом пищу их, и птенцем врановым призывающимъ его.
10 Не в силе констей восхощет, ниже в лыстех мужескихъ благоволит:
11 благоволит господь в боящихся его и во уповающихъ на милость его.

 

Псалом 147.

Аллилуиа, аггеа и захарии, 147.
1 Похвали, иерусалиме, господа, хвали бога твоего, сионе:
2 яко укрепи вереи врат твоих, благослови сыны твоя в тебе.
3 Полагаяй пределы твоя мир, и тука пшенична насыщаяй тя:
4 посылаяй слово свое земли, до скорости течет слово его,
5 дающаго снег свой яко волну, мглу яко пепелъ посыпающаго,
6 метающаго голоть свой яко хлебы: противу лица мраза его кто постоитъ?
7 Послет слово свое, и истает я: дхнет дух его, и потекут воды.
8 Возвещаяй слово свое иакову, оправдания и судбы своя израилеви:
9 не сотвори тако всякому языку, и судбы своя не яви им.

 

Псалом 148.

Аллилуиа, аггеа и захарии, 148.
1 Хвалите господа с небес, хвалите его в вышних.
2 Хвалите его вси ангели его: хвалите его, вся силы его.
3 Хвалите его, солнце и луна: хвалите его вся звезды и свет.
4 Хвалите его, небеса небес и вода, яже превыше небес.
5 Да восхвалят имя господне: яко той рече, и быша: той повеле, и создашася.
6 Постави я в век и в век века: повеление положи, и не мимо идет.
7 Хвалите господа от земли, змиеве и вся бездны:
8 огнь, град, снег, голоть, дух бурен, творящая слово его:
9 горы и вси холми, древа плодоносна и вси кедри:
10 зверие и вси скоти, гади и птицы пернаты:
11 царие земстии и вси людие, князи и вси судии земстии:
12 юноши и девы, старцы с юнотами.
13 Да восхвалят имя господне: яко вознесеся имя того единаго, исповедание его на земли и на небеси.
14 И вознесет рог людий своих: песнь всем преподобнымъ его, сыновом израилевым, людем приближающимся ему.

 

Псалом 149.

Аллилуиа, 149.
1 Воспойте господеви песнь нову: хваление его в церкви преподобных.
2 Да возвеселится израиль о сотворшем его, и сынове сиони возрадуются о цари своем.
3 Да восхвалят имя его в лице, в тимпане и псалтири да поют ему.
4 яко благоволит господь в людех своих, и вознесетъ кроткия во спасние.
5 Восхвалятся преподобнии во славе и возрадуются на ложахъ своих.
6 Возношения божия в гортани их, и мечи обоюду остры в руках их:
7 сотворити отмщение во языцех, обличения в людех:
8 связати цари их путы, и славныя их ручными оковы железными:
9 сотворити в них суд написан. Слава сия будет всемъ преподобным его.

 

Псалом 150.

Аллилуиа, 150.
1 Хвалите бога во святых его, хвалите его во утвержении силы его:
2 хвалите его на силах в силахъ его, хвалите его по множеству величествия его:
3 хвалите его во гласе трубнем, хвалите его во псалтири и гуслех:
4 хвалите его в тимпане и лице, хвалите его во струнах и органе:
5 хвалите его в кимвалех доброгласных, хвалите его в кимвалех восклицания.
6 Всякое дыхание да хвалит господа.

 

Псалом 151.

Сей псалом особь писан, давидов, и вне числа 150 псалмов, внегда единоборствоваше на голиафа.
Мал бех в братии моей и юнший в дому отца моего: пасох овцы отца моего. Руце мои сотвористе орган, и персты мои составиша псалтирь. И кто возвеститъ господеви моему? Сам господь, сам услышит: сам посла ангела своего, и взят мя от овец отца моего, и помаза мя елеем помазания своего. Братия моя добри и велицы: и не благоволи в них господь. Изыдох в сретение иноплеменнику, и проклят мя идолы своими. Аз же исторгнувъ мечь от него, обезглавих его и отях поношение от сынов израилевых.

Вам понравилась молитва - оцените?

Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры

Рекомендуем прочитать Молитвы