Ветхий Завет — Книга Иисуса Навина

Книга иисуса навина

Глава 1.

1 И бысть по скончании моисеа раба господня, и рече господь иисусу сыну навину, служителю моисеову, глаголя:
2 моисей раб мой скончася: ныне убо воставъ прейди иордан ты и вси людие сии в землю, юже аз даю им:
3 всякое место, по немуже прейдете стопою ногъ ваших, вам дам е, якоже глаголах моисею:
4 пустыню и антиливан сей даже до реки великия реки евфрата, всю землю ефеоню, и даже до моря последняго: от запада солнца будутъ пределы ваши:
5 не супротивится человек пред вами во вся дни живота твоего, и якоже бех с моисеом, тако буду и с тобою: и не оставлю тебе, ниже презрю тя:
6 крепися и мужайся: ты бо разделиши людемъ сим землю, еюже кляхся отцем вашимъ дати им:
7 крепися убо, и мужайся зело, хранити и творити, якоже тебе заповеда моисей рабъ мой, и не уклонися от них ни на десно, ни на лево, да смыслиши во всех, яже твориши:
8 и да не отступит книга закона сего от устъ твоих, и да поучаешися в ней день и нощь, да уразумееши творити вся писанная: тогда благоуспееши и исправиши пути твоя, и тогда уразумееши:
9 се, заповедаю тебе: крепися и мужайся, ни ужасайся, ниже убойся: яко с тобою господь бог твой во всех, аможе аще пойдеши.
10 И заповеда иисус книгочиям людским, глаголя:
11 внидите посреде полка людий и заповедайте людем, глаголюще: уготовайте брашно, яко еще три дни, и вы прейдете иордан сей, вшедше прияти землю, юже господь бог отецъ ваших дает вам в причастие.
12 И рувиму и гаду и полуплемени манассиину рече иисус:
13 помяните слово, еже заповеда вам моисей раб господень, глаголя: господь бог ваш упокои вас и даде вам землю сию:
14 жены ваши и дети ваши и скоти ваши да живут на земли, юже даде вам моисей у иордана: вы же прейдете вооружени пред братиею вашею, всяк крепок, и споборствуете им,
15 дондеже упокоит господь бог ваш братию вашу, якоже и вас, и наследят и сии землю, юже господь бог ваш дает им: и отидете кийждо в наследие свое, и наследите е, еже даде вам моисей об ону страну иордана от востоков солнца.
16 И отвещавше иисусу, реша: вся, елика заповеси нам, сотворим, и во всякое место, аможе послеши нас, пойдем:
17 по всем, елика слушахом моисеа, тебе послушаем: токмо да будет господь бог наш съ тобою, якоже бе с моисеем:
18 человек же, иже аще не покорится тебе и иже не послушает словес твоих, якоже заповеси ему, да умрет: точию крепися и мужайся.

 

Глава 2.

1 И посла иисус сын навин из саттина два юноши соглядати втай, глаголя: взыдите и видите землю и иерихон. И шедша два юноши внидоста во иерихон и внидоста в дом жены блудницы, ейже имя раав: и витаста тамо.
2 И поведаша царю иерихонскому, глаголюще: се, мужие внидоша семо (в сию нощь) от сыновъ израилевых соглядати землю.
3 И посла царь иерихонский и рече к рааве, глаголя: изведи мужы вшедшия в дом твой нощию: соглядати бо землю приидоша.
4 И поемши жена два мужа, сокры их: и рече им, глаголющи: приидоша ко мне мужие, но не вем откуду быша:
5 егда же врата затворяху в сумраки, и мужие изыдоша: не вем камо поидоша: пожените скоро вслед их, аще постигнете их.
6 она же возведе я на храмину и сокры я в паздере льняне собранем у нея на храмине.
7 И мужие гнаша вслед их путем ко иордану к преходом, и врата затворены быша.
8 И бысть егда изыдоша женущии вследъ их, и сии прежде неже уснути им, и она взыде к ним на храмину и рече к ним:
9 вем, яко предаде господь землю (сию) вам: нападе бо страх ваш на ны, и ужасошася вси обитающии на земли от лица вашего:
10 слышахом бо, яко изсуши господь бог море чермное пред лицем вашим, егда исхождасте из египта, и елика сотвористе двоимъ царем аморрейским, иже быша об ону страну иордана, сиону и огу, ихже потребисте:
11 и слышавше мы ужасохомся в сердцы нашем, и не ста ктому дух ни во единем от насъ от лица вашего: яко господь бог ваш, бог на небеси горе и на земли доле:
12 и ныне кленитеся мне господем богом (вашимъ), яко аз творю милость вам, да сотворите и вы милость в дому отца моего, и дадите ми знамение истинно:
13 и оживите дом отца моего, и матерь мою, и братию мою, и сестры моя, и вся, елика суть им, и измите души наша от смерти.
14 И рекоша ей мужие: душа наша вместо вас на смерть, аще ныне не объявиши нас. она же рече: и будет егда предаст господь вам град (сей), сотворите мне милость и истину.
15 И свеси их на верве окном: яко дом ея при стене, и при стене сия живяше:
16 и рече им: отидите в гору, да не срящутъ вас гонящии, и скрыйтеся тамо три дни, дондеже возвратятся гонящии вслед вас: и по сихъ отидете в путь ваш.
17 И реша к ней мужие: неповинни есмы клятве сей твоей, еюже закляла еси нас:
18 се, мы входим в часть града, и поставиши знамение, вервь червлену, сию да обяжеши у окна, имже спустила еси нас: отца же твоего и матерь твою, и братию твою и весь дом отца твоего да собереши к себе в домъ твой:
19 и будет всяк, иже аще изыдет изъ дверий дому твоего вон, сам себе повиненъ будет, мы же неповинни (будемъ) клятве твоей сей: и елицы аще с тобою будут в дому твоем, мы будем повинни, аще рука прикоснется их:
20 аще же кто нас обидит, или открыетъ словеса наша сия, будем неповинни клятве твоей сей, еюже закляла еси нас.
21 И рече им: по словеси вашему тако да будет. И отпусти их, и отидоша: и привяза вервь червлену у окна.
22 И отидоша, и проидоша в гору, и пребыша тамо три дни, дондеже возвратишася гнавшии. И искаша гонящии по всем путем, и не обретоша.
23 И возвратистася два юноши и снидоста съ горы: и преидоста (иорданъ) ко иисусу сыну навину, и поведаста ему вся случившаяся има:
24 и реста ко иисусу: яко предаде господь богъ наш в руце наши всю землю, и убояшася вси живущии на земли той от нас.

 

Глава 3.

1 И воста заутра иисус, и воздвигошася изъ саттина, и приидоша до иордана той и вси сынове израилевы, и сташа тамо прежде неже прейти.
2 И бысть по триех днех, проидоша книгочия чрез полк,
3 и заповедаша людем, глаголюще: егда узрите кивот завета господа бога нашего, и жерцы наша, и левиты воздвизающия его, да воздвигнетеся и вы от мест ваших и пойдете вслед его:
4 но подалее да будет между вами и оным, елико две тысящи лакот станете: не приближитеся к нему, да увесте путь, по немуже пойдете: не ходисте бо путем тем ни вчера, ни третияго дне.
5 И рече иисус к людем: очиститеся наутрие, яко заутра сотворит в вас господь чудная.
6 И рече иисус к жерцем: воздвигните кивотъ завета господня и предыдите пред людьми. И взяша жерцы кивот завета господня и идоша предъ людьми.
7 И рече господь ко иисусу: в сей день начинаю возвышати тя пред всеми сынми израилевыми, да уведят, якоже бех с моисеом, тако буду и с тобою:
8 и ныне заповеждь жерцем воздвизающим кивотъ завета, глаголя: егда внидете на часть воды иордана, и во иордане станете.
9 И рече иисус сыном израилевым: приступите семо, и слышите слово господа бога вашего:
10 в сих увесте, яко господь живяй в васъ и потребляяй потребит от лица вашего хананеа и хеттеа, и ферезеа и евеа, и гергесеа и аморреа и иевусеа:
11 се, кивот завета господа всея земли преходитъ иордан:
12 изберите себе дванадесять мужей от сыновъ израилевых, единаго от коегождо племене,
13 и будет егда почиют нози жерцев воздвизающихъ кивот завета господа всея земли в воде иордана, вода иорданова оскудеет, вода же низтекущая станет.
14 И бысть егда воздвигнушася людие от кущъ своих прейти иордан, жерцы же воздвигоша кивот завета господня пред людьми:
15 егда же внидоша жерцы воздвижуще кивотъ завета господня во иордан, и нози жерцевъ воздвизающих кивот завета господня омочишася в части воды иордана, иордан же наполняшеся во вся краи своя, якоже во дни жатвы пшеницы:
16 и сташа воды текущия свыше, ста огустение едино отлучившееся далече зело зело от адами града даже до страны кариафиарима: низтекущая же низтече в море аравско, в море сланое, дондеже до конца оскуде.
17 И людие стояху прямо иерихону. И сташа жерцы воздвизающии кивот завета господня на сусе посреде иордана: и вси сынове израилевы прехождаху по суху, дондеже скончаша вси людие преходяще иордан.

 

Глава 4.

1 И егда скончаша вси людие преходяще иордан, и рече господь к иисусу, глаголя:
2 поими дванадесять мужей от людий, мужа единаго от коегождо племене,
3 повели им, глаголя: возмите от среды иордана, идеже стояша нози жречестии, готовых дванадесять каменей, и изнесше я с собою, положите въ полце вашем, идеже станете тамо в нощи.
4 И призвав иисус дванадесять мужей славныхъ от сынов израилевых, единаго от коегождо племене, рече им:
5 идите предо мною пред лицем господним в средину иордана: и взем оттуду кийждо камень единъ да возложит на рамена своя, по числу племенъ (сыновъ) израилевых:
6 да будут вам сии в знамение посреде васъ лежаще всегда, да егда вопросит тебе утро сын твой, глаголя: что суть камение сие вамъ?
7 и ты возвестиши сыну твоему, глаголя: яко оскуде иордан река от лица кивота завета господа всея земли, егда прехождаше его, и изсяче вода иорданова: и будут вам камение сие в память сынов израилевых даже до века.
8 И сотвориша тако сынове израилевы, якоже заповеда господь иисусу: и вземше дванадесять каменей от среды иордана, якоже заповеда господь иисусу в скончании прехождения сынов израилевых, и принесоша их с собою в полк, и положиша их тамо.
9 Постави же иисус и другия дванадесять каменей в самем иордане на месте, идеже стояху нози жерцев воздвизающих кивот завета господня, и суть тамо даже до сего дне.
10 Стояху же жерцы воздвизающии кивот завета господня во иордане, дондеже сконча иисус вся, елика заповеда господь иисусу поведати людем, по всем, елика заповеда моисей иисусу: и потщашася людие, и преидоша.
11 И бысть егда скончаша вси людие преходити (иорданъ), прейде и кивот завета господня, и камение Вместо [камение] во иных греческихъ [жерцы]. пред ними.
12 И преидоша сынове рувимли и сынове гадовы и пол племене манассиина устроены предъ сынми израилевы, якоже заповеда им моисей:
13 четыредесять тысящ вооружени на рать преидоша пред господем на брань ко граду иерихону.
14 В той день возвеличи господь иисуса предъ всем родом израилевым: и бояхуся его, якоже бояхуся моисеа, елико время поживе.
15 И рече господь ко иисусу, глаголя:
16 заповеждь жерцем, воздвизающим кивотъ завета свидения, изступити из иордана.
17 И заповеда иисус жерцем, глаголя: изыдите из иордана.
18 И бысть егда изыдоша жерцы воздвизающии кивот завета господня от среды иордана, и поставиша ноги на сусе, и устремися вода иорданова на место и пойде якоже вчера и третияго дне по всему краю.
19 И людие взыдоша от иордана в десятый день перваго месяца: и ополчишася сынове израилевы в галгалех на стране, яже на восток солнца от иерихона.
20 И дванадесять камения сия, яже взя от иордана, постави иисус в галгалех, и рече к сыном израилевым, глаголя:
21 егда вопросят вас сынове ваши, глаголюще: что суть камение сие?
22 возвестите сыном вашим: яко по суху прейде израиль иордан сей,
23 изсушившу господу богу вашему воду иорданю пред ними, дондеже преидоша, якоже сотвори господь бог ваш чермному морю, еже изсуши господь бог ваш пред вами, дондеже преидохом:
24 да уведят вси языцы земнии, яко рука господня крепка есть, и вы да чтете господа бога вашего во всякое время.

 

Глава 5.

1 И бысть егда услышаша царие аморрейстии, иже бяху об ону страну иордана, и царие финичестии евр.: ханаани., иже бяху близъ моря, яко изсуши господь бог иордан реку пред сыны израилевыми, внегда преходити им, и истаяша мысли их, и ужасошася, и не бяше в них смышления ни единаго от лица сынов израилевых.
2 В сие же время рече господь иисусу: сотвори себе ножи каменны от камене остраго, и сед обрежи сыны израилевы второе.
3 И сотвори иисус себе ножи каменны остры и обреза сыны израилевы на месте нареченнемъ [холм обрезания].
4 И тако обреза иисус сыны израилевы: елицы тогда родишася на пути, и елицы тогда не обрезани быша от изшедших из египта, всех сихъ обреза иисус: вси людие изшедшии из египта мужеска полу, вси мужие ратнии измроша в пустыни на пути, внегда изыдоша из египта:
5 яко обрезани быша вси людие изшедшии, вси же людие, иже родишася в пустыни на пути, егда изыдоша из египта, не обрезани быша:
6 четыредесять бо и два лета хождаше израиль в пустыни мавдаритиде: сего ради не обрезани быша мнози от тех воинов изшедших изъ земли египетския, не послушавшии заповедий господних, имже и определи господь не видети земли, еюже клятся господь отцем их дати намъ землю кипящую медом и млеком:
7 вместо же сих постави сыны их, ихже обреза иисус, яко скончаныя плоти бяху им, яко родишася на пути не обрезани:
8 обрезавшеся же покой имяху тамо седяще в полце, дондеже исцелишася.
9 И рече господь иисусу: в днешний день отяхъ поношение египетско от вас. И нарече имя месту тому [галгала], даже до сего дне.
10 И ополчишася сынове израилевы в галгалехъ и сотвориша пасху в четвертыйнадесять день месяца от вечера на западе на поли иерихонстем,
11 и ядоша от пшеницы земли оноя опресноки и новая:
12 в той день преста манна, повнегда ядоша от пшеницы земли, и ктому не бысть сыном израилевымъ манны: но ядоша от плодов земли финическия евр.: ханаанския. в лето оное.
13 И бысть егда бяше иисус у иерихона, и воззрев очима своима, виде человека стояща пред ним, и мечь его обнажен въ руце его. И приступив иисус, рече ему: наш ли еси, или от сопостат нашихъ?
14 он же рече ему: аз архистратигъ силы господни, ныне приидох (семо). И иисусъ паде лицем своим на землю и поклонися ему, и рече: господи, что повелеваеши рабу твоему?
15 И рече архистратиг господень ко иисусу: иззуй сапог с ногу твоею: место бо, на немже ты стоиши, свято есть. И сотвори иисус тако.
16 иерихон же заключен и огражден бысть от лица сынов израилевых: и никтоже из него исхождаше, ниже вхождаше.

 

Глава 6.

1 И рече господь ко иисусу: се, аз предаю тебе в руце иерихон и царя его, и сущия въ нем, сильны крепостию:
2 и обходите град окрест вси мужие крепцыи единою (на день), тако сотворите шесть дний:
3 и седмь жерцы да возмут седмь труб рожаныхъ пред кивотом: и в седмый день обыдите градъ седмижды, и жерцы да вострубят в трубы рожаны:
4 и будет егда вострубите трубою рожаною, внегда услышати вам глас трубы, да воскликнутъ вси людие: и воскликнувшим им, падут сами стены града во основании своем, и внидутъ вси людие устремившеся кийждо прямо себе во град.
5 И вниде иисус сын навин к жерцем сыновъ израилевых и рече им глаголя: возмите кивотъ завета господня, и седмь жерцы да возмут седмь труб рожаных пред лицем кивота господня.
6 И рече им глаголя: повелите людем обыти и окружити град, и воини да предыдут вооружени пред кивотом господним.
7 И бысть егда рече иисус к людем, и седмь жерцы имуще седмь труб священных да предыдут такожде пред господем, и да вострубятъ доброгласно: и кивот завета господня вследъ по них да идет:
8 воини же да предыдут напреди, и жерцы трубяще в трубы, и последующии созади кивота завета господня бяху идуще и трубяще трубами.
9 Людем же заповеда иисус, глаголя: не вопите, ниже да слышит кто гласа вашего, ниже да изыдетъ из уст ваших слово до дне, в оньже повелю вам сам воскликнути, и тогда воскликните.
10 И обшед кивот завета божия окрест града (единою), абие иде в полк, и ста тамо.
11 Во вторый же день воста иисус заутра, и воздвигоша жерцы кивот завета господня.
12 И жерцы седмь носящии седмь труб предыдяху пред кивотом господним и трубиша трубами, и воини вооружени идяху, и прочии людие вследъ кивота завета господня идуще, и жерцы вострубиша трубами рожаными.
13 И обыдоша град в день вторый единою, и поидоша паки в полк: сице творяху шесть дний.
14 И бысть в седмый день, восташа в востание утреннее, и обыдоша град в той день седмижды.
15 И бысть во обхождении седмем вострубиша жерцы трубами, и рече иисус к сыном израилевым: воскликните, предаде бо господь вам град:
16 и будет град сей проклят, и вся, елика суть в нем, господу сил: токмо раав блудницу снабдите ю, и вся, елика суть в дому ея, яко сокры прелагатаи, ихже посылахом:
17 но вы соблюдитеся от клятвы, да не когда помысливше вы возмете от клятвы, и сотворите полк сыновъ израилевых клятву, и потребите ны:
18 злато же все и сребро, и медь и железо свято да будет господу: в сокровище господне да внесется.
19 И вострубиша жерцы трубами: егда же услышаша людие глас трубный, воскликнуша вси купно людие гласом великим и сильным: и падоша вся стены града окрест, и внидоша вси людие во град, кийждо противу себе, и прияша град.
20 И прокля и иисус, и елика быша во граде, от мужеска полу и до женска, от юноши и до старца, и от телца до овцы и до осляте, все под мечь.
21 И двоим юношам соглядавшим землю рече иисус: внидите в дом жены блудницы, и изведите ю оттуду, и вся, елика суть ея, якоже клястеся ей.
22 И внидоста два юноши соглядавшии град въ дом жены, и изведосте раав блудницу, и отца ея и матерь ея, и братию ея и все сродство ея, и вся елика быша ей, изведоста и постависта я вне полка израилева.
23 И град сожгоша огнем со всем, еже бе в нем, кроме злата и сребра, меди и железа, яже отдаша в дом господень внести господеви.
24 И раав блудницу и весь дом ея отеческий остави живы иисус, и обитати сотвори во израили даже до дне сего, понеже сокры прелагатаи, ихже посла иисус соглядати иерихона.
25 И прокля иисус в той день, глаголя: проклятъ человек пред господем, иже поставит и созиждетъ град сей иерихон: на первенце своем оснуетъ его, и на меншем своем поставит врата его. И сице сотвори азан, иже от вефиля: на авироне первенце своем основа и, и на меншем спасенемъ постави врата его.
26 И бяше господь со иисусом, и бе имя его по всей земли.

 

Глава 7.

1 И прегрешиша сынове израилевы прегрешениемъ великим, и взяша от клятвы: взя бо ахар сынъ хармии, сына замврии, сына зары, от племене иудина, от клятвы. И разгневася господь яростию на сыны израилевы.
2 И посла иисус мужы от иерихона в гай, иже есть противу вифавн на восток вефиля, и рече им, глаголя: шедше соглядайте землю. И идоша мужие и соглядаша гай.
3 И возвратишася ко иисусу и рекоша ему: да не идут вси людие, но яко две тысящи или три тысящи мужей да идут и да воюютъ гай: да не ведеши тамо всех людий, мало бо есть их (тамо).
4 И идоша от людий тамо, аки три тысящи мужей, и побегоша от лица мужей гайских:
5 и убиша от них мужие гайстии яко тридесять и шесть мужей, и отгнаша их от врат, дондеже сокрушиша их на стремнине: и ужасеся сердце людий, и бысть яко вода.
6 И растерза иисус ризы своя, и паде на земли на лице свое пред господем даже до вечера, самъ и старцы израилевы: и посыпаша персть на главы своя.
7 И рече иисус: молюся, господи господи, вскую преведе раб твой люди сия чрез иорданъ предати их аморреом на погубление? о, да быхом пребыли и вселилися у иордана:
8 господи, что реку? понеже отврати израиль выю свою пред враги своими:
9 и услышав хананей и вси живущии на земли обыдут нас и потребят нас от земли: и что сотвориши имени твоему великому?
10 И рече господь ко иисусу: востани, вскую ты пал еси на лице твое?
11 согрешиша людие и преступиша завет мой, егоже завещах к ним, и украдше от клятвы, скрыша в сосудех своих:
12 сего ради не могут сынове израилевы стати пред лицем врагов своих, но хребет обратятъ пред враги своими, яко клятвою сташася: не приложу ксему быти с вами, аще не измете клятвы от себе самих:
13 востав очисти люди и рцы: очиститеся на утро: яко сия глаголет господь бог израилев: клятва есть в вас, не возможете стати предъ враги вашими, дондеже измете от себе самихъ клятву:
14 и соберитеся вси заутра по племеном (вашимъ), и будет племя, еже покажет господь, да приведете по сонмом: и сонм, егоже покажет господь, да приведете по домом: и дом, егоже покажетъ господь, да приведете по мужем:
15 и иже обличится, да сожжется огнем, сам и вся елика суть его, яко преступи завет господень и сотвори беззаконие во израили.
16 И воста иисус заутра, и приведе людий по племеном: и обличися племя иудино.
17 И приведеся по сонмом, и обличися сонмъ зараин: и приведеся сонм зараин по мужем, и обличися дом замвриин.
18 И приведеся дом его по мужем, и обличися ахар сын хармиин сына замвриина, сына зараня, от племене иудина.
19 И рече иисус ахару: сыне мой, даждь славу днесь господу богу израилеву, и даждь ему исповедание, и исповеждь ми, что сотворил еси, и не утай от мене.
20 И отвеща ахар иисусу и рече: поистинне аз согреших пред господем богом израилевым: сице и сице сотворих:
21 видех в плене ризу красну и добру и двести дидрахм сребра, и сосуд един злат, пятьдесят дидрахм вес его: и помысливъ на ня взях: и се, сия сокровенна суть въ земли в кущи моей, и сребро сокровенно подъ ними.
22 И посла иисус послы, и идоша в кущу в полк: и сия бяху сокровенна в кущи его, и сребро под ними.
23 И изнесоша я из кущи, и принесоша ко иисусу и к старцем израилевым, и положиша я пред господем.
24 И взя иисус ахара сына зараня, и сребро и ризу и сосуд златый, и возведе его въ дебрь ахор, и сыны его и дщери его, и телцы его и ослята его и вся овцы его, и кущу его и вся имения его, и весь израиль по нем: и возведе я (со всемъ) во емек в дебрь ахор.
25 И рече иисус ахару: почто потребил еси насъ? да потребит тя господь, якоже и днесь. И побиша его камением весь израиль, и сожгоша вся огнем, и наметаша их камением,
26 и наметаша на нем громаду камения велику. И преста господь от ярости гнева своего. Сего ради прозвася имя месту тому [емек ахоръ] даже до дне сего.

 

Глава 8.

1 И рече господь ко иисусу: не бойся, ниже ужасайся: поими с собою вся мужы воинския, и воставъ взыди в гай: се, предах в руце твои царя гайска и землю его, и люди его и градъ его:
2 и да сотвориши гаю и царю его, якоже сотворил еси иерихону и царю его: и плен его и скоты его да плениши себе: устрой же себе подсаду граду за собою.
3 И воста иисус и вси мужие воинстии, да внидут в гай: и избра иисус тридесять тысящъ мужей воинских сильных крепостию и посла ихъ нощию,
4 и заповеда им, глаголя: вы скрыйтеся за градом: не далече будите от града зело, и будите вси готови:
5 аз же и вси людие иже со мною приступимъ ко граду: и будет егда изыдут живущии въ гаи в сретение нам, якоже и прежде, и побегнемъ от лица их:
6 и егда изыдут вслед нас, отторгнемъ их от града: и рекут: бежат сии от лица нашего, якоже и прежде:
7 вы же востанете от подсады, и пойдете во град, и предаст его господь бог наш в руце ваши:
8 и будет егда возмете град, запалите его огнем, по словеси сему сотворите: се, заповедаю вам.
9 И посла их иисус, и идоша в подсаду: и седоша между вефилем и между гаием, от моря гаиа.
10 И востав иисус заутра, согляда люди: и взыде сам и старцы израильтестии пред людьми в гай.
11 И вси людие воинстии с ним взыдоша, и идуще приидоша сопротив града от востоков: и подсады града от моря.
12 И ополчишася от севера гаиа, и (бысть) дебрь между ими и между гаием. И взя яко пять тысящ мужей, и положи их на подсаду между вефилем и гаием от запада гаиа.
13 И поставиша людие весь полк от севера града, а прочая его от моря града. И пойде иисус в нощь ону посреде дебри.
14 И бысть егда увиде царь гайский, потщася, и воста рано и изыде в сретение им прямо на брань, сам и вси людие его с ним во время, пред лицем подсады: онъ же не ведяше, яко подсада ему есть за градом (его).
15 И увиде, и отиде иисус и весь людъ от лица их, и побеже путем пустыни.
16 И укрепися весь люд гнати вследъ их, и погнаша вслед сынов израилевых, и отступиша от града.
17 (И) не остася никтоже в гаи и вефили, иже не погна вслед израиля: и оставиша град отверст, и гнаша вслед израиля.
18 И рече господь ко иисусу: простри руку твою с копием, еже в руце твоей, на град, зане в руку твою предах его: и подсады востанутъ вскоре от места своего. И простре иисусъ руку свою и с копием на град.
19 И подсады восташа скоро от места своего: и изыдоша, егда простре руку, и внидоша во град, и взяша его: и потщавшеся запалиша град огнем.
20 И озревшеся обитатели гайстии вспять себе, узреша дым восходящь от града до небесе, и ктому не имеша камо побегнути, семо или овамо: людие же бегущии в пустыню обратишася на гонящих.
21 иисус же и весь израиль увидеша, яко взяша подсады град, и яко восходит дымъ градный до небесе: и обратившеся избиша мужей гайских.
22 И сии изыдоша из града противу им, и быша посреде полка израилева, сии отсюду и сии отонуду: и избиша их, дондеже не остася ни един от них цел, ни убежа.
23 И царя гайска яша жива, и приведоша его ко иисусу.
24 И бысть егда престаша сынове израилевы секуще всех сущих в гаи и сущих на поляхъ и на горе исхода, идеже гониша их, и падоша вси острием меча на ней до конца: и обратися иисус в гай и посече их мечем.
25 И быша вси падшии в той день от мужеска полу и до женска дванадесять тысящ, вси живущии в гаи.
26 иисус же не обрати руки своея, юже простре с копием, дондеже прокля всех обитающихъ в гаи.
27 Кроме скотов (ихъ) и имения, яже во граде онем, вся плениша себе сынове израилевы по повелению господню, якоже повеле господь иисусу.
28 И запали град иисус огнем: землю необитаему во век положи его даже до сего дне.
29 И царя гайска повеси на древе сугубем: и бяше на древе до вечера: и заходящу солнцу повеле иисус, и сняша тело его с древа, и повергоша е в ров пред враты града: и насыпа над ним громаду велику камения даже до сего дне.
30 Тогда созда иисус олтарь господу богу израилеву на горе гевал,
31 якоже заповеда моисей раб господень сыномъ израилевым, и якоже написася в законе моисеове, олтарь от камений всецелых, на нихже не возложися железо: и вознесе тамо всесожжения господу и жертву спасения.
32 И написа иисус на камениих вторый закон, закон моисеов, егоже написа пред сыны израилевыми.
33 И весь израиль, и старцы их и судии ихъ и книгочия их предходяху сюду и сюду предъ кивотом, и жерцы и левити воздвизаша кивотъ завета господня, пришелец же и туземец: иже быша половина их близ горы гаризин, и половина их близ горы гевал, якоже заповеда моисей раб господень благословити людий израилевых в первых.
34 И по сих тако прочте иисус вся словеса закона сего, благословения и клятвы, по всему написанному в законе моисеове.
35 Не бяше словесе от всех, яже заповеда моисей иисусу, егоже не прочте иисус во уши всего сонма сынов израилевых, мужемъ и женам, и детем и пришелцем приходящимъ ко израилю.

 

Глава 9.

1 егда же услышаша вси царие аморрейстии, иже об ону страну иордана, иже в горней и иже в равней, и иже во всем примории моря великаго и иже при антиливане, и хеттеи и аморреи, и гергесеи и хананеи, и ферезеи и евеи и иевусеи,
2 снидошася вкупе сещися со иисусом и со израилем единомысленно.
3 И живущии в холме в гаваоне слышаша вся, елика сотвори господь иерихону и гаю,
4 и сотвориша и сии с лукавством, и шедше уготоваша брашна и уготовашася: и вземше вретища ветха на ослы своя, и мехи вина ветхи и разседшияся завязаны:
5 и сапоги ветхи и заплачены на ногу их, и ризы обветшаны на них, и хлебы брашна их беша пресохли и сплеснели и сдроблени.
6 И приидоша ко иисусу в полк израилев в галгалы, и рекоша ко иисусу и всему израилю: от земли дальния приидохом, и ныне завещайте нам завет.
7 И рекоша сынове израилевы к хоррею: виждь, не посреде ли нас живеши, и како тебе завещаю заветъ?
8 И рекоша ко иисусу: раби есмы твои. И рече к ним иисус: откуду есте? и откуду приидосте?
9 И рекоша к нему: от дальния земли зело приидохом раби твои во имя господа бога твоего: слышахом бо имя его и вся, елика сотвори во египте,
10 и вся, елика сотвори двоим царем аморрейским, иже быша об ону страну иордана, сиону царю есевонску и огу царю васанску, иже живяше во астарофе и во едраине.
11 И слышавше рекоша к нам старцы наши и вси живущии на земли нашей, глаголюще: возмите себе брашно на путь и идите противу им, и рцыте к ним: раби есмы ваши, и ныне завещайте нам завет:
12 сии хлебы наши, теплыя на путь взяхомъ их от домов наших, в оньже день изыдохомъ приити к вам: ныне же пресхоша и быша содроблени:
13 и сии меси вина, ихже налияхом новы, и сии разседошася: и ризы наша сия и обувища наша обетшаша от долгаго пути зело.
14 И взяша князи брашно их, а господа не вопросиша.
15 И сотвори иисус с ними мир, и устави к ним завет, еже снабдети их: и кляшася им князи сонма.
16 И бысть по триех днех по завещании к нимъ завета, услышаша, яко близ их суть и яко посреде их живут.
17 И восташа сынове израилевы и внидоша во грады их в третий день: гради же их (бяху) гаваонъ и кефира, и вирот и град иарим.
18 И не сотвориша с ними рати (иисус и) сынове израилевы, яко кляшася им вси князи сонма господем богом израилевым. И ропташа весь сонмъ израилев на князей.
19 И рекоша вси князи всему сонму: мы кляхомся им господем богом израилевым, и ныне не возможемъ коснутися их:
20 сие сотворим им, еже живити их, и снабдим их, и не будет на нас гнева клятвы ради, еюже кляхомся им.
21 И рекоша им князи: да живут сии, и будутъ древосечцы и водоносцы всему сонму. И сотвори весь сонм, якоже рекоша им князи.
22 И созва их иисус и рече им, глаголя: почто прельстисте мя, глаголюще: далече есмы от тебе зело? вы же населницы есте от живущих в нас:
23 и ныне прокляти есте: и не оскудеетъ от вас раб, ниже древосечец, ниже водоносецъ мне и богу моему.
24 И отвещаша иисусу, глаголюще: понеже возвестися нам (рабом твоимъ), елика заповеда господь бог твой моисею рабу своему, дати вам землю сию и потребити нас и вся живущия на ней от лица вашего, сего ради убояхомся зело о душах наших от лица вашего, и сотворихомъ дело сие:
25 и ныне, се, мы подручни вам, якоже угодно есть вам, и якоже вам мнится, творите нам.
26 И сотвориша им сице: и избави я иисусъ в той день от руку сынов израилевых, и не убиша их.
27 И постави я иисус в той день древосечцы и водоносцы всему сонму и олтарю божию. Сего ради быша живущии в гаваоне древосечцы и водоносцы олтарю божию, даже до днешняго дне, и на месте еже аще изберет господь.

 

Глава 10.

1 егда же услыша адонивезек царь иерусалимский, яко взя иисус гай и потреби его, якоже сотвори иерихону и царю его, тако сотвори и гаю и царю его, и яко сами вдашася живущии в гаваоне ко иисусу и ко израилю, и быша в них,
2 и убояшася сами в себе зело: ведяху бо, яко град бяше велик гаваон, яко единъ от великих градов, и вси мужие иже в немъ крепцы.
3 И посла адонивезек царь иерусалимский къ еламу царю хевронску и фераану царю иеримуфску, и ко афию царю лахисску, и к давиру царю одолламску, глаголя:
4 приидите, взыдите ко мне и помозите ми, да повоюем гаваона: вдашася бо сами ко иисусу и к сыном израилевым.
5 И собрашася и взыдоша пять царей иевусейских: царь иерусалимский и царь хевронский, и царь иеримуфский и царь лахисский и царь одолламский, сами и вси людие их, и обседоша гаваона и воеваша на него.
6 И послаша живущии в гаваоне ко иисусу въ полк израилев в галгалы, глаголюще: не отрешай руки твоея от раб твоих: взыди к нам скоро и помози нам, и изми нас: яко собрани суть на ны вси царие аморрейстии, живущии въ горней.
7 И взыде иисус от галгал, сам и вси людие воинстии с ним, всяк сильный крепостию.
8 И рече господь ко иисусу: не убойся их, яко в руце твои предах я: не останетъ от них ни един пред вами.
9 И прииде на них иисус внезапу: всю бо нощь иде от галгал.
10 И ужаси я господь от лица сынов израилевых: и сокруши я господь сокрушением великим в гаваоне: и погнаша я путем восхода вифоронска, и сечаху их даже до азика и до макида.
11 Внегда же бежати им от лица сынов израилевыхъ до восхода вифоронска, и господь верже на ня камение великое града с небесе даже до азика, и бысть множае умерших от града каменна, неже убиенныхъ от сынов израилевых мечем на брани.
12 Тогда глагола иисус ко господу, в оньже день предаде господь бог аморреа под руку израилеву, егда сокруши их в гаваоне, и сокрушишася от лица израилева: и рече иисус: да станетъ солнце прямо гаваону, и луна прямо дебри елон.
13 И ста солнце и луна в стоянии, дондеже отмсти бог врагом их. Не сие ли есть писано в книгах праведнаго: и ста солнце посреде небесе и не идяше на запад в совершение дне единаго?
14 И не бысть день таковый ниже прежде, ниже последи, еже послушати богу тако гласа человеча, яко господь споборствова израилю.
15 И возвратися иисус и весь израиль с нимъ в полк в галгалы.
16 И убегоша пять царие сии и скрышася в пещере яже в макиде.
17 И поведаша иисусу, глаголюще: обретошася пять царие скрывшиися в пещере яже в макиде.
18 И рече иисус: привалите камение велие ко устию пещеры и приставите над ними мужы стрещи их:
19 вы же не стойте зде, гоняще вслед враговъ ваших, и постигните останок их, и не дадите внити им во грады их, предаде бо я господь бог наш в руце наши.
20 И бысть егда преста иисус и вси сынове израилевы секуще их сечением великим зело даже до конца, и уцелевшии от них внидоша во грады тверды.
21 И возвратишася вси людие в полк ко иисусу в макиду здрави, и не возскомле никтоже от сынов израилевых языком своим.
22 И рече иисус: отверзите устие пещеры и изведите ко мне пять царей сих из пещеры.
23 И сотвориша тако, и изведоша к нему пять царей из пещеры: царя иерусалимска и царя хевронска, и царя иеримуфска и царя лахисска и царя одолламска.
24 И егда изведоша их ко иисусу, и созва иисус всего израиля и началники воинския ходящия с ним, глаголя к ним: приступите и наступите ногами вашими на выи царей сих. И приступивше наступиша ногами своими на выи их.
25 И рече к ним иисус: не бойтеся их, ни ужасайтеся: мужайтеся и крепитеся, яко сице сотворит господь всем врагом вашим, ихже вы повоюете.
26 И уби я иисус, и повеси я на пяти древесех: и быша висяще на древах даже до вечера.
27 И бысть при захождении солнца, повеле иисус, и сняша я с древес, и ввергоша я в пещеру, в нюже вбегоша тамо: и завалиша камением великимъ пещеру до днешняго дне.
28 Взяша же и макиду в той день, и избиша ю острием меча и царя ея, и потребиша их и все дышущее еже бяше в ней: и не остася никтоже в ней цел и избегший. И сотвориша царю макидску, якоже сотвориша царю иерихонску.
29 И отиде иисус и весь израиль с ним от макиды в левну, и облеже левну.
30 И предаде ю господь в руце израилю: и взяша ю и царя ея, и избиша ю острием меча, и все дышущее в ней: и не остася в ней ни един цел и избегший. И сотвориша царю ея, якоже сотвориша царю иерихонску.
31 И отиде иисус и весь израиль с ним от левны в лахис, и облеже его, и воеваше нань.
32 И предаде господь лахис в руце израилевы: и взя его в день вторый, и избиша его острием меча (и все дышущее в немъ), и потребиша его, якоже сотвориша левне.
33 Тогда взыде орам царь газерск, помогаяй лахису: и порази его иисус острием меча, и люди его, дондеже не остася от них ни един цел и избегший.
34 И отиде иисус и весь израиль с ним от лахиса во аглон, и облеже и, и воева на него.
35 И предаде и господь в руце израилю: и взя и в той день, и изби и острием меча, и все дышущее в нем уби, и сотвори ему якоже и лахису.
36 И отиде иисус и весь израиль с ним въ хеврон, и обсяде и:
37 и взя его, и порази его остриемъ меча, и царя его, и вся веси его, и вся дышущая елика бяху в нем: не бе уцелевый: якоже сотвориша аглону, потребиша и и все дышущее, елика в нем бяху.
38 И обратися иисус и весь израиль с нимъ в давир: и обседше и,
39 взяша его и царя его и вся веси его, и поразиша и мечем, и потребиша и и все дышущее в нем, и не оставиша в немъ ни единаго уцелевша: якоже сотвориша хеврону и царю его, тако сотвориша давиру и царю его, и якоже сотвориша левне и царю ея.
40 И порази иисус всю землю горную и нагев, и равную и асидоф, и вся цари его: не оставиша в нем ни единаго уцелевша: и все дышущее потребиша, якоже заповеда господь бог израилю.
41 И изби их иисус от кадисъ-варни даже до газы, и всю землю госом даже до гаваона:
42 и вся цари сия и землю их взя иисусъ единою: яко господь бог израилев помогаше израилю.
43 И возвратися иисус и весь израиль с нимъ в полк в галгалы.

 

Глава 11.

1 егда же услыша иавин царь асорск, посла ко иоваву царю мадонску, и к царю семеронску и к царю ахиавску,
2 и к царем иже в сидоне велицем и в горней, и в араву прямо хенерефу, и на поляну, и в нафеддор,
3 и к приморским хананеам от восток, и къ приморским аморреом и хеттеом, и ферезеомъ и иевусеом, иже на горе, и евеом, и иже под аермоном, в землю массифа.
4 И изыдоша сии и царие их с ними, людие мнози, яко песок иже при краи моря множеством, и кони и колесницы многи зело.
5 И снидошася вси царие сии, и приидоша вкупе, и ополчишася при воде маррон воевати на израиля.
6 И рече господь ко иисусу: не убойся от лица их, яко заутра в сей час аз предамъ их язвенных пред сыны израилевы: конемъ их жилы пресечеши и колесницы их да сожжеши огнем.
7 И прииде иисус и вси людие воинстии съ ним на них к воде марронстей внезапу, и нападоша на ня в горней.
8 И предаде их господь под руце израилевы: и секуще их, прогнаша даже до сидона великаго и до масрефофъ-маима и до поль массифских къ востоком: и изсекоша их, дондеже не остася в них ни един цел и избегший.
9 И сотвори им иисус, якоже заповеда ему господь: конем их жилы пресече и колесницы их сожже огнем.
10 И обратися иисус в то время, и взя асор, и царя его уби мечем: асор бо бе прежде обладающий всеми царствы сими:
11 и изби все дышущее, еже в нем бысть, острием меча, и потребиша вся, и не остася в нем все дышущее: и асор запалиша огнем.
12 И вся грады царств сих и вся цари ихъ взя иисус и изби я мечем, и потреби их, якоже повеле им моисей раб господень.
13 Но вся грады крепки не запали израиль, точию асор един запали иисус.
14 И вся корысти их и вся скоты их плениша себе сынове израилевы: людий же всех потребиша мечем, дондеже погубиша их, и не оставиша от них ни единаго дышущаго.
15 якоже повеле господь моисею рабу своему, тако моисей заповеда иисусу: и тако сотвори иисус, не преступи ни единаго же от всех, яже заповеда господь моисею.
16 И взя иисус всю землю горную и всю землю нагев, и всю землю госомску, и равную, и яже на запад, и гору израилеву, и поля яже при горе,
17 от горы хелха, и яже восходит к сеиру, и даже до валгада, и поле ливана под горою аермон: и вся цари их взя и изби.
18 И многи дни сотвори иисус с цари сими брань:
19 и не бе ни единаго града, егоже не предаде господь сыном израилевым, кроме евеа обитающаго в гаваоне: всех взяша бранию:
20 яко господем бысть укрепитися их сердцу, сопротивитися на брани противу израиля, да потребятъ их, яко да не дастся им милость, но да потребятся, якоже глагола господь к моисею.
21 И прииде иисус в то время, и потреби (вся) енакимы от горныя, от хеврона и от давира и от анова, и от всея горы израилевы и от всея горы иудины, с грады их, и потреби я иисус:
22 не остася ни един енаким от сыновъ израилевых, но точию в газе и в гефе и во асидофе осташася.
23 И взя иисус всю землю, якоже заповеда господь моисею: и даде ю иисус в наследие израилю, разделением по племеном их. И преста земля воюема быти.

 

Глава 12.

1 И сии царие земли, ихже избиша сынове израилевы и наследиша землю их об ону страну иордана, от восток солнца, от дебри арнонския даже до горы аермон, и всю землю араву от восток:
2 сиона царя аморрейска, иже живяше во есевоне, обладаяй от ароира, иже есть в дебри арнонстей от страны дебри, и пол (земли) галаада даже до иавока, (идеже) пределы сынов аммоних:
3 и арава даже до моря хенереф на востоки, и даже до моря арава, моря солищнаго от восток, путем иже ко вифсимофу, и от фемана иже подъ асидофъ-фасгою:
4 и ог царь васанский остася от исполинов, иже обита во астарофе и во едраине,
5 обладаяй от горы аермон, и от селхи, и всею землею васан даже до предел гесури, и махафи, и пол галаада до предел сиона царя есевонска.
6 Моисей раб господень и сынове израилевы поразиша я: и даде ю моисей раб господень в наследие рувиму и гаду и полплемени манассиину.
7 И сии царие аморрейстии, яже изби иисусъ и сынове израилевы об ону страну иордана, при мори валгад на поли ливана, и даже до горы алок, восходящих в сиир: и даде ю иисусъ племеном израилевым в наследие по жребию их,
8 на горе и на поли, и во араве и во асидофе, и в пустыни и во нагеве, хеттеа и аморреа, и хананеа и ферезеа, и евеа и иевусеа:
9 царя иерихонска и царя гайска, иже есть близ вефиля,
10 царя иерусалимска, царя хевронска,
11 царя иеримуфска, царя лахисска,
12 царя еглонска, царя газерска,
13 царя давирска, царя гадерска,
14 царя ермафска, царя адерска,
15 царя левнска, царя одолламска,
16 царя макидска, царя вефилска,
17 царя апфуска, царя оферска,
18 царя афекска, царя хесаромска,
19 царя самвронска, царя фувска,
20 царя маронска, царя ахсафска,
21 царя фанахска, царя магдедонска,
22 царя кедесска, царя иеконама хермела,
23 царя адорска нафеддоря,
24 царя гоимска гелгеля, царя ферска. Вси сии царие тридесять един.

 

Глава 13.

1 иисус же состареся прошед дни. И рече господь ко иисусу: ты состарелся еси денми, и земля остася многа в наследие:
2 и сия земля оставшаяся: пределы филистимли, гесури и хананей,
3 от необитаемыя, яже от лица египта даже до предел аккаронских ошуюю хананеов, причисляется пятим областем филистимским: газеу и азотию, и аскалониту и гетфею, и аккарониту и евею:
4 от феман и всей земли ханаанстей прямо газе, и сидонии даже до афека, даже до пределъ аморрейских:
5 и всю землю гавли филистимлю, и весь ливанъ от восток солнца, от галгал под горою аермонъ даже до входа емаф:
6 всяк обитающий в горней от ливана даже до масрефофмаима, всех сидонян аз потреблю от лица израилева: но раздай ю во жребий израилю, якоже заповедах тебе:
7 и ныне раздели землю сию в наследие девяти племеном и полплемени манассиину от иордана даже до моря великаго, к западу солнца даси ю: море великое предел будет.
8 Дву же племеном и полуплемени манассиину, рувиму и гаду, даде моисей об ону страну иордана: к востоком солнца даде им моисей раб господень,
9 от ароира, иже есть на устии водотечи арнони, и град иже посреде дебри, и весь мисор от медавана:
10 вся грады сиона царя аморрейска, иже царствова во есевоне, даже до предел сынов аммоних:
11 и галаад, и пределы гесури, и махафи, всю гору аермон, и всю васанитску до елхи:
12 все царство огово в васанитиде, иже царствова во астарофе и во едраине: сей остася (единъ) от исполинов, и уби его моисей, и потреби.
13 И не потребиша сынове израилевы гесура и махафа и хананеа: и живяше царь гесури и махафи в сынех израилевых даже до сего дне.
14 Токмо племени левиину не дадеся наследие: господь бог израилев, сам наследие их, якоже рече им господь. И сие разделение, еже раздели моисей сыном израилевым (по племеном ихъ) во аравофе моавли об ону страну иордана противу иерихона.
15 И даде моисей племени сынов рувимлих по сонмом их:
16 и быша им пределы от ароира, иже есть прямо дебри арнонския, и град, иже есть в дебри арнонстей,
17 и всю землю мисорску даже до есевона, и вся грады иже суть в мисоре, и девор, и вамофъ-ваал, и домы веелмони,
18 и иасса и кедимофа и мифааф,
19 и кариафем и севама, и сарф и сиор на горе енак,
20 и веффогор и асидофъ-фасга и вифсимуф,
21 и вся грады мисорски, и все царство сиона царя аморрейска, егоже уби моисей самаго, и старейшины мадиамли, и евиа и рокома, и сура и ура и ровека, князи сиорския, и живущих на земли (той):
22 и валаама сына веорова волхва убиша мечемъ сынове израилевы в сражении.
23 Быша же пределы рувимли, иордан предел. Сие наследие сынов рувимлих по сонмом их, грады их и села их.
24 Даде же моисей сыном гадовым по сонмомъ их,
25 и быша им пределы иазир: вси гради галаади и полземли сынов аммоних до ароира, иже есть пред лицем раввафа:
26 и от есевона до рамофа к масфе, и вотаниму, и манаиму до предел давировых,
27 и во емеке вифарам и вифнамра, и сохофъ и сафон, и прочее царство сиона царя есевонска: и иордан определяет даже до страны моря хенереф, об ону страну иордана от восток.
28 Сие наследие сынов гадовых по сонмом ихъ и по градом их и селам их.
29 И даде моисей полуплемени манассиину по сонмомъ их,
30 и быша пределы их от манаима, и все царство васанско, и все царство ога царя васанска, и вся веси иаира, яже суть в васанитиде, шестьдесят градов:
31 и пол галаада, и во астарофе, и во едраине, грады царства огова в васанитиде: и дашася сыном махировым, сыном манассииным, и половине сынов махировых по сонмом их.
32 Сии суть, имже даде наследие моисей объ ону страну иордана во аравофе моавли, прямо иерихона на востоки.
33 Племени же левиину не даде моисей наследия: понеже сам господь бог израилев наследие его есть, якоже глагола им.

 

Глава 14.

1 И сии наследовавшии от сынов израилевых в земли ханаанстей, имже разделиша ю в наследие елеазар жрец и иисус сын навин и князи отечеств племен сынов израилевых:
2 по жребием наследиша, якоже заповеда господь моисеом дати девяти племеном и полплемени (манассиину),
3 даде бо моисей наследие дву племеном и полплемени манассиину об ону страну иордана: левитом же не даде жребия в них:
4 занеже быша сынове иосифовы два племена, манассиино и ефремле: и не дадеся части въ земли левитом, но токмо грады обитати, и предградия скотом их, и скоты их.
5 якоже заповеда господь моисею, тако сотвориша сынове израилевы и разделиша землю.
6 И приидоша сынове иудины ко иисусу в галгалы. И рече к нему халев иефонниин кенезей: ты веси слово, еже глагола господь к моисею человеку божию о мне и о тебе в кадисъ-варни:
7 четыредесяти бо лет бех, егда посла мя моисей раб господень от кадисъ-варни соглядати землю: и отвещах ему слово по сердцу его:
8 братия моя ходившии со мною превратиша сердце людий, аз же приложихся последовати господеви богу моему:
9 и клятся моисей в той день, глаголя: земля, на нюже возшел еси, тебе будет в жребий и чадом твоим во век, яко приложился еси последовати господу богу моему:
10 и ныне препита мя господь, якоже рече, сие четыредесять и пятое лето, отнележе глагола господь слово сие к моисею, и хождаше израиль в пустыни: и ныне се, ми днесь осмьдесят и пять лет:
11 еще есмь днесь могий, якоже егда посла мя моисей: тако и ныне могу входити и исходити на брань:
12 и ныне прошу у тебе горы сея, якоже рече господь в день он, яко ты слышал еси слово сие в день оный: ныне же енакими тамо суть, грады тверды и велицы: аще убо будет господь со мною, потреблю их, якоже рече ми господь.
13 И благослови его иисус, и даде хевронъ халеву сыну иефонниину, сыну кенезеину в жребий.
14 Сего ради бысть хеврон халеву иефонниину кенезеину в жребий даже до дне сего: понеже возследова повелению господа бога израилева.
15 Имя же хеврону прежде бяше град аргов: митрополь енакимлян сей. И почи земля от брани.

 

Глава 15.

1 И быша пределы сынов иудиных по сонмом их, от предел идумейских, от пустыни син къ ливу даже до кадис к югу:
2 и быша пределы их от полудне до части моря сланаго, от верха клонящагося к югу,
3 и проходят прямо восхождению акраввим, и обходят сена, и восходят от юга до кадисъ-варни: и исходят из есрона, и восходят во аддару, и исходят на запады кадис, обходят аккарки,
4 и исходят во асемону, и преходят даже до дебри египетския: и будет исход пределовъ его к морю. Сии суть пределы их от юга.
5 И пределы от восток, все море сланое даже до части иордана, и пределы их к северу, и от верха моря, и от части иордански:
6 восходят пределы (тии) в вифаглу и преходятъ от севера к вефару, и восходят пределы къ камени веора сына рувимля,
7 и восходят пределы к девиру дебри ахоровы, и низходят до галгалы, яже есть прямо схождению адоммин, иже есть к югу дебри, и восходитъ предел к воде источника солнечна, и будетъ исход его источник рогиль:
8 и восходят пределы в дебрь енном, созади иевуса от полудне, сей есть иерусалим: и исходят пределы на верх горы, яже есть пред лицем дебри енном к морю, яже есть от части земли рафаин к северу:
9 и преходит предел от верха горы ко источнику воды наффо и преходит к горе ефрони, и изведет предел в ваал, сей есть градъ иарим:
10 и обыдет предел от ваала к морю и прейдетъ в гору сиир, и прейдет созади града иарима от севера, сей есть хасалон: и снидетъ ко граду солнечну и прейдет к югу:
11 и преходит предел созади аккарона до севера, и преходят пределы в сакхарон, и прейдутъ гору земли валаани, и преходят ко иавнилу, и будет исход пределов к морю, и пределы их от моря, море великое определит.
12 Сии пределы сынов иудиных окрест по сонмом их.
13 И даде (иисусъ) халеву сыну иефонниину часть посреде сынов иудиных повелением божиим, и даде ему иисус град арвок, отца енакова: сей есть хеврон.
14 И потреби оттуду халев сын иефонниинъ три сыны енаковы, сусиа и фолмаи и ахима:
15 и взыде оттуду халев на живущих в давире: имя же прежде бяше давиру [град писменъ].
16 И рече халев: иже аще возмет кто градъ писмен и возобладает им, дам ему асхань дщерь мою в жену.
17 И взя его гофониил сын кенеза, брата халевова, юнейший: и даде ему асхань дщерь свою в жену.
18 И бысть внегда отходити ей, и совеща с ним, глаголющи: попрошу у отца моего села. И воззва со осляти. И рече ей халев: что ти есть?
19 И рече ему: даждь ми благословение, яко в землю полуденную отдал еси мя: даждь ми голафъ-маим. И даде ей халев голафъ-маимъ вышний и голаф нижний.
20 Сие наследие племене сынов иудиных по сонмом их:
21 быша же гради их гради племене сынов иудиныхъ к пределом едомлим в пустыни, кавсеилъ и едраим и иагур,
22 и кина и димона и адада,
23 и кедес и асор и ифнаксиф,
24 и телем и валоф,
25 и асор новый и град асером (сей есть асоръ):
26 амам и самаа и модада,
27 и асергадда и веффалеф,
28 и асарсула и вирсавее (*и села их и предградия ихъ):
29 и ваала и авим и асем,
30 и елфолад и хесил и ерма,
31 и сикелег и ведевина и сансанна,
32 и лавоф и селеим, и аин и реммон: всех градов двадесять и девять, и села их.
33 В напольней, есфаол и сараа, и асна (*и раменъ),
34 и зано и ингоним, и фаффуа и инаим,
35 и иеримуф и одоллам, (*и немра) и сохо и азика,
36 и сагарим и адиафаим, и гадира и села ея: гради четыренадесять и веси их.
37 Сеннам и адаса и магдалгад,
38 и далаан и масфа и иекфаил,
39 и лахис и васхаф и еглом,
40 и хаввон и ламас и хафлос,
41 и гадироф и вифъ-дагон, и нома и макида: гради шестьнадесять и веси их.
42 Левна и афер и асан,
43 и иеффа и асенна и несив,
44 и кеила и ахзев, и мариса (*и едомъ): гради девять и веси их.
45 Аккарон и села его и предградия его.
46 (*И) от аккарона, иемне и вси елики суть близ асдофа, и веси их:
47 асдоф и веси его и предградия его: газа и веси ея и предградия ея, даже до водотечи египетския, и море великое определяет.
48 И в горней, сафир и иефер и сохо,
49 и ренна, град писмен (*сей есть давиръ),
50 и анов и есфемо и аним,
51 и госом и хилуон и гилон: градов единонадесять и веси их.
52 ерев и есан и рума,
53 и ианум и вефъ-фапфуе и афака,
54 и хаммата и град арво (*сей есть хевронъ) и сиор: градов девять и села их.
55 Маон и хермел, и зиф и иетта,
56 и иездраель и иекдаам и зано,
57 аким и гаваа и фамна: гради десять и веси их.
58 Алул и вефсур и гедор,
59 и мароф и вефанон и елфекен: гради шесть и веси их: феко и ефрафа (*сей есть вифлеемъ): и фагор и етам, и кулонъ и татами, и сорис и карем, и галлим и вефиръ и манохо: градов единонадесять и веси их.
60 Кариафъ-ваал (*сей град иаримъ) и аревва: гради два, и села их и предградия их.
61 Ваддаргис и вифарава, (*и) мадон и сохоха,
62 и невсан и град соли и ингадди: гради шесть и веси их.
63 И иевусей обиташе во иерусалиме, и не возмогоша сынове иудины погубити их: и обиташа иевусее с сынми иудиными во иерусалиме даже до дне онаго.

 

Глава 16.

1 И быша пределы сынов иосифовых от иордана иже ко иерихону от восток, и восходят от иерихона в горную пустыню в вефиль,
2 и исходят от вефиля в лузу, и преходятъ к пределом ахиатарофа:
3 и прейдут к морю к пределом иефалтимским, даже до предел вефорона нижняго и даже до газера, и будет исход их к морю.
4 И наследствоваша сынове иосифовы ефремъ и манассий,
5 и быша пределы сынов ефремлих по сонмомъ их: и быша пределы наследия их от востокъ атароф и адар, даже до вефорона вышняго и газары,
6 и преходят пределы к морю в махфоф от севера, и идут на восток во финафъ-силом, и прейдут от восток во ианоха,
7 и от ианоха снидут во атароф и в наарафа и веси их: и приходят ко иерихону и исходятъ ко иордану,
8 и от тапфу пойдут пределы к морю к водотечи кана, и будет исход его к морю. Сие наследие племене сынов ефремлих по сонмом их.
9 И грады отлученныя сыном ефремлимъ посреде наследия сынов манассииных, вси гради и веси их.
10 И не погуби ефрем хананеа живущаго въ газере: и обиташа хананее посреде ефрема, дающе ему дани до днешняго дне, дондеже взыде фараон царь египетский, и взя град, и запали его огнем: и хананеев и ферезеевъ и живущих в газере избодоша: и даде его фараон в вено дщери своей.

 

Глава 17.

1 И быша пределы племене сынов манассииных, яко сей первенец иосифу, махирови первенцу манассиину, отцу галаадову, (сей бо бысть мужъ храбръ) в галаадитиде и васанитиде.
2 И быша сыном манассииным прочим по сонмомъ их: сыном ахиезеровым и сыном елековымъ и сыном есриилевым, и сыном сехемовымъ и сыном семираеловым и сыном оферовым: сии суть сынове манассиины, сына иосифова, мужескъ пол по племеном своим.
3 И салпааду сыну оферову, сына галаадова, сына махирова, сына манассиина, не быша сыны, но токмо дщери: и сия имена дщерем салпаадовым: маала и нуа, и егла и мелха и ферса.
4 И сташа пред елеазаром жерцем и предъ иисусом сыном навиным и пред князи, глаголющя: бог заповеда рукою моисеовою дати нам наследие посреде братии нашея. И дадеся им наследие повелением господним, жребий в братии отца их.
5 И паде жребий манассию поле лавеково кроме земли галаадовы и васани, яже есть объ ону страну иордана,
6 понеже дщери сынов манассииных наследиша жребий посреде братий своих: земля же галаадова бысть сыном манассииным прочим.
7 И быша пределы сынов манассииных от асиръ-махфофа, и данаф, яже есть пред лицем сихема, и идут пределы на иамин и на иасиф ко источнику фаффоф.
8 Манассию будет земля фаффоф: и фаффоф надъ пределы манассииными сыном ефремлим:
9 и снидут пределы к дебри кана на юг по дебри иарим: теревинф ефрему посреде града манассиина. И пределы манассиины к северу на водотечь, и будет исход его море:
10 от юга ефрему, и к северу манассии, и будет море предел им: и ко асиру совокупятся к северу, и иссахару от восток.
11 И будет манассию (пределъ) между иссахаромъ и между асиром вефсан и веси их, и иевлаамъ и веси его, и живущия в доре и веси его, и живущия в ендоре и веси его, и живущия в магедде и веси его, и живущия в танахе и веси его, и третия часть нафефа и веси его.
12 И не возмогоша сынове манассиины потребити градов сих: и нача хананей жити в земли сей.
13 И бысть егда укрепишася сынове израилевы, и сотвориша хананеов послушных, потреблениемъ же не потребиша их.
14 Противореша же сынове иосифовы иисусу, глаголюще: почто наследствовал еси нас жребием единымъ и ужем единымъ? аз же люд мног есмь, и благослови мя бог (даже доселе).
15 И рече им иисус: аще люд мног еси, взыди в дубраву и отреби себе тамо место в земли ферезеа и рафаима, аще утесняетъ тя гора ефремля.
16 И реша сынове иосифовы: не доволно намъ горы ефремли: и конь преизбранный и железо всему хананею живущему в земли емек, в вефсане и в весех ея, и во юдоле иезраель.
17 И рече иисус к сыном иосифовым, ефрему и манассию, глаголя: аще люд мног еси и силу велику имаши, не будет ти жребий един:
18 зане дубрава будет тебе, понеже дубрава есть, и отребиши ю, и будет тебе, и концы ея, егда потребиши хананеа, аще конь преизбранный ему есть: (и сам силен,) ты бо пресилиши его.

 

Глава 18.

1 И собрася весь сонм сынов израилевых в силом, и водрузиша тамо скинию свидения: и земля одержася от них.
2 И осташася сынове израилевы, иже не наследиша наследия своего седмь племен.
3 И рече иисус сыном израилевым: доколе вы разслабляетеся внити наследити землю, юже даде вам господь бог отец вашихъ?
4 дайте от вас по три мужы от племене, и послю их, и воставше да пройдут землю и да опишут ю предо мною, якоже есть лепо разделити ю. И приидоша к нему.
5 И раздели им на седмь частей: иуда да поставит предел своим от лива, и сынове иосифли да поставят предел своим от севера:
6 вы же разделите землю на седмь частей, и принесите ко мне семо, и изнесу вам жребий пред господем богом вашим:
7 несть бо части у вас сыном левииным, зане жречество господне часть их: гад же и рувимъ и полплемене манассиина взяша наследие свое об ону страну иордана на востоки, еже даде им моисей раб господень.
8 И воставше мужие поидоша. И заповеда иисусъ мужем идущим описати землю, глаголя: идите и обыдите землю, и опишите ю, и приидите ко мне, и изнесу вам зде жребий пред господемъ в силоме.
9 И идоша мужие, и обыдоша землю и соглядаша ю, и описаша ю по градом ея на седмь частей в книгу, и принесоша ко иисусу в полкъ в силом.
10 И верже им иисус жребий пред господемъ в силоме: и раздели тамо землю иисус сыномъ израилевым по разделению их.
11 И изыде жребий племене сынов вениаминовыхъ первый по сонмом их: и изыдоша пределы жребия их посреде сынов иудиных и посреде сыновъ иосифовых.
12 И быша пределы их от севера: от иордана взыдут пределы созади иерихона к северу и взыдут к горе к морю, и будет исход его мавдарит вефавн:
13 и пройдут оттуду пределы лузы созади лузы от юга: сия есть вефиль: и снидут пределы сии от атарофъ-аддар на горную, яже есть к ливу вефорон нижний,
14 и прейдут пределы, и обыдут к стране зрящи к морю от ливы, от горы к лицу вефоронъ лива, и будет исход его в кариафъ-ваал: сей есть кариафиарим, град сынов иудиных. Сия есть часть яже к морю.
15 И часть яже к ливу от части кариафъ-ваал: и пройдут пределы морския в гаин, на источникъ воды наффоновы,
16 и снидут пределы на страну горы, яже есть пред лицем дубравы, сына енома, яже есть от части емек рафаин от севера, и снидут к геенному созади иевуса от юга, и снидут на источник рогиль,
17 и пройдут сквозе от севера, и пройдутъ на источник самеса, и пройдут на галилоф, иже есть прямо к восходу едомим: и снидутъ на камень ваан сынов рувимлих,
18 и пройдут созади вефаравы от севера, и снидут ко араве,
19 и снидут с аравы (*на) пределы созади вефагла от севера, и будет исход пределовъ на холм моря сланаго от севера в страну иорданову от ливы. Сии пределы суть от юга: и иорданъ определит ю от страны востока.
20 Сие наследие сынов вениаминовых, пределы его окрест по сонмом их.
21 И быша грады племене сынов вениаминовыхъ по сонмом их, иерихо и вифагла и амеккасис,
22 и вефарава и семрим и вифил,
23 и авим и афара, и афра (*и екаренъ),
24 и кафираммин и афни и гаваа: грады дванадесять и веси их:
25 гаваон и рама и вироф,
26 и масфа и хефира и амоса,
27 и рекем и иерфаил и фарала,
28 и силалеф и иевус (*сей есть иерусалимъ), и гавааф и град иарим: грады тринадесять и веси их. Сие наследие сынов вениаминовыхъ по сонмом их.

 

Глава 19.

1 И изыде вторый жребий симеону, племени сыновъ симеоновых по сонмом их, и бысть наследие их посреде жребия сынов иудиных.
2 И бысть жребий их вирсавее и савее и молада,
3 и асерсуал и вафул, и велвола и асом,
4 и елфулад и ерма,
5 и секелаг и вефаммаргасвоф, и асерсусимъ
6 и вефалваф, и села их: грады тринадесять и веси их.
7 Аин и реммоф, и еефер и асам, грады четыри и веси их:
8 и вся предградия, яже окрест градов сихъ даже до ваалферирраммоф, идущих во иамеф къ ливу. Сие наследие племен сынов симеоновыхъ по сонмом их.
9 от жребия иудина наследие племене сыновъ симеоновых, яко бысть часть сынов иудиныхъ болшая нежели их: и наследиша сынове симеоновы посреде жребия их.
10 И изыде жребий третий завулону по сонмомъ их: и будут пределы наследия их до сарида:
11 и восходят пределы их к морю и мариле, и дойдут к давасефу, и снидутся в дебрь, яже есть к лицу иекнама,
12 и обратятся от сарида противу от востоковъ самес на пределы хасалофъ-фавор, и пройдутъ к даврафу, и взыдут к иафаги:
13 и оттуду обыдут супротив на востоки въ гефаефер, во град касим, и пройдут на реммонамъ мафарим аннуа,
14 и обыдут пределы к северу на еннафоф, и будет исход их к гаю иеффаил,
15 и каттаф и наалол, и семрон и иадила и вифлеем: грады дванадесять и веси их.
16 Сие наследие племене сынов завулоновыхъ по сонмом их, грады их и веси их.
17 И иссахару изыде жребий четвертый, сыномъ иссахаровым по сродством их,
18 и быша пределы их иезраель и ахаселофъ и сунам,
19 и аферарим и сиан, (*и ренафъ) и анахареф,
20 и раввоф и кесион и аеме,
21 и рамаф и инганним, и инадда и веффасис:
22 и снидутся пределы к фавору и к сасимафу к морю, и вефсмас, и будет его исходъ предел иордан: грады шестьнадесять и веси их.
23 Сие наследие племене сынов иссахаровыхъ по сонмом их, грады и предградия их.
24 И изыде жребий пятый племене сынов асировыхъ по сонмом их,
25 и быша пределы их хелкаф и ооли, и ватне и ахсаф,
26 и елимелех и амад и масал: и приближатся к кармилу к морю, и сиору и лаванафу,
27 и обратятся от восток солнца в вифъ-дагон, и приближатся к завулону, и в гай иеффаилъ к северу, (*и внидут пределы асафа) в вифъ-аемек, и да идут по долине аниила, и пройдут въ хавол ошуюю,
28 и ахран и роов, и аммон и кана, даже до сидона великаго:
29 и возвратятся пределы в раму, и даже до града тверда тириан, и возвратятся пределы до сусы, и будет исход его море, и от ужа в ахзиф,
30 и амма и афек и раов: грады двадесять два и веси их.
31 Сие наследие племене сынов асировых по сонмом их, грады их и веси их.
32 И неффалиму изыде жребий шестый, сыномъ неффалимлим по сонмом их,
33 и быша пределы их меелеф и милон, и весенаним и арме, и накев и иавнил, даже до лаккун: и быша исходи их иордан:
34 и возвратятся пределы к морю в азанофъ-фавор, и пройдут оттуду во икок, и приткнутся къ завулону от юга, и асиру приближатся к морю, и ко иуде иордан от восток солнца.
35 И грады ограждени тириан, тир и амаф, и реккаф и хенероф,
36 и адами и рама и асор,
37 и кедес и едраи и источник асор,
38 и иарион и магдалиил, оран и вефанафъ и фасмус: грады девятьнадесят и веси их.
39 Сие наследие племене сынов неффалимлихъ по сродству их, грады и предградия их.
40 И дану и племени сынов дановых по сонмомъ их изыде жребий седмый,
41 и быша пределы их сараа и есфаолъ и грады самес,
42 и саламинь и еалон и иефла,
43 и елон и фамна и аккарон,
44 и елфеко и гавафон и ваафоф,
45 и иуф и ваниварак и гефреммон,
46 и от моря иераконска, и ираккон, пределъ близ иоппы, и изыде предел сынов дановыхъ от них.
47 И изыдоша сынове дановы и воеваша ласем, и взяша его и поразиша его остриемъ меча: и обиташа в нем, и нарекоша имя его ласендан, по имени дана отца своего. И аморрей остася жити во еломе и в саламине: и отяготе рука ефремля на них, и быша им данницы.
48 Сие наследие племене сынов дановых по сонмомъ их, грады их и веси их. И не истребиша сынове дановы аморреа озлобляющаго их на горе, и не даяху им аморрее исходити на юдоль, и утесниша от них предел части их.
49 И совершиша разделяти землю в пределехъ ея: и даша сынове израилевы жребий иисусу сыну навину повелением господним среде себе,
50 и даша ему град, егоже проси, фамнафъ-сараи, иже есть в горе ефраим: и созда град, и вселися в нем.
51 Сия разделения, яже разделиша елеазаръ жрец и иисус навин и князи отечествъ в племенех израилевых по жребиям в силоме пред господем, у дверий скинии свидения. И скончаша делити землю.

 

Глава 20.

1 И рече господь ко иисусу, глаголя:
2 рцы сыном израилевым, глаголя: дадите грады убежений, яже рекох к вам моисеом:
3 убежище убийце поразившему душу неволею: и будут вам грады убежище, и не умретъ убийца от ужика крове, дондеже предстанетъ пред сонмом на суд.
4 И (аще кто) убегнет во един от градов сих, и станет во вратех града, и исповесть во уши старцем града того словеса своя: и приимут его сонм к себе, и дадятъ ему место жити с ними:
5 и егда поженет ужик крове вследъ его, и не дадут убившаго в руце его: яко не ведый уби ближняго своего и не ненавидя той его от вчера и третияго дне:
6 и да вселится в той град, дондеже станетъ пред лицем сонма на суд, и дондеже умретъ жрец великий, иже будет в тыя дни: тогда да обратится убийца, и внидет во град свой и в дом свой, и во град, отнюдуже избеже.
7 И отделиша кедес в галилеи, в горе неффалимли, и сихем в горе ефремли, и град арво (*сей есть хевронъ) в горе иуде:
8 и об ону страну иордана ко иерихону на восток, даша восор в пустыни в поли от племене рувимля, и рамоф в галааде от племене гадова, и голан в васанитиде от племене манассиина:
9 сии грады избраны быша всем сыном израилевымъ и пришелцу прилежащему в них, еже убежати тамо всякому убивающему душу неволею, да не умрет от руку ужика крове, дондеже станетъ пред сонмом на суд.

 

Глава 21.

1 И приидоша старейшины отечеств сынов левииныхъ к елеазару жерцу и ко иисусу сыну навину и к старейшинам отечеств от племен сыновъ израилевых,
2 и реша к ним в силоме в земли ханаани, глаголюще: заповеда господь рукою моисеовою дати нам грады еже обитати, и окрестная ихъ предградия скотом нашим.
3 И даша сынове израилевы левитом от участий своих по повелению господню грады сия и окрестная предградия их.
4 И изыде жребий сонму каафову, и бысть сыномъ аароним жерцем левитом от племене иудина и от племене симеоня и от племене вениаминя по жребием грады тринадесять:
5 и сыном каафовым оставшимся от (сродства) племене ефремова и от племене данова и от полуплемене манассиина по жребию грады десять:
6 и сыном гирсоним от племене иссахарова и от племене асирова, и от племене неффалимля и от полуплемене манассиина (еже) в васане, по жребию грады тринадесять:
7 и сыном мерариным по сонмом их, от племене рувимля и от племене гадова и от племене завулоня, по жребию грады дванадесять.
8 И даша сынове израилевы левитом грады сия и окрестная их, якоже заповеда господь моисею, по жребию.
9 И даде племя сынов иудиных и племя сыновъ симеоновых и племя сынов вениаминовых грады сия: и нарекоша по имени.
10 И быша сыном аароновым от сонма каафова сынов левииных, яко сим бысть жребий первый.
11 И даде им кариафарвок, митрополь сыновъ енаковых (*сей есть хеврон в горе иудине), и окрестная их.
12 И села града (сего) и веси его даде иисус халеву сыну иефонниину во обдержание его.
13 И сыном аарона жерца даде град убежище убившему хеврон и отлученная яже къ нему:
14 и левну и отлученная яже к ней: и иефер и отлученная яже к нему: и есфемо и отлученная яже к нему:
15 и олон и отлученная яже к нему: и давир и отлученная яже к нему:
16 и аин и отлученная ему: и иетта и отлученная ему: и вефсамис и отлученная ему: грады девять от дву племен сих.
17 И от племене вениаминя гаваон и отлученная ему: и гавее и окрестная его:
18 и анафоф и окрестная его: и алмонъ и окрестная его: грады четыри.
19 Вси грады сынов аароновых жерцев, грады тринадесять и окрестная их.
20 И сонмом сынов каафовых левитом, оставльшимся от сынов каафовых, и бысть град пределовъ их от племене ефремова.
21 И даша им град убежище убившему сихем и окрестная его в горе ефремли: и газер и окрестная его:
22 и кавсаим и окрестная его: и вефоронъ и окрестная его: грады четыри.
23 И от племене данова елфеко и окрестная его: и гавефон и окрестная его:
24 и елон и окрестная его: и гефреммонъ и окрестная его: грады четыри.
25 И от полуплемене манассиина фаанах и окрестная его: и вефсам и окрестная его: града два.
26 Вси грады десять и окрестная их сонмомъ сынов каафовых оставльшимся.
27 И сыном гирсоним сродником левитским, от полуплемене манассиина, грады отлученныя убившим, голан в васанитиде и окрестная его: и веесфера и окрестная его: града два.
28 И от племене иссахарова кисион и окрестная его: и девраф и окрестная его:
29 и иермоф и окрестная его: и источникъ писмен и окрестная его: грады четыри.
30 И от племене асирова масаал и окрестная его: и авдон и окрестная его:
31 и фелкаф и окрестная его: и роовъ и окрестная его: грады четыри.
32 И от племене неффалимова град определенный убившему кедес в галилеи и окрестная его: и емафдор и окрестная его: и ноеммон и отлученная его: грады три.
33 Вси грады гирсоновы по сонмом их, грады тринадесять и отлученная их.
34 И сонму сынов мерариных левитом прочим, от племене сынов завулоних, иекнаам и окрестная его: и карфа и окрестная его:
35 и дамна и окрестная его: и наалолъ и окрестная его: грады четыри.
36 И об ону страну иордана ко иерихону от племене рувимова даде град убежище убившему восор в пустыни мисор и окрестная его: и иазир и окрестная его:
37 и гедсон и окрестная его: и масфа и окрестная его: грады четыри.
38 И от племене гадова град убежища убившему рамоф в галааде и окрестная его: и манаимъ и окрестная его:
39 и есевон и окрестная его: и иазиръ и окрестная его: грады четыри.
40 Вси грады сыном мерариным по сонмом их, оставльшихся от племене левиина, и быша пределы их грады дванадесять.
41 Вси грады левитстии посреде обдержания сыновъ израилевых четыредесять и осмь градов и окрестная их, окрест градов сих:
42 град и окрестная окрест града: тако всем градом сим. И соверши иисус разделивый землю в пределех ея: и даша сынове израилевы часть иисусу повелением господним: даша ему град, егоже проси: фамнасахар даша ему на горе ефремове. И созда иисус град, егоже проси, и вселися в нем. И взя иисусъ ножы каменныя, имиже обрезова сыны израилевы, родившияся на пути в пустыни, яко не обрезашася в пустыни, и положи я во фамнасахаре.
43 И даде господь израилю всю землю, юже клятся дати отцем их: и наследиша ю и вселишася в ней.
44 И упокои господь их окрест, якоже клятся отцем их: не воста никтоже противу им от всех врагов их: и вся враги ихъ предаде им господь в руки их.
45 Не оскуде слово (ни едино) от всехъ глагол благих, яже рече господь сыном израилевым: вся собышася.

 

Глава 22.

1 Тогда созва иисус сыны рувимли и сыны гадовы и полплемене манассиина, и рече им:
2 вы слышасте вся, елика заповеда вам моисей раб господень, и послушасте гласа моего, по всему елика заповедах вам:
3 не остависте братии вашея в сия дни и множайшия, даже до дне сего: сохранисте заповедь господа бога вашего:
4 ныне же упокои господь бог ваш братию вашу, якоже рече им: ныне убо возвратившеся отидите в домы ваша и в землю обдержания вашего, юже даде вам моисей раб господень объ ону страну иордана:
5 но сохраните зело творити заповеди и закон, егоже заповеда вам моисей раб господень, любити господа бога вашего и ходити во всех путехъ его, хранити заповеди его и прилежати ему и служити ему от всего сердца вашего и от всея души вашея.
6 И благословив их иисус отпусти их: и отидоша в домы своя.
7 И полу (племене) манассиину даде моисей (обдержание) в васане, и половине даде иисус с братиею их у иордана к морю. И егда отпусти их иисус в домы их, и благослови их:
8 и со имением многим отидоша в домы своя: и скоты многи зело, и сребро и злато, и медь и железо, и ризы многи зело, и разделиша плен врагов своих с братиею своею.
9 И возвратившеся отидоша сынове рувимли и сынове гадовы и полплемене манассиина от сыновъ израилевых, от силома земли ханаани, отити въ землю галаадску, в землю обдержания своего, юже наследиша по повелению господню рукою моисеовою.
10 И приидоша в галилоф иорданск, иже есть в земли ханаани: и создаша сынове рувимли и сынове гадовы и полплемене манассиина тамо олтарь у иордана, олтарь велик еже видети.
11 И услышаша сынове израилевы глаголющих: се, создаша сынове рувимли и сынове гадовы и полплемене манассиина олтарь у пределовъ земли ханаани, в галилофе у иордана объ ону страну сынов израилевых.
12 И услышаша сынове израилевы, и собрашася вси сынове израилевы в силон, еже возшедше воевати их.
13 И послаша сынове израилевы к сыном рувимлимъ и к сыном гадовым и к полуплемени манассиину в землю галаадску финееса сына елеазара, сына аарона жерца,
14 и десять князей с ним: князь един от дому отечества, от всех племен сынов израилевых: мужие князи домов отечеств их, иже суть тысященачалницы израилевы.
15 И приидоша к сыном рувимлим и к сыномъ гадовым и к полуплемени манассиину в землю галаадову, и реша к ним, глаголюще:
16 сия глаголет весь сонм господень: кое прегрешение сие, имже согрешисте пред господем богом израилевым, отвратитися днесь от господа бога израилева, создавше себе требище, еже отступником вам быти днесь от господа?
17 еда мал вам грех фогоров, яко не очистихомся от него даже до сего дне? и бысть язва в сонме господни:
18 и вы отвратистеся днесь от господа: и будетъ егда отступите днесь от господа, и заутра на всем израили будет гнев господень:
19 и ныне аще мала вам земля обдержания вашего, прейдите вы в землю обдержания господня, идеже пребывает скиния господня, и наследите среде нас, и не будите отступницы от господа, и от нас не отступите, за еже создати вамъ требище кроме олтаря господа бога нашего:
20 не се ли ахар сын заранов прегрешениемъ прегреши от проклятия, и бысть на весь сонмъ израилев гневъ? аще и един бяше, но не единъ умре грехом своим.
21 И отвещаша сынове рувимли и сынове гадовы и полплемене манассиина, и реша тысященачалникомъ израилевым, глаголюще:
22 бог бог, господь есть, и бог бог господь самъ весть, и израиль сам познает, аще во отступлении прегрешихом пред господем, да не избавит насъ во днешний день:
23 и аще создахом себе требище, еже отступити нам от господа бога нашего, или вознести намъ нань жертву всесожжений, или еже сотворити на нем жертву спасения, сам господь взыщет:
24 но ради благоговения глагола сотворихом сие, глаголюще: да не рекут заутра чада ваша чадомъ нашим, глаголюще: что вам и господеви богу израилеву?
25 и пределы постави господь между вами и нами, сынове рувимли и сынове гадовы, иордан, и несть вам части господни: и отчуждят сынове ваши сынов наших, яко да не служат господу:
26 и рекохом сотворити сице, еже создати требище сие, не приношений ради, ниже жертвъ ради,
27 но да будет свидетелство сие между вами и нами и между роды нашими по нас, еже служити службу господеви пред ним в приношениихъ наших и в жертвах наших и в жертвах спасений наших: и да не рекут чада ваша заутра чадомъ нашим: несть вам части господни.
28 И рекохом: аще будет когда, и возглаголютъ к нам или к родом нашим заутра и рекут: зрите подобие жертвенника господня, егоже сотвориша отцы наши, не приношения ради, ниже жертвъ ради, но свидетелство есть между нами и между вами и между сыны нашими:
29 да не будет убо нам отступити от господа, еже отвратитися во днешний день от господа, еже сотворити нам жертвенник приношениемъ и жертвам саламин мирнымъ и жертве спасения, кроме олтаря господа бога нашего, иже есть пред скиниею его.
30 И услышавше финеес жрец и вси князи сонма, и тысященачалницы израилевы, иже быша с ним, словеса сия, яже глаголаша сынове рувимли и сынове гадовы и полплемене манассиина, и угодно им бысть сие.
31 И рече финеес жрец сыном рувимлим и сыном гадовым и полуплемени манассиину: днесь познахом, яко с нами есть господь, иже не погрешисте пред господем прегрешения, но днесь избависте сыны израилевы от руки господни.
32 И возвратися финеес жрец и князи отечествъ от сынов рувимлих и от сынов гадовых и от полуплемене манассиина от земли галаадовы в землю ханааню к сыном израилевым: и отвещаша им словеса сия.
33 И угодно бысть слово сие сыном израилевым, и благословиша бога сынове израилевы и рекоша: ктому да не изыдем к ним на брань потребити землю сынов рувимлих и сынов гадовых и полуплемене манассиина. И вселишася на ней.
34 И нарече иисус требище сынов рувимлихъ и сынов гадовых и полуплемене манассиина и рече: яко свидение есть между ими, яко господь бог бог их есть.

 

Глава 23.

1 И бысть по днех мнозех, егда упокои господь бог израиля от всех врагов его иже окрест, и иисус состареся прошед дни.
2 И созва иисус вся сыны израилевы и старейшины их, и князи их и судии их и книгочия их, и рече к ним: аз состарехся и проидохъ дни:
3 вы же видесте вся, елика сотвори господь бог ваш всем языком сим от лица вашего, зане господь бог наш споборствовавый нам:
4 видите, яко низвергох вам языки оставшияся вам сия во жребиих племеном вашим, от иордана вся языки потребих, и от моря великаго, еже определит на запад солнца:
5 господь же бог ваш сам потребит их от лица вашего, дондеже погибнут, и послет на ня звери дивия, дондеже потребит их и цари их от лица вашего, и наследите землю их, якоже глагола вам господь бог ваш:
6 укрепитеся убо зело хранити и творити вся написанная в книгах закона моисеова, да не уклонитеся от него на десно или на лево:
7 яко да не внидете во языки оставшияся сия, и имена богов их да не возыменуются в вас, ниже да кленетеся ими, ниже да послужите им, ниже поклонитеся им:
8 но токмо господу богу вашему прилепитеся, якоже твористе до сего дне:
9 и потреби господь от лица вашего языки велики и сильны, и никто противоста вам до сего дне:
10 един от вас прогна тысящи, яко господь бог ваш споборствоваше вам, якоже глагола вам:
11 и сохраните зело любити господа бога вашего:
12 аще бо отвратитеся и приложитеся ко оставшимся языком сим, иже с вами, и браки сотворите с ними, и смеситеся с ними, и они с вами,
13 ведением уведите, яко не приложитъ господь потребити языки сия от лица вашего: и будут вам в сети и в соблазны, и в гвоздия в пятах ваших и в стрелы во очесех ваших, дондеже погибнете от земли благия сея, юже даде вам господь бог ваш:
14 аз же днесь отхожду в путь, якоже и вси иже на земли: и познаете всем сердцемъ вашим и душею вашею, яко ни едино слово отпаде от всех словес благих, яже рече господь бог ваш к вам: вся приходят вам, и не разнствова от них ни едино слово:
15 и будет, имже образом приходят на васъ вся словеса добрая, яже глагола господь бог к вам, тако наведет господь на вы вся словеса злая, дондеже потребит вы от земли благия сея, юже даде вам господь бог ваш:
16 внегда преступите завет господа бога вашего, егоже заповеда вам, и шедше послужите богомъ иным и поклонитеся им: и разгневается яростию господь на вы, и погибнете скоро от земли благия, юже даде господь вам.

 

Глава 24.

1 И собра иисус вся племена израилева в сихем, и созва старейшины израилевы и князи их, и судии их и книгочия их, и сташа предъ господем богом.
2 И рече иисус ко всем людем, глаголя: сия глаголет господь бог израилев: об ону страну реки жиша отцы ваши исперва, фара отецъ авраамов и отец нахоров, и служиша богомъ иным:
3 и поях отца вашего авраама от об ону страну реки, и водих его во всей земли ханаанстей: и умножих семя его, и дахъ ему исаака:
4 исааку же дах иакова и исава, и дахъ исаву гору сиир наследие ему: иаков же и сынове его снидоша во египет, и быша тамо в язык велик и крепок и мног, и озлобиша их египтяне:
5 и послах моисеа и аарона, и поразих египта во знамениих, яже сотворих в них, и по семъ изведох вас,
6 и изведох отцы ваша из египта, и внидосте в море чермное: и погнаша египтяне вслед отец ваших на колесницах и на конех в море чермное:
7 и возопихом ко господу, и даде облак и мглу между нами и между егвптяны, и наведе на них море, и покры их: и видеша очеса ваша, елика сотвори господь в земли египетстей: и бысте в пустыни дни многи:
8 и приведе вас в землю аморреов живущихъ об ону страну иордана, и ополчишася на вы: и предаде я господь в руки ваша, и наследисте землю их, и потребисте их от лица вашего:
9 и воста валак сын сепфоров, царь моавль, и ополчися противу израиля, и послав призва валаама сына веорова кляти вас:
10 и не восхоте господь бог погубити тя, но благословениемъ благослови вас и избави вас от рук их:
11 и преидосте иордан и приидосте во иерихон, и бишася с вами живущии во иерихоне, аморрей и ферезей, и хананей и хеттей, и гергесей и евей и иевусей, и предаде их господь в руки ваша:
12 и посла пред вами шершни, и изгна от лица вашего два царя аморрейска, не оружиемъ твоим, ниже луком твоим,
13 и даде вам землю, о нейже не трудистеся на ней, и грады, ихже не создасте, и пожисте в них, и винограды и масличие, ихже не насадисте вы, ядосте:
14 и ныне убойтеся господа, и послужите ему в правде и правоте: и отвержите боги чуждыя, имже служиша отцы ваши об ону страну реки и во египте, и служите господеви:
15 аще же не угодно вам служити господеви, изберите сами себе днесь, кому послужите, или богом отец ваших, иже быша об ону страну реки, или богом аморрейским, въ нихже вы живете на земли их: аз же и домъ мой служити будем господеви, яко свят есть.
16 И отвещавше людие, реша: не буди намъ оставити господа, еже служити богом иным:
17 господь бо бог наш той бог есть, той изведе нас и отцы наши от земли египетския, от дому работы, иже сотвори пред очима нашима знамения велия, и сохрани нас во всем пути, по немуже идохом, и во всех языцех, ихже сквозе проидохом:
18 и изгна господь вся языки и аморреа живущаго на земли от лица нашего: но и мы послужим господеви, сей бо есть бог наш.
19 И рече иисус к людем: не возможете служити господеви богу, яко бог свят есть и ревнитель сей: не оставит грех ваших и беззаконий ваших:
20 егда оставите господа и послужите богомъ чуждим, и пришед озлобит вас и потребитъ вас, вместо еже благо сотвори вам.
21 И рекоша людие ко иисусу: ни, но господеви послужим.
22 И рече иисус к людем: свидетели вы сами на ся, яко вы избрасте служити господеви самому. И рекоша: свидетели мы.
23 И ныне отвержите боги чуждыя, иже суть в вас, и исправите сердца ваша ко господу богу израилеву.
24 И рекоша людие ко иисусу: господеви богу нашему послужим, и гласа его послушаем.
25 И завеща иисус завет к людем в день он, и даде им закон и суд в сихеме, пред скиниею господа бога израилева.
26 И вписа иисус словеса сия в книгу закона божия: и взя камень велий, и постави его под теревинфом, иже есть пред господем.
27 И рече иисус к людем: се, камень сей будет вам во свидение: яко сей слыша вся глаголанная от господа, елика глагола к вам днесь, и сей будет вам во свидение в последния дни, егда солжете господеви богу вашему.
28 И отпусти иисус люди, коегождо в места своя.
29 И послужи израиль господеви во вся дни иисусовы и во вся дни старцев, иже препроводиша время со иисусом и иже видеша вся дела господня, елика сотвори израилю.
30 И бысть по сих, и умре иисус сынъ навин раб господень, (поживъ) сто и десять лет.
31 И погребоша его в пределех жребия его во фамнасахаре, в горе ефремли, от севера горы гаасовы, и положиша тамо с ним во гробе, в немже погребоша его, ножы каменныя, имиже обреза сыны израилевы в галгалех (иисусъ), егда изведе их из египта, якоже повеле господь: и тамо суть даже до дне сего.
32 И кости иосифовы изнесоша сынове израилевы из египта и закопаша их в сихемех, в части села, еже притяжа иаков от аморрей живущих в сихемех стом агниц, и даде ю иосифу в часть.
33 И бысть по сих, и елеазар сын аароновъ архиерей скончася: и погребен бысть в гаваафе финееса сына своего, егоже даде ему въ горе ефремове.
34 В той день вземше сынове израилевы кивотъ божий, обношаху с собою: и финеес жречествова вместо елеазара отца своего, дондеже умре и погребеся в гаваафе своем.
35 Сынове же израилевы отидоша кийждо в место свое и в свой град.
36 И почитаху сынове израилевы астарту и астарофа и боги языков сущих окрест их. И предаде их господь в руки еглому царю моавлю, и облада ими лет осмьнадесять.

Вам понравилась молитва - оцените?

Есть молитвы, которые одинаково важны для всех верующих и для католического и православного христианина   Отче Наш  Радуйся Мария  Псалом 90  Молитва Символ Веры
Джерело Яндекс.Метрика Твоя Библия: Библия, ответы на вопросы, христианская библиотека. Каталог Христианских сайтов Каталог Православных сайтов Маранафа: Библия, словарь, каталог сайтов, форум, чат и многое другое. Рейтинг@Mail.ru